eSefarad Noticias del Mundo Sefaradi
Keridos amigos, aAki toparesh el teksto de mi emision de este djueves, ke es la kontinuasyon, i no el kavo, del foyeton sovre la chikez i la mansevez de Avram Avinu, asigun el Meam Loez. Komo del paganismo uno se va al monoteismo…i se toma kontra el rey Nimrod..
El program se puede sintir por Internet kada djueves a las 4 H O6 PM, ora de Paris, indo al sityo RADIO – la fréquence juive. Kale tener pasensya i asperar un poko, no se oye pishin.
Saludos a todos
Edmond Cohen
Paris, Fransya
MEAM LOEZ: AVRAM KONTRA NIMROD (2)
Saludos a todos los oyentes de la emisyon Muestra lingua, la emisyon en djudeo-espanyol fundada por el profesor Haïm-Vidal Sephiha i prezentada agora por vuestro servidor Edmond Cohen, kon Philippe en la kabina.
Komo a kada vez, vos akodro ke el proksimo atelye de konversasyon de la Asosyasyon Vidas Largas se tendra el martes 22 de janvier, de las dos i un kuarto asta las sinko, en el Centre Communautaire, 119, rue Lafayette Paris (10°), métro Cadet o Poissonnière.
El djueves pasado, vos empesi la meldadura de un pedaso de lo ke eskrivyo Yakov Huli, en su komentaryo de Bereshit en el Meam Loez, sovre la chikez i la mansevez de Avram Avinu. Lo empesi, ama no lo eskapi, i vo aprovar de eskapar oy esta meldadura. Ama antes, tengo de azer viduy (konfesyon) i demandarvos de pedronarme dos yerros ke ize:
En primero, vos meldi una abrevasyon komo syendo « el Santo Ytbareh », i esto fue dos vezes un yerro: de una parte, no es Santo, ama Shem, de otra parte, no es ytbareh, ama Ytbarah. Kaliya ke vos melde El Shem Ytbarah, i no el Santo Ytbareh. Rengrasyo el haham Daniel Farhi i el Senyor (muy haham afillu si no es haham) Yehuda Hatsvi por tenerme aklarado sovre mi yerro, ke veniya del livro de los profesores Maeso i Recuero, ke aviyan eskrito Ytbareh, i yo dishe komo eyos.
I esto no es todo: me burli un poko de estos dos profesores Maeso i Recuero, i esta vez sin derecho, dizyendovos ke syendo espanyoles, meldavan enfermedad kuando aviya eskrito hazinura, estrolojiya kuando aviya eskrito estrelyeriya, ets.
Esto era mal avlar kontra estos profesores. Meldando kon mas tino, me apersivi ke dyeron una komparazon entre la edisyon de Izmir de 1864 i la de Livorno de 1822. Yo teniya solo la edisyon de Izmir, ke aviya topado sovre internet. Ama en la edisyon de Livorno, ke por tanto es de antes de la de Izmir, esta byen eskrito enfermedad i estrolojiya. Ke verguensa: esto mos ambeza lo ke ya saviyamos, ke uno ke no save deve muncho bushkar antes de burlarse de un profesor, indimas de dos! Esto dicho, eyos son ke me izyeron yerrar sovre Ytbarah, i de otra parte, yo komo puediya endevinar ke aviyan dos edisyones diferentes a partir del mismo manuskrito?
Este viduy echo kon muncha umeldad, agora aboltaremos al Meam Loez. Vos aviya deshados kuando el rey Nimrod, venido kon muncha djente para matar a Avram, se espanto porke el Dyo ayudo a Avram, embiyando una nuve grande, al punto ke Nimrod i toda su djente se huyeron asta Bavel.
I aki kontinuo mi meldadura del Meam Loez:
Le disho el mallah Gavriel a Avram de nombrado de Shem Itbarah ke deviya de irse a Bavel detras de su enemigo Nimrod.
Respondyo Avram dizyendo ke no teniya ningun aparejo a poder ir, ni dinero para komanya del kamino i para un kavalyo i resto de gastos menesterozos para batalya; ubifrat (indimas), syendo asolado, ke podiya azer? Le disho Gavriel:
Savete ke no tyenes hekreah (menester) de ninguna koza, ke yo te yevaré en mi ombro asta dientro de Bavel, i de esto prevaras ke el Shem Ytbarah esta kon ti.
