eSefarad Noticias del Mundo Sefaradi
Keridos amigos, aki toparash el teksto de la emisyon de esta semanada.
Akavido los ke me oyen sovre internet desde paizes ajenos ke aki en Fransya entrimos el alhad pasado en la ora de invyerno, i atrazimos muestras oras de una ora
El program se puede sintir por Internet kada djueves, indo al sityo RADIO – la fréquence juive. Kale tener pasensya i asperar un poko, no se oye pishin.
Saludos a todos
Edmond Cohen
Paris, Fransya
LOS DJUDYOS DE PORTUGAL
Saludos a todos los oyentes de la emisyon Muestra lingua, la emisyon en djudeo-espanyol fundada por el profesor Haïm-Vidal Sephiha i prezentada agora por vuestro servidor Edmond Cohen, kon Philippe en la kabina.
Komo a kada vez, vos akodro ke el proksimo atelye de konversasyon de la Asosyasyon Vidas Largas se tendra el martes 13 de marso, de las dos i medya asta las sinko, al muevo adereso del 17 rue Pierre Semard Paris (9°), arriva del Square Montholon, métro Cadet. La entrada es la del lokal i no la del han.
En mi emisyon de ay tres semanas, la del 9 de fevrero, konsagrada a los sefaradim de Holanda, kaji todos venidos en este pais fuyendo del Portugal, vos aprometi ke un diya vos kontariya aki lo ke fue la istorya trajika de los djudyos del Portugal. Lo ke sufriyeron los djudyos del Portugal es una koza inimajinavle, ke sureo mas de 300 anyos, en los siglos 16, 17 i 18, i ke se eskapo por la disparisyon kaji entera de djudyos en este pais asta oy en diya.
Esto es lo ke vos vo kontar agora, bazandome sovre tres estudyos:
1) el de la Senyora Anita Novinsky, profesora en la Universidad de Sao Paulo, en el Brazil, estudyo intitolado Juifs et Nouveaux Chrétiens du Portugal, travado del livro kolektivo puvlikado en 1992 en Paris, basho la direksyon de mi amigo Henry Méchoulan, kon el titolo Les Juifs d’Espagne, histoire d’une diaspora 1492-1992.
2) lavori tambyen sovre el estudyo del senyor Elia Boccara, profesor en Milano, intitulado 1497: le drame des Juifs portugais, ke topi sovre internet (harissa.com)
3) lavori enfin sovre el livro del senyor Carsten Wilke, profesor en la Universidad de Düsseldorf, intitolado Histoire des juifs portugais, ke se puede tambyen meldar sovre internet.
Kale saver ke antes de estos tres siglos trajikos ke vos dishe, los djudyos biviyan kyetos en el Portugal, i esto desde muncho tyempo. Por siguro, un Portugal independyente de la Espanya komo de los arabos, en el teritoryo ke konosemos oy, egziste solo desde la Edad medya. El reyno de Portugal nasyo en los anyos 1139-1143, kuando el konde de Portugal Alfonso Henriques de Bourgogne, ijo del konde Henri de Bourgogne, ama tambyen, por su madre inyeto de Alfonso VI, rey de Castilla i de Leon, se aze rey kon el nombre de Alfonso Iero de Portugal i ke Alfonso VII, rey de Castilla, su primo, lo rekonose kome rey del Portugal. Antes del siglo 12, la istorya de los djudyos de Portugal se konfunde kon la istorya de los djudyos de Espanya. Los Romanos en primero, despues en el siglo 5 la venida de los Wizigotes arianos – de la ereziya ariana – intolerantes, despues, al empesijo del siglo 8 la yegada de los arabos, en vezes tolerantes, en vezes no, despues a poko a poko la rekonkista del norte por los kristyanos. I, komo lo dishe, los djudyos son bastante kyetos.
A la fundasyon del reyno de Portugal, en el siglo 12, el teritoryo del reyno no es dainda el del Portugal de oy, syendo ke los arabos okupan dainda la parte sur del Portugal, ke aze parte de Al Andalus. Es solo en 1147 ke el muevo rey Alfonso Iero va rekonkistar la sivdad de Lisboa ke kedava asta aya a los arabos. Es solo un siglo mas despues, verso los anyos 1250, ke toda la parte sur es rekonkista sovre los arabos por el rey Alfonso III, i el Portugal se ve en las fronteras ke tyene dainda oy.
