Muestra lingua: LOS DJUDYOS DE PORTUGAL (2) por Edmond Cohen

Keridos amigos, aki toparash el teksto de la emisyon de esta semanada.

El program se puede sintir por Internet kada djueves a las 4 H O6 PM, ora de Paris, indo al sityo  RADIO – la fréquence juive. Kale tener pasensya i asperar un poko, no se oye pishin.

Aki toparesh el teksto de mi emisyon del djueves 15/3, konsagrada de muevo a los djudyos de Portugal syendo ke no pude eskapar mi primera emisyon por manko de tyempo. Aprovechi esta mueva emisyon para adjuntar unas kuantas kozikas.
Kon karinyo

Saludos a todos
Edmond Cohen
Paris, Fransya

 LOS DJUDYOS DE PORTUGAL (2)

Saludos a todos los oyentes de la emisyon Muestra lingua, la emisyon en djudeo-espanyol fundada por el profesor Haïm-Vidal Sephiha i prezentada agora por vuestro servidor Edmond Cohen, kon Philippe en la kabina.

Komo a kada vez, vos akodro ke el proksimo atelye de konversasyon  de la Asosyasyon Vidas Largas se tendra  el martes 27 de marso, de las dos i medya asta las sinko, al muevo adereso del 17 rue Pierre Semard Paris (9°), arriva del Square Montholon, métro Cadet. La entrada es la del lokal i no la del han.

Tengo un otro anunsyo de azer:  Tomad un kalem i guadradvos sovre vuestros kalendaryos el alhad primo de avril, no por kualkyer shaka, ama porke va ser el diya del  livro djudeo-espanyol en Paris. Desde las dos i medya, en el mismo lokal del 17 rue Pierre Semard, munchos eskrivanos i eskrivanas van a venir para prezentar, vender i dedikar sus livros: Meri Badi i su famozo livro de kozina,  Ariane Bois i su livro Le Monde d’Hannah, Caroline Bongrand i su livro L’Enfant du Bosphore, Marcel Cohen i su famoza Lettre a Antonio Saura, Evelyne Lagardet, ke vino a dos de mis emisyones, i su livro Un rêve Français, Henri Nahum i sus livros Juifs de Smyrne XIXe-XXe siècle, i La Médecine Française et les Juifs, muestras amigas Mathilde Pessah i Evelyne Nahmias, ke eyas tambyen vinyeron aki para una de mis emisyones, por sus livro La Robe Couleur Abricot El Fostan de Pitagra, Rosie Pinhas-Delpuech por sus livros Anna une histoire Française, i Suite Byzantine, Aure Recanati i su livro Memorial de la Déportation des Juifs de Grèce, Angèle Saül, ke tambyen resivi dos vezes aki, por su livro Djoha, Djohaya, nouveaux contes judéo-espagnols, sin olvidar muestro kerido Prezidente, el Profesor Haïm-Vidal Sephiha, por sus livros L’agonie des Judéo-espagnols, i Le judéo-espagnol.

Syertos de estos livros no se topan mas en libreriyas, i un diya komo este va ser una okazyon unika de pueder dainda toparlos i merkarlos.

Este anunsyo echo,  en mi emisyon de ay dos semanas, la del primo de marso, ke keriya konsagrar a los djudyos de Portugal, en vedra por la mayoriya venidos en este pais echados de Espanya, no pude avlarvos mas de unos 12 minutos, syendo ke la radyo teniya menester de mi tyempo de avla para otras kozas, i no solo no pude eskapar mi emisyon, ama en vedra a penas pude empesarla.

Vos akodro ke lavori bazandome sovre tres estudyos:

1) el de la Senyora Anita Novinsky, profesora en la Universidad de Sao Paulo, en el Brazil, estudyo intitolado Juifs et Nouveaux Chrétiens du Portugal, travado del livro kolektivo puvlikado en 1992 en Paris, basho la direksyon de mi amigo Henry Méchoulan, kon el titolo Les Juifs d’Espagne, histoire d’une diaspora 1492-1992.

2) lavori tambyen sovre el estudyo del senyor Elia Boccara, profesor en Milano,  intitulado 1497: le drame des Juifs portugais, ke topi sovre internet (harissa.com)

3) lavori enfin sovre el livro del senyor Carsten Wilke, profesor en la Universidad de Düsseldorf, intitolado Histoire des juifs portugais, ke se puede tambyen meldar – no todo, ama largos pedasos – sovre internet.

