eSefarad Noticias del Mundo Sefaradi
Keridos amigos, aki toparash el teksto de la emisyon de esta semanada.
Akavido los ke me oyen sovre internet desde paizes ajenos ke aki en Fransya entrimos el alhad pasado en la ora de invyerno, i atrazimos muestras oras de una ora
El program se puede sintir por Internet kada djueves, indo al sityo RADIO – la fréquence juive. Kale tener pasensya i asperar un poko, no se oye pishin.
Saludos a todos
Edmond Cohen
Paris, Fransya
LOS SEFARADIM DE HOLANDA
Saludos a todos los oyentes de la emisyon Muestra lingua, la emisyon en djudeo-espanyol fundada por el profesor Haïm-Vidal Sephiha i prezentada agora por vuestro servidor Edmond Cohen, kon Philippe en la kabina.
Komo a kada vez, vos akodro ke el proksimo atelye de konversasyon de la Asosyasyon Vidas Largas se tendra el martes ke vyene 14 de fevrero, de las dos i medya asta las sinko, al muevo adereso del 17 rue Pierre Semard Paris (9°), arriva del Square Montholon, métro Cadet. La entrada es la del lokal i no la del han.
El djueves pasado teniya una tal abashada, ke de toda manera dainda no s’eskapo – ande mi una abashada no es koza ke s’eskapa katikolay – ke no teniya dinguna boz, i no pude venir a la radyo para azer una emisyon. Pasaron una redifuzyon.
Yo keriya dizir dos byervos sovre la fyesta de Tu Bishvat, ama agora la koza ya se izo bayat, syendo ke la fyesta era ayer. Los djudeo-espanyoles aunidos en el CCJE organizaron un seder, ama yo no pude irme por modo ke eramos myerkoles, diya de mi baby-sitting…
Dunke oy no vos avlare de Tu Bishvat, i pensi avlarvos de la rika istorya de los Sefaradim de Holanda en jeneral, i de Amsterdam en partikolar. Para aparejar esta emisyon, lavori lo mas sovre Wikipedia en internet, ama tambyen sovre dos artikolos travados del estudyo dirijido por mi amigo Henry Mechoulan, intitolado Les Juifs d’Espagne Histoire d’une diaspora 1492-1992. El primer artikolo, de Yosef Kaplan, es intitolado La Jerusalem du Nord : la communauté séfarade d’Amsterdam au XVIIème siècle; el sigundo artikolo, de Renata Fuks-Mansfeld, es intitolado Les juifs séfarades des Pays-Bas du XVIIIème siècle à nos jours.
Por esto kale ke sepash dos o tres kozas sovre la istorya de la Holanda, sin las kualas no seriya posivle de entender la istorya de los djudyos de Holanda.
Primera koza : a la diferensya de lo ke se paso en toda la Evropa, parese ke no aviya djudyos en Holanda durante la Edad Medya. Deke? No se.
Sigunda koza : en 1492, kuando los djudyos son echados afuera de la Espanya, la Holanda se topa basho la dominasyon del duke de Bourgogne Philippe le Beau, ijo de Marie de Bourgogne (eya misma ija de Charles le Téméraire) i del emperador Habsbourg Maximiliano de Austria . Tyene 14 anyos i se va kazar en 1496, a la edad de 18 anyos, kon Juana la Loka, ija de los Terrivles Reyes Katolikos, i se va azer rey de Castilla. Esto todo para dizir ke no es en Hollanda ke se puediyan pensar de ir los djudyos kuando fueron echados de Espanya, syendo ke la Hollanda va ser unos kuantos anyos tyerra espanyola.
Komo ya lo savesh, pokos eran los paizes kristyanos de Evropa dispuestos a arrekojer los poveretos djudyos espanyoles en 1492. Bendicho fue el Sultan de Turkiya Beyazit II. Ama yene uvo un pais kristyano, muy serka de Espanya, ke arrekojo los djudyos (kon pagamyento): fue el Portugal, i munchos de los djudyos, entre irse leshos en un pais deskonosido komo la Turkiya, o irse en Portugal, elijyeron el Portugal.
