eSefarad Noticias del Mundo Sefaradi
Keridos amigos, No se si a vozotros (a parte de Rachel, eya ya lo se) vos agrada el Meam Loez. A mi me agrada muncho, afillu si no es kolay para mi de meldarlo, kon tantos byervos sea en ebreo, sea en espanyol, ke no son konosidos de mi, i ke tengo de bushkar en diksyonaryos. Por esto vos apareji un muevo foyeton para mis emisyones a venir, empesando por la de amanyana djueves. Esta vez el foyeton va ser sovre los dertes ke Yaakov tuvo de tomar kon buenas a su ermano Esav ke keriya matarlo, syendo ke Yaakov le aviya tomado i la behora (en vedra no la teniya tomado, la teniya merkado kontra un plato de lentejas) i las bendisyones de su padre syego Itshak, enganyandolo kon vestido de su ermano Esav.
El program se puede sintir por Internet kada djueves a las 4 H O6 PM, ora de Paris, indo al sityo RADIO – la fréquence juive. Kale tener pasensya i asperar un poko, no se oye pishin.
Saludos a todos
Edmond Cohen
Paris, Fransya
MEAM LOEZ: YAAKOV KONTRA ESAV
Saludos a todos los oyentes de la emisyon Muestra lingua, la emisyon en djudeo-espanyol fundada por el profesor Haïm-Vidal Sephiha i prezentada agora por vuestro servidor Edmond Cohen, kon Philippe en la kabina.
Komo a kada vez, vos akodro ke el proksimo atelye de konversasyon de la Asosyasyon Vidas Largas se tendra el martes 19 de marso, de las dos i un kuarto asta las sinko, en el Centre Communautaire, 119, rue Lafayette Paris (10°), métro Cadet o Poissonnière.
Komo ya vos dishe la semana pasada, despues del atelye, a las 6 de la tadre, vo azer el mismo diya 19 de marso, si kyere el Dyo, en el kuadro del sinkuenten aniversaryo del Sentro Komunitaryo ke mos akoje para muestros atelyes, una konferensya sovre « La résistance spirituelle des judéo-espagnols de Paris sous l’Occupation » (la rezistansya espirituala de los djudeo-espanyoles de Paris basho la Okupasyon).
Aze poko, vos ize la meldadura, tres semanas en sira, de un pedaso del Meam Loez konsagrado a los dertes ke tuvo Avram Avinu kon el rey Nimrod, en su chikez i en su mansevez.
Vos akodro ke el komentaryo de Bereshit del Meam Loez fue eskrito en muestra lingua por el haham Yaakov Huli en 1730.
Oy tuve la gana de meldarvos otro pedaso del Meam Loez, es el komentaryo del empesijo de la perasha Vayishlah, kijo dizir el kapitulo 32 de Bereshit, sovre la manera en ke Yaakov se va enkontrar kon su ermano Esav, muy arravyado kontra el.
Mos ambezimos por el pasuk 41 del kapitulo 27 ke disho Esav en su korason: « se yegaran dias del yanto (luto) de mi padre, i mataré a Yaakov mi ermano ». Es vedra ke dainda bive Itshak al empesijo de muestra meldadura, ama yene Yaakov tyene buenas razones de espantarse de su ermano, i por tanto tyene de irse de su lado.
I el pasuk 4 del kapitulo 32 empesa ansina:
I embiyo Yaakov mensajeros delante el a Esav su ermano, ets
I agora puedo empesar mi meldadura del Meam Loez:
Este primer kapitulo (de la perasha Vayishlah) uzan la djente a meldarlo kada noche de alhad despues de avdala, i el taam (la razon) es ke tyene segula (poder) grande ke el kyen lo melda topa grasya en ojos del mundo, ubifrat (indimas) el kyen tyene de salir a kamino por mar o por tyerra le sera bueno a eskaparlo del enemigo; i si tambyen ke ay remez (alegoriya) en esta perasha del galut ke estamos, ke todo lo ke le akontesyo a Yaakov kon Esav mos deve akonteser a nozotros kon los ijos de Esav,(aki yo Edmond Cohen avro una paranteza para akodrarvos ke en la tradisyon djudiya los ijos de Esav, ke es Edom, fueron los Romanos, i agora los kristyanos, rsyerro la paranteza) i es razon ke mos rejamos asigun se rijo Yaakov, ke aparejemos tres kozas, ke son: tefila de rogar al Shem Yitbarah ke mos eskape de sus manos; i darles prezentes, asigun dyo Yaakov a Esav, para poder taparles la boka i prekurar a fuir de su poder; i no estar a su lado en ora de su ravya.