Despues de vos tener dicho ke los djudyos fueron kyetos en el reyno de Portugal al empesijo, vos dishe ke, en 1492, el rey de Portugal Joao II akojo (kontra paras) mas de 100.000 djudyos echados de Espanya, ama solo por ocho mezes, i ke malorozamente, el repozo fue muy kurto: el rey ke aviya  aprometido ayudo i naves al kavo de los ocho mezes, en vez de esto, al kavo de los ocho mezes  vendyo los proves djudyos komo esklavos a los novles, sin darles ni naves ni ayudo.

Komo lo dishe la ultima vez, la trajediya kontinuo en1493, un anyo solo despues de la yegada de los djudyos. Los Portugezes aviyan konkistado la isla de Sao Tomé, en el Golfo de Guinea, serka del ekuador, isla tambyen yamada de los Logartos, kijo dizir los krokodiles. Era tambyen yena de serpientes venimozos komo los kobras. Se puediya aya kultivar la kanya de asukar, ama dingun portuges keriya ir a kolonizar tal infyerno. El Portugal empeso dunke por embiyar aya galeryanos i esklavos pretos. I el rey Joao II penso ke, por kuaksikyer sözde irregularidad en el vergi o otra koza, se puediya tomar de sus paryentes djudyos a sus kriaturas de menos de ocho anyos, ijos i ijas, bautizarlos por fuersa i embiyarlos a Sao Tomé. Se dize ke deportaron ansina unas 2.000 kriaturas, fiyadas a un syerto Alvaro de Caminha. La mayoriya de estas poveretas kriaturas muryeron, sea de hazinura, sea modridas por las serpyentes o komidas por los krokodiles. Solo unas 600 se sovrebivyeron. Se engrandesyeron aya , se kazaron i no se save mas lo ke les afito. Lo ke es siguro, es ke sus paryentes no las vyeron mas nunka.

Esta krueldad marko el empesijo de munchas otras. El rey Joao II se muere en 1495, i en 1496 vyene el rey Manoel Iero. Komo kyere eredar de Castilla i Aragon, demanda a los Reyes Katolikos la mano de sus ija Isabel. Los reyes achetan kon una kondisyon: ke todos los poveretos djudyos de Portugal, tan los halizes portugezes komo los espanyoles refujyados en el Portugal, sean echados de Portugal. El rey Manoel acheta esta kondisyon, i el 5 de desyembre 1496, firma un dekreto  ke ovliga a todos los djudyos i tambyen los Moros de kitar el Portugal en 10 mezes, o sino el ke se kedara sera kondenado a muerte. Los poveretos djudyos espanyoles ke aviyan pensado topar avrigo en Portugal se ven echados de aya solo kuatro anyos despues de tener deshado la Espanya. La idea del rey, ke en vedra no keriya ver irse los djudyos ke teniyan un interes ekonomiko, era ke se uvyeran konvertido komo aviyan echo munchos en Espanya. Ama si los djudyos aviyan todo deshado de Espanya para no azerse katolikos, no era para trokar de idea kuatro anyos despues. Vyendo esto, en fevrero 1497, malgrado la opozisyon del ovispo del Algarve, Fernando Coutinho, el rey dyo a la polisiya el orden sekreto ke el 19 de marso1497, en tyempo de Pesah, sean tomados de sus paryentes todas las kriaturas djudiyas de menos de 14 anyos, para espartirlas entre los kristyanos i edukarlas en la fe del Kristo. Si los paryentes kyeren kedarsen kon sus kriaturas, kale ke se agan katolikos eyos tambyen.

Las kriaturas fueron travadas de sus paryentes kon golpes de asotes, i yevadas por fuersa asta las iglesyas. Munchos paryentes se mataron este  dya preto.

La inkreivle krueldad de esta politika da un tal asko a munchos portugezes ke  de si para si eskonden kriaturas djudiyas, komo lo izyeron los djustos mas de kuatro siglos despues,  del tyempo de los Almanes.

Lo ke kyere el rey, no es ke se vaygan los djudyos, kyere ke se keden azyendose katolikos. El haham de Lisboa, Simon Meimi, es torturado para ke de el egzemplo de la konversyon, komo lo aviya echo Avraham Seneor en Espanya. Ama el haham se muere kon la tortura sin achetar de konvertirse. Komo dizimos en lashon, zihrono livraha, ke su memorya mos sea bendisyon.

