Muestra lingua: LOS REKODROS DE SABI SOULAM por Edmond Cohen

Keridos amigos, vos do el teksto de la proksima emisyon del programa.

El program se puede sintir por Internet kada djueves, indo al sityo RADIO – la fréquence juive. Kale tener pasensya i asperar un poko, no se oye pishin.

Saludos a todos

Edmond Cohen – Paris, Fransya

UN

LOS REKODROS DE SABI SOULAM

Saludos a todos los oyentes de la emisyon Muestra lingua, la emisyon en djudeo-espanyol fundada por el profesor Haïm-Vidal Sephiha i prezentada agora por vuestro servidor Edmond Cohen, kon Philippe en la kabina. 

Komo a kada vez, vos akodro ke el proksimo atelye de konversasyon de la asosyasyon Vidas Largas se tendra el djueves 3 de fevrero, de las dos a las kuatro i medya-sinko, en el Centre Communautaire, 119 rue Lafayette Paris (10°) métro Gare du Nord o Poissonnière. Este diya tendremos una konferensya de muestro amigo Frederic Viey sovre los djudyos rusos en Kina al kavo del siglo 19. Para los ke no son myembros de Vidas Largas o de JEAA kostara 6 €, lo ke kyere dizir ke va ser de baldes para los myembros de la una o de la otra asosyasyon…Los ke son interesados son rogados de rezervar en eskrivyendo a Vidas Largas, 23 rue du Dr Potain, escalier B, boîte 27, 75019 Paris. 

Afillu si oy estamos en diya de Tu Bishvat i si, por esta okazyon, vos embiyo a kada uno de vozotros, keridos oyentes, mis dezeos los mas kalorozos de hag Sameah, yene, komo lo dishe la semana pasada, no vos avlaré oy de Tu Bishvat porke todo lo ke yo era kapache de dizir sovre esta fyesta, ya lo dishe en mis emisysones de los anyos pasados . 

De otra parte, komo ya lo savesh, el djueves ke vyene 27 de janvier, va ser, komo kada anyo, el dya mundyal del olokosto, asigun lo dechido la ONU. Al lado de este diya mundyal del oloksto ke kae kada 27 de janvier, ay tambyen el Yom Ashoa ke dechido el Estado de Israel para kada 27 de nissan, i ke va kaer este anyo el alhad primo de mayo. 

Para onorar el diya mundyal del olokosto, me pensi de meldar los rekodros de muestro amigo Sabi (Sabetaï)  Soulam, ke topi sovre un papel ke arresivi de Alain de Toledo, Prezidente de la asosyasyon Muestros Dezaparesidos. Kuando meldi los rekodros de Sabi Soulam, pishin le demandi la otorizasyon de trasladar en muestra lingua lo ke aviya eskrito en franses, i de meldarvos esta traduksyon miya para el diya del olokosto. I komo la meldadura va ser un poko larga, me tomo de antes i empeso de oy para eskapar, si kyere el Dyo, al djueves ke vyene i ke sera el diya mundyal del olokosto.

Antes de empesar mi meldadura vos kyero dizir ke konosi a Sabi porke el es ke se okupo en todo el mueven arrondissement de Paris de organizar las komemorasyones de los ijikos i ijikas aferrados en kada eskola del mueven arrondissement i embiyados en Auschwitz. Ya vos avli aki de unas de estas komemorasyones. No tengo menester de dizirvos ke egzisten tales komemorasyones tambyen en kada uno de los otros arrondissements de Paris.

Antes de meldar sus rekodros en este papel ke vos dishe, lo konosiya por su lavoro por la memorya de tantos ijikos i ijikas, ama no konosiya su istorya suya. Esta es ke vos vo kontar agora : empeso mi meldadura de sus rekodros ; es agora Sabi Soulam ke avla por mi boka :

Mi padre Bension Haïm Yaco Soulam nasyo en Constantinopla en 1901, i vino en Fransya en 1924 para no azer askerlik, porke los djudyos teniyan un rejimen partikular muy duro. Teniya un ermano en Turkiya, Albert. No vino direktamente en Fransya, paso en primero por Espanya. Aziya los merkados.

Mi madre se yamava Rebecca, nasida Bensasson en Bursa, Turkiya de Asia, en 1900. Vino en Fransya en 1924. Teniya deshado dos ermanos en Turkiya, Yakim i Behor ; su padre (mi papu) se aviya muerto en la armada turka, durante la primerra gerra mundyala, su madre (mi vava) se kedo bivda. Mi madre konosyo mi padre en Paris i se kazaron en 1925.

Yo nasi en Paris en el dodjen arrondissement el 18 de avril 1929, teniya una ermana nasida en 1928 i ke se muryo en Israel en 1996, i ke fue enterrada en Yerushalaïm. Mi haliz nombre es Sabe taï.

Moravamos 42 rue Godefroy Cavaignac en el 11en arrondissement.Mis paryentes eran de nasyonalidad turka no rekonosida por sus Governo, kijo dizir ke para la pulisiya franseza eran konsiderados komo turkos sovre sus papeles, ama no rekonosidos por el konsulado turko. Komo turka mi madre no yevava la estreya amariya, ama yo ke era franses, si.

