eSefarad Noticias del Mundo Sefaradi
Despues de dos mezes de vakansas, ya me eskarinyi de vozotros todos, i vos dezeo una anyada buena i dulse, kon salud i kon vida. Entre Rosh Ashana el djueves pasado i Sukoth i Shemini Atseret los dos djueves a vinir, este mes de septyembre vo azer una sola emisyon a la radyo, el djueves 12/9. Va ser sovre los djudyos de Sud-Afrika i vos do el teksto aki.
Saludos a todos
El program se puede sintir por Internet kada djueves a las 4 H O6 PM, ora de Paris, indo al sityo RADIO – la fréquence juive. Kale tener pasensya i asperar un poko, no se oye pishin.
Saludos a todos
Edmond Cohen
Paris, Fransya
Los djudyos de Sud-Afrika
Saludos a todos los oyentes de la emisyon Muestra lingua, la emisyon en djudeo-espanyol fundada por el profesor Haïm-Vidal Sephiha i prezentada agora por vuestro servidor Edmond Cohen, kon Philippe en la kabina.
Ayde, despues de dos mezes de vakansas ande me gozi en primero de mis keridos inyetizikos i despues de mis keridas montanyas, i despues tambyen de un djueves de Rosh ashana ande no uvo emisyon, ya empesaron por de muevo, si kyere el Dyo, mis emisyones de kada djueves, i me alegro de esto, porke despues de tanto tyempo ya me eskarinyi de vozotros, keridos oyentes!
Oy, djueves12 de septyembre, mos topamos en medyo, i mizmo kaji al kavo, de los yamim noraim, los dias de espanto entre Rosh Ashana i Kipur. A vozotros todos, keridos oyentes, esperando ke pasatesh buenas fyestas de rosh ashana arrodeados de vuestros keridos, vos dezeo, antes del diya de Kipur ke va kaer amanyana vyernes a la tadre, de toparvos todos eskritos en el grande tefter de la vida.
I despues de esta emisyon, de muevo me vo kedar dos semanas, syendo ke los djueves a venir van a kaer en Sukoth i Shemini Atsereth, i ke para mi proksima emisyon tendresh dunke de asperar el djueves 3 de oktovre.
Esto dicho, malorozamente, munchos fueron este enverano los djudyos ke mos desharon la buena vida.
Solo para avlar de los fransezes, tengo de nombrar un avokato, Tiennot Grumbach, ke era konosido komo avokato luchando syempre para los ovreros kontra sus patrones.
Tengo de nombrar tambyen Rita Thalmann, nasida en Almanya antes de la gerra, i ke konsagro su vida para dos kozas: la istorya del nazismo (entre otros livros, eskrivyo uno en 1972 sovre la Noche de Kristal, en djuntos kon mi amigo Emmanuel Feinerman) i la sigunda koza fue su lucha para el feminismo al lado de Gisèle Halimi, famoza avokata djudiya ke dainda bive i ke lucho para permeter la movedura (avortement en franses, abortion en ingles) al empesijo del prenyado.
Tengo de nombrar tambyen a Jean Kahn, bissovrino de Zadoc Kahn ke fue hahambashi de Fransya al empesijo del siglo vente i ke dirijo la famoza «Biblia del Rabinato», ke kedo asta agora vamos a dizir la traduksyon djudiya ofisyala del Tanah en franses. Por lo ke es del bissovrino Jean Kahn ke muryo este enverano a los 84, vos meldaré solo lo ke se eskrivyo sovre el en la gazeta: «Gran Zabit de la Lejyon de Onor, Komendador del orden nasyonal del Merito, Gran Kruz kon estreya de la Republika Federal de Almanya, Doktor honoris causa de la Universidad de Haïfa, Prezidente onoraryo de la Komunidad israelita de Strasburg, Prezidente onoraryo de los tres Konsistoryos konkordataryos (kijo dizir de los departamentos de Alsace i Lorraine), Prezidente onoraryo del Consistoryo sentral de Fransya, Prezidente fundador de la asosyasyon sportiva Menora, Prezidente onoraryo del Konsilyo Reprezentativo de las Institusyones Djudiyas de Fransya, Prezidente onoraryo del Kongreso Djudyo Evropeo, Vise-Prezidente Onoraryo del Kongreso djudyo Mundyal, Prezidente onoraryo de la komisyon Konsultativa Nasyonal de los derechos umanos, Prezidente fundador onoraryo del Observatoryo evropeo de los fenomenos rasistos i ksenofobos». Aki me kedo, ya entenditesh ke pedrimos un grande djudyo franses, afillu si ya era retitado de todo por modo de su edad i de su negra salud.
