eSefarad Noticias del Mundo Sefaradi
Keridos amigos, mi emisyon de este djueves va ser sovre Philipinas i Israel.
El program se puede sintir por Internet kada djueves a las 4 H O6 PM, ora de Paris, indo al sityo RADIO – la fréquence juive. Kale tener pasensya i asperar un poko, no se oye pishin.
Saludos a todos!
Edmond Cohen
Paris, Fransya
PHILIPINAS I ISRAEL
Saludos a todos los oyentes de la emisyon Muestra lingua, la emisyon en djudeo-espanyol fundada por el profesor Haïm-Vidal Sephiha i prezentada agora por vuestro servidor Edmond Cohen, kon Philippe en la kabina.
Komo a kada vez vos akodro ke el proksimo atelye de konversasyon de la asosyasyon Vidas Largas se tendra el martes 4 de marso, de las dos i un kuarto asta las sinko, en el Centre Communautaire, 119 rue Lafayette Paris (10°). Metro Poissonnière o Gare du Nord.
Por empesar un anunsyo: la kantadera suisa Esther Ackermann, ke tomo komo nombre de artista Keren Esther, aviya salido un primer CD de kantikas djudeo-espanyolas a la vez turkas i marokiyas, intitolado A la una yo naci. Kanta a la manera de los djudeo-espanyoles del Maroko, syendo ke se ambezo de su madre nasida de Tanger (por egzemplo, pronunsya la jota i pronunsya muher i no mujer). Puedesh oir unas kuantas de sus kantikas indovos en su sityo chanteplume.ch
Agora kyere azer un muevo CD enteramente konsagrado a las kantikas de los djudeo-espanyoles del Maroko. Por esto tyene menester de paras i propoza varyas kompensasyones a los ke le van embiyar paras. Toparesh esto todo indovos sovre el sityo
http://www.mymajorcompany.com/projects/2eme-album
Esto dicho, i antes de empesar mi emisyon de oy, me devo de akodrarvos la memorya de dos grandes djudyos, en vedra un djudyo i una djudiya, ke mos desharon la buena vida estos diyas, kyero avlar de Jacques Lazarus i de Shulamit Aloni.
Empesaremos por el primero ke se fue, Jacques Lazarus, a la edad, mashalla, de 97 anyos.
Este obre nasyo en una famiya alzasyana en 1916, i su idea fue de ser zabit en la armada franseza. Entro en la armada i despues en una eskola para ser zabit, ama kuando vino la gerra i las leyes rasyalas de Vichy, fue echado a la puerta de la armada despues de sej anyos de vida militar. Penso en primero irse en Londres en la armada de De Gaulle, ama enkontro un amigo ke lo izo entrar en la rezistansya djudiya (la Armada Djudiya de Abraham Polonski) ande se izo konoser komo Capitaine Jacquel, su nombre de rezistansya.
En julyo 1944, sus kapos lo embiyan a ver un ombre sozde de los servisyos sekretos inglezes, ama lo ke no saven es ke en vedra es un espyon alman. Se topa enkarselado en Drancy i de aya embiyado para Auschwitz por el ultimo treno, el 17 de agosto 1944. Ama, kon 27 kompanyeros, reushe de fuir del treno i abolta para kombatir kon los rezistantes.
Despues de la gerra es embiyado en Aljeriya para kriar la primera eskola de la ORT. Aya se kaza kon una djudiya de Aljeriya i se va kedar en Aljeriya ande va fundar una gazeta, ke va yamar l’Information Juive. De este diya va ser konosido komo gazetero i, de syerta manera, reprezentante de los djudyos de Aljeriya. En vedra este ombre va ser en mizmo tyempo djudyo, fransez, de Aljeriya (de korason si no de nasimyento), i syonisto.
En 1962, se topa ovligado kon los otros djudyos de aboltar en Fransya, i en Fransya kontinua su gazeta i su lavoro de gazetero.