Kuando la gerra empeso en 1939, estavamos en vakansas en una sivdadika yamada Les Sables d’Olonne. Mi padre se fue en Paris para prezentarse komo voluntaryo, i fue inkorporado en la armada franseza, en la artiyeriya de montanya en Grenoble.

Kuando el muevo governo de Vichy firmo el armistisyo kon los Almanes en 1940, la Fransya fue dividida en dos partes, una parte norte okupada por los Almanes, i una parte sud yamada parte libera, dirijida por el muevo governo de Vichy.

Mi padre fue demobilizado en Lyon, en la parte sud, i le tomo unos kuantos mezes para abolatr en Paris, porke kon las muevas leyes rasyalas del governo de Vichy los djudyos no eran otorizados de pasar la linea de demarkasyon entre la parte sud i la parte norte, i a la rovez.

Zaten no se komo izo para aboltar. Torno en Paris i su komersyo aviya sido aryanizado : asigun las mueves leyes de Vichy todos los komersyos djudyos aviyan sido tomados por administradores non djudyos.

Los 20 i 21 de agosto 1941, uvo el primer aferramyento de masa, el onzen arrondissement fue enserrado por la pulisiya franseza, ke aferro solo a los ombres ; mi padre fue entre los aferrados i internado en Drancy.

Los primeros mezes en Drancy fueron terrivles, sin letras, sin paketes, syertos se muryeron de ambre, de hazinura. De espanto de epidemiyas unos kuantos fueron liberados.

El fakto ke algunos pudyeron salir de Drancy entretuvo una syerta iluzyon. Mos kreimos ke ivan a ser todos liberados a poko a poko.

Despues de sej mezes la korrespondansya fue permetida sovre chikitikas kartas miradas por la sensura, i aviyamos establesido una korespondansya kodada medyo en franses medyo en djudeo-espanyol, i pudimos embiyar paketes de komida.

En avril 1942 kumpli minyan en el kal del 7 rue Popincourt (Al syete), mi padre me aviya eskrito de Drancy de byen ambezar mi perasha. Las deportasyones no aviyan dainda empesado.

Fue deportado a Auschwitz el 18 de septyembre 1942 por el treno 34 .

No topi dinguna trasa de el, en Auschwitz mismo, ande me fui a mirar los arshivos del kampo.

El 26 de mayo 1942, mueva ley kontra los djudyos, ovligasyon de yevar la estreya  amariya desde los 6 anyos, estreya ke tuvimos de merkar kon muestros tiketes de teshido. Teniyamos de irmos solo en el ultimo vagon del metro, era proibido de irse a la pisina, al sinema, proibidas las uertas publikas (Sabi no lo dize, ama es konosido ke aviya eskrito : proibido a los perros i a los djudyos) , kaliya kedar en kaza desde las ocho de la tadre. Tuvimos de yevar las bisikletas i las makinas de radyo al karakol ; no mas telefono.

Despues del aferramyento de masa de los 16 i 17 de julyo 1942 (dicha del Vel d’Hiv : el velodromo de invyerno) ande por la primera vez las mujeres, las kriaturas, los vyejos, los hazinos, fueron aferrados, la vida se izo un infyerno, los aferramyentos eran a kada momento , en kaza, en la kaye. Yo aziya parte de los skoutes djudyos, i resiviyamos informasyones de aferramyentos posivles, i aviyamos kreado grupos para akavidar a la djente ke aviya sekana ke sean aferrados. Tres vezes sovre kuatro la djente mos diziya « ama ande kyeres ke mos vayamos, ijiko ? »

Mos ivamos a eskondermos munchas famiyas en djuntos en una kamareta vaziya ke una vizina mos emprestava, kaji sin pueder durmir, i a la demanyana kaliya ir a la eskola.

Yo me iva en el kolejyo Arago, i me ize estableser una karta de estudyante kon mi foto, komo egzistiya en esta epoka, kon el nombre de Roger Sabatier. El administrador del kolejyo ke me la izo saviya muy byen ke mi nombre era falso, me miro, se kedo shupeli un momento, i me metyo su mur sovre mi karta sin dizir nada.

El 20 de mayo 1944 dos inspektores fransezes vinyeron aferrarmos en kaza. Deviyamos ser en las 7 i medya, teniyamos una mujer eskondida ande mozotros, Mme Albouer, ke se eskondyo debasho de los kolchones. Mi madre yevo los pulizes verso la ventana para amostrarles los papeles, i yo avri la puerta i me fuyi tomando mi ermana por la mano. Eya se eskondyo en el numero de la eskalera, yo me arresvali las eskaleras komo un relampago, uno de los pulizes me korryo detras. Muestra kaza teniya dos salidas, tomi la chika, el pulis tomo la grande, i no me vido. Ama yo vide irse mi madre. Me suvi yene ande morava para azer salir Mme Albouer, tuve de romper la puerta i azer saltar el mur de la polisiya.