Tengo de nombrar tambyen a Valérie Benguigui, aktrisa de teatro i sinema, ke vyene de murir a los 47 de un kanser del pecho. Es muy pekado porke teniya un grande talento i paresiya prometida de azerse una muy grande en su lavoro.
I kyero nombrar tambyen a uno menos konosido de las gazetas; el ya se muryo en avril, ama yo me lo ambezi solo este enverano, kyero avlar de Albert Bourla, una kara del kal de Buffault ande yo me vo tambyen. Este merkader empeso por ser mi mushteri para sus echos en 1961, kijo dizir ay mas de sinkuenta anyos. De mushteri se izo kon el tyempo un haliz amigo. Ya aziya muncho tyempo ke i el i yo eramos retirados, i mos veiyamos solo una vez al anyo, el kon sus tres ermanos al kal en los dias de Rosh Ashana i Kipur. I a kada vez ke mos veiamos, eran bezos i chupos, i alegriya de vermos kon amistad.
El era kazado sin kriaturas, i despues bivdo, ama komo lo dishe teniya tres ermanos, el syendo el bohor i el kapo de famiya, un poko komo Napoleon: kada ermano, kada sovrino era komo sus kriaturas.
I al kipur pasado, por la primera vez no estava al kal. Sus ermanos me disheron ke kon su edad era kansado…tan kansado ke se muryo este mez de avril.
Tuve muncha pena kuando me ambezi su muerte solo agora, i lo dishe a sus ermanos kuando los vide al kal el djueves pasado, diya de Rosh Ashana.
Esto dicho, la vida kontinua, i de kualo avlarvos oy?
Mi amigo Jose Molho, ke se preokupa – es el solo – de toparme sujetos de emisyon, i ke munchas vezes me dyo buenas ideas, i no solo ideas, ama tambyen dokumentasyon, esta vez me embiyo varyos artikolos travados de la gazeta Actualité Juive, numero del 18 de djulyo de este anyo 2013, artikolos konsagrados a los Djudyos de Afrika del Sur. I yo me fui a bushkar sovre internet i topi sovre el sityo del bnaibrith Europe un artikolo de una senyora Gilberte Jacaret.
Komo ya lo savesh, el kamino verso las Indyas pasando por la Punta de Buena Esperansa fue deskuvyerto en 1487 por el navigador portuges Bartolomeu Dias, i despues por Cabral i Vasco de Gama (en 1497, lo ke kyere dizir ke los Portugezes ayegaron por mar a las Indyas sinko anyos despues ke Cristobal Colon ayego a Amerika, kreendo ayegar el tambyen a las Indyas por la otra vanda). Dias yamo a la Punta «punta de las fortunas», ama es el rey de Portugal ke topo mijor de yamar esta punta «Punta de buena esperansa». Vos diré ke si mirash una karta, vash a ver ke esta punta no es en vedra la mas al sur del pais. La punta la mas al sur es la Punta «Agulhas». Ama poko importa. Lo ke ay de detener, es ke estas deskuvyertas markan el empesijo de la istorya evropea de Sud-Afrika.
Esto dicho, no van a ser los portugezes ke van a aprovechar esta tyerra, ama los olandezes, ke van a fundar la Kompaniya de las Indyas Oryentalas en 1652. Unos kuantos djudyos se van a ir aya kon los olandezes, ama estos no achetan djente ke no sea kristyana, i los djudyos van a ser ovligados de konvertirsen. De tal manera ke no van a fundar una komunidad djudiya aya.
