eSefarad Noticias del Mundo Sefaradi
Keridos amigos,
Mi emisyon de djueves va ser la kontinuasyon de mi meldadura del komentaryo del Meam Loez sovre la atadura de Itshak
El program se puede sintir por Internet kada djueves a las 4 H O6 PM, ora de Paris, indo al sityo RADIO – la fréquence juive. Kale tener pasensya i asperar un poko, no se oye pishin.
Saludos a todos!
Edmond Cohen
Paris, Fransya
MEAM LOEZ ATADURA DE ITSHAK – 3
Saludos a todos los oyentes de la emisyon Muestra lingua, la emisyon en djudeo-espanyol fundada por el profesor Haïm-Vidal Sephiha i prezentada agora por vuestro servidor Edmond Cohen, kon Philippe en la kabina.
Komo ya lo savesh, empesi aze dos semanasla meldadura de un pedaso bastante largo del Meam Loez en su komentaryo de la atadura de Itshak, meldadura ke me va tomar unas kuantas semanas.
Ama antes de kontinuar mi meldadura, ay dos anunsyos ke vos tengo de azer , i mismo tres:
El primer anunsyo, es para dizir ke Este lunes a las 11 i un kuarto de la demanyana, yo era kombidado a asistir a la seremoniya ke se tuvo en los salones – i ke salones – de la Mayoriya de Paris, ke onorava el Profesor Sephiha kon la famoza medaya vermeil de la Sivdad de Paris.
La ke reprezentava el Mayor era su ayudante primera, yamada Anne Hidalgo, ke es agora la kandidata ofisyala del partido sosyalisto para las eleksyones munisipales ke se tendran en marso 2014. La sola koza ke parese sigura oy es ke el proksimo mayor de Paris sera una mujer, syendo ke kaji todos los kandidatos son mujeres, la de la syedra syendo Anne Hidalgo, la de la derecha syendo otra mujer, Nathalie Kosziusko-Morizet. La senyora Hidalgo izo un muy ermozo diskorso ande konto las razones ke aziyan ke el Profesor meresiya la medaya. En su diskorso akodro tantas linguas ke se ambezo Haïm, ama entre todas se olvido de nombrar l yidisch. I el yidisch tambyen! grito mi lehliya de mujer al lado de mi. I el yidisch tambyen, atorgo la Senyora Hidalgo… A la fin de su diskorso remityo ofisyalmente la medaya a Haïm, en prezensya de muncha djente, entre los kuales el Embashador de Espanya, el mayor del trezen arrondissement de Paris, la prezidente de la universidad Paris III de Paris, ande HaÏm fue profesor, el prezidente del Crif (Konsilyo reprezentativo de las Institusyones djudiyas de Fransya), el prezidente i el direktor del sentro komunotaryo de Paris, i por siguro toda la famiya de Haïm, i por empesar su mujer Inge, ke resivyo un bukete de rozas.
Despues Haïm rengrasyo a Anne Hidalgo kon un diskorso a la vez muy esmovyente i muy savyo, komo los save azer. Resivyo una ovasyon de toda la djente prezente.
Despues de la seremoniya, mos fuimos en un otro salon (grande komo un terreno de futbol) ande se teniya un bufe. Fue una muy ermoza koza, i mos fuimos todos alegres.
El sigundo anunsyo ke keriya azervos era para anunsyarvos ke el Memoryal de la Shoa, setenta anyos despues de la deportasyon de los djudyos de Selanik en 1943, va organizar una ekspozisyon ke se tendra en el Memoryal del primo de desyembre 2013 asta el 16 de marso 2014.
La prezentasyon de esta ekspozisyon se va azer el primo de desyembre a las tres, i empesara por un enkontro entre Rena Molho, istoryadera grega, Erika Perahia Zemour, direktrisa del muzeo djudyo de Selanik, i del testigo Isaac Revah (ke fue deportado en Bergen Belsen, ama salvado grasyas a su nasyonalidad espanyola. Bive agora en Fransya i por esto es ke lo konosko). Este enkuentro sera animado por Leon Saltiel, istoryador grego. Los ke son interesados tyenen de rezervar en telefoneando al numero 01 53 01 17 42.
La tresera koza ke keriya dizirvos es un anunsyo enteramente personal, dizyendovos ke pedri alhad a la tadre, i enteri martes, a mi mijor amigo, ke era komo mi ermano. Se yamava Leon Cohen, komo mi tiyo. Era de Tanger en el Maroko, i mos konosimos aze sesenta anyos manko una semana, el 9 de novyembre 1953, el diya despues del empesijo de muestros estudyos de derecho. Mos konosimos este diya. Pishin fuimos amigos, i lo kedimos asta alhad sin pelearmos ni una sola vez. Kuando mos kazimos, muestras mujeres se izyeron eyas mizmas amigas muy serkanas, i los kuatro eramos unidos komo los dedos de la mano. Ize parte de su famiya, izo parte de la miya. Eramos los dos avokatos, i munchas vezes lavorimos en djuntos.