Malorozamente, el rey de Portugal, Joao II, se muryo en 1496, i su ijo, Manoel Iero, se kazo kon Isabel, otra ija de los Reyes Katolikos, i en desyembre este rey ordeno komo sus suegros la ekspulsyon de los djudyos, ama en vedra no les permityo de irse i los konvertyo por fuersa a todos. Un diya vos kontare aki lo ke fue la istorya trajika de los djudyos del Portugal.
Para oy, me vo kontentar de dizirvos ke la mayoriya de los djudyos dichos portugezes fueron, desde 1497, djudyos venidos de Espanya, avlando espanyol, i kristyanos forsados, anusim en ebreo. En el fondo de sus korasones, kedavan djudyos i keriyan fuir del Portugal. Ama komo fuir? I, sovre todo, ande ir?
Lo ke rendiya las kozas un poko mas kolay en kuanto a los paizes kristyanos de Evropa ke no achetavan a djudyos, es ke los djudyos venidos del Portugal paresiyan kristyanos. Esto es lo ke permityo, por egzemplo, a djudyos venidos del Portugal de venir en Fransya i estableserse en Bordeaux o Bayonne, komo ya lo konti aki.
En Holanda, los Olandezes, en mayoriya protestantes, se salyeron a poko a poko de la dominasyon katolika espanyola, i fundyeron en 1579, entre varyos senyores de Holanda, la Union dicha de Utrecht ke va dar en 1581 la Repuvlika dicha de las Provinsyas Unidas. Esta repuvlika de protestantes proklama la libertad relijyoza, lo ke es koza mueva en Evropa kristyana, en jeneral katolika i intolerante. I por siguro esta mueva situasyon interesa muncho a los poveretos djudyos de Portugal (i no solo eyos).
A poko a poko, kon muncha prudensya, unos kuantos djudyos venidos de Portugal a la fin del siglo 16 i al empesijo de los anyos 1600, empesan a ayegar en Amsterdam, i yene al empesijo kontinuan a azerse pasar por kristyanos, lo ke son ofisyalmente.
man
Tomaremos komo egzemplo uno de los mas konosidos, kon Spinosa, de los djudyos de Holanda, kyero avlar de Manasse Ben Israel.
Kuando nase Manasse Ben Israel en 1604, se yama Manoel Dias Soeiro. Ya aze tres jenerasyones ke sus antepasados son sözde katolikos del Portugal. Ama ya pudyeron fuirse asta la isla de Madeira, isla portugeza del oseano atlantiko, i es aya ke nase Manasse.
De aya sus paryentes se van a Amsterdam i pishin echan la karatula de katoliko, se amostran ofisyalmente djudyos, i el chiko Manoel se aze Manasse, su haliz nombre eskondido, i en 1610, a la edad de 6 anyos, empesa de ambezarse la relijyon djudiya en la mueva yeshiva de Amsterdam, tenyendo komo profesor el haham Isaac Uziel, espanyol nasido en Fez, en el Maroko, i venido en Amsterdam para avrir aya su yeshiva.
Entremyentres los djudyos de Amsterdam se organizan en komunita yamada Beth Yaakov (la kaza de Yaakov) kon un haham, Joseph Pardo, venido de Selanik. Verso 1608, una sigunda komunita se forma, yamada Neve Shalom.
En 1616, una ley vyene dizir ke es proibido a los djudyos de konvertir al djudaismo un kristyano, komo de tener relasyones seksuales kon mujeres kristyanas. Esta ley, si se melda byen, vyene dar a los djudyos derecho de bivir en Amsterdam, afillu si es kon estas kondisyones.
De la misma manera, es proibido para los djudyos el komersyo de detaye i tambyen de azer parte de una gilda, diremos una korporasyon. Kapara! Los djudyos azen negosyo internasyonal, de asukar, de lana, de seda, de tutun, i se meten tambyen en la taya de los diamantes. Los sefaradim son mas de 1.000 en Amsterdam en 1620. Los djudyos sefaradim moran en una male de tres kayes, i el famozo pintor Rembrandt biviya en una de estas kayes en medyo de los djudyos, lo ke da a entender deke pinto tantos djudyos i djudiyas, inkluyendo su amigo Manasse ben Israel.
