Muestra lingua: NOMBRAMYENTO (2), HATIKVA, LOS DJUDYOS DE RHODES por Edmond Cohen

Keridos amigos, vos do el teksto de la proksima emisyon del programa. 

El program se puede sintir por Internet kada djueves, indo al sityo RADIO – la fréquence juive. Kale tener pasensya i asperar un poko, no se oye pishin. 

Saludos a todos 

Edmond Cohen – Paris, Fransya 

UN 

NOMBRAMYENTO (2), HATIKVA, LOS DJUDYOS DE RHODES

Saludos a todos los oyentes de la emisyon Muestra lingua, la emisyon en djudeo-espanyol fundada por el profesor Haïm-Vidal Sephiha i prezentada agora por vuestro servidor Edmond Cohen, kon Philippe en la kabina.

Komo a kada vez, vos akodro ke el proksimo atelye de konversasyon de la asosyasyon Vidas Largas se tendra el djueves ke vyene 3 de marso, de las dos a las kuatro i medya-sinko, en el Centre Communautaire, 119 rue Lafayette Paris (10°) métro Gare du Nord o Poissonnière. Este diya tendremos una mueva konferensya de Frederic Viey, esta vez sovre la revue Blanche (la revista blanca) , komo ya lo anunsyi las semanas pasadas.

Esto dicho, el djueves pasado, vos alvli, entre otras kozas, de la seremoniya del nombramyento de una ijika rizin nasida, a la okazyon ke djustamente, este alhad, se tuvo esta seremoniya para mi inyetizika ke ya tyene mashalla un anyo pasado.

Todo se paso mas o menos komo lo aviya anunsyado bazandome sovre lo ke aviya meldado sovre Internet. Las solas diferensyas fueron ke mi ermuera no tuvo de dizir la birkat agomel, puede ser porke ya la aviya dicho despues de parir, i de otra parte fue el haham i no mi ijo ni yo mismo ke disho la birkat akoanim. A mi me uvyera agradado de bendizir a mi inyetizika, ama kapara: la bendizire yene! Fue muy grasyoza, nunka yoro, no se durmyo, mirava todo i a kada uno. I keriya tomar los papeles del haham.

Despues de esta emisyon, i antes de alhad, el Profesor Sephiha me eskrivyo para ambezarme ke la noche antes la seremoniya del nombramyento, aviya asigun Michael Molho un uzo ande los djudyos ke era de aunarse para azer orasyones, i ke esto se yamava «la viola». Ama Nehama en su diksyonaryo avla de la viola solo a propozito de la nochada antes de la mila de un ijiko. I asigun el profesor Sephiha, es la misma koza kon Sarano zl, ke era el marido de Matilda Koen Sarano, ke mos desho la buena vida aze poko i ke eskrivyo un livro sovre estas seremoniyas.

I el profesor Sephiha me adjusto ke esta viola se yama «beyada» en haketiya , ke vyene de la velada en kasteyano. I me demando de azer una enkuesta sovre Ladinokomunita al sujeto de esta viola. Esto es lo ke ize, i resivi unas kuantas repuestas, sovre todo la de Rachel Bortnick, la ke fundyo Ladinokomunita i ke konose todo lo ke se eskrivyo aya durante los 11 anyos i mas ke este sityo egziste. I eya me embiyo a ver vyejas repuestas sovre la kuestyon.  Tambyen Rosina Karako i Ester Beatriz Hazan me respondyeron, i de todo lo ke meldi, puedo azer un komplemento a lo ke vos aviya dicho el djueves pasado.

En primero, lo ke Nehama yamava «viola» en Selanik, otros lo  yamavan «vijola o fijola». I era la nochada  antes de la mila de un ijiko. Dinguno eskrivyo sovre una nochada antes del nombramyento de una ijika. Ester Beatriz Hazan mos konta la nochada antes de la mila de un ijiko, i mos dize : «La nochada antes de la mila se melda kon minyan en la kaza del nasido; kon ombres de la famiya kreigo son tehilim, i se pone un sidur en basho del kolchon por modo de espantar a los mijores de mozotros. » Tambyen Rachel Wolf eskrive: « La nochada antes del dia de la brit se yamava en Izmir «la shemira» (noche de semirot). Es en ebreo guadradijo. Guadraron la kriatura de los guerkos, de los mijores de mozotros, ke sus fuersas, antes ke el chiko entre al djudezmo, eran muy fuertes. En Selanik esta nochada se yamava vijola ». 

Estas dos mujeres avlan de nochada solo antes de mila. Al kontraryo, sovre el diya mismo de la fyesta del nombramyento de la ijika, meldi un alay de eskritos. Bendizir a la ijika i nombrarla se yama «fadar», i se topa por egzemplo en la famoza kantika Semana buena mos de el Dyo, ande se dize para fadar i sirkuzir. Sirkuzir es azer mila. Fadar es nombrar a ijika. Ester Hazan yama fadasyon la fyesta del nombramyento de ijika.

