eSefarad Noticias del Mundo Sefaradi
Keridos amigos, la semana pasada, estuve tan abashamyentado (para trokar) ke no pude azer emisyon. Ama esta semana me syento mijor i apareji para amanyana djueves una emisyon sovre los dezmazalados djudyos de Ukranya.
El program se puede sintir por Internet kada djueves a las 4 H O6 PM, ora de Paris, indo al sityo RADIO – la fréquence juive. Kale tener pasensya i asperar un poko, no se oye pishin.
Saludos a todos!
Edmond Cohen
Paris, Fransya
LOS DJUDYOS DE UKRANYA
Saludos a todos los oyentes de la emisyon Muestra lingua, la emisyon en djudeo-espanyol fundada por el profesor Haïm-Vidal Sephiha i prezentada agora por vuestro servidor Edmond Cohen, kon Philippe en la kabina.
Komo a kada vez vos akodro ke el proksimo atelye de konversasyon de la asosyasyon Vidas Largas se tendra el martes 18 de marso, de las dos i un kuarto asta las sinko, en el Centre Communautaire, 119 rue Lafayette Paris (10°). Metro Poissonnière o Gare du Nord.
Vos demando pedron, keridos oyentes, si no ize emisyon en direkto la semana pasada, ama estava hazino kon esta buen mal de grip ke me aze toser.
Esto dicho, kon todo lo ke se esta pasando estos diyas en Ukranya, me vino la gana de avlarvos oy de los djuyos de Ukranya, syendo ke tuvyeron una istorya a la vez muy briyante en varyos dominyos (literatura, muzika, politika, ets) i trajika por modo de los pogromes i de la shoa ke fue una matansina en Ukranya puede ser peor ke en kualkyer otro lugar. Kuando digo la Ukranya avlo de la Ukranya de oy, kon el teritoryo ke tyene oy, inluyendo la Galisya i la Crimea, savyendo yene ke ya ize una emisyon espesyala sovre los djudyos de Crimea aki el 10 de fevrero 2011, aze dunke unos tres anyos. Kuanto tyempo la Crimea va kedar azyendo parte de la Ukranya, kon lo ke se esta pasando estos diyas no se save dainda.
Ama en esto dainda no estamos. I para avlarvos de la istorya de los djudyos de Ukranya, kale dizirvos dos byervos de la istorya jenerala de este pais. Ya lo vimos kuando vos avli del Uzbekistan, estas tyeras yanas, i por esto kolayes de konkistar, trokaron munchas vezes de dominasyon, kon ida i vinida de las fronteras.
Vos diré solo ke unos 2000 anyos antes del kristo, las tyerras al norte de la Mar Preta, eran okupadas por los Cimmeryanos, los Scytos i los Sarmates. Los Gregos vinyeron en Crimea. Uvo un reyno scyto ellenizado, la Bosforanya, kon kapitala Panticapee (oy Kertch, a la punta este de la Crimea).
Se topan prevas arkeolojikas ke aviya djudyos bivyendo en este reyno dicho del Bosforo.
Ama despues, el norte de la Mar Preta va ser okupado por un alay de puevlos: los Godos, los Hunos, los Avares, los Bulgaros, los Khazares (Kiev va ser una sivdad Khazar un syerto tyempo),los Magyares, los Pechenegos, los Kumanes i los Tatares mongoles, ama tambyen trivos slavos.
En el siglo IX, Kiev es konkistada sovre los Khazares por Oleh el Savyo, rey de los Rutenos, yamados Rus. La Ruteniya, o Rus, es un territorio ke en esta epoka kovre lo ke yamamos oy el norte de la Ukranya, la Byelorusiya i el oeste de la Rusiya.
Los Rus de Kiev se van a azer kristyanos en el siglo XI, ama despues los Tatares i Mongoles van a konkistar el teritoryo de Kiev, i parese ke los djudyos dezaparesen kon la venida de los Tatares. Ama antes, aviya djudyos en Kiev. Kiev teniya en el siglo XI una puerta dicha judaika.