En 1632 nase en Amsterdam, en una famiya de orijen ispano-portugeza de anusim, un syerto Baruch Spinoza, del kualo vamos a avlar mas despues. Ama antes, aboltaremos un poko a Manasse Ben Israel, ke deshimos en 1610 a la edad de 6 anyos. Entremyentres se engrandese asperando la venida del Mashiah, anunsyada komo serkana por la Kabala.
Ama para ke venga el Mashiah, kale ke los djudyos se topen en todas partes del mundo, inkluyendo la Ingletyerra, de ande los djudyos an sido echados en 1290. Por esto Manasse se va en Ingletyerra, para konvenser Cromwell de deshar aboltar los djudyos en Ingletyerra. Eskrive a su entisyon el livro Defensa de los Djudyos, para amostrar ke los prinsipes tyenen interes de tener djudyos kon eyos.
No reushe pishin, ama ya sembro una idea ke va dar sus frutos despues. Manasse eskrive en ebreo, espanyol, portuges i latino. I funda una basmaane para imprimar los eskritos djudyos. El mismo eskrive en espanyol, en 1650, el livro Esperenza de Israel, sovre la venida serkana del Mashiah, i 5 anyos mas despues, en 1655, su otro livro en espanyol :Piedra gloriosa, o la estatua de Nebuchadnesar. Me akodro ke mi amigo Henry Mechoulan dyo una konferensya, aze unos dos anyos, sovre este livro ke puvliko kon sus komentaryos i ke konose byen. Manasse estudya la profesiya de Daniel, en el kapitulo 2, pesukim 37 a 55, del Livro de Daniel en el Tanah, asigun la kuala una pyedra destruye una estatua sonyada por el rey de Babyloniya Nebuchadnetsar, el ke destruyo a Yerushalayim i al Bet Amikdash. Danyel anunsya en el pasuk 44 un kinto reynado ke no sera nunka destruido, ama no dize kual sera este reynado, i Manasse responde : sera el puevlo de Israel, i la pyedra es el Mashiah ke destruyendo la estatua permitira la venida de este kinto reynado.
Este livro, komo vos dishe, fue puvlikado en 1655. Un anyo solo mas despues, la komunita de Amsterdam da un herem muy duro i severo kontra Baruch Spinoza, aedado de 23 anyos syendo ke nasyo, komo vos dishe, en 1632. El teksto del herem es konosido : Spinoza es maldicho, dinguno le deve avlar ni aserkarse de el, ni meldar kuakyer de sus eskritos . Ama, koza kuryoza, no se save lo ke izo, disho o eskrivyo Spinoza para arreyevar tala maldisyon. El herem no lo dize, solo mos dize ke « kometyo aktos monstruozos », sin otra presizyon.
Esto dicho, es vedra ke konosemos lo ke pensava Spinoza por los livros ke eskrivyo, i es klaro ke su palavra era muy libera, i kontrarya a los ensenyamyentos de los hahamim : Su filozofiya asemeja el Dyo a la Natura, el ombre aze parte de la natura, no es Moshe Rabenu ke eskrivyo el Humash, ets. La mayoriya de las ovras de Spinoza fueron puvlikadas despues de su muerte, en 1677, a la edad de 44 anyos.
A propozito de Spinoza, vos kyero kontar dos konsejikas :
La primera, la oyi de Alain Bombard, este biolojisto fransez ke se izo batireado veluntaryo en 1952, para amostrar ke uno puediya sovrebivir sin nada de bever ni de komer, en medyo de la mar, bevyendo un poko de agua del mar o esprimyendo la agua de los pishkados ke lograva de peshkar, i komyendo plankton aferrado kon una red. I kualo azer entremyentres? « Me tomi kon mi La Etika de Spinoza, dizyendome ke la iva meldar soliko i kyeto. Ama kon la mijor veluntad, no pude! » konto Bombard, ke se kedo ansina mas de dos mezes en medyo de la mar.
