eSefarad Noticias del Mundo Sefaradi
Keridos amigos, vos do el teksto de la proksima emisyon del programa.
El program se puede sintir por Internet kada djueves, indo al sityo RADIO – la fréquence juive. Kale tener pasensya i asperar un poko, no se oye pishin.
Saludos a todos
Edmond Cohen
Paris, Fransya
MELDANDO EL AMANESER
Saludos a todos los oyentes de la emisyon Muestra lingua, la emisyon en djudeo-espanyol fundada por el profesor Haïm-Vidal Sephiha i prezentada agora por vuestro servidor Edmond Cohen, kon Philippe en la kabina.
Komo a kada vez, vos akodro ke el proksimo atelye de konversasyon de la asosyasyon Vidas Largas se tendra el djueves 16 de djunyo, de las dos a las kuatro i medya-sinko, en el Centre Communautaire, 119 rue Lafayette Paris (10°) métro Gare du Nord o Poissonnière.
De kualo avlarvos oy? Esta semana me senti un poko haragan, indimas kuando topo en El Amaneser artikolos o konsejikas tan ermozos ke no puedo rezistir a la gana de kompartirlos kon vozotros.
Para avrirvos la gana, empesaremos por una konsejika muy kurta travada del Amaneser de mayo, eskrita por Israel Benyakar, ke bive en Estambol. Su titolo: Djente d’Anderne.
Ansina empesa:
Kualas personas son mas kayentes? La djente de Estambol, o los de Danderné?
En un diya luvyozo dos ombres estavan asperando otobus en Estambol.
Achakes ke estava aziendo luvia, los kaminos estavan yenos de lodo. En lo ke vino el otobus, les sarpiko todo el lodo del kamino i los izo sepetana. De punta de pie a kavesa se enlodaron los dos.
El shoför del otobus los vido. En saviendo su kulpa, no se kedo en el estasion i kontinuo su kamino.
Los ombres ke se embatakaron del lodo, empesaron a insultar a lo ke les vino en la boka.
Despues el uno disho al otro : En Danderné, nunka afita este modo de kozas ».
El otro le demando: « Kualo afitava si era en Danderné?»
«En Danderné, el shoför abashar abasha del otobus, te demanda pardon, te toma, te yeva a su kaza, de ta una tovaja, te enshuga bueno bueno, te da vistimientas limpias, i a komer te da i te arta. A la noche te da su kama para ke te eches, te durmes aya, i el se echa al lado de ti asta la demanyana. I a la demanyanada te mete 200 liras en la aldikera.»
«No me kreygo ! » disho el otro ; « Esto todo te afito a ti?»
«A mi no…A mi mujer si !»
Despues de reir, agora vos kyero meldar un artikolo eskrito por Aslan Palachi, ke bive en Vancouver, en el Canada. Este artikolo, lo topi en el Amaneser del mes pasado, dunke de avril, i tambyen me ago un dever de kompartirlo kon vozotros, keridos oyentes, porke mos aklara sovre una istorya ke asta agora kreo ke pokos konosiyan, la istorya de los djudyos de Albaniya salvados por los muzulmanos del pais. El senyor Palachi los yama Albanyanos ; otros dizen albanezes; en mi famiya se diziya Arnautes, del turko arnavut. Este artikolo tyene komo titolo: «La kaza del Dio»
El filmo «God’s House» (La Kaza del Dio), el primer dokumental por la rijidora djudia amerikana Rachel Goslins, es bazado sovre el livro «BESA ; Muslims who saved Jews in World War II» del fotografo djudio Norman H. Gershman ke durante sinko anyos arrekojio estorias i fotos para este livro.
La estoria de los muzulmanos de la Albania i lo ke izieron durante la Segunda Gerra Mundial, es una de las mas grandes estorias ke no se konose de la gerra. Kuando las armadas de Hitler, al empesijo de los anyos 40 del siglo pasado, okupan los paizes balkanikos, determinan el destino de mas de un million de djudios. Ma, en el chiko pais de la Albania, la suerte de los djudios parese ser enteramente diferente. Aya, los muzulmanos, en todo el pais, de la kapital Tirana asta los apartados kazalikos en las montanyas, protejan en sus kazas los djudios refujiados. los visten komo muzulmanos, los yevan a la meshkita, los eskonden en los almarios i mansardas, los adoptan i los akseptan komo amigos, i nunka son traisionados. Lo mas remarkavle, esto es echo kon el konsentimiento i el apoyo del pais entero. Miles de djudios, eskondidos, ke todos saven i ke dinguno avla.
