eSefarad Noticias del Mundo Sefaradi
Keridos amigos, de meldar el mesaj 46933 del 26 de mayo eskrito por muestro amigo Albert Tari a LK sovre Napoleon, Korsika i los Djudios, me dyo la gana de azer este djueves una emisyon konsagrada a la istorya de los djudyos de Corsica. .
Saludos a todos
El program se puede sintir por Internet kada djueves a las 4 H O6 PM, ora de Paris, indo al sityo RADIO – la fréquence juive. Kale tener pasensya i asperar un poko, no se oye pishin.
Saludos a todos
Edmond Cohen
Paris, Fransya
LOS DJUDYOS DE CORSICA
Saludos a todos los oyentes de la emisyon Muestra lingua, la emisyon en djudeo-espanyol fundada por el profesor Haïm-Vidal Sephiha i prezentada agora por vuestro servidor Edmond Cohen, kon Philippe en la kabina.
Komo a kada vez, vos akodro ke el proksimo atelye de konversasyon de la Asosyasyon Vidas Largas se tendra el martes 4 de junyo, de las dos i un kuarto asta las sinko, en el Centre Communautaire, 119, rue Lafayette Paris (10°), métro Cadet o Poissonnière.
Despues de lo ke vos konti la semana pasada sovre Napoleon i los djudyos, un senyor Albert Tari, ke bive en Paris, eskrivyo un mesaj muy interesante en Ladinokomunita sovre la atitud de los Corsos verso los Djudyos, sovre todo durante la Gerra i despues kon Israel.
Kale dizir ke uvo a la televizyon franseza este anyo, el 14 de avril, un dokumentaryo, ke malorazamente no vide, sovre el ayudo de los Corsos a los Djudyos durante la Gerra.
Komo a kada vez, keriya empesar por el empesijo, kijo dizir la yegada de los djudyos en Corsica durante la Istorya, ama no topi fuentes istorikas siguras. Penso ke del tyempo ande la Corsica era parte del Imperyo romano i los djudyos sivdadanos romanos, no ay razon porke no uvyera djudyos en Corsica. Ama no meldi ke ayga preva istorika de esta koza.
Lo ke meldi, es ke verso los anyos 800 (kuando Charlemagne era koronado emperador) vinyeron djudyos de Ayifton. Ama en vedra no se sovre ke fuentes se funda esta afirmasyon.
Meldi tambyen ke se topan en syertas iglesias dokumentos eskritos en lashon al lado de los ke son eskritos en latino. Ama deke en las iglesias i no en kales? No se.
Meldi tambyen ke djudyos vinyeron en Corsica de Napoli entre 1500 i 1530, i tambyen de Padova en 1684, despues del pogrom ke konosyo el ghetto de Padova el 14 de agosto. De estos vendriya la alkunya Padovani.
Lo ke es mas siguro, es ke vinyeron en Corsica, entre 1755 i 1769, djudyos yamados por Pasquale Paoli, kapo de la demokrasiya corsa. Kale saver ke los Corsos arondjaron los djenovezes de Corsica en 1755 i tomaron Pasquale Paoli komo kapo militar i politiko. I el izo votar por el puevlo una constitusyon demokratika ke va servir de modelo mas despues para los Amerikanos.
Es un fakto istoriko ke, a la diferensya de todos los paizes al rededor, Paoli yamo a los djudyos para ke vengan en Corsica, i les aprometyo libertad de relijyon. Los Corsos teniyan menester de la para i de la kapachedad de los djudyos para el komersyo. La kuestyon ke no se es: kuantos djudyos vinyeron en Corsica? Meldi entre 5.000 i 10.000, ama esto parese muy egzajerado, syendo ke mas despues, en el siglo19, los djudyos eran muy pokos, i kuando digo muy pokos, es muy pokos. Un syerto Marc de Cursay (un pseudonimo, ya lo atorga el mismo, ama no konosko su haliz nombre) a eskrito ke en la mitad del siglo 19, dunke verso 1850, se kontan solo kuatro djudyos en la isla entera.