Yo tuve la okazyon de verlo en varyas okazyones. Era un ombre muy respektado, i por esto me deviya de nombrarlo.
Agora vengo a la ke se fue despues, a la edad de 85, Shulamit Aloni.
Eya nasyo en 1928 en Tel Aviv, en una famiya eznaf, i entro manseva en el movimyento Hashomer Hatsaïr (syonistos marksistos) i despues en la Haganah i el Palmah. Teniya entre 19 i 20 anyos en la epoka de 47-48, al nasimyento del Estado. Toparse en estos tyempos en la Hagana i el Palmach no era koza kolay.
La lucha de su vida entera fue en favor de los derechos umanos, i sovre todo de los arabos israelyanos i palestinyanos. Despues de tener sido deputada del Maarah (travayistos) en 1965, va deshar este partido para fundar el movimyento Ratz ke se va azer el partido Meretz ande se va kedar asta la venida de Yossi Sarid en 1996.
Al lado de su lucha en favor de la paz, Shulamit Aloni se peleo syempre kontra los hahamim de los partidos ultra-sufus, i mizmo kontra los syonistos relijyozos, en favor del kazamyento sivil i mas jeneralmente en favor de un derecho personal ke sea laiko i no entre las manos de los hahamim. Esta bataya dainda no la gano, i se izo munchos enemigos ande los relijyozos, por egzemplo el partido Shass.
Por lo tanto, no era enemiga de la relijyon djudiya, al punto ke, asigun lo ke demando eya mizma, fue enterrada relijiozamente, i sus tres ijos meldaron el kadisch para eya.
I agora vo trokar enteramente de lakirdi para dizirvos ke ay en varyos paizes inkluyendo la Fransya una emisyon de televizyon ke se yama X Factor, para eskojer muevos talentos de la kantika. Uno de estos paizes fue Israel, i la ke gano el konkurso este anyo en Israel fue una Philipina de 47 anyos, ke se yama
Rose Fostanes, i ke lavora, komo kaji todas las Philipinas de Israel, guadrando a una vyeja hazina. Esta viktorya inesperada kontra kandidatas muncho mas mansevikas i ermozikas travo el tino de toda la djente sovre esta komunita de los Philipinos de Israel, en vedra sovre todo Philipinas, al punto ke en Fransya sinko pajinas an sido konsagradas sovre las Philipinas i Israel por la gazeta l’Actualité Juive (fundada en 1982 por Serge Benattar i ke no kale konfundir kon l’Information Juive fundada por Jacques Lazarus, del kual avli un poko antes). I mi amigo Jose Molho me embiyo estas 5 pajinas, pensando kon djusta razon ke vos puediya azer una emisyon sovre este sujeto.
Komo ya lo savesh, las Islas Philipinas se topan en el oceano Pasifiko, entre Taywan al norte i las Islas de Indonesia al sur. Fueron vijitadas por Magellan en 1521, i konkistadas por los Espanyoles a poko a poko desde 1565. Los Espanyoles van a kedar en las Philipinas, ansina yamados por eyos en onor del rey Felipe II, asta 1896, ande empesa la rebuelta de los Philipinos kontra Espanya. Kale dizir ke entremyentres, durante los tres siglos de prezensya espanyola, los misyonaryos espanyoles izyeron ke la povlasyon se aga katolika a 80%, i si se adjuntan unos 10% de protestantes, se puede dizir ke mas de 90% de la povlasyon de Philippina es kristyana.
Esto dicho, se save ke aviya kripto-djudyos kon los Espanyoles, porke ay arshivos sovre el djuzgamyento de dos ermanos Rodriguez akuzados por la Santa Inkizisyon de «judaizar». Ama lo ke es siguro, es la yegada en Manilla en 1870 de los tres ermanos Levy vinyendo de Alsace, i despues de eyos de djudyos turkos o ejipsyanos.
