eSefarad Noticias del Mundo Sefaradi
Keridos amigos, vos do el teksto de la proksima emisyon del programa.
El program se puede sintir por Internet kada djueves, indo al sityo RADIO – la fréquence juive. Kale tener pasensya i asperar un poko, no se oye pishin.
Saludos a todos
Edmond Cohen – Paris, Fransya
UN
NOMINASYON, BAT MITSVA, TOSTADOR
Saludos a todos los oyentes de la emisyon Muestra lingua, la emisyon en djudeo-espanyol fundada por el profesor Haïm-Vidal Sephiha i prezentada agora por vuestro servidor Edmond Cohen, kon Philippe en la kabina.
Komo a kada vez, vos akodro ke el proksimo atelye de konversasyon de la asosyasyon Vidas Largas se tendra el djueves 3 de marso, de las dos a las kuatro i medya-sinko, en el Centre Communautaire, 119 rue Lafayette Paris (10°) métro Gare du Nord o Poissonnière. Este diya tendremos una mueva konferensya de Frederic Viey, esta vez sovre la revue Blanche (la revista blanca) , una revista literarya i artistika fundada por tres ermanos Natanson ijos de un bankero djudyo venido de Polonya. Esta revista sureo poko, de 1890 a 1903, ama fue muy importanta en su tyempo, i para eya lavoraron los mas grandes eskrivanos i pintores de este tyempo.
Esto dicho, ya vos konti en vezes aki ke tengo un kerido inyetiziko ke kamina sovre sus 4 anyos ke no tyene dainda, los tendra en marso, ama ya me amostra sus kuatro dedikos para darme a entender kualo es kuatro ; ama no se si ya vos dishe ke tengo tambyen el mazal de tener una inyetizika, su ermana, ke ya aferro un anyo, i ke me da kon su boka sin dyentes, salvo dos en basho, sonrizas ke me toman el korason, porke, a esta edad, no ay dainda ipokriziya. Si me da una sonriza, puedo estar siguro de su plazer de verme.
Ama no vine aki para avlarvos de mi inyetizika, afillu la gana ke tengo. Era solo para dizirvos ke el alhad ke vyene sus padre i madre van a tener en el kal una seremoniya de nominasyon, lo ke se yama en lashon Zeved habat, i despues se tendra en el kal mismo un chiko büfe para bever i komer por la salud de la chika. I esto me dyo la idea de avlarvos oy de estas seremoniyas para las ijikas, ke son al nasimyento el zeved abat i , a los dodje anyos, la bat mitsva. En vedra ya ize aki una emisyon sovre la brit mila i el pidyon aben, ke son seremoniyas para los ijikos, ama nunka avli, i esto no es djusto, de las seremoniyas para las ijikas.
Por dizir la vedra, el tanah avla solo de la berith mila por un ijo, i no dize nada por una ija. Ama de lo ke no dize nada, no kyere dizir ke es proibido de azer kualkyer koza, sovre todo ke sale de la perasha nitsavim ke son todos los del puevlo de Israel, esto inkluendo las mujeres, ke resivyeron la torah i entraron en la aliansa de Avraham avinu. Por esto los sefaradim, mas ke los ashkenazim parese, tyenen el uzo de selebrar la nominasyon de la rizin nasida a los trenta diyas, ama no ay tyempo ovligado komo por el ijo ke son ocho dias, ni antes i mijor es ni despues, salvo por razon de salud del chiko. Por lo ke es de mi inyetizika, kon pedron si avlo yene de eya, ya tyene mas de un anyo i es solo agora ke va tenerse la seremoniya para eya.
Asigun lo ke meldi sovre internet (Wikipedia) – no se si ansina va ser alhad – la madre empesa por dizir la birkat agomel, le beraha para el Dyo ke le permityo de parir sin danyo. Despues se kantan unos kuantos pesukim del Kantar de los Kantares : el pasuk 14 del kapitulo 2 : Yonati behagve asela …Mi paloma en reskisyos de la penya, en enkubyerta del eskalon, fazme ver tu vista, fazme oir tu boz, porke tu boz sabroza i tu vista deseable.
I si la ija es bohora, se puede dizir tambyen el pasuk 9 del kapitulo 6 : Una eya mi paloma, mi perfeta ; una eya a su madre, klara eya a la ke la paryo; vyeronla ijas i byenaventuraronla, reinas i mansevas i alavaronla.
Despues se dize una bendisyon de la ijika kon su nombre – por esto se yama una nominasyon – la bendisyon mi sheberah ke dize en lashon:
El ke bendisyo Sara i Rivka, Rachel i Lea, i Myriam la profeta i Avigaïl i la Reyna Ester ija de Avigaïl, ke bendiga esta kerida ija, i ke su nombre sea Fulana ija de Mengana kon buen mazal i en ora bendicha. Ke se engrandeska en buena salud, en la paz i la trankilidad ; ke su padre i su madre vean su alegriya i su boda, i sus ijos ser rikos i onrados.I ke bivan en buena salud asta una edad vyeja; i ansi ke sea Su veluntad, i digamos Amen!