I topamos en Rabenu akadosh (Yeuda anasi, el ke eskrivyo la Mishna en los anyos 200 despues del Kristo) ke kuando estava en Roma, kada vez ke teniya hekreah (menester) de topar kon el rey, meldava esta perasha de Vayishlah para deprender (ambezar) el buen rijo ke tuvo Yaakov kon Esav, i azer el lo mizmo ke syendo somos djudyos, no mos konvyene avlar fuerte, solamente kon muncha abatisyon i palavra dulse, sigun veresh kuantas kozas se deprenden de este kapitulo a saver avlar delantre djente grande.
Ande savresh ke despues de averse espartido Laban de Yaakov, mando a su ijo Be’or ke era de 17 anyos, i al nyeto de Nahor, ke su nombre Abihoref, i dyes gerreros byen enkomendados ke en breve tomaran la delantera de Yaakov por otro kamino, i se fueran ande Esav kon una karta, ke esta es su nota:
« Ya ternas (tendras) sintido la falsiya ke me izo Yaakov tu ermano, ke vino a mi kaza desnudo i dezmamparado, i por mi sali aresivirlo i lo trushe a mi palasyo, i lo tuve en reputasyon, i le di a mis dos ijas por mujeres i a mis dos esklavas i a mis kuestas (a mi lado) se izo patron de muncho dinero de oro i plata i esklavos i esklavas i muncho ganado, i vyendose riko rikisimo me rovo el korason; i el diya ke me fui a traskilar (arapar) las ovejas se alevanto i se fuyo kon toda su famiya i su azyenda para la tyerra de Kenaan, i no tuvo dereh erets (la korteziya) a lo menos deshame bezar a mis nyetos, ke supito los yevo komo kativos. I no le basto esto, sino ke me rovo los terafim, ke son mis dyozes, i a las oras esta en la montanya del rio ke se yama Nahal Yabok. Te syerva de avizo ke tyenes modo de irle ensima supito i kumpliras tu dezeo ke ya lo se ke estas kemado de el, i de kamino vengaras mi sangre del saar ke tuve kon el i te lo agradeseré muncho ».
I syendo meldo Esav dita karta, se aravyo muncho kon Yaakov i se le desperto la inimistad vyeja ke teniya kon el de agora 34 anyos ke le tomo la behora i las berahot, asigun kontimos en la perasha de Toldot, i ansi enjenyo 400 presonas, dehaynu (es dizir): ke la djente de su kaza eran 60, i akojo de la djente de Seir 340 presonas patrones de batalya, i odreno una buena armada en ocho partidas, ke en kada 50 presonas puzo un rijidor ke les odrenara asigun deven de azer, i su ijo Elifaz era uno de los rijidores. I Esav estava en medyo de la armada para ke izyeran lo ke les komandava. I se fueron por la parte de Yaakov.
La senyora de Rivka, la madre de Yaakov, tuvo avizo de alguna djente ke lo supyeron i fueron a tyerra de Kenaan i le kontaron todo lo pasado, dizyendo ke le bushkara algun remedyo a Yaakov de akudirlo (ayudarlo) kon alguna djente ke esten en su ayuda. Dita Rivka le mando 72 esklavos forsudos i barraganes, ke en breve fueran onde Yaakov, dizyendole de su nombrado:
« Ijo miyo, senti dizir ke Esav, tu ermano, se le desperto la inimistad i odreno armada para matarte. Lo ke te digo es ke deves de rijirte kon el kon buenas i kon muncha abatisyon i aregalarlo kon algun prezente de lo mijor ke te se topa, para taparle la boka; i si te demanda komo fue tu pasada, veras de darle avizo de todo i no enkuvrir de el ninguna koza, i katale kavod (amostrale onor), ke al kavo kavo tu ermano grande es ».
I ay kyen dize ke Yaakov no tuvo avizo de la armada de Esav, i el de suyo lo desperto, ke syendo deviya Yaakov de pasar por la sivdad de Edom, ke es la sivdad de Esav, ke por ayi era su kamino para ir a la tyerra de Kenaan, se espanto no sea ke salga Esav a matarlo. Por esto fue mukrah (ovligado) de akonantar (antisipar) a afalagarlo (tomarlo kon buenas).
I mando Yaakov unos kuantos de su djente delantre de el onde Esav, su ermano, en la tyerra de Seir, kanpo de Edom, ke dita sivdad es entre Haran i entre tyerra de Kenaan. I ay kyen dize ke los anjeles ke vinyeron de los syelos para akompanyarlo, asigun kontimos en la perasha de Vayetse, de akeyos propyos mando onde Esav, ke syendo vido Yaakov ke ninguno de su djente atorgo (konsintyo) a ir en akel shelihut (misyon) porke se espantavan de Esav, fue mukrah (ovligado) de mandar malahim mammash (haliz anjeles). I si tambyen ke syendo le aparejo el Shem Yitbarah dita suma de malahim sin hekreah (menester), disho Yaakov:
« Syerto me avizan de los syelos ke a eyos mandi en este shelihut onde Esav para ke se espante de verlos ».
I ay kyen dize ke al sar (zabit) de Esav mando malahim para ke lo abatan, i a Esav propyo mando de su djente. I la siba (razon) de este shelihut (mandamyento) fue syendo konosyo Yaakov ke Esav teniya la maaraha (pozisyon) de alto i fue hekreah (menester) de azerle hanupot (hadras), i le dyo a entender ke es el rey i grande en este mundo, i aun ke era rasha (negro) le katava kavod (markava onor) por enkuanto era su ermano grande; i si tambyen ke lo djuzgo le kaf zehut (en su favor) ke se rijera kon el de buen modo syendo es su ermano. I disho Yaakov:
« Ya lo se ke Esav le kata muncho kavod (le marka muncho onor) a su padre, ke nunka se aravyo delantre de el; i todo tyempo ke bive mi padre, no me espanto de el. Por esto agora en vida de mi padre es menester afalagarlo para ke no tenga ninguna inimistad kon mi ».
I lo ke dize el pasuk (4 del kapitulo 32) artsa Seir, sede Edom (a tyerra de Seir, kampo e Edom) es avizo de la maldad de Esav, ke tanta inimistad teniya kon Yaakov ke a su tyerra la yamo Seir para akodrarse lo ke le kondjo (enganyo) Yaakov de vestirse el kuero de kavrito para enganyarlo a Itshak, ke pense ke es Esav i lo bendiga. I al kanpo yamo Edom para akodrarse de la lenteja kolorada ke le dyo a komer i le tomo la behora, ke kon estos nombres nunka le saliya del tino.
I enkomendo a eyos dizyzendo estas propyas avlas:
« Ansi le diresh a mi senyor, a Esav: Ansi disho tu esklavo Yaakov: Kon Laban mori i me detadri asta agora».
I topamos en Rabenu Akadosh (Yehuda Anasi) ke le disho a Rabi Epes ke eskrivyera una karta de su nombrado para el rey Antoninus. Kuando se la trusho a afirmar, meldo la alatsa (rekomandasyon) i vido ke diziya: esta karta es de Yeuda el Nasi a nuestro sinyor rey Antoninus. La tomo i la izo pedasos i lo arifto (ambezo) dizyendo ke deviya de eskrivir: De tu esklavo Yeuda al senyor rey Antoninus. Disho Rabi Epes: Porke menospresya su mersed su kavod ? Le respondyo dizyendo: pues ke, yo so mijor ke mi aguelo ke les enkomendo a los esklavos ke le disheran a Esav: Ansi disho tu esklavo Yakov ? Dito rey Antoninus se kesho kon el, dizyendo: Makari tenga yo ventura de ser tu esklavo en Olam aba. I el taam (la razon) ke se abatyo tanto Yaakov delantre de Esav es para podestar en el, ke se afirme la beraha de Itshak ke lo bendisho a Yaakov, dizyendo yaavduha amim veyishtahavu leha leumim (te syervan los puevlos, i enkorvensen a ti las nasyones). I syendo Esav algun perdido, no le es ninguna grandeza a Yaakov kuando se enkorvara a el, por esto lo sonalso (alavo) Yaakov muncho a Esav para tenerlo por senyor i por patron i muy estimado komo rey, para ke kuando sera tyempo ke se afirmaran las berahot verna (vendra) Esav kon toda su grandeza i se enkorvara delantre de Yaakov.