Otro fakto istoriko, mas serka de mozotros: en 1915, los turkos arondjaron a mas de 700 djudyos de Palestina, de los alrededores de Tiberiade, i, por una razon ke no se, vinyeron a instalarse en Corsica.
Vo aprovar de darvos una idea la mas vedradera posivle de lo ke se paso en Corsica entre 1940 i 1943, savyendo ke, asigun los akodros de armistisyo entre Fransya i Almanya, la Corsica no fue okupada por los Almanes. Kuando los Almanes i los Italyanos entraron en la zona non okupada en novyembre 1942, la Corsica fue okupada por los Italyanos. Esta okupasyon sureo astal 8 de septyembre 1943. En este tyempo, Italia kapitulo, Mussolini fue enkarselado i los Almanes entraron en Corsica. Ama la armada italyana, ke aviya sido alyada de los almanes, troko de kampo i lucho kontra los almanes al lado de los rezistantes Corsos i de los fransezes i marrokis venidos de Afrika ainsi ke 400 amerikanos. El 5 de oktobre 1943, los Almanes eran arondjados de Corsica, primer departamento franses liberado.
Esto es la istorya de la Corsica. Agora veremos la istorya de los djudyos en esto todo.
La primera kuestyon es: kuantos djudyos aviya en Corsica en 1940? Asigun lo ke meldi, eran unos 600.
Komo lo dishe, entre 1940 i Novyembre 1942, no ay ni Almanes ni Italyanos en Corsica, solo la polisiya franseza de Vichy.
El prefeto embiyado por Vichy en Corsica en agosto 1940 se yama Paul Balley. Es diplomado en linguas oryentales (arabo, turko, ebreo…) i no tyene dinguna gana de aharvar a los djudyos. Kuando resive de Vichy el orden de dar los nombres de los djudyos de Corsica, i sovre todo de los djudyos ajenos venidos a refujyarse en Fransya despues de 1933, topa solo 142 djudyos. Dyo el orden a su ermano Pierre, ke lavora al lado de el, de echar a basho las listas de kriaturas. Sovre los 142, kaji todos son sea fransezes, sea turkos (los djudyos de Palestina venidos en 1915, komo ya lo dishe, de Palestina, ke aziya dainda parte del Imperyo osmanli). La Fransya de Vichy puede, kon el Statuto de los djudyos, de oktovre 1940, serrar varyos ofisyos a los djudyos fransezes, ama aferrarlos dainda no. En kuanto a los turkos, son suditos neutros.
Entremyentres, son syenes de djudyos, lo mas ajenos, venidos del norte okupado por los Almanes, ke reushen a pasar la linea de demarkasyon i ke van a refujyarse en Corsica. De 600, los djudyos se topan ser entre 2.000 i 4.000, no se save byen porke djustamente no figuran en los arshivos de la polisiya corsa ke serra los ojos.
Es agora un profesor corso de istorya, Louis Luciani, ke esta lavorando i bushkando sovre este tyempo.
Los mayores de kazales azen falsos papeles para los djudyos, ke se eskonden en famiyas de kazalinos pedridos en las montanyas en medyo de la isla.
En agosto 1942, el prefeto Balley resive el orden de nombrar los djudyos ajenos. Demanda a sus polises, i resive las mismas repuestas: « No topimos dingun djudyo ajeno en muestra rejyon ».Lo todo eskrito en un estilo muy administrativo.
En vezes dizen ke ay turistos. Los turistos son los djudyos ajenos mas o menos eskondidos. Para estos « turistos », ke tyenen menester de kartas de alimentasyon para pueder merkar de komer, el prefeto las demanda a la administrasyon, komo lo topo Louis Luciani bushkando en los arshivos.
En novyembre 1942, komo vos dishe, 85.000 askeres italyanos, lo ke es enorme para una isla de unos 300.000 moradores, vyenen a okupar la isla. Vos akodro ke los Amerikanos vyenen de okupar la Afrika del Norte, i los Italyanos se espantan, i tyenen razon, de un debarkamento amerikano, lo ke va afitar un anyo mas despues, ama dainda no estamos en esto.