Komo vos dishe, en esta epoka los djudyos eran kyetos ; ansina eskrive la senyora Novinsky: « En la Edad Medya, los reyes portugezes, karakterizados por sus grande independensya i sus toleransa, permityeron a sus suditos djudyos de bivir en la mas grande libertad: puediyan tener sus propya djustisya sivil i kriminala, segir sus tradisyones i kostumbres, ser proprietaryos de terrenos. Ke tengan una relijyon diferente no impediya a los reyes de darles una grande konfyansa politika i situasyones ofisyales de la mas alta importansya ».
Los djudyos de Portugal no eran persegidos ni forsados de konvertirse al katolisismo, ni echados afuera komo fueron los de Fransya i de tantos otros paizes de Evropa. Las matansinas de 1391 en Espanya no tokaron a los djudyos ke biviyan en el Portugal.
Los djudyos de Portugal si no eran todos rikos, a lo ke parese a lo manko eran pokos a ser menesterozos. Pagavan vergis importantes. Aviyan entre eyos munchos medikos, ama tambyen matematikos, astronomos, kartografos, navigadores. Asigun Joao de Barros, el rey Henrique el Navigador (1394 -1460) izo venir de Mayorka el djudyo Jacome Cresques, famozo kartografo. Mas despues el rey Joao II, el ke reynava en el Portugal del tyempo de la ekspulsyon de los Djudyos de Espanya, arrekojo una komisyon syentifika sovre las kuestyones de navigasyon, kon varyos savyos entre los kualos munchos eran djudyos. Eyos son ke deskonsejaron al rey de ayudar Cristobal Colon en su proyekto de ir verso las Indyas por el oeste, i, komo ya lo dishe aki en mi emisyon sovre Cristobal Colon, son eyos ke teniyan razon syendo ke no se konosiya la egzistensya de Amerika entre la Espanya i las Indyas, i ke la distansya entre Espanya i Indyas paresyo a la Comisyon larga demaziya, lo ke era vedra. Colon, al kontraryo, pensava la distansya muncho mas korta, i reusho a konvenser, no el rey de Portugal, ama los reyes de Espanya, i fue este grande yerro – felix culpa, bendicho yerro – ke le dyo la ozadiya de partir i de deskuvrir Amerika, ama tambyen ke izo, syendo su yerro, ke nunka entendyo ke no aviya yegado a las Indyas, ama aviya deskuvyerto tyerra mueva.
Entre los astronomos i kartografos venidos a la korte de los reyes de Portugal, el mas famozo es Abraham Zakuto, ke vino kon tantos otros refujyarse en Portugal kuando fue echado de Espanya en 1492. Fue yamado astronomo real i ayudo a la ekspedisyon de Vasco de Gama.
La trajediya va empesar kon la ekspulsyon espanyola de 1492. A parte del Imperyo osmanli ke se amostra dispuesto a akojerlos, pokos son los paizes ande se puedan ir los djudyos espanyoles. Si, ay un pais ke no esta leshos, ande los djudyos son kyetos, es el Portugal, ke parese muncho mas kolay ke la leshana i deskonosida Turkiya.
En 1492, el rey de Portugal es Joao II. Pishin kuando es firmado el edikto dicho de la Alhambra, el 31 de marso 1492, el ultimo Gaon de Castilla, Isaac Aboab, korre a ver al rey para demandarle ayudo para los djudyos. El rey acheta, ama no para kedar syempre ; solo para 8 mezes, ama el rey apromete a los djudyos naves i ayudo para pueder irsen despues de los 8 mezes.
La otorizasyon de entrar no es dada de baldes. Kale pagar asigun la fortuna o la utilidad para el Portugal: 1) 8 cruzados para un djudyo ordinarto ; 2) solo 4 cruzados para los djudyos savyendo lavorar a la fabrikasyon de armas ; 3) para 600 famiyas mas o menos rikas, un presyo en proporsyon de la rikeza. Pagaron 60.000 cruzados de oro ; 4) enfin, otro modo de vergi para trenta grandes famiyas de muy alto nivel, tratadas kon muncho respeto. Esto todo va yevar unos mil dukados a la Korona, lo ke es una suma fabuloza en este tyempo.
La grande mayoriya de los djudyos, en vez de la Turkiya muzulmana, eskoje el Portugal kristyano. Asigun el famozo Abraham Zacuto, los djudyos ke se fueron de Espanya fueron 180.000 i sovre eyos, unos 120.000 eskojeron el Portugal. Los solos venidos del reyno de Castilla reprezentaron unos 93. 000. Los proves se arrekojen basho tyendas en un vaye ke va ser yalmado vaye de las chosas, los otros se esparten en varyas sivdades.
Malorozamente, el repozo va ser muy kurto: el rey ke aviya aprometido ayudo i naves, en vez de esto, al kavo de los ocho mezes vende los proves djudyos komo esklavos a los novles. No ay naves, no ay ayudo.
La trajediya kontinua en1493, un anyo solo despues de la yegada de los djudyos. Los Portugezes aviyan konkistado la isla de Sao Tomé, en el Golfo de Guinea, serka del ekuador, isla tambyen yamada de los Logartos, kijo dizir los krokodiles. Era tambyen yena de serpientes venimozos komo los kobras. Se puediya aya kultivar la kanya de asukar, ama dingun portuges keriya ir a kolonizar tal infyerno. El Portugal empeso dunke por embiyar aya galeryanos i esklavos pretos. I el rey Joao II penso ke, por kuaksikyer sözde irregularidad en el vergi o otra koza, se puediya tomar de sus paryentes djudyos a sus kriaturas de menos de ocho anyos, ijos i ijas, bautizarlos por fuersa i embiyarlos a Sao Tomé. Se dize ke deportaron ansina unas 2.000 kriaturas, fiyadas a un syerto Alvaro de Caminha. La mayoriya de estas poveretas kriaturas muryeron, sea de hazinura, sea modridos por las serpyentes o komidos por los krokodiles. Solo unos 600 se sovrebivyeron. Se engrandesyeron aya, se kazaron i no se save mas lo ke les afito. Lo ke es siguro, es ke sus paryentes no los vyeron mas nunka.
Esta krueldad marko el empesijo de munchas otras. El rey Joao II se muere en 1495, i en 1496 vyene el rey Manoel Iero. Komo kyere eredar de Castilla i Aragon, demanda a los Reyes Katolikos la mano de sus ija Isabel. Los reyes achetan kon una kondisyon: ke todos los poveretos djudyos de Portugal, tan los halizes portugezes komo los espanyoles refujyados en el Portugal sean echados de Portugal. El rey Manoel acheta esta kondisyon, i el 5 de desyembre 1496, firma un dekreto ke ovliga a todos los djudyos i tambyen los Moros de kitar el Portugal en 10 mezes, o sino el ke se kedara sera kondenado a muerte. Los poveretos djudyos espanyoles ke aviyan pensado topar avrigo en Portugal se ven echados de aya solo kuatro anyos despues de tener deshado la Espanya. La idea del rey, ke en vedra no keriya ver irse los djudyos ke teniyan un interes ekonomiko, era ke se uvyeran konvertido komo aviyan echo munchos en Espanya. Ama si los djudyos aviyan todo deshado de Espanya para no azerse katolikos, no era para trokar de idea kuatro anyos despues. Vyendo esto, en fevrero 1497, malgrado la opozisyon del ovispo del Algarve, Fernando Coutinho, el rey dyo a la polisiya el orden sekreto ke el 19 marso1497, en tyempo de Pesah, sean tomados de sus paryentes todas las kriaturas djudiyas de menos de 14 anyos, para espartirlas entre los kristyanos i edukarlas en la fe del Kristo. Si los paryentes kyeren kedarsen kon sus kriaturas, kale ke se agan katolikos eyos tambyen.
Las kriaturas fueron travadas de sus paryentes kon golpes de asotes, i yevadas por fuersa asta las iglesyas. Munchos paryentes se mataron este dya preto.
La inkreivle krueldad de esta politika da un tal asko a munchos portugezes ke de si para si eskonden kriaturas djudiyas, komo lo izyeron los djustos mas de kuatro siglos despues, del tyempo de los Almanes.
