Muestra Lingua: OJO MALO por Edmond Cohen

 
 
 
Keridos amigos,  vos do el teksto de la proksima emisyon del programa.
  
El program se puede sintir por Internet kada djueves, indo al sityo RADIO – la fréquence juive . Kale tener pasensya i asperar un poko, no se oye pishin.
     

Saludos a todos
Edmond Cohen – Paris, Fransya    

OJO MALO

Saludos a todos los oyentes de la emisyon Muestra lingua, la emisyon en djudeo-espanyol fundada por el profesor Haïm-Vidal Sephiha i prezentada agora por vuestro servidor Edmond Cohen, kon Philippe en la kabina.

Despues de akodrarvos ke los ateles de konversasyon de la asosyasyon Vidas Largas empesaran el djueves 4 de novyembre, vos kyero azer un chiko anunsyo a la demanda del Sinyor Aron Saltiel, bivyendo en Austria, ke salyo un CD intitulado « Boda – Kantigas de Novia », realizado por el i su ekipo ( su ija, sus ermanas, i muzikos turkos). Kon el CD vyene un livriko kon las palavras de kada kante, i ay tambyen entroduksyones de Judith Cohen i Yusuf Altintas. A mi me vino ermozo de un punto de vista artistiko, i interesante de un punto de vista syentifiko.

En primero, demandaremos kualo es el ojo malo, lo ke en lashon se dize ayn ara. El ojo malo es el danyo ke vyene de el ojo de uno ke se sela del byen ke tenej. I mismo si no se sela, mismo si solo se enkanta, de enkantarse es komo pensar ke este byen no es meresido, i esto esperta arriva a los andjeles akuzadores, i kyen save el danyo ke estos pueden azer .

No kale pensar ke el ojo malo es una koza solo de los djudyos. El espanto del ojo malo egziste desde muncho tyempo, i en kaji todas las sivilizasyones. Si vos vaj sovre internet para meldar lo ke dize la ensiklopediya Wikipedia en ingles sovre el evil eye, komo se dize en ingles, vaj a aprender ke el espanto del ojo malo es koza ke egziste de syempre, i en la mayoriya de los puevlos. Se topa ande los Asiryanos, los Gregos i los Romanos aze mas de 2.000 anyos, en Turkiya, Armeniya, Indya, en los paizes arabos, en Bengladesh, Tibet, Brazil, ande los papus de mueva Ginea, ets

Las maneras de luchar i topar remedyo kontra el ojo malo son diferentes asigun los puevlos. Yo me vo solo interesar al ojo malo ande los djudyos, i no todos los djudyos, porke los ashkenazim tyenen sus propyos uzos kontra el ojo malo, ama yo me vo solo interesar a los sefaradim de Oryente, puede ser influensados por los Turkos.

Para los djudyos, el ojo malo egziste: se yama ayn ara. Ama asigun lo ke meldi sovre internet del haham australyano Aron Moss, esta eskrito en el Talmud, no dize ande, ke el ojo malo aze solo danyo a kyen se espanta de el, ama desha sin danyo a el ke no se preokupa de el.

Asigun lo ke meldi sovre el forum internasyonal Ladinokomunita, los djudyos del Oryente se preokupavan muncho del ojo malo, yamado tambyen solo ojo, o nazar komo dizen los turkos. 

Kale saver ke ande los djudyos del imperyo osmanli aviyan kuranderas, kijo dizir mujeres ke saviyan kurar kontra syertas hazinuras, sovre todo las ke veniyan de ojo malo. Estas kuranderas eran tambyen prekanteras, kijo dizir ke aziyan prekantes, invokasyones kon palavras ritualas.

Esto dicho, lo mijor es ke vos melde lo ke topi sovre Ladinokomunita, savyendo ke este forum egziste desde mas de diez anyos, i por esto se izo kon el tyempo una ekstraordinarya ensiklopediya eskrita por   kada uno i uno. 

Egzemplos de lo ke meldi sovre Ladinokomunita :

El ojo malo es, sigun la kreyensa, el ojo de la persona ke se ensela del proksimo, i tyene el poder de azerle danyo, kon la sola mirada. Munchos se enselan, ma no todos tyenen este poder. En jeneral el ke lo tyene no save de tenerlo…

Un reflan dize : « Boka de leon ke te koma, i no ojo de benadam ».
Ma ay el ke se burla i dize : « Al desmazalado le kaye el bokado, i dize ke es ojo malo ». (Matilda Koen-Sarano Yerushalayim)

Kuando se pensava ke uno sufria de alguna malatia kavzada por el aynara , la kurandera (la ke azia la kura o dezia el perkante) tomava un punyadiko de sal en la mano, i se lo pasava ensima de la persona ke sufria, i deziya lo sigiente : « Fulano, ijo de Fulano, ke no tenga dingun mal ; todo ke se vayga a la profundina de la mar. Todo lo ke te miro kon ojo malo, la vala mala, el aynara. » Entonses se echava la sal. (Benny Aguado New York)

Alguno me alavo « ke ermoza ke estas » ? Ayde ! Al venir a kaza mi madre tomava la sarten, echava azeite, yervas buenas, klavikos, i un poko de raki i metiya a la lumbre…esta kombinasyon empesava salir umos i mi mama empesava el prekante : « Ken te kijo mal, ke te lo kite, ken te maldisyo, ke te salga », i ansina el ojo malo se kitava. En este tyempo yo estava suspirando los umos i mi mama me salpikava en la kara kon lo ke estava en la sarten. Kuando era chika syempre  teniya un sakito de ajo en la aldikera para guadrar del ayn ara o ojo malo. Vos digo klaramente ke oy mismo syempre tengo un kaliko de ajo en la chanta ke tomo kon mi. (Daisy Alalouf Newell Florida, ke tyene agora noventa anyos).
 