Ama meldi ke la fyesta del nombramyento de la ijika se yama tambyen «las syete kandelas». Deke? Ay de pensar ke en esta fyesta se asyende syete kandelas komo en la menorah del kal… Alhad en vedra no vide esto, ama, poveretos de mozotros, un kal en  Boulogne-Billancourt kualo tyene de ver kon los de  Estambol, Izmir o Selanik?

Ansina me vo kedar sovre la fadasyon de la ijika, i  demandarvos pedron para vos orejas, ama agora kale ke kante. En una emisyon ke ize aze poko sovre los rekodros de Sabi Soulam, en partikolar sovre la vida de su male antes de la gerra, mos disho ke en el kafe frente a la mayoriya del onzen arrondissement se iva chikitiko kon su padre en las reunyones de los Syonistos i ke kantavan la Hatikva en djudeo-espanyol.  Kije konoser las palavras i vengo de resivirlas. Ansina era :

Arastados fuimos por mil i un lugares
Sin tener un kanton para respozar
Altaremos la bandiera
Por l’amor de muestra tyerra
Biva biva Palestina
Esta tyerra d’alegriya
Ke lo mas de djudyos sufrieron
A la fin salvasyon ya tuvyeron

No tengo menester de akodrarvos ke kuando se kanta biva Palestina antes de la gerra, se avla de muestra Tyerra Santa, la Palestina djudiya, no de la Palestina araba de oy.

De su lado, el Profesor Sephiha me embiyo otras palavras ke kantava el kon su padre :

Oyid ermanos dispersos por el mundo
Kual deve ser muestra tenas idea
I ay ojos ke miran al oryente
I al Sion ke muestros padres pedrieron
Esta esperansa no sera pedrida
Esta esperansa eterna i sakrosanta
D’aboltar a la tyerra prometida
Ande David fundo la Sivdad Santa

No se lo ke pensash. Las palavras en lashon son muy ermozas, ama yene uvyera sido muncho pekado ke las palavras en muestra ermoza lingua se kaygan en el olvido.

I agora, pensi de avlarvos de los djudyos de la isla de Rhodes, una istorya malorozamente muy triste komo munchas vezes, porke 90% de estos djudyos fueron asasinados en terrivles kondisyones en el enverano 1944.

Ama empesaremos por el empesijo. Parese ke uvo djudyos en Rhodes desdel siglo V antes del Kristo. En 142 antes del Kristo, del tyempo de los Hashmonaïm, i mas presizamente de Hyrcan, ijo de Shimon i sovrino de Yeuda Makabi,  los Romanos embiyan a Rhodes, entre otras tyerras, un teksto de amistad kon los Djudyos.

De su lado, Flavius Joseph mos konta ke el rey Herodes, en 40 antes del Kristo, embiyo munchas vezes paras a Rhodes.

La isla va ser romana asta 653, kuando ayegan los arabos.

Muncho mas despues, en el siglo 12 despues del Kristo, mi amigo Binyamin de Tudela mos konta ke 400 famiyas djudiyas son establesidas en esta isla.

Despues, kon las kruzadas vyenen los kristyanos, i la isla kae en 1309 entre las manos de los Cabayeros de San Juan ke van okuparla asta 1522, kuando va ser konkistada por los Turkos.

Entremyentres los djudyos van a sufrir de los ombres i de los terremotos, i solo van a kedar 22 famiyas en 1488.

Komo vos dishe, los Turkos konkistan a la Isla en 1522, i de este diya los djudyos de Rhodes se van a topar kyetos, al punto ke, a poko a poko, los djudyos se van a azer numerozos i la sivdad es yamada la chika Yerushalaïm. Los djudyos azen negosyo i unos kuantos se enrikesen en el negosyo de teshidos i sedas.

En el siglo 19, la povlasyon djudiya se topa entre 2.000 i 4.000 personas.

Esto todo va surear asta 1912, kuando despues de las gerras balkanikas la isla kaye en las manos de los italyanos. 4.500 djudyos biven en Rhodes. La povlasyon djudiya se engodra de imigrantes venidos de Bulgariya, Turkiya, Gresya, ama de otra parte munchos mansevos deshan la isla para bushkar lavoro en Amerika o en Afrika : Congo Beljikano o Rhodesia . No kale yerrarse :el nombre de la Rhodesia no tyene nada de ver kon la isla de Rhodes ama kon un ingles ke se yamava Rhodes.

Al empesijo, los fascistas no se okupen de los djudyos, ama esto va trokar en 1936 kon la venida del Governador Mario de Vecchi, muy antisemit, ke syerra las eskolas djudiyas, arondja los djudyos venidos en Rhodes despues de 1919, ets.  En avril 1942, este Vecchi se va i vyene en su lugar un muevo Governador, el almirante Campione, ke al kontraryo de su predesesor se amostra amistozo kon los djudyos, komo lo fueron, kale dizirlo porke es la vedra, kaji todos los militares italyanos en las zonas ke okupavan.