Lo ke kyere el rey, no es ke se vaygan los djudyos, kyere ke se keden azyendose katolikos. El haham de Lisboa, Simon Meimi, es torturado para ke de el egzemplo de la konversyon, komo lo aviya echo Avraham Seneor en Espanya. Ama el haham se muere kon la tortura sin achetar de konvertirse. Komo dizimos en lashon, zihrono livraha, ke su memorya mos sea bendisyon.
En oktovre 1497 vyene el kavo del tyempo de diez mezes para fuir el Portugal. 20.000 djudyos se arrekojen en el puerto de Lisboa, dispuestos a partir, kuando son todos aferrados por la polisiya i kondusidos de fuersa en plazas i aya deshados kuatro diyas sin komer ni bever para ke acheten de konvertirsen. (Esto me aze pensar al Vel d’hiv) I komo no achetan, son mojados de agua de baptismo i travados por kaveyos i barvas asta las iglesyaslas iglesyas de Lisboa i son todos baptizados por fuersa. Munchos se echan por las ventanas o en pozos. (Esto ma aze pensar al Gheto de Varsovia). Mismo los dokumentos ofisyales los yaman baptisados em pè (en pye). No tengo menester de dizir ke los baptizados en pye no se sentiyan una grande gana verso sus mueva relijyon katolika, i ke kontinuaron a konsiderarse komo djudyos, dechidados de fuir esta tyerra maldicha pishin kuando seriya posivle. I esto es lo ke munchos puedyeron azer, komo Avraham Zacuto, ke reusho en 1501 a fuirse kon su ijo baptizado.
Kale senyalar ke el rey no se komportyo de la misma manera kon los Moros. No fueron forsados a la konversyon. El kronikador portuges Damiao de Goes da una eksplikasyon: los arabos, ke no eran leshos, puediyan venir a vengar los Moros. Los djudyos, eyos, no teniyan dingunos para venir defenderlos. Por esto Anita Novinsky mos dize ke este Damiao de Goes es un prekursor del syonismo politiko.
Las desgrasyas de los djudyos ke kedaron en el Portugal no se kedaron kon la konversyon. En 1506, la povlasyon de Lisboa, yevada por los papazim dominikanos, empeso una matansina komo la de 1391 en Espanya. En la sola Lisboa 4.000 ex-djudyos fueron asasinados i arrovados de todo. Unos fueron kemados bivos, kriaturas fueron kortadas en pedasos, asigun los testigos portugezes de esta epoka.
El peor empeso despues, kon la venida de la Inkizisyon en Portugal en 1536. Ya vos avli aki de lo ke fue la Inkizisyon en Espanya. Fuel o mismo en Portugal: torturas, los akuzados ke atorgaron por fuersa ke eran djudyos en sus korasones, kemados bivos, ombres, mujeres, kual ke sea la edad: lo ke la Santa Inkizisyon yamava kon orguyo autodafe, akto de fey…Por siguro los djudyos ke lo puediyan se fuiyan de este pais maldicho ; se fueron en el mundo entero, i entre tantos unos se fueron en Fransya (Bordeaux, Bayonne) otros en Hollanda, ets Ya vos avli de estos.
I malgrado todo esto, uvo una rezistansa espirituala de los ke kedaron en Portugal. Rezistyeron a todo, inkluyendo la ley de eksterminasyon de 1683, ke permetiya a los djudyos de fuir el Portugal, ama kon la kondisyon de deshar sus kriaturas de menos de 7 anyos, ets.
Komo ya lo savesh, dainda oy kedaron kazales en Portugal ande biven dainda djudyos ke rezistyeron mas de 500 anyos, praktikando en sekreto sus relijyon, komo en el kazal de Belmonte. Asigun Cecil Roth, esta rezistansya spirituala durante tanto tyempo kontra una fuersa tan kruela komo era la Inkizisyon, es una koza unika en el mundo.
Aviya dainda munchas kozas de dizir, ama el tyempo me falta, i vos digo, no se dainda si va ser al djueves ke vyene porke va ser Purim, en todo kavzo al djueves de despues, si kyere el Dyo!
Edmond Cohen
