Muestra lingua: MEAM LOEZ – AVRAM KONTRA NIMROD (1) por Edmond Cohen

Keridos amigos, Aki toparesh el teksto de mi emision de este djueves, konsagrado a pajinas del komentaryo de Bereshit en el Meam Loez , paginas ke mos kontan la chikez de Avram Avinu asigun los midrashim del Talmud. Komo el teksto es mas largo ke lo ke puedo meldar en vente minutos, tendre de azer una kontinuasyon, i puede ser dos, porke no vos puedo deshar en medyo, sin saver lo ke va afitar despues, kon este negrinyado de rey Nimrod ke kyere mal a muestro Avramiko.

El program se puede sintir por Internet kada djueves a las 4 H O6 PM, ora de Paris, indo al sityo  RADIO – la fréquence juive. Kale tener pasensya i asperar un poko, no se oye pishin.

Saludos a todos
Edmond Cohen
Paris, Fransya

MEAM LOEZ: AVRAM KONTRA NIMROD (1) 

Saludos a todos los oyentes de la emisyon Muestra lingua, la emisyon en djudeo-espanyol fundada por el profesor Haïm-Vidal Sephiha i prezentada agora por vuestro servidor Edmond Cohen, kon Philippe en la kabina.

Komo a kada vez, vos akodro ke el proksimo atelye de konversasyon de la Asosyasyon Vidas Largas se tendra el martes 22 de janvier, de las dos i un kuarto asta las sinko, en el Centre Communautaire, 119, rue Lafayette Paris (10°), métro Cadet o Poissonnière.

I komo kada semana, mi emisyon es anunsyada por el empesijo de la famoza kantika Kuando el Rey Nimrod, la kuala fue eskrita, asigun lo ke se pensa, del tyempo del Rey Alfonso X de Castilla, ke reyno en los anyos 1280.

Esta kantika mos konta el nasimyento de Avraham avinu. El Tanah mos dize kaji nada sovre la chikez de Avram, ama los midrashim del Talmud son yenos de konsejas sovre su chikez i su mansevez. Yaakov Huli, el ke eskrivyo el empesijo del Meam Loez en 1730 kon su komentaryo de Bereshit, tomo todas estas konsejikas del Talmud i las izo una istorya entera ke mos konta en su komentaryo.

Ya vos dishe ke, grasyas a muestra amiga Gisèle Salmona Assuied, tengo de muevo esta ovra en la translitersyon en karakteres latinos echa por los profesores David Gonzalo Maeso i Pascual Pascual Recuero, ke me azen muncho mas kolay la meldadura. Yene kale ir a mirar el teksto en karakteres rashi, ke se topa agora sovre internet, porke estos dos profesores, al kavo al kavo, son espanyoles, i sin renderse kuenta trokan lo ke esta eskrito i meten onde en vez de ande, enkontre en vez de toparé, enfermo en vez de hazino, enfermedad en vez de hazinura, estrolojiya en vez de estrelyeriya, bendito en vez de bendicho, kojer en vez de akojerlo, entonses en vez de estonses, o dejo en vez de desho, eskrito en rashi kon un shin, ets.

Esto dicho, me ago un plazer de meldarvos lo ke mos konta Huli. No vo pueder todo meldarvos oy; tendre menester a lo manko de un djueves mas, sino dos.

Ama en primero kale ke vos melde los pesukim 27 i 28 del kapitulo 11 de Bereshit: « Y estas generaciones de Terah: Terah engendro a Abram, a Nahor y a Haran; y Haran engendro a Loth. Y murio Haran sobre faces de Terah su padre en tierra de su nascimiento, de Ur de Caldeos ».