Komo echar los klavikos : se toman 15 klavikos de komer (clous de girofles) ke tengan buena la kavesika. Se separan 5 a 5 i se dize : « El ojo malo, la avla mala, todo ke se vaya a la profundidad de la mar . 5 por la mar, 5 por la tyerra, 5 por la djente (nombre ijo de nombre) ke no tenga dingun mal. Si es ombre : ke se le arremate el nombre. Si es mujer ke se le arremate el saver.

Esto se repita 3 vezes, kada grupo de 5 klavikos guadrados en la mano i pasarlos por el puerpo un total de 15 vezes. Se toma i se meten en un plato de aleminyon (aluminium) i kon un fosforo (kibrit) se keman i se rekoje i se echa al basin.

A mis ijos de vez en kuando se los echo, es por el mal de ojo.
(Esther C. New York)
Kuando se kuziya ensima de la persona se diziya:
« Ensima de ken kuzgo ?
Ensima del rey de Fransya
Tu ke tengas sus byenes
El ke tenga tus ansyas.
Ansi ke esto no es vedra,
El Dyo ke te guadre de aftira
(Guler Orgun Estambol)

I no devemos de olvidar kuando echavan kurshun/plomo. Se deretiya plomo i se echava en una payla de agua ensima la kavesa ke keriyan kitar el ojo malo. Esta persona se tapava la kavesa kon una tovaja (Salomon Kuzi Beer Sheva Israel)

A propozito de echar kurshum, en Ladinokomunita tambyen meldi un pedaso embiyado por el Senyor Profesor Isaac Jack Levy, bivyendo en Davidson, en los Estados Unidos, de su livro intitulado Ritual medical lore of Sephardic women : Sweetening the spirits, healing the sick (Tradisyones medikales rituales de las mujeres sefaraditas : adulsar los espiritus, kurar los hazinos)

El mos konta ke se fue a ver, serka de Tel Aviv, una vyeja mujer ke le konto lo sigiente : En una riza se deve meter mayorana (marjolaine) ,ruda (rue), i un punyado  de asukar. Se toma todo esto i se mete debasho del kavesal del hazino toda la noche. Por la manyana, se kuvre el hazino kon una savana. Myentras tanto, se mete la asukar, mayorana i ruda en un legen kon agua yelada. Tambyen se mete mueve pedasitos de pan en el legen. En una kuchara se mete el kurshum/plomo. Esta se deve de tener sovre el fuego asta ke el kurshum se derite. Kuando el kurshum ya se dirityo, se mete el legen sovre la kavesa del hazino. Entonses se echa el kurshum diritido el el agua. Si el hazino fue atakado por el ojo malo, el kurshum patladea. Si se kura, kere dezir ke se avlo mal de el. Si el plomo se trava por la ruda, es tambyen ke le echaron ojo. Si se trava por la mayorana, es ke se siklio (esta deprimido) el hazino. Si se trava por el pan, kre dezir ke alguno lo esta devorando komo devoro el pan al plomo. Despues se kita el plomo de la agua, i se derita un otra vez en la kuchara. Kuando ya esta deretido, se pasa la kuchara tes vezes sovre la kavesa, tres vezes sovre el korason, i tres vezes sovre los djenuyos. Al fin, se derite el plomo una otra vez, i se mete en basho entre los pies. Lo ke kavzo el espanto se forma en el plomo.

Tambyen en Ladinokomunita meldi un alay de otras kozikas sovre el ojo malo.

Por egzemplo, sovre la ruda, meldi ke es muy buena para ojo malo. Es una yerva aromatika. Esta yerva se ensembrava enriva del tul de la kama del bebe rezin nasido, komo nazarlik. Kere dizir para ke no le kayga ojo malo. Ansi tambyen le metiyan sovre el vestido de la madre mueva, la rezin parida, por la misma razon (Israel Bar Yehuda, k’este’n Ganeden, Tel Aviv)

En vez de dizir de nazar guadrado o guadrado de ojo malo, aviyan ke diziyan en boz basha « ajinkuli » lo ke keriya dizir ajo en el kulo…

La kolor blu protekta de ojo malo.

El Dyo (o el Tavan) ke mos guadre de ojo malo, de ayre de giris (koryente de ayre) i pedo de vyeja (Eli i Rivka Yona Petah Tikva Israel)

Komo vyene ke tiyas i nonas yamavan pigul (asko, fedor, en lashon) a los sovrinos o inyetos ke tanto amavan ? La repuesta es ke por akavido de aynara/ojo malo (Yehuda Hatsvi Israel)

Por siguro, meldi otras kozas muncho mas seryozas sovre lo ke dizen los hahamim o los savyos sovre el ojo malo, por egzemplo los hahamim mos dizen ke el ojo malo, no aze danyo al ke lo resive, aze danyo al ke lo echa. El hazino, es el ke echa ojo malo. El selo lo pudre de aryentro.

Ama, en el poko tyempo ke tengo, yo deviya de eskojer ; i me pensi, keridos oyentes, ke seriaj mas interesados por estas kostumbres a la vyeja, ke se dezaparesyeron agora ke los djudyos osmanlis se oksidentalizaron. K’esto dizyendo : no son solo las kostumbres ke dezaparesyeron, son los djudyos eyos mismos en tanto ke osmanlis.

Lucharemos en djuntos, keridos oyentes, para no dezapareser, yo en avlandovos, vozotros en eskuchandome, i dunke vos digo al djueves ke vyene, si kyere el Dyo !