Los djudyos de Rhodes son kyetos i se kreen al abrigo de la gerra. Ni saven ke egziste la shoa ande son los Almanes. Esto va trokar kuando  en el enverano 1943, Mussolini kae i Badoglio toma el poder en su lugar. Los Almanes se apresuran de entrar en septyembre 1943 en todas las zonas okupadas por los Italyanos, de espanto ke kaygan en las manos de los Amerikanos. Los Almanes entran en Rhodes el 16 de septyembre 1943, i de este diya los djudyos son bolados ama no lo saven dainda. Son ovligados de konsentrarsen en tres sivdades :Trianda, Climaso i Villanuovo. No saven ke esto es para pueder despues deportarlos mas kolay.

En junyo 1944, en el tyempo ande los Amerikanos debarkan en Fransya, dos kapos SS debarkan en Rhodes i organizan en sekreto la matansina de los djudyos. El 19 de julyo, todos los ombres de mas de 15 anyos son yamados, mismo los vyejos de kuakyer edad para un kontrol. I se van, i naturalmente son aferrados. El mismo diya son las mujeres i las kriaturas ke son yamadas kon sus paras i sus djoyas. Los Almanes deshan estas mujeres i kriaturas sin komer ni bever durante tres diyas.

Entre estos 1.700 poveretos djudyos se topavan 42 sivdadanos turkos. El konsul de Turkiya en Rhodes, Selahattin Ulkümen, korre a ver al jeneral alman Kleeman, akodrandole ke la Turkiya es neutra, i egzijendole de liberar no solo a los sivdadanos turkos, ama tambyen a sus myembros de famiya ke no son turkos. El jeneral refuza, syendo ke los djudyos deven ser komo tales embiyados en kampos. Ülkümen responde ke para la Turkiya, no ay diferensya entre sus sivdadanos, ke sean muzulmanos, kristyanos o djudyos. Atakarse a un sivdadano turko, ke sea djudyo o no, es la misma koza, i va ser un kavzo de insidento diplomatiko internasyonal. Kleeman eskapa por achetar delantre de las menasas de Ülkümen, i libera los djudyos turkos.

Ülkümen no pudo salvar miles de djente, solo 42, ama sin su enerjiya i su koraje se kedavan en las manos de la gestapo ande ya se topavan.

Kuando, en fevrero 1945, la Turkiya deklaro la gerra a la Almanya, la Almanya izo bombardar el konsulado de Turkiya, matando a la mujer prenyada de Ülkümen. El mismo fue yevado en prezo en Gresya.

Munchos anyos despues, en 1989, obtuvo la medaya de los djustos entre las Nasyones. Yo lo vide kontar su istorya en una emisyon de televizyon ke se izo en Fransya sovre los djudyos de Turkiya, ke dainda tengo.

Ülkümen se muryo en su suenyo, un suenyo de djusto se puede dizir, en 2003, a la edad de 89.

Esto akodrado sovre 42 djudyos salvados, agora me keda de kontarvos lo ke afito a los otros, i ke ya savesh todos.

Despues de tres diyas de martiryo, el 23 de julyo 1944, los djudyos son echados verso el puerto, aharvados sin piyadad por los djandarmas, i enserrados en tres vapores kon 20 SS armados en kada uno. El viyaje va surear una semana entera. A estos desmazalados muryendo de ser los Almanes les dan kada tres diyas pan i sevoya. Los SS les amostran agua, ama no tyenen derecho de beverla. Al kavo, ayegan el 31 de julyo en una prezo de Athena. A los ombres les kitan los kalsados.

De aya el 3 de agosto son echados en kamyones, i yevados a la estasyon de trenos de Athena. Aya se topa el treno, treno para behemot komo ya lo savemos. A kada uno le dan un pan, unas kuantas pasikas, unos pipinos i sevoyas. Una kaldera de agua en medyo i serran las puertas de kada vagon. El viaje va surear mas de 14 diyas, en una Gresya solevantada por la rezistansya. Kada dos tres diyas, los Almanes avren las puertas i gritan : « Raus mit den toten ! » ( Ahuera los muertos !) Los djudyos salen los muertos en yorando, dizyendo kadish, i meten los kuerpos en montones, serka de los rayes. Ayegaron en Auschwitz el 17 de agosto. Unos kuantos mansevos dainda bivyendo son metidos al lavoro, los otros o ya estan muertos o estan yevados a la kamareta de gaz. Los ke sovrebivyeron tuvyeron despues de azer la marcha de la muerte.

Los shifros ke meldi son los sigyentes: sovre 1.700 djudyos, 32 se muryeron en el viyaje, 1.145 fueron matados a la yegada en Auschwitz, 437 muryeron en los kampos de lavoro, 151 se sovresalyeron. Sovre eyos, solo unos 50 aboltaron en Rhodes. En los anyos 70 eran menos de 30; agora no se.

Otrun lugar vazyado de sus djudyos ke moravan aya desde 2.500 anyos.

En kuanto a los djudyos Rodeslis ke se aviyan ido en el Congo Beljikano ,  se fuyeron kuando vino la gerra sivil i se fueron en Bruxelles, komo muestro grande amigo Moïse Rahmani ke fundo aze mas de vente anyos la revista Los Muestros i el sityo internet sefarad.org. De aya es ke travi las informasyones para mi emisyon de oy.

Asta el djueves ke vyene, si kyere el Dyo!