I ainsi en un punto, kuanto avrir i serrar el ojo, se topo Avram en Bavel. I fue arrodeando por toda la sivdad kon boz alta, dizyendo:
Adonay u aElohim, es uno i su nombre uno: Eloe ashamayim, ve Eloe aelohim, veEloe Nimrod (el Dyo de los syelos, el Dyo de los dyozes, el Dyo de Nimrod). I yo, Avram, so esklavo del Shem Ytbarah, i devesh de atorgar todos en esto.
Kaminando Avram por la sivdad, enkontro kon su padre i su madre, i les disho:
Ke avana (razon) tenesh de servir estas figuras de Nimrod arasha (el negro, el sin fey)? Boka tyenen i no avlan; ojos tyenen i no ven; i no ay de eyas ningun provecho.
Kuando sintyo Terah su avla, le lyevo a kaza i le demando ke le dishera kuando vino a Bavel. Le respondyo dizyendo ke en un diya fue bastante de kaminar kamino de kuarenta diyas. Presto fue Terrah i se lo konto a Nimrod, i todos kedaron enkantados de sentirlo. I ainsi torno Nimrod i se akonsejo kon sus savyos ke le amostraran algun remedyo. I fueron maskimim (de avizo) todos ke se apregone (anunsye) kon Bavel kual mente estan todos kombidados onde el rey ke les aze kombite syete diyas i ke se akomoden todas las plasas i botikas kon fyesta grande, i todos muy byen vestidos, de chiko asta grande,ke vengan ande Nimrod a gustar de su kombite. I ansi lo izyeron.
Estando Nimrod sovre silya de su reyno, mando a lyamar a Avram i vino kon Terah, su padre, i se fue derecho al lugar del rey i metyo su mano en la silya i la fue meneando muncho, gritando kon boz alta, dizyendo:
Uay de ti, Nimrod! ke eres kofer (sin kreer) en el Dyo de los syelos i en Avram, su esklavo fiel. Desdichado de ti ke no konoses al Dyo bivo i firme, ke es uno i su nombre uno, ni dorme, ni adormese, i tu vas detras de estos dyozes de palo ke no se resive de elyos ningun provecho.
I ainsi fue avlando i dezonrandolo a Nimrod de mal modo.Todas akelyas figuras ke aviyan alyi se kayeron de arriva abasho i kedaron echadas kon la kara para la tyerra. Nimrod kon toda su jente se kedaron dezmayados del myedo ke les entro de sentir los gritos de Avram, i kedaron dos oras espantados komo unos muertos. Kuando ya se retornaron, le demando Nimrod a Avram: Esta boz es tuya, o de tu Dyo?
Respondyo dizyendo: Mi boz es ke no so la kriansa mas chika de las kriansas ke kreo mi Dyo poderozo. Estonses Dyo kredito Nimrod i disho en prezente de todos:
Syerto ke tu Dyo es rey grande de todos los reyes, i no ay mas ke avlar.
I ainsi lo entrego en mano de su padre ke se fueran a su lugar le shalom (en paz).
Despues de diyas, kayo Terah hazino, i les rogo a sus ijos Avram i Haran ke vendieran algunas figuras para tener ke gastar. Ke sabres ke dito Terah era vendedor de figuras, i syendo hazino metyo a sus ijos en su lugar en la botika ke miren su trato. Un diya le demando Avram a su padre ke le dishiera kien es el Dyo ke kreo los syelos i la tyerra.Le respondyo dizyendo:
Ainda no lo konoses tanto tyempo ke estas en la botika, ke esta lyena de idolos i figuras grandes i chikas? Akelyos son los patrones del mundo, ke te krearon a ti i a mi, i a todas las kriansas.
En derecho se fue Avram onde su madre i la rogo ke izyera buenas komidas, ke keriya lyevarlas por prezente delantre de los dyozes a azer su orasyon. I ainsi tomo Avram todas las komidas de su mano i se enserro en la kamareta i estuvo todo el diya esperando a ver si espandyeran la mano para komer algun bokado, ve en kol ve en one (i no boz i no respondyen) (Reyes I, kapitulo 18 pasuk 26). I ainsi tomo la shuela (balta) en la mano i partyo todas las figuras i akavando metyo la shuela en la mano del tselem (idola) grande ke lo desho sano por hekreah (menester) ke sentiresh.