Besa ke signifika promesa, es un kodigo de onor ke tiene profondamente rais en la kultura albaniana i inkluido en la fey de los muzulmanos de la Albania. Este kodigo es una ovligasion moral de komporto de la kuala uno toma la responsabilidad por la vida de otros en el tiempo ke tienen menester. Rizikando gravemente sus vida i la de sus famiya, estos muzulmanos dieron abrigo, no solo a los djudios de las sivdades de la Albania i de Kosovo, ama tambien a miles de djudios fuyendosen de los nazis de otros paizes evropeos. El livro i el filmo revelan, despues de la kaida del rejim komunista, un periodo eskondido de la istoria, i mostran el lado de kompasion de la djente ordinaria salvando vidas djudias. Las fotos del livro de Gershman, las kualas estan reprezentadas en los muzeos a traves del mundo, tambien son akseptadas en las ekspozisiones de Yad Vashem en Israel i en las Nasiones Unidas en Nueva York.
El dokumental, la inkreyivle istoria de los muzulmanos de la Albania, se konsentra sovre el viaje a Israel de dos ombres: Recep Hoca ke trata de dar atras unos livros de orasion de un djudio sovrebiviente, ke su famiya dio refujio mas de sesenta anios atras i Norman Gershman, el fotografo djudio amerikano, dechidido de aklarar esta istoria olvidada desde munchos anyos.
El filmo sige el viaje de Hoca para kumplir la promesa ke izo a su padre el dia de su muerte, mientres las entrevistas kon los sovrebivientes i los ke los salvaron de akel tiempo prezentan un eroismo i koraje ande ni lo menos se aspera.
A lo ke se pudo saver, despues de la gerra, ni un solo djudio albaniano o ni kualkier de los miles otros djudios ke bushkaron refujio en la Albania, son entregados a los nazis por los muzulmanos de akel pais durante la gerra. Kon la eksepsion de la Danimarka, la Albania es el uniko pais okupado ke pueda pretender a esto. Ya es tambien el uniko pais en la Evropa okupada ke tenga mas djudios a la fin de la gerra ke al empesijo. Realmente, una estoria ke deve ser kontada, agora mas ke nunka. « La kaza del Dio » es el primer dokumental de mayor autoridad ke arrelumbra esta istoria maraviyoza i inkreivle.
Me parese ke era muy importante de darvos a konoser este pedaso de la istorya de los muestros en un chiko pais. Yo, despues de meldar este artikolo, kije bushkar sovre internet para saver un poko mas i topar detalyos.Topi un artikolo sovre Wikipedia, un artikolo de Antoinette Bremond sovre el sityo Un echo d’Israel, ama tambyen un artikolo mas kritiko eskrito por Jean-Moïse Braitberg sovre el sityo steinbergrecherche. Ansina me ambezi ke en 1934 aviya unos 200 jdjudyos en Albaniya sovre unos 830.000 arnautes, en mayoriya muzulmanos. Ama kon la vinida del nazismo en Evropa, djudyos vyenen de munchas vandas de Evropa, entre 600 i 1.800. Entre eyos, por siguro, djudyos almanes, syendo ke asta 1939, la embashada de Albaniya en Berlin da visas a los ke kyeren fuir Almanya verso Albaniya.
Kuando vyene la gerra, la Albaniya es okupada por los Italyanos, ke komo entre otros lugares, por egzemplo en Fransya, no se atakan a los djudyos. Ama en 1943, kuando Badoglio kapitula, los Almanes entran en Albaniya. Los Almanes krean una Grande Albaniya inkluyendo el Kosovo, el oeste de la Makedonya i el sur del Montenegro. Ay una divizyon SS kompozada de arnautes muzulmanos, la divizyon Skanderberg. Uvo 400 djudyos aferrados en avril 1944 por los arnautes en la Grande Albaniya, kyere dizir afuera de la chika, guadrados en el kampo de Pristina, en el Kosovo, i despues embiyados en Bergen Belsen. Uvo unos 100 sovrebivyentes . Ansina vemos ke la istorya ke vos meldi es vedra, ama la istorya entera es malorozamente un poko mas komplikada i triste ke lo ke vos meldi.
Agora, de muevo para reir un poko, una shaka embiyada por Rosy Hemmo de Paris en el Amaneser de Avril, travada de Ladinokomunita. El titolo: Kavayos
Un viejo judio va a los kursos de kavayos por la primera vez.
No saviendo absolutamente nada sovre kursos i kavayos, se dirija al Padok para echar un ojo, entonses observa a un Rabino bendiziendo a uno de los kavayos, el toma nota del numero del animal i le djuga dos dolares.
El kavayo gana, i el ombre se kovra 20 dolares, entonses torna de muevo al Padok i de muevo ve al Rabino bendiziendo otro kavayo. Anota el numero, i mete 20 dolares i de muevo el kavayo gana en pagando 100 dolares.
Ansi munchas vezes, kurso despues de kurso asta ke el viejo djudio logra de arrekojer 5.000 dolares.
Justo antes de el ultimo kurso, abasha i ve ke el rabino bendize otro kavayo, el djuga sus 5.000 dolares, ama esta vez el kavayo yega en el ultimo lugar.
El korre ande esta el Rabino i le dize:
-Sinyor Rav, porke siempre kuando bendizia los kavayos, eyos ganavan, i esta vez yego en el ultimo lugar ???
El Rabino lo mira, i le responde : Esto es el problem kon los djudios liberales. No konosen la diferensia entre una Beraha i el Kadish !!!