I esto fue un punto muy delgado, ke si Esav tuvyera avizo de esta horfa (injenyo) de Yaakov se matava kon su mano en tal de no venir en esto, syendo ke esto fue mas ke tomarle la behora; ma el Shem Ytbarah le serro los ojos de Esav ke no entendyera en lo ke iva Yaakov i ke era su mekuvan (su eskopo).
I ay kyen dize ke este kavod ke le aziya Yaakov a Esav de yamarlo senyor era por tenerle myedo de lo ke lo amenazo por la behora ke le tomo; por esto lo estimava por patron, komo kyen dize tu eres el grande i akeya vendida de la behora no fue nada. I tanto se akavidava en esto, ke afilu en su lugar, ke era leshos de Esav munchos diyas, no lo yamava por su nombre kuando lo enmentava, solamente diziya: Mi senyor Esav; i los akavido a su djente ke kuando ivan en su shelihut i preguntavan a la djente por el, ke disheran: onde es la estada de nuestro senyor Esav ?
« I no entyendras ke me ize algun ombre grande i estimado, solamente pelegrino i no me aboreskas por las berahot de nuestro padre ke me bendisho dizyendo: eve gevir le aheiha (sey mayoral a tus ermanos) syendo ke no se afirmo en mi ninguna de eyas. I aun ke estuve kon Laban arasha (el negro), afirmi las 613 mitsvot i no deprendi de sus maasim (echos). I uvo a mi buey i asno, ovejas esklavos i esklavas; de todas las suertes me se topa a poko de kada koza. I de todas las berahot ke me bendisho mi padre no ay en mi solamente unos kuantos de los ditos. I lo mando a avizarlo a mi senyor ke no me aprovecharon akeyas berahot, ke kon esto topare grasya en tus ojos, i no me guardaras inimistad. I te syerva de avizo ke yo esto para venir onde ti por darte a saver ke mi korason tengo kumplido kon ti i bushko tu amistad ».
I no es ke todas estas avlas las mando a dizir a Esav, ke a el poko se le importa si afirmo las mitsvot o no, sino el rov (la mayoriya) de estas avlas las mando a dizir al sar de Esav por mano de los anjeles ke izyeron orasyon por el ke eskape de Esav.
I el taam ke mando los malahim es ke ya avizi en la perasha de Toledot ke lo ke se le eskuresyeron los ojos de Itshak fue por las lagrimas ke le kayeron de los malahim ke yoraron en la ora de la akeda (ligatura) de ver a Itshak en akel saar, i si no fuera esto no podia tener Esav ninguna demanda kon Yaakov por lo ke le tomo las berahot, ke teniya ke responderle Yaakov, dizyendo: « Vaday (syerto) ke el Shem Ytbarah no kijo ke tu te bendigas, i kon esto se syego Itshak, para ke no te konoska ». I kon esto era mukrah (ovligado) Esav de estar kayado, ama syendo uvo dito kavzo, topo lugar Esav de pelear kon Yaakov por las berahot, dizyendo: « Syendo ke mi padre a mi me enkomendo ke me trushera a komer para bendizirme, ke bushkavas tu a ir antes de mi ? ».
Por esto mando Yaakov malahim mamash a el sar de Esav para ke lo afalagen, ke ditos malahim ke mando eran los propyos ke yoraron en la ora de la akeda.
Agora veo ke ya vino la ora de eskapar mi emisyon, sin pueder eskapar la meldadura de este muevo foyeton. Si lo puedo la eskaparé el djueves ke vyene, si kyere el Dyo !
Edmond Cohen