En oktovre 1497 vyene el kavo del tyempo de diez mezes para fuir el Portugal. 20.000 djudyos se arrekojen en el puerto de Lisboa, dispuestos a partir, kuando son todos aferrados por la polisiya i kondusidos de fuersa en plazas i aya deshados kuatro diyas sin komer ni bever para ke acheten de konvertirsen. (Esto me aze pensar al Vel d’hiv, salvo ke en el Vel d’Hiv, la konversyon no uvyera trokado nada). I komo no achetan, son mojados de agua de baptismo i travados por kaveyos i barvas asta las iglesyas  de Lisboa i son todos baptizados por fuersa. Munchos se echan por las ventanas o en pozos. (Esto ma aze pensar al Gheto de Varsovia). Mismo los dokumentos ofisyales los yaman baptisados em pè (en pye). No tengo menester de dizir ke los baptizados en pye no se sentiyan una grande gana verso sus mueva relijyon katolika, i ke kontinuaron a konsiderarse komo djudyos, dechidados de fuir esta tyerra maldicha pishin kuando seriya posivle. I esto es lo ke munchos puedyeron azer, komo Avraham Zacuto, ke reusho en 1501 a fuirse kon su ijo baptizado.

Para los « baptisados em pè », empesaron por trokarles sus nombres djudyos i ovligarlos de yevar muevos nombres kristyanos, kortandolos ansina de sus raises. De la misma manera, fue proibido de guadrar kon si kualkyer papel eskrito en ebreo ( salvo, para los medikos, los papeles profesyonales, sin los kuales los medikos no puediyan mas kurar a los kristyanos) . Uno ke era topado kon papeles eskritos en ebreo era kondenado a muerte. Abraham Saba,;por egzemplo, reusho a fuirse de Portugal, ama tuvo de deshar sus manuskritos en Portugal, de espanto por su vida. Al mal de su pezar, los eskondyo de basho de un arvole. Despues de 1497, munchos baptisados em pè topados kon eskritos en ebreo ke no fueron kondenados a muerte fueron « solo » kastigados por la konfiskasyon de sus byenes, asotados i embiyados en las coloniyas.

Kale senyalar ke el rey no se komportyo de la misma manera kon los Moros. No fueron forsados a la konversyon. El kronikador portuges Damiao de Goes da una eksplikasyon: los arabos, ke no eran leshos,  puediyan venir a vengar los Moros. Los djudyos, eyos, no teniyan dingunos para venir defenderlos. Por esto Anita Novinsky mos dize ke este Damiao de Goes es un prekursor del syonismo politiko.

Las desgrasyas de los djudyos ke kedaron en el Portugal no se kedaron kon la konversyon. En 1506, la povlasyon de Lisboa , yevada por los papazim dominikanos,  empeso una matansina komo la de 1391 en Espanya. En la sola Lisboa 4.000 ex-djudyos fueron asasinados i arrovados de todo. Unos fueron kemados bivos, kriaturas fueron kortadas en pedasos, asigun los testigos portugezes de esta epoka. Por dizir la vedra, el rey Manoel no estava en Lisboa durante las matansinas ke se izyeron sin su akodro, i kuando abolto en Lisboa, kastigo a los matadores. Dos papazim fueron kemados, 48 otros matadores enforkados.

Ama dainda no aviya la Inkizisyon en el Portugal. Joao III, el rey ke vino despues de Manoel en 1521, demando en 1531 al papa (Clemente VII) la kreasyon de una Inkizisyon en el Portugal. El papa dyo su akodro en desyembre 1531. Pishin los djudyos dyeron a komer a los papazim de la Kuriya Romana, i el Papa , en 1533, dyo un « pedron jeneral », ama para puvlikar este edikto demando mas paras, i el edikto salyo solo dos anyos i medyo mas despues. Ama una vez las paras tomadas, el muevo papa, Paul III, permityo al rey de Portugal, por lettra del 23 de mayo 1536, de estableser en el Portugal un tribunal inkizitoryal. El rey Joao III metyo su ermano komo grande Inkizidor, i el primero auto da fe (akto de fey) se tuvo en Lisboa el 20 de septyembre de 1540. Miles de Muevos Kristyanos fueron aferrados i kondenados.