(Aki yo, Edmond Cohen avro una paranteza: esta istorya de Avram ke demanda a su padre kyen kreo al syelo i a la tyerra, ke se ve responder por su padre ke son las idolas, i ke despues demanda a su madre de azer komida para las figuras, las kuales no komen, esta istorya ya la konosesh si vos akodrash ke ya la meldi el djueves pasado, avlandovos de kuando Avramiko era una kriatura de tres anyos. Agora estamos avlando de un ombre de mas de 48 ke ya rompyo las idolas ande Nimrod, i ke kontinua de demandar a su padre kyen kreo los syelos i la tyerra, es komo si se aviya todo olvidado. La vedra me parese ser ke entre tantos midrashim (kuentos del Talmud) Huli eskojo dos midrashim ke deven ser espartidos en dos lugares diferentes del Talmud, i ke son a la vez el mismo i yene diferentes. En el primero Avramiko no rompe nada, en el sigundo Avram, ombre maduro, rompe las idolas. Esto dicho, syerro la paranteza i me abolto a muestro Avram ikonoklasto ).
Dito Terah sintyo los golpes komo kuando parten lenya, fue koryendo a la kamareta i lo topo a Avram ke estava salyendo de eya. I vyendo Terah todos los tselamim (idolas) despedasados, se determino de matarlo a Avram komo tuvo animo de azer tal koza. El se diskulpo dizyendo ke no tyene ninguna kulpa, ke su intisyon fue de alyegar un prezente a los dyozes, i syendo trusho la komida konpesaron (empesaron) los diozes chikos a komer antes ke el dyo grande de todos elyos espandyera la mano. De la ravya ke sintyo, los rompyo a todos, syendo no tuvyeron dereh erets (korteziya):
I esto lo prevaras de la shuela ke tyene en su mano. I si no te krees de mi, demandale a el i te lo dira kon su boka.
Mas se resendyo (ensendyo) la ravya de Terah de sentir tales avlas, dizyendo ke es mentira; klaro ke savido es ke estos dyozes no tyenen esperto de azer tal, syendo son de palo i pyedra.
Respondyo Avram dizyendo:
Pues komo das kredito ke son dyozes ke krearon el mundo, ke syendo no son provechozos, ni syenten ni se menean; ke avana (razon) tyenes de servirlos? I uay de ti i de todo este dor (jenerasyon) ke empleastesh toda guestra vida detras de patranyas! I avyendo Dyo poderozo en los syelos, asigun ya kansi de dizirvolo i no me azesh la kuenta, syerto ke guestro kavo deve de ser negro, asigun lo provaresh de los dorot (jenerasyones) pasados, dor Enosh i dor amabul (la del diluvyo), ke por servir avoda zara (idolas) fueron atemados. Por esto, padre miyo, vos rogo ke vos deshesh de servir patranyas i no seash kavzante ke vos venga algun dezastre grande.
I dyo un salto Avram i abasho el tselem grande i lo izo pedasos delantre de su padre, i se fuyo de alyi. Avriyo la botika i tomo dos tselamim i los ato kon una kuedra i los iva arastando por enbasho, gritando komo uzansa de los vendedores ke gritan para ke merken de elyos. I lo ke diziya era:
Kyen kere merkar un dyo ke no aze ningun provecho? Boka tyene i no avla; ojos tyene i no ve, pyes tyene i no kamina, orejas tyene i no syente.
I kuando veniya alguno a merkar, le diziya:
Uay de ti, ke eres de edad de 50 anyos, i te enkorvas a un dyo ke ay un diya ke se izo.
I kon esto se arrejistava (averguensava el ke veniya por merkar) i se iva.
Estando arrodeando la sivdad a vender los tselamim, se desho pasar una vyeja i le disho ke le eskojyera un tselem bueno i grande para servirlo. Le respondyo dizyendo:
Yo te vide la semana pasada ke merkates uno de Haran, mi ermano. I para ke kyeres sigundo?
Le disho la vieja ke kuando se fue de kaza vinyeron ladrones i lo rovaron.
Pues komo syerves a un dyo ke no puede eskapar a su alma, kuanta mas a otro?