I kuando estamos en las berahot, se puede tambyen dizir la birkat Cohanim, la bendisyon de los Cohanim, komo la ize yo mismo para mi ijo i su novya kuando se kazaron. Kyen save? Puede ser ke tendre de azerla para mi inyetizika alhad… Vos diré despues!
Una koza es sigura: komo es fyesta alegre, despues se kome i se beve kon los musafires.
Esto es lo ke se de la nominasyon de una ija. Despues, kuando tyene dodje anyos, es tyempo de fyestar su yegada a la responsabilidad de su vida relijyoza. La ijika se topa bat mitsva, ija de la mitsva, i si es vedra ke la mujer no es ovligada a syertas mitsvot ke son solo para los ombres, es vedra ke son ovligadas , a partir de esta edad de 12 anyos, a todas las otras mitsvot.
Por lo tanto, no es ke syempre se izo una fyesta por esta okazyon, salvo ande los djudyos italyanos, ke syempre fyestaron la fyesta de bat mitsva. Meldi sovre internet ke esta seremoniya ya egzistiya ande los djudyos de Roma ay 2.300 anyos ! Ama sino, los djudyos de los otros lugares no aziyan nada asta el siglo 19. En la mitad del siglo 19, se vido en Varsovia i en Irak una fyesta para las ijas . Ama es en Amerika en 1922 ke un haham amerikano yamado Mordecaï Kaplan ke izo tal fyesta para su ija de dodje anyos.
Desde este tyempo, asigun el movimyento del kal, kijo dizir asigun ke el kal aze parte de tal o tal movimyento el djudaismo, la fyesta va ser diferente. Mas el djudaismo va ser liberal, mas la bat mitsva se va asemejar a una bar mitsva. Ande los liberales, sovre todo los he tyenen hahamim mujeres, devriya dizir hahamot, las ijikas suven a la teva i meldan la perasha.
Ande los djudyos tradisyonales, no es el kavzo. La ijika no melda la perasha, ama va azer un diskorso, va dizir orasyones, o meldar teilim. Ande los italyanos, las ijikas, a lo manko antes de la gerra, no se komo es agora, ivan vestidas de blanko komo novyas, a la manera de lo ke yevavan las ijikas kristyanas para la primera komunyon.
En Ladinokomunita, Rachel Bortnick mos embiyo estos diyas a mirar un artikolo de Roz Cohen Drohobitzer sovre internet, ande mos amostra djustamente una foto de una bat mitsva kolektiva en el kal de Torino en 1937. En Fransya no konosiyamos esto. Mos vino a poko a poko despues de la gerra. Agora se puede dizir ke las ijas fyestan sus bat mitsva kaji tanto komo los ijos sus bar mitsva, salvo ke en jeneral me parese ser mas kolektivo.
Esto es lo ke me pensi de dizirvos sovre las fyestas para las ijas, i agora, trokando de lakirdi i komo me keda tyempo, vos kyero meldar una muy savroza konsejika ke topi en la gazeta El Amaneser de este mes de fevrero, eskrita por Rivka Abiry, de Haifa en Israel. A mi me parese komo un chiko kapo de ovra de umor i de lokura, ke me izo pensar al estilo de un otro israelyano, ke mos desho la buena vida ya ay unos kuantos anyos, kyero avlar de Ephraïm Kishon. A vozotros de djusgar. Empeso mi meldadura.
El tostador, por Rivka Abiry
Munchas vezes pensi a trokar el viejo tostador ke me dio mi abuela, ma no me dio el korason. Yo lo uzi 10 anyos i agora vino la buena ora. Esto asentada en el mupak, mirando el paketo grande kon el muevo tostador. Lo avri. No tiene kolor. Es transparente, ma tiene munchos botones i su mas grande avantaje es ke es konsiderado komo un ustensilio de mupak audio-visual. Puede avlar. En komparezon kon la antika ke resivi de mi avuela, es muy espektakular. El livriziko de instruksyones kontiene unas 100 pajinas. Indemas ay kuatro CDs i un DVD (debaldes). Es editado tambien en braille.
El tostador tiene una sistema komo en el navigador, ke te dize ke azer en avlandote.
Primero te saluda kon « Bienvenido », i despues te dize ke la ayuda esta disenyada para ambezarte la mekanika del tostador durante su uzo. Tambien puede ayudarte a soportar dolores i azerte aflakar. Esta maraviya kontiene sinko seksiones : la edad tuya, la altura tuya, komo tomar deskansos, ir mas avagar, komportarte kon tu marido i estar sana .
El sigiente paso es de apretar el boton « inisio » i resivir el « Menu ». Bastante klaro i fasil !!! Despues te da la posibilidad, si es nesesario, para trokar otomatikamente este ustensilio de mupak kon el « Mikro ».