Agora empeso mi meldadura del Meam Loez:

I dize el pasuk ke dito Haran muryo en vida de Terah, su padre, en Ur Kasdim, i por aki ayares todo el mesiut (el kavzo) de Ur Kasdim por entero. Ande sabres kual mente antes ke nasyera senyor Abraham Avinu era Nimrod el rey de todo el mundo, segun sentistes arriva, i era kofer (no kreiya) en la emuna (la fey) del Santo Ytbareh, i tanta gaava (orgulyo) teniya ke se prezumiya por Dyo i toda la djente de akel dor (jenerasyon) se enkorvavan a el i serviyan avoda zara (kulto pagano) asigun su orden ke les dava. I por avizo de esto dize el pasuk (kapitulo 10,pesukim 7 i 8): « Uvne Kush, Seba va Havila…ve Kush yalad et Nimrod » (Y ijos de Cus: Sevah, y Havilah…y Cus engendro a Nimrod ). Ke vos tyene de embarasar muncho ke deviya de kontar a Nimrod bihla (en jeneral) de Seva vaHavila i resto de sus ermanos, i para ke me dize a parte: « I Kush enjendro a Nimrod? Pero es avizo ke Nimrod se teniya por Dyo i estavan toda la djente enganyados en el, syendo les dyo a entender ke el krio los syelos i la tyerra i no savian ke Nimrod era nasido de mujer,, i ainsi pensavan ke Kush no tuvo mas ke sinko ijos,, ke son: Seba, Havila, Savta, Ra’ma, Savteha. Por esto dize: « I Kush enjendro a Nimrod », azyendo burla de akeya djente nesya (bova) ke lo teniyan a Nimrod por Dyo, ma el era ijo de Kush. I dito Nimrod era tohen (astronomo) i savyo en la sensya de la estrelyeriya i alkanso a saver kon su sensya ke tyene de naser un ombre en su tyempo ke le sera embaraso grande a dezenyegar su emuna.

La noche ke nasyo Avraham Avinu vyeron los savyos de Nimrod kon su sensya ke una estraya grande salyo de la parte de mizrah ( el oryente) i koryo por el syelo i englutyo kuatro estreyas de las kuatro partes del mundo, i se kedaron maraviyados de ver tal milagro i dyeron kredito ke seriya syerto de aver nasido akeya kriatura ke tyene de ser grande i kovrar fama i eredar toda la tyerra de Kenaan i matar a los reyes. A la manyana se akonsejaron dizyendo ke deviyan de darle avizo a Nimrod de lo ke vyeron la noche, porke:

–  Despues ke akontesera algo se tomara kon nozotros por lo ke no le dimos avizo i es aharayut (una responsabilidad) ke mos mate a todos. Por esto devemos de kontarle el suenyo kon la soltura, ke el mire su remedyo.

I ainsi fueron todos los savyos delantre de Nimrod dizyendo ke estuvyeron la noche en kaza de Terah, su mishne, ke los kombido por la fyesta del ijo ke le nasyo:

I despues del kombite salimos al kortijo a pasear i vimos esto i esto, i syerto ke sera lo ke vistes tu kon tu sensya: ke tyene de naser una kriatura ke tyene de eredar este mundo kon el otro i baldara tu emuna. Agora, si te plaze, kontentale a Terah kon dinero i tomale la kriatura i matala antes ke se aga grande i akonteska algun dezastre ke no lo podremos remedyar.

Dito Nimrod se lo agradesyo muncho por el avizo ke le dyeron i yamo a Terah i le disho:

– Un ijo te nasyo anoche; damelo ke kyero matarlo. I le aprometyo de darle una kaza yena de oro.

(Aki yo, Edmond Cohen, vos avro una chika paranteza para akodrarvos en primero de la kantika Kuando el rey Nimrod, ande sale en la estreriya i ve luz santa ke aviya de naser Avraham avinu. En sigundo topamos aki un nasimyento anunsyado por una estreya, i un rey ke kyere matar a kriatura, de espanto de lo ke va ser esta kriatura. Es un poko la istorya de Moshe Rabenu, i sovre todo la istorya de Jesus. Me parese ke los evanjelistos se inspiraron de los midrashim de la epoka kuando eskrivyeron sovre su nasimyento. Syerro la paranteza i abolto a mi meldadura):

I le aprometyo de darle una kaza yena de oro. Respondyo Terah, dizyendo:

-Yo esto pronto a tu komando i lo ke keras tu me daras.

I desho pasar unas dos oras avlando kon el otros kuentos de kozas del reynado, siendo era su mishne (ministro) i deviya de avizarle de todo lo ke se pasa. Despues le disho:

–  Sabras, senyor, ke una koza me akontesyo anoche i no tuve animo de azerla sin tu lisensya. Onde me vino tal fulano rogando ke le emprezente el kavayo mijor ke tengo i me prometyo de dar un lugar yeno de sevada (granos).