De muevo en El Amaneser de mayo, un artikolo de Gad Nassi, de Herzlia (Israel) sovre la savidurya, ama tambyen la pasensya de Rabi Hillel, esto a la rovez de Rabi Shamaï, otro grande haham de la epoka de Hillel, ama ke no teniya su pasensya. El artikolo de Gad Nassi tyene por titolo La Saviduria del Rabino Hillel.
Ansina empesa :
El Rabino Hillel, konosido por su saviduria, bivia en Eretz Israel. El fue uno de los lideres de un grupo de skolares de su tiempo. El Rabino Hillel era muy apresiado por todos i fue el sujeto de munchos kuentos i leyendas .Era i famozo por su maturidad i su pasensia.
Akel tiempo avia un kurtizano mansevo en la korte del rey Herod ke avia echo un bas (un pari) kon sus amigos ke puedia inyervar al Rabino Hillel. Avia oyido su fama i keria verifikar el mizmo si el era bastante savido i pasiente asigun se rakontava. Al dia ke vino, se hue a la eskola ande el Rabino ensenyava i le demando a boz alta en interompiendo su lision: «Rabino ! Rabino ! Porke es ke los Babileos tienen la kavesa redonda?» Hillel se abolto a el i le respondio: «Porke sus komadrones son torpes.»
En esto el kortizano se hue. Ma se abolto al dia ke vino i yene empeso a gritar en medio de la lision: «Rabino! Rabino! Porke es ke los Ejipsianos tienen el pie plano?» Hillel le respondio: «Porke eyos kaminan muncho en los marekajes del Nilo». I se abolto a sus elevos para kontinuar su lision.
El mansevo grito de muevo: «Aspera Rabino, tengo una otra kestion para ti!» Hillel le respondio kon grande pasensia: «Demanda, ijo bueno, vo aprovar de responderte». El mansevo : «Porke es ke los Numidianos tienen el ojo flako?» Hillel: «Esto es achakes del ayre fuerte ke aze en los deziertos de sus pais i kon esto la arena les entra siempre a sus ojos.» Despues se abolto kon muncho kalmo a su lision.
Ma el kortizano de Herod ainda no se esvacheyo. Avia echo un bas por kuatrosientos dukados kon sus amigos ke iva pueder inyervar al Rabino i no estava pronto de pedrer esta suma.Se penso toda la noche sin serrar sus ojos, i a la fin se dechidio sovre un plano.
Al diya ke vino se hue de muevo ande el Rabino. Entro bruskamente i kon muncho dezmodro de la puerta de la klasa, i se enfinko enfrente del Rabino en saltando en su lugar i diziendo: «Rabino !Rabino ! Me puedes ambezar toda la Tora kuando esto en pies sovre una pacha?»
Todos los elevos alevantaron sus kavesas de sus livros i empesaron a mirar kon grande enkanto al mansevo ke estava saltando en su lugar i repetando sin kedarse su demanda. Paresia a una sigonya ke chapteyava sus alas i ke gritava. Se disheron entre eyos kon kayades: «Mozotros mos ambezamos la Tora anyos enteros ! I ke repuesta le puede dar muestro Rabino?»
A Hillel no se le meneyo ni un pelo. Miro a los ojos del kortizano i le disho: «No agas a otros lo ke no keres ke te agan. Esto es toda la Tora. El resto es komentarios. Vate i ambezatelos».
El kortezano esta vez se kalmo. I le disho al Rabino: «Kreygo ke no ay un otro komo ti en todo Eretz Israel !»
Hillel le demando: Deke pensas ansi?» El mansevo le respondio kon grande ka’s: «Porke por modo de ti peryi un bas de kuatrosientoss dukados!»
Hillel en esto sonrio debasho de su barva i le disho: «Mijor es ke perias un bas i ke no me kites loko de mi kavesa.»
El kortizano se hue a la korte, i lo ke afito despues dinguno lo save. Ma de la saviduria del Rabino Hillel, el instruktor savio i pasiente, mos akodramos ainda en muestros diyas.
I agora, komo me parese ke ya esta vinyendo el kavo de mi emisyon, mos desharemos yene sovre una riza kon una shaka de Djoha en El Amaneser de marso, embiyada por el mismo Gad Nassi: Djoha i el kochero
Djoha, entero soflamado, entra kon sanyo a su kaza i se mete a pelear por nada kon su mujer:
«Ya esto enfasiado, me esto indo de esta kaza!»
Su mujer entera alborotada korre detras de el en demandando:
«Ande es ke te estas indo ? Dizeme a lo manko ande te vas…»
Djoha serra en chapteyando la puerta i sale sin responder. Una vez en la kaye, aze kedar a una karosa i entra ariento sin dizir un biervo.
El kochero: «Buenos dias Djoha. Ande te keres ir?»
«Komo de koza es ke me estas demandando? No lo dishe mizmo ni a mi mujer, i tu keres ke te lo diga a ti!»
Astal djueves ke vyene, si kyere el Dyo!