Este maldicho alhad, es una parte de mi vida ke se fue.
I agora me keda de aboltar a mi meldadura del Meam Loez, ande mos aviyamos kedado sovre lo ke Khuli yama el djudezmo de Avraham, kijo dizir a la vez la konfyansa en el Dyo i la ovedensya sin tratar ni baratar.
I despues Khuli mos konta lo ke sige:
I ya topamos maase (istorya) en uno de los reyes de Moav ke les pregunto a su djente ke es el kavzo (la razon) ke los djudyos tyenen este buen avantaje ke se les aze nissim, lo ke no akontese a ninguno de los 70 ummot (nasyones). Le respondyeron, dizyendo: Savras, Senyor, ke Avraham, su padre, teniya un ijo regalado i le disho el Dyo ke lo degoye por korban (sakrifisyo) i ansi lo izo. I kon akel kavdal van komyendo todos los djudyos. Disho el rey: Yo tambyen tengo un ijo behor i kyero azer lo mizmo.
I se determino i lo kemo a su ijo por korban, asigun avizaremos de largo en la kopya de Neviim.
I aun ke ya lo viyan a Avraham azer muncha sedaka i resivir forasteros, i ser muy plazentero kon todo el mundo, no lo teniyan por hidush (koza mueva) porke diziyan: Syendo es tan riko, puede azerlo; ma si es ke era povre, no fuera tan bueno. I ainda puede ser ke este hasidut es por algun mekuvan (intensyon) i por enganyar a la djente. Ma agora en este kuento de la akeda atorgaron (admetyeron) todos ke su djudezmo era de alma i de korason i no por algun interes, sola mente por amistad del Santo Itbarah. Ubifrat (indimas) vyendo ke pasaron tres diyas i medyo, ke ya ay metsiut (koza de avlar) de azer una koza fuerte por amor del rey, dehaynu (es dizir): de echarse del tejado abasho o desharse kortar la kavesa, ke el tsaar es un punto; kuando muryo, eskapo. Ma no ay metsiut ke ben adam pueda soportar tsaar tanto tyempo por amistad del rey. I kol sehen (indimas) de degoyar su ijo regalado kon su mano, ke si era por mano de otro no era la pasyon tan grande. I syendo ke se kontento Avraham de ir kaminando 3 diyas para degoyar a su ijo presyado kon su mano kon alegria i gusto grande, komo si no fuera su ijo, esto es preva grande ke su djudezmo era kumplido.
I se rekresyo este kuento de la akeda por kuatro sibot (razones):
Una es ke ya avizimos arriva de la fyesta grande ke se izo kuando nasyo Itshak, ke kombido Avraham a 32 reyes. Agora diziyan los malahim (andjeles) kon el bet din (tribunal) de los syelos ke no es Avraham tan bueno, asigun parese; i la preva es ke izo tal kombite milagrozo i no tuvo virtud de azer un korban por kavod del Santo Itbarah, i syendo ke no tuvo este kargo, parese ke su djudezlo no es kumplido.
Dos es ke Avraham propyo se tomava tsaar de si para si, dizyendo; Komo ize yerro tan grande de no akodrarme de ayegar un korban de kual kyer koza por dar loores al Santo Itbarah ke me alegro el korason.
I todo akel dinero ke gasto en dito kombite, ke syerto seriya suma grande, lo tuvo mal empleado, syendo no se akodro de azer korban.
3 Es ke savresh kual mente Itshak i Ishmael teniyan pleto uno kon otro, ke aun ke Avraham lo echo a Ishmael de kaza, ma ya avizimos arriva ke despues de tyempo se adelanto Ishmael kon toda su famiya i se vino onde Avraham. I la taana (pretensyon) de Ishmael era dizyendo: Yo so mas grande ke ti, syendo ke me sirkusyo mi padre de 13 anyos, i no refuzi su palavra; lo kual ke tu de ocho diyas te sirkusyo, ke no estava en tu mano; i si era grande tal koza no te desharas azer.
Le respondyo Ishak dizyendo: Kon kortar un pedasiko de miembro te kontyenes tanto, i todo tu kavdal es porke te deshates kitar un poko de sangre? Ma yo syendo mansevo de 37 anyos si me dize el Santo Itbarah ke me deshe degoyar afirmaré su komando kon buen grado.
4 Es ke el diya de la seuda (el kombite) del berit mila suvyo el Satan a los syelos i avlo mal por Avraham, dizyendo: Senyor del mundo: A este vyejo le apiyadastes de azerlo enjendrar despues de 100 anyos, i azyendo tal fyesta grande no tuvo virtud de ayegar delantre de ti algun pidjoniko o palombika por korban? I por esto tengo yo muncha razon kuando vos digo ke ombre bueno no puede aver.
I Rabi Shimon Ben Yohay dize ke el Satan se fue en la kaza de Avraham komo un ani (prove) a demandar tsedaka, i no se apiyado de el de kombidarle algun bokado de la seuda, syendo Avraham estava embevesido en su fyesta, rijendo a los reyes ke komiyan en su kaza, i Sara estava entremetida kon dar leche a las kriaturas de la djente. I por esto avlo mal de Avraham, ke ya avizimos arriva en la perasha de Leh leha, kapitulo sesh, ke el diya de fyesta no basta kon dar tsedaka a los proves, si no tambyen kale kontentarlos kon alguna komida porke estan dezeozos.
I ay kyen dize ke el taam (la razon) fue para kitar el enganyo de la djente ke entendiyan ke de Avimeleh se kedo meuberet (prenyada) Sara, por esto le komando el Santo Itbarah ke lo ayegara por korban , ke de esto preven por syerto ke Itshak es su ijo de Avraham, ke si no era pasul (impropyo) para korban. I por avizo de esto dize el pasuk: I fue despues de las palavras las estas; kyere dizir ke por ditas avlas ke avlaron los malahim o el Satan por Avraham, le enkomendo el Santo Itbarah ke degoyara a Itshak, para darles a entender el djudesmo de Avraham ke es kumplido.
I syendo ke ditas avlas de los malahim i el Satan fueron en el propyo diya de la seuda, tendresh ke demandar por ke tardo la seuda tanto tyempo. Ma savresh ke fue rejido para publikar tambyen la grandeza de Itshak, ke aun ke era mansevo a lo mijor de su logramyento, i syendo Avraham ombre vyejo ke kon un dediko lo pudiya arondjar, kon todo esto no avriyo boka ni refuzo su palavra; i tambyen agora konosyo mas la grandeza de Avraham ke aun ke ya era muy vyejo, ke ya no asperava de tener ijos syendo ya teniya 137 anyos, kon todo esto afirmo el komando del Santo Itbarah . I por avizo de esto dize el pasuk : ve haelohim nisa et Avraham ( i el Dyo provo a Avraham); kyere dizir ke el Santo Itbarah le engrandesyo la fama de Avraham kuanto el mastil de la nave ke es muy alto i todos lo ven. Ke savresh ke el mastil de la nave en lashon hakodesh se yama nes. (Aki yo Edmond Cohen avro una paranteza para konfirmar ke el byervo nes en lashon tyene a lo manko tres sentidos: kyere dizir a la vez bandyera, mastil, el palo alto de la nave ke yeva las velas, i milagro. Syerro la paranteza).
Lo mismo fue esto, ke el kuento de la akeda kayo las bokas de la djente ke avlavan mal de Avraham, i todos dyeron kredito
I aun ke Itshak amostro djudezmo grande, ma no es tan koza de milagro, ke ya topamos munchos tsadikim ke se desharon matar al kidush hashem (por sanktifikasyon del Nombre). Lo kual Avraham ke pudiya dizir una taana (demanda) i refuzar en la avla del Santo Itbarah, dizyendo: Syendo ke ya me aprometiste ke kon Itshak se yamara a mi semen i de este ijo tengo de ver linaje grande, , komo me demandas agora ke lo degoye? I esta avtaha (promesa) de Itshak me la tenesh dicho munchas vezes, ke afillu el rey basar vadam (de karne i sangre) kuando apromete una koza dos tres vezes no desha de azerla, kuanto mas el Santo Itbarah, ke nunka se repyente de lo ke disho. ke su djudezmo era kumplido.
I ay kyen responde: Porke el tsaar de Itshak era una ora i no mas, ke kuando lo degoyava eskapava; lo kual Avraham ke se kedava amargo toda su vida.
I ansi veresh ke este kuento se yama akedat Itshak, syendo el tsaar de Itshak no fue si no de la ora ke lo maniato (ato); lo kual Avraham ke su tsaar fue tres diyas. I si tambyen es de alavarlo a Avraham, syendo podiya azer tefila (orasyon) al Santo Itbarah ke le emprezente la vida a Itshak i no le aga tal dezastre, sigun izo tefila por los de Sedom, ke estuvo un diya entero bushkando piyadades por eyos: kuanta mas ke konveniya azerlo por su ijo regalado ke otro byen no teniya; i a lo menos se teniya de mofinar (amostrar pena) i atristar de sintir tal komando; ke munchas mitsvot ay ke se toma muncho tsaar para azerlas; i las afirma la presona kon tsaar de alma, ke syerto ansi es su ovligo, porke si pensara la presona de no azer las mitsvot porke tyene tsaar, nunka afirmara una mitsva, syendo vemos ke ninguna mitsva se puede azer kolay (fasil, no es sola mi vava ke diziya kolay, el haham Khuli tambyen) ke todas son travajozas i se yeva tsaar por afirmar el komando del Santo Itbarah. Ma el Senyor de Avraham teniya un buen avantaje: ke todas las mitsvot, aun ke eran penavles, las aziya kon muncho gusto sin ningun agravyo.
Kon esto tengo de eskapar, no mi meldadura, ama por lo manko mi emisyon de oy.
Al djueves ke vyene, si kyere el Dyo!
Edmond Cohen