Ya lo dishe munchas vezes aki mismo en varyas emisyones ke ize, el peligro no vyene tanto de los Italyanos, ke en vedra no se interesan muncho a los djudyos, ke de la polisiya franseza, ke kyere aferrar a los djudyos para embiyarlos a los almanes.
El subprefeto de Bastia, Pierre-Henri Rix, embiya la lista de sus djudyos ajenos al Konsul jeneral de Turkiya en Marsilya, Bedri Arbel, para ke le de papeles de turkos. Parese ke lo izo, asigun lo ke eskrivyo este Rix en sus memoryas, ke yo personalmente no topi para meldarlas, ama topi esto sovre internet, en un artikolo de Cecilia Gabizon, gazetera para el Figaro.
En este mismo artikolo de Cecilia Gabizon, se konta ke la Administrasyon de Vichy demanda al prefeto Balley de verifyar si Solvey Saethrin, ke mora en Calvi, es djudyo. Balley responde ke no tyene este nombre en sus listas, i ke dunke no puede saver si es djudyo o no. Vichy demanda yene. Balley bushka, i responde ke no es un ombre, ama una mujer, ke izo dos bushkedades para saver si es djudiya, ama no obtuvo rezultado. Mueva demanda de Vichy. Balley responde: « No fue posivle de saver si es djudiya. Le demandimos, respondyo ke no »…
Meldi munchas vezes ke dingun djudyo de Corsica fue deportado. Meldi tambyen, en el artikolo de Marc de Cursay, del kual ya vos avli mas arriva, ke fueron unos 70 los deportados djudyos. En vedra, asigun lo ke topi, kon verifikasyon sovre el livro-memoryal de Serge Klarsfeld, uvo un deportado, i a lo ke parese un solo, el desmazalado Ignace Schreter. En el livro de Klarsfeld esta eskrito komo nasido en Berlin en 1901, teniya 38 anyos, fue aferrado en Ajaccio, parese por los fransezes, yevado en el kampo (franses) de Rivesaltes, serka de Perpignan, i de aya embiyado a Drancy, i de Drancy embiyado el 23 de marso 1943 por el treno n° 52 al kampo de eksterminasyon de Sobibor. En este treno eran 1.000 djudyos, 640 ombres, 360 mujeres. En estos 65 kriaturas. Fueron todos sin eksepsyon asasinados a sus yegada al kampo.
Es vedra tambyen ke los italyanos aferraron a unos kuantos djudyos. En el numero 16 de la Lettre Sepharade, ke se puede meldar sovre internet, un djudyo de Corsica, Albert Aben, konta lo ke le afito. Mos konta este Albert Aben ke su famiya venida del Imperyo osmanli biviya kyeta en Corsica. Solo empesaron a espantarse kon la yegada de los italyanos en novyembre 1942. Ama es solo en mayo 1943, sin ke nada lo aga andevinar, ke empesaron los aferramyentos de ombres de 16 a 60 anyos, lo ke era su kavzo. El 24 de mayo, kon otros djudyos, fueron aferrados i deshados liberos por 48 oras para ke puedan aparejarse. I ansina, dos diyas mas despues, unos 60 ombres fueron yevados en el chiko kazal de Asco (un nombre byen topado) i enkarselados en una eskola. Para komer, pan i arroz. Vijitas de la famiya permetidas. Ansina sureo asta septyembre, kuando los italyanos kapitularon i ke empesaron los kombates de liberasyon, no kontra los italyanos, ama kontra los almanes venidos de la isla serkana de Sardaigne.
Esto es lo mas ke sufrieron los djudyos ombres de Corsica, durante unos tres mezes, en kondisyones muncho mas livyanas ke en los kampos fransezes, para no avlar de los kampos almanes.