Disho la vyeja:
Dime a kyen sirviré por dyo, ke no konosko a otro.
Disho Avram:
Savras ke en los syelos ay un dyo poderozo ke es dyo de Nimrod i Terah, i de todo el mundo.
I ke perro es Nimrod, ke lo tengas por dyo de servirlo?
Disho la vyeja:
Ayom arat olam (oy nasimyento del mundo, dicha ke se dize en Rosh Ashana i ke aki kyere dizir, si bueno lo entendi, ke para esta vieja era komo si nasiya solo este diya) i de agora endelantre serviré a tu Dyo. Ma kero ke me asegures ke provecho terné (tendré) por elyo.
Respondyo Avram dizyendo:
La una es ke todo lo te ke rovaron te verna (vendra) a su lugar; i la otra es ke eskapara tu alma de gehinnam (infyerno).
Disho la vieja ke le ambezara algunos byervos para ir dizyendolos. Le ambezo ke diga:
Adonay u aeloim bashamayim mimaal, veal aarets mitahat, en od ehad, veen sheni memit umehaye, ve Avram avdo neeman beto (el Senyor es el Dyo en los syelos de arriva i sovre la tyerra de embasho, i no ay dingun otro, ni ay sigundo ke aga morir i arrebivir, i Avram es su syervo, fiel de su kaza).
I ainsi dita vyeja torno en teshuva i se arrepintyo de lo pasado, i al sigundo diya topo a los ladrones i se kovro de elyos todo por entero. I iva el diya entero arrodeando por las plasas dizyendo ditas avlas ke le ambezo Avram i fue bastante dita vyeja de azer tornar en teshuva muncha djente, ombres i mujeres; ma alkansandolo a saver Nimrod, la mato. I se kedo pensando ke azer en Avram syendo vido ke el rov (la mayoriya) de la djente ya estavan de su vanda.
I tambyen ke estando Nimrod en un kombite entro Avram a su palasyo i rompyo todos los tselamim asigun le izo a Terah.
I syendo Nimrod se teniya por dyo i diziya ke kreo los syelos i la tyerra, le disho Avram:
Yo veo ke kada diya sale el sol de mizrah (oryente) se pone en maarav (oksidente); si tu tyenes poder de rejir ke salga el sol de maarav i se ponga en mizrah, estonses atorgaré en tu avla i me enkorvaré a ti; i si no, savete ke mi Dyo, ke me dyo fuersa de romper a tus idolos, el me dara poder de matarte a ti.
Muncho se ensansyo ( se arravyo) Nimrod de sentir tales avlas, i por la ora lo mando a la karsel enkadenado, i enkomendo Nimrod a los shomrim (guardyas) ke le dyeran pan solo sin agua. I estuvo un anyo entero en la karsel. I vino el mallah Gavriel i le izo un manadero (una fuente) de agua i kada diya le dava a komer de buen modo, i estava a su lado i no se espartyo del todo.
Despues de esto, akojyo Nimrod a todos los savyos de su reynado entero i les demando ke era el mishpat (el djusgamyento, aki la kondanasyon) de Avram ke dezonro a el rey i rompyo a los tselamim. I salyo el mishpat ke meresiya ser matado. I ainsi se apregono (anunsyo) por toda la sivdad ke todo kyen es amigo de Nimrod deve de traer una karga de lenya. I dito Nimrod teniya un orno muy grande en un kazal ke se yama Kasdim. Alyi se fueron todos i ensendyeron akel orno de modo ke estuvo tres diyas kon las noches, kemando a tanto ke no podiyan la djente de akeyas partes soportar la kalor, syendo ke se izo la sivdad komo un banyo kalyente. I se akojyeron el mundo entero, ombres i mujeres, a ver komo lo van a kemar a Avram.
A este momento de mi foyeton, penso ke vino el mijor momento para kedar en medyo de mi istorya. Kualo se va pasar? Es ke Avram se va pueder eskapar de lo ke se esta aparejando para kemarlo? Es ke este negrinyado de Nimrod va ganar?
Esto es lo ke savresh, keridos oyentes, si venish a oirme la semana proksima para la kontinuasyon de este foyeton del Meam Loez.
Al djueves ke vyene, si kyere el Dyo!
Edmond Cohen