En el oeste de la Ukranya de oy, la tyerra yamada Galisya se aze princhipato en los siglos 13 i 14. Los djudyos son bastante numerozos. Ya estavan aya desde el siglo XI.
En 1362 la Polonya ke kontrola la Galisiya toma tambyen Kiev. En los siglos 14 i 15, los djudyos se azen mas i mas numerozos en Polonya i Ukranya.
Malorozamente, vamos a empesar agora de kontar kozas mas i mas negras, i la istorya de los djudyos de Ukranya va ser una istorya de sangre. En 1648, los kozakes ortodoksos, enemigos de los Polakos katolikos i yevados por el hetman Bogdan Khmelnytsky, van, kon el ayudo de los Tatares i de los Rusos, konkistar la parte sur del reyno polako katoliko i fundar un territoryo kozako yamado Ukranya.
Esta konkista se va azer, en nombre de la kristyanidad ortodoksa, en matando, mas ke los katolikos polakos i los uniates, la mas grande parte de los djudyos ke biviyan aya, entre 50.000 i 100.000 asigun los istoryanos.. Kale saver ke asta oy este kriminal es konsiderado por los Ukranyanos komo un gibor, el padre de la nasyon ukranyana, al punto ke agora dyeron su nombre a una sivdad. Portanto los pogromes de Khmyelnytsky son unos de los mas terrivles de la larga istorya de los pogromes en Evropa del este.
Es en estos tyempos ke va apareser serka de la sivdad de Medzhybyzh, no leshos de la sivdad ke se yama agora Khmielnitski, el movimyento djudyo hasidismo, del kualo ya vos avli antes en una emisyon. Aya bivyo el Baal Shem Tov en la primera mitad del siglo 18. De este tyempo asta oy, kon el movimyento Lubavitch, el hasidismo se izo konoser en el mundo entero komo movimyento mistiko (ke no agrado a todos los djudyos. Kontra el Hasidismo se alevantaron los mitnagedim (opozantes) el mas konosido entre eyos syendo el famozo Gaon de Vilna.
Entremyentres, los Rusos se van a partir el reyno kozako de Ukranya entre eyos i los Ostriakos ke toman la Galisiya. El Imperyo ruso ke no keriya djudyos sovre su teritoryo se va topar kon los dkudyos de la parte de Ukranya ke kae ande los Rusos.
En Odesa, puerto al sur de la Ukranya, los djudyos son atakados en 1821 por gregos ortodoksos despues de la muerte en Estambol del patriarka ortodokso. 14 djudyos son matados. Yene va aver pogrom en Odessa en 1859. De muevo son gregos, esta vez marineros, ke van atakar a los djudyos.
I empesan en la parte de Ukranya basho el imperyo ruso, unos pogromes detras de otros. En marso 1881, el tsar Aleksandro II es asasinado por una granada echada por un sosyalisto. Korre en todo el imperyo la rumor asigun la kuala el muevo tsar Aleksandro III a permetido de vengarse kontra los djudyos. Empesan las matansinas en todo el Imperyo, inkluyendo la parte rusa de Ukranya. Asigun el governo tsaristo, los djudyos de Rusiya van a dezapareser, syendo ke un tyerso sera konvertido, un tyerso se va fuir afuera del pais, un tyerso sera matado. Unos 100 pogromes empesan en el Imperyo: Kiev el 26 de avril, de Odessa del 3 al 5 de mayo,ets. Parese ke uvo mas destruksyones materyales ke matansinas esta vez.
Malorozamente, estamos solo al empesijo de lo ke va ser mas i mas mortal.
Los djudyos ya lo entendyeron muy byen, i no es una koinsidensya si el movimyento Hoveve Tsion funda en Palestina su primera komunidad, yamada Rishon Letsion (la primera por Sion) en 1882.
Kale yene dizir ke no todos los djudyos eskojeron el syonismo. Munchos eskojeron de luchar en Ukranya misma, sea en un partido sosyalisto, el Bund, sea en los partidos revolusyonaryos.
Ama de toda manera los djudyos entendyeron ke aviya solo dos solusyones: o irse, ke sea en Palestina o en Amerika, o kedarse, ama luchando. Se konstituyeron en kada komunidad djudiya grupos de otodefensa, ke van a amostrarse muy kapaches kuando van a ayegar los pogromes de despues.
Porke, malorozamente, van a venir munchos otros pogromes.
La sigunda ola de pogromes se va tener en el tyempo de la primera revolusyon rusa en 1905. El governo tsarista entyende ke su interes es de kanalizar la birra del puevlo no kontra el, ama kontra los djudyos.
En 1903 se va tener un pogrom famozo, el de Kichenev, ama no es en Ukranya, es en Bessarabiya, ke no aze parte de la Ukranya de oy.
Ama en 1905, es en Odessa ke se tuvo entre el 19 i el 21 de oktovre un pogrom ke, malgrado la lucha de los grupos djudyos de oto-defensa, mato entre 300 i 1.000 djudyos, firyo unos 5.000, sin avlar de las destruksyones i de las famiyas echadas en la mizerya.
No kale pensar ke el pogrom de Odessa fue el solo. Uvo 660 pogromes en la sola Ukranya i Bessarabiya.
La tresera ola de pogromes empesa kon la revolusyon de 1917 i va surear kon la gerra sivil asta 1921. Ke sea soldados de la armada tsarista o despues de la armada kolorada, los antisemites atakaron a los djudyos en Ukranya. La armada kolorada kastigo kon fuersa a los pogromistos. Los pogromes vinyeron sovre todo de los antibolshevikos. Meldi un estudyo dizyendo ke uvo, entre 1917 i 1922, 120.000 djudyos matados, sea 5% de la povlasyon djudiya de Ukranya. Las mujeres ke no son matadas son forsadas.
Medyo milyon de djudyos sorretean en las kampanyas bushkando refujyo. Los ke topan un kampo de refujyados kaen hazinos en estos kampos por modo de las epidemiyas. Meldi en el mismo estudyo ke unos 100.000 muryeron ansina, lo ke aze ansina unos 235.000 muertos komo konsekuensa direkta o indirekta de los pogromes, sea 10% de la povlasyon djudiya de Ukranya.
No tengo menester de adjuntar las destruksyones de los kales, de las eskolas, de las bibliotekas, de los semetaryos.
El hetman Simon Petlyura era kapo de la Ukranya en estos tyempos. Fue asasinado en Paris en 1926 por un djudyo, Samuel Schwartzbard, ke deklaro ke kijo vengar a sus ermanos i ke el responsavle de las matansinas era Petliura. Por esto Schwartzbard fue akitado. Lo ke dizen en Wikipedia es ke desho en 1919 las kozas azerse sin impedirlas, ama no era antisemit i despues izo su posivle kontra los pogromes. Yo no so istoryano, i desho dunke a los istoryanos el lavoro de djuzgar a Petliura. Lo ke parese siguro, es ke la mayoriya de los pogromes ke aharvaron a los djudyos de Ukranya en estos anyos fueron echos por la armada ukranyana, i ke Petliura era su kapo.
Malgrado todo esto, en Ukranya kedaron munchos djudyos. En 1926 kedavan 154.000 djudyos en Odessa, sea 36,5% de la povlasyon de la sivdad, en Kiev 140.500 sea 27,3% , en Lvov 98.000 sea 31,9%, en Kharkov 81.500 sea 19,5%, ets
Agora me keda de avlar de la sigunda gerra mundyala i de la invazyon de la Ukranya por los Almanes . Si mozotros sufrimos de los Almanes en Fransya, kualo dizir de lo ke sufrieron los djudyos de Ukranya.
Kuando ize mi emisyon sovre la shoa por kurshumes, vos dishe ke milyon i medyo de djudyos fueron fuzilyados por los einzatskomandos almanes, i se puede dizir ke a lo manko un milyon fueron matados en Ukranya de esta manera, sin avlar de los ke fueron deportados en kampos de eksterminasyon.