Mi madre fue yevada direktamente en Drancy, i fue deportada el 31 de junyo 1944 por el treno 76.

En Drancy mi madre enkontro una de sus primas, Esther, ke morava en Champigny, era kon sus tres kriaturas, izyeron el viyaje en djuntos asta Auschwitz. A la yegada, las kriaturas yoravan, mi madre tomo uno en los brasos, i komo yorava muncho mi prima lo tomo atras. Mi prima se fue direktamente a la kamareta de gaz, mi madre se hue a lavorar. (Aki yo Edmond Cohen avro una paranteza : ya entenditesh ke si al momento de la seleksyon la madre de Sabi aviya dainda tenido la kriatura en sus brasos, uvyera sido pishin embiyada eya tambyen en la kamareta de gaz. Syerro la paranteza, i kontinuo mi meldadura) :

Un nes, mi madre teniya una fuersa de vida ekstraordinarya. Kuando los Almanes desharon el kampo, la desharon komo kaji muerta, teniya el typhus.

Vido ayegar los Rusos el 27 de janvier 1945, mongoles ke pasaron sin okuparse de eyos, orozamente aviya unos kuantos zabites djudyos ke los tomaron en karga.

Fue kurada por los Amerikanos durante unos kuantos mezes, komo paso de los Rusos a los Amerikanos, no se. En vedra nunka avli de klaro kon mi madre, deke no lo se, puede ser por pudor, no es mas posivle agora.

Mi madre la topi el 30 de mayo 1945 en el Hôtel Lutetia ke era el Sentro ande yegavan los deportados, yo era de servisyo kon los skoutes djudyos, aziyamos la resivida de los deportados, mi madre me rekonosyo, de espalda. Dainda oygo su grito : « Sabi ! » I se desmayo.

El ke no konosyo la atmosfera del Hôtel Lutetia no konosyo nada de la mizerya de toda esta djente ke veniyan bushkar a paryentes, kon fotos, yenos de esperansya.

Mi ermana, kuando me aviya eskapado, se fue a bushkar avrigo ande una prima ke morava en Miromesnil i aya teniya un eskondijo. Acheto mi ermana, ama no teniya lugar para mi ; me disho «  si kyeres, tenemos muestra morada ofisyala, tyene dos salidas, si vyenen a bushkarte tu puedras fuir por los tejados ». Bivi un poko aya, un poko kon los skoutes, sorreteando de aki i de aya asta la liberasyon de Paris el 25 de agosto 1944.

De los skoutes no kedava muncho. Despues del aferramyento del 16 de julyo 1942, de un grupo de 35, mos kedimos  4 o 5, i mos yamimos « le dernier carré » (el ultimo kuadrado, komo los granaderos de la Guardya franseza en Waterloo). Los kapos ya aviyan pasado en la Rezistansya en la famoza « sejena » ande sorretei un poko kon eyos .

Mi ermana se hue en Israel en 1948, se muryo en 1996. Mi madre se muryo en 1974, es enterrada en Yerushalaïm.

Ansina Sabi eskapa sus rekodros del tyempo de la gerra. Me disho ke uvyera pudido kontar muncho mas, ama ke no kijo apretar mas los korasones…A mi ya me lo apreto bastante, afillu si ya konosi munchas istoryas asemejantes : kada djudyo de este tyempo puede kontar tanto i tanto. Komo puede ser ke ayga en Fransya djente, komo Faurisson,  ke tenga la ozadiya de dizir ke esto todo no egzistyo, i ke los djudyos lo inventaron para tomar paras de los Almanes i arrovar la tyerra de Palestina a los arabos. Komo puede ser ke djudyos  Neturei Karta, kon shtremel i tsisit, se fueron en Teheran al kongreso de los negasyonistos tenido por Ahmadinedjad. Devriyan meldar i meldar la istorya de Sabi…

Sabi, despues de lo ke vos meldi, vyene atras i mos konta lo ke era la vida de su malé antes de la gerra. Ama agora so demaziya serka de la fin de mi emisyon, i no vo tener tyempo para meldarvos todo, i no kyero kedarme en kortando su deskripsyon en medyo. Kon bueno , lo meldaré el djueves ke vyene, kon tambyen letras eskritas de Drancy por los internados ke pudyeron embiyar letras.

Es muestro dever a todos de yamar i de kontar  la vida de todos los ke fueron aferrados i asasinados sin piyadad. Es muestro dever de meter la polisiya franseza delantre de su pasado : aferro i dyo a los almanes ombres komo el padre de Sabi, ke se aviyan ido voluntaryos para azer la gerra en la armada franseza. I despues, no kontenta de aferrar al padre, se aharvo kontra su mujer i sus kriaturas. No los Almanes : esto avlando del governo franses i de su polisiya. Sinkuenta anyos despues, se arrepintyo i lo disho ofisyalmente. Ama yene estos diyas me ambezi ke el governo franses va vender armas anti tankes a la armada del Levanon. Ke verguensa i ke asko….

Ayde ya vino el tyempo de eskapar, i vos desho dizyendovos : al djueves ke vyene, si kyere el Dyo!