Los otros djudyos se fueron eskonderse en famiyas kristyanas en varyos kazales de las montanyas corsas. Entre estos kazalinos ke eskondyeron a djudyos uvo Jean Colonna, papu de Yvan Colonna, ke a sido kondenado aze poko por aver matado el prefeto Erignac. Meldi ke un testigo djudyo eskrivyo al Tribunal para kontar el zahut del papu del akuzado.
En sus eskondijos, los djudyos asperaron la liberasyon, ke vino muncho mas presto ke en el kusur de la Fransya, syendo ke todo fue eskapado kon la Liberasyon de toda la Corsica i la fuida de los Almanes el 5 de oktovre 1943.
Agora ay djudyos de Corsica ke demandan ke todo el departamento de Corsica se vea rekonoser la kategoriya de Djusto.
Ay un solo otro egzemplo de Djustos kolektivos, es el kazal de Chambon sur Lignon.
Es siguro ke los djudyos de Corsica tuvyeron muncho mazal de ser protejados por el puevlo corso en jeneral, i es vedra ke grasyas a esta proteksyon, kon la sola eksepsyon del desmazalado de Ignace Schreter, todos se sovrebivyeron.
Esto dicho, kale akodrar syertas kozas:
1°) De uno, los djudyos de Corsica no eran munchos en una isla montanyoza.
2°) De dos, a parte un mes entre septyembre i oktovre 1943, no aviya almanes en Corsica. La okupasyon italyana, ke turo solo unos 10 mezes, de novyembre 1942 a septyembre 1943, no tuvo nada de ver kon la okupasyon almana. En septyembre 1943, los italyanos se aunaron kon los fransezes para luchar kontra los almanes.
3°) El rolo del prefeto Balley parese aver sido muy importante, i el no era corso.
4°) No kale pensar, malorozamente, ke todos los corsos fueron rezistantes. Aviya en Corsica halizes perros antisemites, gazetas antisemitas, ama no pudyeron azer el danyo ke keriyan.
No digo esto, por siguro, para menospresyar el ayudo de la mayoriya de los corsos, lo digo solo para ke no se olvide la djente ke uvo en la Fransya okupada por los almanes i no los italyanos, djustos ke tomaron grandes rizikos durante muncho mas tyempo.
Despues de la gerra, se konta ke, en 1947, los Corsos ayudaron al renasimyento del Estado de Israel. La Hagana teniya menester del aeropuerto de Ajaccio para arresivir avyones ke kaliya kargar de armas i embiyar en lugares guadrados por la Hagana (esto todo, por siguro, enteramente proibido por los Inglezes). Kuatro Corsos, medio pulizes, medio bandidos, se van a ver el Prefeto de Corsica en este tyempo. Le demandan de serrar los ojos i deshar partir los avyones kargados de armas illegales. El prefeto refuza en primero, ama los corsos le dan a entender ke si no acheta, puede pedrer la vida…I komo le dizen indimas ke el Governo franses esta d’akodro, al kavo el prefeto desha azer.
Kyen era este prefeto? Maurice Papon. Este Papon aviya aferrado munchos djudyos durante la gerra, pokos anyos antes, ama dinguno lo saviya. Es un istoryano yamado Michel Berges ke va deskuvrir su rolo munchos anyos mas despues, i un djudyo, su amigo Michel Slitinsky, va obtener kon muncha difikultad porke era protejado por el Prezidente Mitterrand, ke sea djusgado i kondenado en 1998. Ama en 1947, i durante munchos anyos despues, dinguno lo save, i este negrinyado va mismo ser ministro entre 1978 i 1981.
I agora? Komo estan los djudyos en Corsica?
Asigun lo ke pude meldar, ay agora muy pokos djudyos en Corsica, al punto ke es yuch de topar minyan para un kadisch. Los mansevos se van sovre el kontinente para sus estudyos o para topar mujer, i se kedan aya.
Es la misma koza ke mos aviya dicho el senyor ke mos arresiviya en Sens. Mas los djudyos son pokos, mas se azen pokos, porke la mansevez se va bushkar afuera lavoro i mujeres.
Esto dicho, komo dize Haim-Vidal Sephiha, semos el puevlo de los nisim. