Muestra lingua: Mi viaje en Israel por Edmond Cohen

Keridos amigos,
En esta okasion vos kontare sovre mi viaje en Israel.

Saludos a todos
Edmond Cohen Paris Fransya

El program se puede sintir por Internet indo al sityo  RADIO – la fréquence juive.

Saludos a todos!
Edmond Cohen
Paris Fransya

MI VIAJE EN ISRAEL

Saludos a todos los oyentes de la emisyon Muestra lingua, la emisyon en djudeo-espanyol fundada por el profesor Haïm-Vidal Sephiha i prezentada agora por vuestro servidor Edmond Cohen, kon Philippe en la kabina.

Komo a kada vez vos akodro ke el proksimo atelye de konversasyon de la asosyasyon Vidas Largas se tendra el martes 27 de mayo, de las dos i un kuarto asta las sinko, en el Centre Communautaire, 119 rue Lafayette Paris (10°). Metro Poissonnière o Gare du Nord.

Koza mueva kale ke sepash: agora Radio J tyene un sityo internet. Agora mis emisyones se pueden oir en el mundo entero indose sovre Radio J kon internet, sea en direkto, sea kuando se kyere: mis emisyones son enrejistradas a mi nombre.

Esto dicho, kuando vos deshi al kavo de mi emisyon del 17 de avril, ay mas de un mes de esto, vos akavidi ke no me oyiriash en direkto durante unas kuantas semanas, solo en redifuzyones, syendo ke yo teniya de azer un viaje en Israel, ande no me aviya ido desde unos 43 anyos.

Ya me aviya ido kuatro vezes en Israel, la primera vez en 1955, i despues en 1967,69 i 71, ama despues no tuve la okazyon de irme mas.

Me pensi interesante de kontarvos el viaje ke ize agora, afillu si ya me do kuenta ke no vo ambezarvos koza grande, syendo ke la mayoriya de vozotros ya konose el pais mijor de mi. Ama puede ser ke yene vash a ser interesados por mi manera de ver syertas kozas ke vozotros no vitesh o no oitesh.

La primera koza de kontar, por siguro, es el viaje por El AL. Toparse tres oras antes ke el avyon parte, i ensima partyo kon una ora de tadrada, lo ke kyere dizir ke mos topimos en Roissy kuatro oras enteras, kaji el mizmo tyempo ke en el viaje por avyon. El kapitan del avyon mos disho kon muncha umeldad ke no saviya avlar franses, ama en lashon era muy avliston, me paresyo ke kontava su vida entera, ama en vedra la sola koza ke entendi, povereto de mi, era ke estava muy kontente de aboltar abayta (a kaza).

Una vez en el aeropuerto Ben Guryon, tuvimos de asperar para el kontrolo de pasaportes, de tal manera ke yegados a las dos despues de mediodiya en Roissy, mos topimos a las dos i medya de la noche en el otel de Tel Aviv.

Muy ermozo otel, ke mi mujer aviya eskojido por modo de su pisina, ande se fue pishin el primer diya. Ama salyendo de la pisina se aresvalo dos vezes i se firyo los dizes, sovre todo uno, i el kusur de este primer diya de vakansas lo pasimos entre los doktores i el ospital. Pasado sea, no teniya rotura, ama tuvo dolor astal kavo de las vakansas.

El diya de despues, malgrado el diz de mi mujer, mos fuimos a pye a Yafo, pasando delantre el muzeo del Etsel (el Irgun), muzeo ke konta komo los djudyos konkistaron a Yafo durante la gerra de independensya. Una vez en Yafo, mos fuimos a komer en un restorante arabo al lado del puerto. Kual ke sea lo ke tomas, te traen en primero, komo si eran mezzes,  unos kinze chinikos de varyas salatas, lo ke a mi me plazyo muncho.

Kuando mos aboltimos a Tel Aviv, me enkanti de ver ke kon mozotros kaminavan un alay de arabos, sovre todo mujeres kon kriaturas, ke ivan a asentarse en las uertas de Tel Aviv para djugar i komer. Eramos un djueves, i despues me ambezi ke los arabos se kedan de lavorar de la mediudiya de djueves, syendo ke el diya de despues es vyernes, fyesta para eyos.

Lo kuryozo, para mi, era de ver tantos arabos komando i bevyendo asentados sovre la yerva djusto al lado del muzeo del Irgun. Kale dizir tambyen ke eramos a unos pokos diyas del Yom aatsmaut, diya de la independensya, i ke sin asperar todas las ventanas eran adornadas de bandyeras israelyanas, no solo las ventanas de las kazas (i de los oteles i hanes administrativos, esto no tengo menester de dizir) ama tambyen las de las arabas. La fyesta se tuvo el 6 de mayo, mos fuimos de Israel el 13, dunke una semana despues de la fyesta, i dainda kedavan todas las bandyeras, dinguno tuvo gana de kitarlas. Vyendo estos arabos fyestando en medyo de tantas bandyeras, me demandava komo ay unos ke akuzan Israel de apartheid. Ke lokura…

Otra koza keriya kontarvos: en el otel de Tel Aviv, los empyegados eran djudyos venidos del mundo entero: rusos, etyopyanos, i…djudeo-espanyoles. Me ize pishin amigo kon el kapidji i kon uno ke serviya la komida, dos izmirlis (estambolis no eran, nobody’s perfect) kon kyen mos tresaliyamos, eyos i yo, de avlar espanyol muestro.

El diya de despues, tuve la gana de ir a ver el muzeo de la independensya, kyere dizir la kaza ande Ben Guryon proklamo el Estado de Israel el 14 de mayo 1948. Ke emosyon de ver esta kazika modesta, i la sala bastante chika ande se tuvo la seremoniya. Por empesar vimos un filmo de unos kuantos minutos kontandomos la istorya de la kaza, ke tyene de ver kon el nasimyento de Tel Aviv en 1909. Kale saver ke en 1909, unos 66 ombres i mujeres se aunaron en una playa vaziya merkada al lado de Yafo para fundar una mueva sivdad ke se yamariya Tel Aviv. La superfisiya de la futura sivdad fue dividida en 66 pedasos ke fueron atribuidos asigun el mazal a kada uno de los partisipantes. Uno de los 66 se yamava Meir Dizengof, i obtuvo la parte ande fraguo la kaza de la kuala vos esto avlando. El vino a ser el mayor de la mueva sivdad, i a su muerte desho su kaza a la munisipalidad, ke izo aya un muzeo de arte, i es en esta kaza venida de Dizengof ke fue proklamado el Estado de Israel. De oir la boz fuerte i veluntarya de Ben Guryon avlando en ebreo, i proklamando Medinat Israel, tuve lagrimas en los ojos tanto me senti esmovido.

Despues mos fuimos a vijitar la sala istorika ande un giya dava eksplikasyones en ingles a los turistos, djudyos o no, venidos de kada lugar del mundo. El giya amostro la karta del estado djudyo tal ke era atribuido por la ONU a los djudyos. Sin el dezyerto del Negev, kaji entero vaziyo, el pais djudyo entero teniya la superfisiya de la mitad del Estado de New Jersey, atakado por sinko armadas enemigas, keryendo echar los djudyos a la mar. Ama, disho el giya kon umor, mozotros los djudyos ( a parte Johnny Weismuller i Mark Spitz) no savemos tanto nadar: kuando fue kuestyon de traversar la Mar Kolorada, la traversimos a pye seko. La mizma koza fue kuando Yoshua i los djudyos traversaron el Yarden para entrar en Israel. I el profeta Yona echado a la mar? Viyajo sin nadar asta la tyerra, en la tripa de un pishkado. I Jesus? No nadava, kaminava sovre las aguas…Para los djudyos, swimming is not an option (nadar no es de eskojer) konkluyo el giya…

A la noche mos fuimos a komer ande un primo miyo, venido en Israel al empesijo del Estado, para lavorar en un kibuts. Agora bive en Tel Aviv ande dainda lavora (lavoro de banka) afillu su edad de mas de ochenta. Ensima de su lavoro, aze eskultura, poeziya, arkitektura, sin olvidar la kozina i la oenolojiya. Konose los vinos no solo de Fransya i de Israel, ama del mundo entero! No tengo menester de dizir el pranso para arresivirmos…

A parte de este primo, izimos otra vijita a un amigo miyo muy sufu bivyendo kon su mujer en Bne Brak, una sivdadika serka de Tel Aviv ande moran solo djudyos sufus vestidos de preto kon chapeos pretos kodja boy. Es un otro mundo…

No kijimos deshar Tel Aviv sin una vijita al Bet atefutsot, el muzeo de las komunidades djudiyas del mundo entero, para amostrar no solo las diferensas entre kada una, ama tambyen las asemejansas ke azen de los djudyos un puevlo uno.

Dainda mos topavamos en Tel Avi la noche del Yom azikaron, en memorya de los soldados kaidos en las gerras de Israel. En un supito, kuando estavamos kaminando mirando el bodre de mar, oyimos la sirena i kada uno se kedo en pyes sin menear asta ke se kede la sirena.

El diya de despues, ke era dainda el Yom azikaron, mos fuimos a Yerushalayim, i aya tambyen, kuando estavamos en el taksi, la sirena chuflo, i el arabadji se kedo en medyo de la kaye, i todos salimos de la araba i mos kedimos en pye astal kavo de la sirena.

En el otel de Yerushalayim, a la diferensya del otel de Tel Aviv, los empyegados eran munchos arabos, lo ke no entendi pishin komo avlavan ingles i ebreo. La meskla de djente en Yerushalayim es koza de enkantar. Es vedra ke en Paris tambyen ay turistos ke vyenen del mundo entero, ama no ay gerra o intifada entre eyos. En Yerushalayim la meskla entre djudyos i arabos me enkanto muncho. No esto avlando de amistad, esto es otra koza. Esto solo avlando de meskla. Los djudyos i los arabos biven en Yerushalayim mesklados, sin dingun apartheid. Kuando vijiti el Muzeo Herzl, ay, no leshos de la tomba de Herzl, la de Zeev Jabotinsky, enemigo determinado de los arabos kontra los kuales diziya ke kaliya fraguar una pared de fyerro. I ke veo arrodiyandose al unos kuantos metros de la tomba de Jabotinsky para azer la orasyon muzulmana? Un empyegado del Muzeo, ke entendi ser un arabo. Tambyen fui enkantado de ver ke el pulis ke guadrava la entrada para el kotel, el tambyen era arabo. Un arabo guadrando la entrada del kotel, ande esta el apartheid?

Esto dicho, doz vezes tuve de darme kuenta komo esta paz entre ombres bivyendo endjuntos es solo al pareser i se puede derrokar pishin. La primera vez fue kuando, en la vyeja sivdad, en medyo de la male araba i de los arabos, unas pokas mujerikas djudiyas, puede ser menos de diez, se metyeron a gritar kontra la polisiya ke no les permetiya de entrar en una kaleja. Gritavan sloganes en ebreo ke no entendi byervo por byervo, ama el senso jeneral era ke Yerushalayim pertenesiya a los djudyos i no a los arabos. Despues de los gritos, uvo peleo mas fiziko, djudyos kontra djudiyas, por el grande plazer de los arabos, tresalidos de ver djudyos peleandosen delantre de eyos.

La sigunda vez, me topava sovre lo ke yamamos el Monte del Templo i ke los gazeteros yaman la esplanada de las Meshkitas. En supito unos arabos se metyeron a gritar Allah uakhbar! i en poko tyempo todos los arabos, i las mujeres tambyen, se metyeron a gritar en djuntos, i se vido muy presto ke esta dicha relijyoza se troko en un slogan politiko. Vinyeron los pulizes, muy kyetos ama armados, i las kozas se kedaron ansina.

Syerro esta larga paranteza i abolto al Yom azikaron. La noche, fue el empesijo del Yom aatsmaut. Esta vez, no eran solo las kazas i las arabas ke eran kon bandyeras, ama la djente tambyen, unos emburujados enteros en la bandyera. Yo mismo  me merki una chika bandyera para tener en la mano. I toda la djente se fue al kotel (la Pared) para una selebrasyon del Yom aatsmaut. Yo estava tresalido de toparme frente al kotel el diya mismo de la independensya.

Despues mos fuimos a una fyesta no leshos, i kyen era el kantador? Mi kerido Yeoram Gaon, el mismo ke yo aziya oir a mi ijiko kuando yorava bebiko. Le pasava en disko i en muestra lingua «Durme durme mi andjeliko», i pishin se kayava. Oy mi ijo tyene serka de 39, i Gaon , de su lado, se engodro bastante kon la edad. Ama su ermoza boz no troko. Ke plazer de oirlo delantre de mi, en Yerushalayim!

El diya de despues, ke era Yom Aatsmaut, los muzeos eran avyertos, i mos fuimos  al Muzeo de Israel, sovre todo para ver los manuskritos de la Mar Muerta; malorozamente, la flakeza no solo de la luz, ama tambyen i sovre todo de mis konosimyentos en la eskritura del ebreo del primer siglo no me permityeron de pueder meldar i entender bien komo keriya estos maraviyozos dokumentos.

A la noche tuve el grande plazer de ir en Har Homa (la male ke izo tanto avlar de eya kuando Netanyau dechizo de fraguarla en la parte araba de Yerushalayim) a komer ande una amiga i su marido. Esta amiga era, aze trenta anyos, mi empyegada komo chika avokata.  Vente anyos despues, dunke aze diez anyos de esto, tuvo el koraje de azer su aliya kon su marido i sus dos kriaturas, i se ambezo a la vez el ebreo i la ley israelyana para azerse avokata en Yerushalayim. Se fue a bivir en Ofra, una implantasyon en medyo de la Cisjordaniya, ke mozotros yamamos tyerra de Yeuda. Agora bive en Har Homa, no es mas avokata i se izo adjensiya immobilyarya. Tyene un ijo asker por tres anyos i una ija tambyen. Eya komo su marido me disheron kuanto eran orozos de bivir en Israel en jeneral i en Yerushalayim en partikolar.

Por siguro no pudiyamos estar en Yerushalayim sin irmos a Yad Vashem. Aya mos fuimos, aviya muncha djente, ama no pude darme kuenta si aviya solo djudyos o no. Me parese ke los djudyos de mi edad no teniyan muncho de ambezarsen. Ama para los otros, los ke no pasaron por estos anyos de maldisyon, ke sean djudyos mansevikos o kristyanos o muzulmanos, este Yad Vashem amostra lo ke fue la Shoa, kontra los ke dizen ke no egzistyo, o, komo syertos djudyos (Esther Benbassa, por egzemplo, nasida en Estambol sinko anyos despues de la gerra) ke se avla demaziya de la Shoah, komo si saviyan mijor de la Shoah ke los ke la bivyeron.

Agora ya esta vinyendo la ora de eskapar esta emisyon. Keriya dizir una ultima koza antes de desharvos. A kada vez ke yo dishe ke aviya 43 anyos ke no aviya venido en Israel, a kada vez  oyi responderme: «Vash a ver, todo a trokado, no vash a rekonoser nada». Si se avla de fraguas, es siguro. Ama lo ke yo rekonosi, es la alma de Israel, eya no troko. Vide un puevlo unido komo era antes, echo de rusos, sabras, uzbeks, etyopyanos, fransezes, i tantos otros. Vide una djente amistoza: a kada vez ke me kedava kon mi karta bushkando mi kamino, veniya alguno para ofreserme su ayudo ke no le aviya demandado, pronto a akompanyarme para amostrarme el kamino. Mi repuesta es no. No, Israel, orozamente, no a trokado en su fondo. I es muy byen ansina.

Astal djueves ke vyene si kyere el Dyo!

Edmond Cohen