I kale dizir ke esto fue posivle grasyas al ayudo de munchos ukranyanos ke se metyeron de la vanda de los almanes kontra los djudyos.
El 19 de septyembre 1941, los Almanes entran en Kiev, ande ay entre 120.000 i 130.000 djudyos, sovre una povlasyon de 900.000 personas.
Los kolorados antes de irse tuvyeron la idea de meter bombas en los lugares ande se van a instalar los kapos almanes, i azen saltar estos hanes, lo ke mata miles de soldados almanes.
Los almanes, afillu si ya saven ke son los rusos ke lo izyeron, dizen ke son los djudyos i ke se van a vengar.
El 28 de septyembre 1941 un komunikado es apegado sovre las paredes, komandando a los djudyos de arekojerse en un lugar la demanyana del 29. Si no lo azen i son topados en otro lugar seran fuzilyados. Los poveretos se van i son yevados, ombres, mujeres i kriaturas, en un lugar yamado Babi Yar, i aya son matados uno detras de otro de un kurshum en la kavesa. Kaji todos los djudyos de Kiev van a ser matados ansina, azyendo de el burrako de Babi Yar un enorme semetaryo sin tombas, ama kon miles de puerpos en djuntos.
(Aki avro una chika paranteza para dizirvos ke despues kuando vinyeron los komunistos no disheron nada sovre la matansina de djudyos en Babi Yar. Kedo kaji sekreto asta ke el poeta ruso Evtushenko eskriva en 1961 el poema Babi Yar, ke fue konosido en el mundo entero. Los rusos metyeron un monumento en Babi Yar en 1966, ama sin dizir ke eran djudyos. Es solo desde 2001 ke ay en Babi Yar un monumento evokando el martiryo de los djudyos de Kiev. Syerro la paranteza).
En Odessa son los Rumanos, alyados de los Almanes, ke matan en el solo diya del 23 de oktovre 1941, 19.000 djudyos. Sus puerpos son mojados de benzina i kemados. El diya despues 24 de oktobre, son 40.000 djudyos ke son fuzilyados o mitrayados por los Rumanos. Los ordenes vyenen del mareshal Antonescu. El mismo sera kondenado a muerte i egzekutado en 1946.
Unos 115.000 djudyos fueron matados, i kaji no kedaron djudyos en Odessa.
En todo, komo vos dishe, son un milyon a lo manko los djudyos ke fueron matados en Ukranya. Vos akodro ke en Fransya fueron 76.000. Es muncho, por siguro, ama yene es kaji vente vezes menos.
I despues? Despues, fue Staline i el rejimen komunisto. Imposivle de salir de Ukranya.
Kuando kayo el komunismo, la mayoriya de los djudyos ke kedavan en Ukranya se fueron en Israel o en Amerika.
Kuantos son los ke kedan dainda? De 2.700.000 ke eran en 1941, kayeron a 840.000 en 1959 i a 67.000 en 2012.
I kon lo ke se esta pasando estos diyas, me demando kuantos van a kedar. El haham de Ukranya, por lo ke oyi, akonseja a los djudyos de irse. No se lo ke pensash, keridos oyentes, ama yo, entre los Ukranyanos i los Rusos ke se pelean entre eyos, no veo lo ke aze un djudyo en medyo. Ke se peleen entre eyos, i mos deshen en paz!
Esto dicho, no kyero eskapar esta emisyon sin akodrar lo ke el puevlo djudyo deve a los djudyos de Ukranya, i esto en todos los dominyos: la relijyon kon los hasidim, la literatura kon Sholem Aleichem, Mendele Moher Sefarim, Isaac Babel, Haim Nachman Byalik, la muzika kon Nathan Milstein, David Oistrakh, i sin olvidar la politika kon Zeev Jabotinsky, Golda Meir, Moshe Dayan (enfin, su padre) i tantos otros.
Al djueves ke vyene, si kyere el Dyo!
Edmond Cohen