Le respondi dizyendo ke:

-Yo no le podiya dar palavra asta ke toparé kon ti, ke eres nuestro rey i patron del mundo, ke si te parese ke es buen trato lo aré; i kedimos en esto. Agora me esta asperando kon la repuesta. Te rogo ke me amostres el kamino de esto lo ke es bueno para mi, ke syendo so tu mishne, syerto bushkas mi provecho i no keres mi danyo.

Dito Nimrod se kedo enkantado i dyo kredito ke Terah salyo loko de sentirle tales avlas, i le respondyo dizyendo:

Si kon este meoyo rijes mi reynado, syerto ke sera atemado en poko tyempo, ke syendo un kavayo tan valido, komo ay metsiut de trokarlo kon dinero, kuanto mas kon sevada?

Terah lo desho ke atemara de avlar kon su ravya i despues le respondyo, dizyendo:

Syendo ke esto te peza tanto siendo un kavayo, ke sentiré yo de lo ke akometes, ke te venda a mi ijo por dinero, ke syendo lo matas, kyen me eredara mi azienda i ke bien espera el ombre mas ke esto?

Dito Nimrod ke sintyo la platika (el diskorso) de Terah kon el mashal (parabola) ke le trusho, se ensendyo kon mucha ravya de mal modo, a tanto ke ya pensava de matarlo. Vyendo Terah ke Nimrod estava kon el mal, se le echo a sus pies i le disho ke burlando estava, ke syerto el teniya ovligasyon de azer su komando:

I aun ke me kyeras matar, kon todo esto te entregaré en mi vida el ijo ke me nasyo i sus dos ermanos, solamente dame 3 diyas de tyempo asta ke avlaré kon mi mujer i resto de la mishpaha a ver si podré afalagarlos kon dadivas (regalos) i buenas palavras ke lo tomen a pasensya.

Dito Nimrod le dyo tyempo, asigun demando. Al terser diya mando a yamarlo i le izo hatraa (avizo) dizyendo ke afirmara su komando, ke sino deviya de ser kemado el i toda su famiya sin desharle ninguno de los suyos.

Vyendo Terah ke no ay remedyo, izo una hamsha (mentira), dehaynu (es dezir): Ke una esklava de las suyas aviya parido un ijo; se lo tomo i se lo entrego a dito Nimrod i tomo su dinero kuanto le aprometyo. Nimrod, kon muncho gusto, mato a dita kriatura kon su mano entendiendo ke era Avram, i kon esto se le repozo el korason i se olvido de eyo, i ninguno de sus savyos penso mas en akel petet (sirkunstansya).

I syendo Avram de tres anyos penso kon su daat (meoyo) a saver kyen kreo los syelos i la tyerra, i al prinsipyo entendyo ke el sol los kreo; i ainsi todo akel diya ordeno su orasyon al sol. Komo se izo tarde i se puzo el sol en maarav (oksidente) i esklaresyo la luna en mizrah (oryente) i a su deredor munchas estreyas, entendyo ke la luna kreo al mundo i las estreyas eran sus esklavos; i estuvo akeya noche ordenando su orasyon a la luna. Al otro diya, vyendo ke salyo el sol i se dezaparesyo la luna, disho entre si: -«Parese ke ninguno de los dos es patron del mundo, i syerto ay Dyo en los syelos ke rije el mundo».

Se fue ande Terah, su padre, i le pregunto ke le dishiese kyen kreo los syelos i la tyerra. Terah le trusho una avoda zara (idola) en la mano, i le disho:

Este es el Dyo ke te kreo a ti i a mi, i todo el mundo.

Se fue Avram ande su madre i le disho ke le izyera buenas komidas, ke las keriya yevar por korvan (ovlasyon) delantre de su dyo; i azyendolas, las tomo Avram i las ayego delantre de la avoda zara, i vido ke de el modo ke las puzo, ansi kedaron. I syendo travajo muncho para konoser al Santo Ytbareh, pozo la shehina (prezensya divina) sovre el i le dyo a entender ke todos akeyos idolos eran echos por mano de persona, i vino el malah Gavriel i le ambezo munchos sekretos.

I ay kyen dize ke vyendo el senyor de Avram (entre parantezas, Huli le da a Avram la onor de yamarlo senyor, ama no vos olvidesh ke esta avlando de una kriatura de tres anyos) a su padre i a su madre embatakados en el enganyo de la avoda zara, no le dyo gana de estar kon eyos. I de ayi se fue en la Yeshiva de Noah i Shem i se asento kon eyos a meldar sekretos de la Ley Santa; i estuvo aya 39 anyos retsufim (enteros) i no se lo supo ninguno. I meldando tanto tyempo kon muncho repozo i amistad grande i muncha gana, se izo haham grande i alkanso a saver kon su daat ke todo akel dor (jenerasyon) estavan enganyados i yerrados de servir figuras de palo i pyedra. I kuando entro en tres anyos enpeso a konoser al Santo Ytbareh, i syendo de 48 anyos lo konosyo por entero.

Despues de esto topo kon su madre i le dyo a entender partida de el djudezmo i kon taanot (argumentos) i razones la dezgano de su negro enganyo i le disho ke fuera onde Nimrod i le dyera avizo de todo. La madre fue koryendo a kaza i se lo konto a su marido kon alegriya grande de tener tal ijo bendicho. Ma syendo Terah rasha betahlit (pagano al ekstremo) i mishne de Nimrod, estava muy apegado en su emuna. I ainsi fue onde Nimrod dizyendo:

Akeyo ke vistes kon tu sensya, ke tyene de naser una kriatura en tu reynado ke tyene de azer olvidar tu emuna, te syerva de avizo ke es mi ijo, ke syendo mi mujer mala lo nyego de mi, i aun ke le vide la tripa grande, me enganyo dizyendo ke teniya una hazinura ke se renovava kada anyo.I kon esto lo nyego de mi i lo paryo i lo krio en sekreta mente sin tener yo avizo de eyo. Agora me konto ke en tantos anyos ke esta meldando Ley ajena i dando a entender ke ay otro Dyo en los syelos, ke akel es el verdadero i tu eres falso.

Dito Nimrod, ke sintyo todo este kuento, le tomo reada (espanto) grande i se akonsejo kon sus savyos ke le bushken su remedyo. Eyos le disheron:

Ke ay de espantar de una persona ke el mas chiko de tus esklavos puede akojerlo i meterlo en la karsel asta ke veremos su mishpat (jusgamyento) ke deve de ser?

Estonses vino el Satan en semejansa de persona i se echo delantre de Nimrod dizyendo ke se maraviyava muncho komo un reynado entero tengan myedo de una persona; i lo derecho es ke toda su djente se armen byen komo kuando van a la bataya i por muy baragan ke sea no valdra kon eyos. En akel punto salyo pregon (orden gritado) por todas las partes i se akojeron milaryas de djente byen armados i se fueron a trayerlo a Avram. Syendo vido akeya suma grande de djente, le entro muncho myedo i izo tefila al Santo Ytbareh, dizyendo:

Syendo ke yo lo ago por tu kavod (onor), mira de apiyadarme i eskaparme de estos enemigos.

I ainsi el Santo Ytbareh le resivyo su orasyon i mando al malah Gavriel ke le dishera ke no tenga myedo porke el Santo Ytbareh esta kon el. I ainsi abasho una nuve grande i se eskuresyo el mundo, i vyendo esto dita djente se boltaron onde Nimrod kon muncho myedo, a tanto ke Nimrod kon toda su djente se fuyeron de akeya sivdad i ke fueron a Bavel.

Aki me devo de kedar de mi meldadura, no porke lo kyero, ama ya vino la ora de eskapar esta emisyon djusto en medyo de mi istorya. Si vos interesa la kontinuaré el djueves ke vyene o un otro djueves.

Yene vesh ke ay muy pokos byervos turkos en el espanyol de Huli. Konti un solo en todo lo ke vos meldi, es el verbo enbatakar. Ama es yeno de byervos ebreos, algunos sin menester asigun mi, ama ansina eskriviya Huli. Vitesh tambyen ke uzava byervos espanyoles ke no dizimos tanto agora, komo myedo (agora dizimos espanto), travajar (agora dizimos lavorar), ets.

Al djueves ke vyene, si kyere el Dyo!

Edmond Cohen