I en 1898, es la gerra entre Espanya i Estados Unidos, ke se va pasar tambyen en las Philipinas, ke van a pasar basho la dominasyon amerikana. Unos askeres djudyos de la armada amerikana se van a plazer en las Philipinas i se van a kedar aya. El djudyo el mas famozo de las Philipinas es Emil Bachrach, ke se va azer aya Prezidente de la Banka del Puevlo i uno de los fundadores de la primera kompaniya de avyones de Philipinas.
En 1935, las Philippinas obtyenen de los Amerikanos una grande otonomiya i tyenen komo primer prezidente Manuel Quezon. En 1937, los Japonezes, amigos de los Almanes, entran en Kina. Munchos djudyos almanes son refujyados en Shanghaï, i los djudyos de Philippinas se espantan de kualo les va afitar si los Japonezes toman Shanghaï. Akojen en Manilla unas trenta famiyas de djudyos almanes. I en 1938 es la Kristallnacht, i los djudyos de Philippinas entyenden ke sus ermanos de Almanya son en grande sekana. Kale dizir ke los Philippinos lo entyenden tambyen, i protestan kon manifestasyones. Los djudyos se van a ver al Prezidente Quezon ke da pishin su akodro para akojer a los refujyados djudyos, lo ke, komo ya lo savesh, no fue malorozamente una koza frekuente en estos tyempos ande todas las puertas se serravan delantre los desmazalados ke keriyan fuir la Almanya. 1.300 djudyos obtuvyeron vizas para las Philippinas, i el Prezidente Quezon el mismo metyo tyerras suyas a sus dispozisyon. Un plano Quezon preveiya mizmo el ajkojimyento de un milyon de refujyados…
Malorozamente, esto no va ser posivle porke, komo ya lo savesh, las islas van a kaer entre las manos de los Japonezes entre desyembre 1941, djusto despues Pearl Harbour, i fevrero 1942. La armada amerikana se rende, ama su kapo, el jeneral Mac Arthur, reushe de fuir kon un vaporiko verso Australia. I dize su dicha famoza: «Vine i aboltaré». Lo ke izo entre oktovre 1944 i julyo 1945. Las Philippinas van a aboltar entre las manos de los amerikanos malgrado una rezistansya fanatika de los Japonezes.
Agora kedan unos 500 djudyos en las Philippinas, kon un haham, un kal, un gan para las kriaturas, un shohet, i mizmo kezo kasher.
Las Philipinas fueron el solo pais de Asia ke voto en 1947 en la ONU en favor de un estado djudyo. Agora ay kyenes dizen ke los Amerikanos pusharon en favor del voto. Esto es posivle, ama de lo ke vimos, parese ke los Philipinos uvyeran votado mismo sin empushamyento amerikano.
Agora no son mas los djudyos ke van a bivir en las Philipinas, son los Philipinos, i sovre todo las Philipinas, ke vyenen a lavorar i morar ande los djudyos, kijo dizir en Israel.
Todo empeso kon las Intifadas ke tuvyeron komo konsekuensa la serradura de las frontyeras entre Israel i los territoryos. Los palestinyanos ke veniyan lavorar en Israel no lo pudyeron mas, i Israel tuvo de akojer a lavoradores venidos de otros paizes, i entre eyos Philipinas.
Esto me da gana de avrir una paranteza para adjidearme un poko sovre los arabos ke no tyenen dingun mazal: a kada vez ke kyeren aharvar a Israel, la koza se abolta kontra eyos i en favor de los djudyos, al punto ke me demando si los mijores amigos de Israel no son, al kavo dal kavo, los arabos:
De lo ke no achetaron un estado arabo al lado del estado djudyo, i eskojeron la gerra, no solo la pedrieron, ama ensima pedrieron munchas tyerras, i muncha djente. En el estado djudyo votado por la ONU, aviya kaji tantos arabos ke djudyos (500.000 djudyos i 400.000 arabos, mas 100.000 tan djudyos ke arabos en la zona de Yerushalayim. Sin la gerra, los arabos uvyeran aferrado la mayoriya en poko tyempo, i oy el estado sozde djudyo seriya arabo.