Los Muevos Kristyanos obtuvyeron del papa ke suspenda en 1544 la aktividad de los tribunales inkizitoryales, ama el rey Joao III prometyo las rentas de la ovisperiya de Viseu al inyeto del papa (inyeto del papa??? Si. El papa Paul III – Alexandro Farnese – tuvo kuatro kriaturas de una mujer ke konosyo kuando era ovispo) i en 1547, el papa otorizo de muevo la Inkizisyon portugeza.

Un papa merkado kon paras, no so yo ke avlo ansina, todo lo ke vos digo, lo tomi del livro del senyor Carsten Wilke.

Lo ke fue la Inkizisyon, ya vo lo konti para la Espanya en una de mis emisyones. Fue lo mismo en Portugal: en primero las torturas para obtener ke el sospechado atorge tu atadijo a su haliz relijyon eskondida. Kuando digo sospechado, es manera de avlar; el sospechado  puediya ser una sospechada, i la sospechada torturada una vyeja mujer, komo la antepasada de Pierre Mendes-France . Ama antes de todo los sospechados deven dizir ande estan todos sus byenes, sus paras, asta las mas chikas kucharikas. La Inkizisyon no fue solo una matansina, fue tambyen un rovo, komo izyeron los Almanes unos 400 anyos mas despues. . Esto todo se trava de los arshivos de los tribunales inkizitoryales, syendo ke esto todo era legal. Los ke atorgan por fuersa ke kedaronn djudyos en sus korasones, i ke tyenen el koraje de refuzar de trokar de idea, o solo de dizir ke trokaron de idea, son  kemados bivos, ombres, mujeres, kual ke sea la edad: lo ke la Santa Inkizisyon yamava kon orguyo autodafe, akto de fey…

Por siguro los djudyos ke lo puediyan se fuiyan de este pais maldicho; se fueron en el mundo entero, i entre tantos unos se fueron en Fransya (Bordeaux, Bayonne) otros en Hollanda, ets Ya vos avli de estos.

I malgrado todo esto, uvo una rezistansa espirituala de los ke kedaron en Portugal. Rezistyeron a todo, inkluyendo la ley de eksterminasyon de 1683, ke permetiya a los djudyos de fuir el Portugal, ama kon la kondisyon de deshar sus kriaturas de menos de 7 anyos, ets.

Ofisyalmente, la Inkizisyon se va kedar en 1821, ama la ultima kemadura sera en 1761. En todo, uvo en Portugal 1.175 kondenasyones a ser kemado (unas 30.000 en Espanya)

Komo ya lo savesh, dainda oy kedaron kazales en Portugal ande biven dainda djudyos ke rezistyeron mas de 500 anyos, praktikando en sekreto sus relijyon, komo en el kazal de Belmonte. Asigun Cecil Roth, esta rezistansya spirituala durante tanto tyempo kontra una fuersa tan kruela komo era la Inkizisyon, es una koza unika en el mundo.

Por siguro, ay tambyen oy en Portugal djudyos venidos de aki o de aya ke no son bene anusim .  Para los ke se interesan a la istorya i a la situasyon de los djudyos de oy en el Portugal, i ke entyenden el franses, los kombido de ir a meldar sovre internet, en el sityo sefarad.org, el estudyo del Senyor Michael Studemund-Halevy intitolado Les Juifs au Portugal aujourd’hui.

El 17 de marso 1989, el Prezidente de la Republika, el famozo Mario Soares, deklaro ofisyalmente: « Em nome de Portugal, peço perdao aos judeus pelas perseguiçoes de que foram vitimas na nossa terra. » (En nombre del Portugal, demando pedron a los Djudyos por las persekusyones ke los aharvaron sovre muestra tyerra).  No se si los djudyos de oy pedronaron por lo ke sufrieron los djudyos de ayer, ama kale saver ke de famiya djudiya fueron Nuno Kruz Abecassis i Jorge Sampaio, mayores de Lisboa, i ke este ultimo a sido mismo Prezidente de la Republika de 1996 asta 2006.

Despues de estos todos reyes kriminales, ke el Portugal meta a su kavesa un Prezidente de famiya djudiya, esto amostra ke la Istorya puede trokar.

Kon esto vos vo deshar, i vos digo al djueves ke vyene, si kyere el Dyo!

Edmond Cohen