La sigunda konsejika, es lo ke yo mismo oyi a la radyo. Eramos en un djugo de kultura, il el animador, kreo ke era el famozo Pierre Bellemare, demanda: « kualo era el haliz nombre de Benediktus Spinoza? » Dinguno le save responder. I Bellemare, meldando sus papeles, da la repuesta : « Se yamava Baruch. Porke era olandes, i en olandes Benediktus se dize Baruch! » Ermoziko, no?
Esto dicho, no kale pensar ke solo uvo en Amsterdam en esta epoka Manasse ben Israel i Baruch Spinoza . Fueron munchos los hahamim, los poetas, los eskrivanos djudyos, i la basmaane de los djudyos de Amsterdam lavorava sin kedar, puvlikando en espanyol o en portuges traduksyones de las grandes ovras de la literatura djudiya en ebreo, komo hovat alevavot de Bahya Ibn Paquda, o el Kuzari de Yeuda Halevi, ets.
Los viajadores kontan komo la djente djudiya baylava en las kayes en tyempo de Purim, o fraguavan sukot delantre de sus kazas en el tyempo de esta fyesta. Era un tyempo de grande libertad i de buena amistad kon los kristyanos.
A poko a poko, los sefaradim se metyeron a avlar olandes. En los anyos 1720, el espanyol era solo para el kal.
Esto dicho, la situasyon ekonomika de los sefaradim se abasho mas i mas, por varyas razones, i los sefaradim se emprovesyeron mas ke los ashkenazim (yamados los tudeskos), al empesijo pokos, ama ke a poko a poko eran mas i mas.
Komo en Fransya, los djudyos keriyan una emansipasyon kon los de los mismos derechos ke los kristyanos. Es la yegada de las armadas fransezas de la Revilusyon ke va permeter en 1796 ke por la primera vez los djudyos sean rekonosidos sivdadanos olandezes.
Lo ke se paso entonses, i ke konta Renata Fuks-Mansfeld en el artikolo ke vos dishe, es la rezistansya de los parnassim kontra el modernismo, no keryendo mismo aunirse kon los ashkenazim. Kuando en 1815 los Fransezes se fueron i ke vino un rey Olandes, Guillaume Iero, reorganizo el djudaismo en el pais, ovligando los chikos djudyos de ambezarse la lingua i la istotya olandezas en las eskolas djudiyas.
A poko a poko los djudyos se mesklaron a la sosyeta olandeza, los sefaradim i los ashkenazim se kazaron entre eyos.
Komo veo ke el tyempo pasa, no kyero eskapar esta emisyon sin avlar de la shoa en Holanda. Los Almanes empesando los aferramyentos i deportasyones de djudyos, los ovreros de Amsterdam se metyeron en grev el 24 de fevrero 1941. La Holanda es el solo pais de Evropa ande se vido tal koza. Los trasportes, las aktividades del puerto, se kedaron munchos diyas. Naturalmente los Almanes aogaron esta grev, i las deportasyones kontinuaron. Los Almanes kontaron ke aviya 4.300 djudyos dichos portugezes en Holanda, entre los kuales 3.800 en Amsterdam. Fueron todos aferrados, komo los otros, inkluyendo la famoza Anna Franck. En 1940 aviya 160.000 djudyos en Holanda, entre los kuales 16.000 refujyados de Almanya i 8.000 de Evropa del Este. Solo 20.000 se sovrebivyeron, entre eyos solo 200 djudyos portugezes.
200 djudyos para el grande kal maraviyozo de los sefaradim, la Esnoga, fraguado en 1672. En 1970, me topi en este kal para un shabath, eramos unos kuantos fransezes venidos en Amsterdam para un kongreso de los sefaradim evropeos, i entre eyos el profesor Haim Vidal Sephiha.
Agora este kal, asendido dainda solo kon kandelas, no ay elektrik, es solo avyerto para Rosh Ashana i Kipur.
Malorozamente kreo ke los djudyos sefaradim de Holanda son agora mas un rekodro ke una realidad .
Al djueves ke vyene, si kyere el Dyo!
Edmond Cohen