Simple, kero dizir. Agora viene el torno del kontrol remoto. Se eskrive ayi kon una pluma (komo en un GPS), lo ke la persona dezea komo su produkto final : pan tostado normal, el numero de los tostades (a diferentes temperaturas), tostadas kon kezo o marmelada, tostadas fransezas, beigale kon sesamo, o panes de mas chikas granduras. Si metes panes ke tienen un diametro de mas de 4 sm, el tostador te los puede achetar de azer de chikas revanadas mas grandes . Las migas se alimpian otomatikamente.
Eskoji toast normal. En el momento ke la persona esta desidada lo ke kere del tostador,ke tiene arientro una boz ke avla (la boz de una mujer o de un ombre), te eksplika lo ke deve de azerse. Por egzemplo : « Mete dos revanadas de pan », despues « kontinuar », « aboltalas a la derecha », « agora aboltas a la siedra », « mete sovre el pan la manteka », « mete el kezo », ets. Si dezeas de ignorar todas estas instruksiones, la boz te dize « Aze klik al « avansar » o no « akseptar ». Ansi se avansa o se serra, sigiente, sigiente, a poko, a poko… Entremientres se ve a traves del kristal de la ventana el produkto ke se esta aprontando. Al kavo, la boz te dize ke « En unos kuantos puntos tu tostada estara pronta » i te dezea « bon apetito ».
No es tan komplikado komo lo pensi, ma por fvor, no te entremetas kontra la boz, ke te puede anunsiar « yerro, yerro » o kedarse mudo. Disfrutando ansina, por la primera vez, mi pan tostado, bevi mi kafe, ke ya se aviya yelado un poko, i despues me echi a la kaye, para irme al lavoro.
Al dia sigiente aprovi el otro menu. Tostadas a la franseza . El menu i la boz maskulina me disho ke azer. Devo atorgar ke la boz me esta plaziendo, me esta enkantando. Me desidi por un solo pedaso de pan tostado i komo el pan ke topi en el frigider no estava kortado, me olvidi de entrar el numero 1 –kero dizir solo una revanada. Imediatamente la boz empeso a ordonarme « El orden no es valido, dame el numero de pedasos » i adjusto « mas presto, mi temperatura esta ogmentando ». Tenia razon. Visto ke la temperatura estava suviendo, mi pan tostado se izo preto karvon, ke no me gusta i no es sano. Bushki el boton para trokar esta situasion, la boz disho « volver al paso de antes ». Ke maraviya, un kuchiyo invisivle kito la krosta preta de enriva del pan i la revanada se izo komo normal, komo eya. La boz kontinuo « Mas presto ». OK. OK. Komo estuve en adjele, ize klik i vide komo una mano de robot salio del tostador, batio un guevo, tomo el pan i lo mesklo kon el guevo. La boz disho : « En unos kuantos puntos tu tostada estara pronta. Aze klik para « terminar » i « bon apetito ! ». Amati la luz, tomi la kupa del kafe, ke estava kompletamente yelada, i me apresuri de irme al lavoro.
Al dia sigiente ke era mi vakansa, tuve tiempo para eksperimentar mas profundamente el tostador. Esta vez eskoji el « toast muzikal », una espesia de muzika ke akompanya el proseso de tostar komo « Nutkracker suite » -le ballet casse-noisette – « marcha turka » o « Clair de Lune ». Demaziado klasiko, me pensi, pero kontinui. De mesmo en la ventanika de kristal aparesieron mis panes en un baile elegante (komo en « nutkracker suite ») despues marchando komo soldados (sigun la marcha turka) i a la fin echandose a durmir kuando la melodiya trankila de Clair de lune estava djugando. Un divertimiento agradavle i grasiozo. No es ? Todo esto akompanyado por la ermoza boz del narrador ke me emborracho, de ken me enamori. Gozandome de los bailes de mis panizikos, me topi sin kerer apretando mi dedo sovre el kontrol remote, i segun el tono de la muzika aziendo klik en « avansar » « avansar » « avansar ».
El fumo en el mupak me izo alevantar la kavesa. Los panizikos se kemaron, el sinyal de la luz se amato, la sirena del fuego empeso a penetrar el aire, i pudiya oirse por todas partes de muestra fragua. Ademas, kuando la alarma de fuego se aktivo en mi apartamento, los arosiadores de agua empesaron a echar agua a las paredes i mi vizina estava sonando a la puerta asperando ke le de kuento de lo ke akontesio.
Ke desgrasia!
Tengo tres posibilidades para resolver esta problema. Si no esto satisfecha, puedo retornar el tostador en 14 dias, segundo, puedo rejistrarme ande la firma ke merki el tostador i de trokar el password o invitar a un amigo de kontaktar mi tostador i demandar su asistensia de leshos. Ke devo azer?
Para kualo me prime esto todo ? Prefero uzar mientres el tostador muncho mas simple ke servio de manera amistoza asta el anio 2010 a mi avuela, i ke resivi de eya komo su unika erensia.
Kon esta konsejika tan savroza de Rivka Abiry se eskapa mi emisyon, i vos digo al djueves ke vyene, si kyere el Dyo!