Las kozas no van a trokar muncho asta la yegada de los Inglezes en 1806. Empesaron a vinir djudyos inglezes, i en 1841 fue fundada la primera komunidad djudiya kon 17 ombres arrekojidos ande uno de eyos para dizir las orasyones. Ocho anyos mas despues va ser fraguado el primer kal de Sud-Afrika, yamado Tikvat Israel (la esperansa de Israel) en atadijo kon el nombre de la Punta serkana de Buena Esperansa.
Los djudyos se van aserkar sea de los Inglezes, sea de los Boers o Afrikaaners, kijo dizir los desendyentes de los Olandezes. Munchos djudyos van a lavorar kon los Boers komo merkaderes, i por esto ser yamados los «Boere Jode», los djudyos Boers.
En 1867 va ser deskuvyerta una mina de diamantes en Kimberley, lo ke va traer muncha djente, i en 1876 se avriyo aya un kal de 400 personas. Entre estos djudyos, munchos se van azer merkaderes de dyamantes. Los mas konosidos de estos djudyos son Barney Barnato i Sammy Marks.
Al empesijo Barney Barnato no se yamava Barney Barnato, se yamava Barnet Isaacs. A los 22 anyos, en 1873, se va de Ingletyerra, prove entre los proves, adjuntarse a su ermano bohor ke se fue en Kimberley, i dize «And Barnet too!» (i Barnet tambyen) i de Barnet too se aze Barnato. Merka vyejas minas, se enrikese, funda la Barnato Diamond Mining Company i se aze rikinyon, i vende por 4 milyones de Sterlings (milyardas de oy) su partisipasyon a Cecil Rhodes, ke va dirijir la firma De Beer (Es este Rhodes ke va dar su nombre a la Rhodesia, oy el Zimbabwe).
En kuanto a Sammy Marks, nasido en Lituanya de un shastre en 1843, su istorya es un romanso, ke no tengo el tyempo de kontarvos aki. Sepash solo ke de Lituanya vino en Ingletyerra para vender kavayos. Aya oye avlar de la mina de diamantes topada en Kimberley, i se va aya en 1869, dunke a los 25 o 26 anyos. Solo tyene kon el un kuti de kuchiyos de plata, su solo byen de vender. Va vender kuchiyos a los mineros, i en pokos anyos se aze rikinyon en diamantes, oro, karvon, agrikultura. Amigo del prezidente Kruger, se aze elejir senador. El es ke va entremeterse para negosyar el kavo de la gerra de los Boers, ke sureo de 1899 a 1902.
Estos dos son solo dos egzemplos de lo ke puediyan azer djudyos aventureros i korajozos. Los djudyos desveloparon la peshka, el komersyo, la produksyon de asukar, de vino, de vestimyenta.
En 1881, kon los pogromes de Rusia, son unos 40.000 djudyos de Rusiya, i sovre todo de Lituaniya, ke vinyeron arefujyarse en Afrika del Sur. Eyos tambyen bushkaron lavoro en la mobilya, las chiltés, la vestimyenta, i mismo las plumas de abistru.
En 1915 nase en la sivdad de la Punta (Capetown) un djudyo ke sera muncho mas despues uno de los mas famozos ministros de Israel, Abba Eban, ke dainda no se yamava ansina. Nasyo Aubrey Solomon Meir.
Este mismo anyo 1915, kuando nasiya Abba Eban, Sir Harry Graumann, ke aviya sido mayor de Johannesburg en 1909 (el primer mayor djudyo), entrava en el Parlamento.
Malorozamente, en los anyos 1930, empeso antisemitismo en la povlasyon blanka, i salyeron leyes impidyendo a los djudyos ke keriyan fuirse de Almanya i de Evropa de entrar en Sud-Afrika. En el momento ande los djudyos teniyan lo mas menester de pueder fuirse, las puertas de los paizes del mundo entero se serraron, i los djudyos kedaron prezoneros de la Evropa, kon las konsekuensas ke ya savemos. Esto solo me parese ser una razon bastante para justifikar el syonismo. Agora ay un Estado de Israel ke arrekoje a todos los djudyos persegidos en el mundo, ke no izo nada para eyos kuando tuvyeron menester.
Esto dicho, los djudyos partisiparon a la gerra kontra los Almanes, i despues a la gerra de independensya de Israel. Ya ize aki mismo, el 16 oktovre 2011, vamos a dizir aze dos anyos, una emisyon sovre los veluntaryos ajenos en Israel 1947-1948, ande ya konti lo ke izyeron estos korajozos veluntaryos. Entre eyos, komo lo dishe en esta emisyon, munchos vinyeron de Sud-Afrika.
Despues de la gerra, a partir de los anyos 1948, empesaron en Sud-Afrika las leyes rasistas de apartheid, ke no eran dirijidas kontra los djudyos, ama kontra los pretos, los melezes (medio pretos) i los azyatikos.
La mayoriya de los blankos ke lucharon kontra el apartheid fueron djudyos, i por empesar Nadine Gordimer, premyo Nobel de literatura en 1991. Mos akodramos todos de Johny Cleg, djuguando muzika zulu i baylando kon los zulus en tyempo de apartheid (i despues!).
Isabelle Puderbeutel mos konta en Actualité Juive ke Nelson Mandela, kuando eskapo sus estudyos de derecho, entro para lavorar ande un avokato djudyo, Lazar Sidelsky, ke le disho: » aki sos el igual de todos; el apartheid no entra aki».
Mandela se enkantava i no entendiya deke su amo le enkomendava de ir a komer en una lokanda leshos del buro, al punto ke le merko una bisikleta para esto. «Deke irme tan leshos? demando Mandela; Ay munchas lokandas mas serka». – Si, le respondyo Sidelsky, ama la lokandyera es una bivda ke tyene menester de ser ayudada». I Mandela, kuando se akodra esto, adjusta: «Por lo ke es de la solidaridad, tenemos de ambezar de los djudyos».
Esto dicho, i komo ya lo savesh, Sud-Afrika, por modo de su apartheid, fue metida a parte de las nasyones, komo lo era Israel en el mismo tyempo, el syonismo syendo asimilado a rasismo, komo lo voto la ONU en 1975. I por esto los dos paizes se ayudaron, i en estas kondisyones no kale enkantarse si, agora ke los pretos tomaron el poder en Sud-Afrika, este mismo pais es a la punta kontra Israel.
El mismo Mandela, ke kyere tanto a los djudyos, izo en 2001 una deklarasyon muy negra kontra Israel, akuzado de «diskriminasyon rasyala», de «tortura», de gerra kontra las kriaturas, ets. I Desmond Tutu dize kaji lo mismo.
No kale olvidarse de la Konferensya kontra el rasismo, ke se tuvo en la sivdad de Durban, en Afrika del Sur, en 2001, ande lo mas tyempo fue konsagrado kontra Israel. Agora es ansina: los ke sufrieron lo mas del rasismo son akuzados de ser rasistos. Es en una manifestasyon en Sud-Afrika ke se grito: «One Jew, one bullet» (un djudyo un kurshum).
De tal manera ke esto dyo espanto a unos djudyos, i ke la komunidad djudiya de Sud-Afrika, ke era una de las mas importantes del mundo en los anyos 70, se aflako de mitad en 40 anyos para abashar a unos 75.000 oy (entre eyos unos 1200 sefaradim, lo mas Rodeslis). Ama yene, asigun Actualité Juive, keda una komunidad fuerte i manseva. Su haham bashi, Warren Goldstein, obtuvo este sityo a los 32 anyos en 2005.
Kualo va ser de los djudyos de Sud-Afrika en los anyos a venir, dinguno lo save, ama puedemos dezear ke van a pujar i no menguar, i kontinuar de guadrar komo syempre el amor de Israel i del syonismo.
Kon esto vos desho porke ya vino la ora de eskapar mi emisyon, i vos digo al djueves 3 de oktovre si kyere el dyo, syendo las fyestas de antes, komo vos dishe.
Edmond Cohen
Bravo Edmond