eSefarad Noticias del Mundo Sefaradi
Ver todos los artikolos de esta seksion
Saludes a todos
Edmond Cohen
Paris – Fransya
____________________________________________________________
2 Nissim Cohen
Pintado por Edmond Cohen a partir de una foto.
Sovre mi papu Nissim Cohen, nasido en Esstambol en 1871, i ke tuve muy poko tyempo para konoserlo , ya se un poko mas kozas. Aviya sido dyamantero, lo ke podriya, por yerro, dar a pensar ke era riko o a lo manko ke lo fue en una kualkyer epoka de su vida. El byervo dyamantero yeva pishin al dyamante, rey de las pyedras presyozas, koza de lukso i de ermozura; adjunta este byervo a Estambol, i te veo, amigo meldador, sonyando de la kaverna de Ali Baba… Yerro grande: la rikeza del ombre no tyene atadijo kon la natura de la koza ke vende. Algunos se enrikesyeron kon el guano, ke es solo medra, i otros lasdraron toda una vida de mizerya syendo bushkadores de oro en los rios. Mi papu nunka konosyo la rikeza, aparte sus tres ijos, i pudo permeter estudyos en un liseo a un solo de sus ijos, el bohor, mi padre Albert ; es sovre todo su sigundo ijo, Victor, ke, afillu si uvyera el tambyen kerido azer estudyos, se metyo al lavoro para pueder pagar los estudyos superyores de mi padre, lo ke konstituye un ermozo egzemplo de sakrifisyo fraternal. Los tres ermanos kedaron, kale dizirlo, muy unidos astal kavo de sus vidas.
Este papu era un oryental ke teniya por lingua maternala, komo lo dishe antes, el djudeo-espanyol, esta lingua partikolar a los djudyos del imperyo osmanli. Por lo tanto, avlava muy byen el fransez. Un diya ke su mediko le demando lo ke pensava de los kudyos de su mediko de antes, mi papu le respondyo (es mi tiyo Leon ke me lo konto) : « tomaré los versos de Corneille avlando de Richelieu : me izo demaziya byen para dizir mal de el, me izo demaziya mal para dizir byen de el ». No tan mal respondido, por un turko ke no izo estudyos…
Esto dicho, en la vida de kadal diya no sitava espesyalmente a Corneille, ama de el es ke me ambezi el kifur sapristi, ke no es tan negro ma byen fransez el tambyen.
Guadro, malorozamente, pokos rekodros de el, syendo ke fui separado de el desde 1942 por modo de la gerra. Teniya sinko anyos a lo mas. Mas no lo vide, porke se muryo de hazinura el anyo mas despues, kuando yo estava kon mis paryentes en el sud de Fransya.
El rekodro ke guadro de el es el de un vyejo de kiyafet dinyo, kon mustacho blanko komo sus kaveyos, vestido de una aba vedre, enklavado por la hazinura sovre su fotolyo. Sufriya del estomago i no puediya mas komer. Vyejo, dishe. En vedra, era en este tyempo mas mansevo ke yo oy. Ama su hazinura lo teniya muncho envejesido, i de toda manera en mi mirada de kriatura era un vyejo komo tengo de serlo oy en la de mis inyetizikos. Su kara serya solo se aklarava kuando me veiya, i era estonses todo sonriza i induljensya. Me plaziya asentarme a basho a sus pies, arrodeado de mis djugetes, i el me kontava istoryas ke me tresaliyan.
Me akodro la vez, deviya tener tres o kuatro anyos, kuando me ambezo kualo era la muerte : kijo dizir ke uno se keda echado los ojos serrados, sin menear ; lo ke ize pishin, para ver komo es kuando sos muerto. Ama mi papu me disho ke no era bastante : kaliya tambyen kedar de respirar ; lo ke dunke aprovi de azer durante un minuto, dos minutos…sin pueder dayanearme mas, me estava atabafando…tomi un grande suluk, i mi papu me deklaro ke en estas kondisones, yo no puediya ser konsiderado komo muerto. Entendi entonses ke era muy yuch de murir, sin andevinar ke para mi papu, iva ser muncho mas kolay uno o dos anyos mas tadre…
Kada alhad, este papu me dava un bilyete blu de diez frankos, lo ke en esta epoka no era nada, i yo pensava, kuando tendriya bastante para, ke mi madre me merkariya kon esta suma una panopliya de asker fransez, lo ke, por mis kuatro anyos, era mi suenyo esensyal en la vida ; en vez de esto, me merko un pyjama…i yorri muncho. Ke me saliya, a mi, de tener muevo pyjama ? Ande un pyjama, i ande una panopliya de asker ?
A kontinuar…
Edmond Cohen
Paris, Fransya
Fuente: LK/eSefarad