De lo ke kijeron de muevo la gerra en 1967, pedrieron la parte este de Yerushalayim, i se toparon okupados en todos los territoryos.
De lo ke izyeron el boycott de los produktos israelyanos, ovligaron Israel a dezaroyar una industria de tan alto nivel ke los otros paizes son agora ovligados de merkar a Israel, ke lo kyeran o no.
De lo ke izyeron dos intifadas sin achetar las propozisyones de paz de Israel, no tyenen mas lavoro, no tyenen estado, no tyenen dingun provecho.
Syerro esta paranteza, ama Israel deve amostrarse muy agradesyente verso los arabos, ke al final lo ayudaron muncho; sin lo ke le kijeron azer, Israel no egzistariya mas oy en tanto ke estado de los djudyos.
I vengo de muevo a mi sujeto, los Philipinos, ke eyos tambyen tyenen bela kon los pokos muzulmanos ke tyenen en el sur del pais, los kuales kyeren un estado islamiko i azen terrorismo para esto.
Komo lo dishe un poko antes, agora ay una komunita de mujeres Philipinas ke vyenen en Israel para lavorar komo ayudantes de vida, sovre todo para las personas aedadas i hazinas. Kada anyo ay unos 5.000 philipinos ke entran en Israel, i son agora unos 45.000.
Al empesijo de mi emisyon, vos avli de Rose Fostanes, la kantadera ke gano el konkurso de X Factor. Su alkunya vyene konosida a muestras orejas. Mozotros ya savemos lo ke son fostanes, ama komo puede ser alkunya de una Philipina? Primera repuesta: munchos philipinos tyenen alkunyas espanyolas en relasyon kon la dominasyon espanyola de las Philipinas asta 1896. Ama es ke fostan es un byervo espanyol? Si vash a mirar en el Nehama, el dize ke fostan vyene del turko fistan. Si ansina es, kualo aze un byervo turko ande los Philipinos? En vedra, si se bushka byen, se topan los byervos fusta i fustan en espanyol, vinyendo del latino fustis (sin olvidar ke los gregos yaman fustanela la fusta de los Evzones). Lo ke vyene kuryozo, es ke Rose no se yama Fustanes, se yama Fostanes, i solo konosko los djudeo-espanyoles dizyendo fostanes. El destino de Rose era eskrito en su alkunya: kaliya ke se vaya ande djudyos…
Ande las kozas se komplikan, es kuando martes, en el atelye de konversasyon, muestro amigo Moshe Gormez mos ambezo ke el byervo pishtan, en ebreo, es tela de lino…Esto es demaziya para mi, lo desho agora a los linguistos. A eyos de salirmos de esta situasyon!
El embashador de Philipinas en Israel, el Senyor Generoso Calonge, resivyo Rose Fostanes en la embashada para felisitarla de su viktorya, i el ministro del lavoro de Israel le dyo el derecho de lavorar kon la kantika, i no solo por ser ayudante de vida. No tengo menester de dizir la alegriya de esta mujer.
El embashador disho a los gazeteros ke las relasyones entre Philipinas i Israel ivan de mijor en mijor. Munchos Philipinos, syendo kristyanos, vyenen en Israel komo turistos i de la mizma manera, ay unos 5.000 Israelyanos ke se van kada anyo komo turistos en las islas Philipinas.
El embashador no se olvido tampoko de rengrasyar a Israel por su ayudo a las Philipinas kuando uvo el tifon ay dos mezes. Los israelyanos kuraron mas de 3.000 kriaturas, se okuparon de render pura la agua suzya, fraguaron de muevo a las eskolas derrokadas, i los Philipinos se toparon ansina muevos amigos.
Agora ya vino la ora de eskapar esta emisyon, i vos digo al djueves ke vyene, si kyere el Dyo!
Edmond Cohen
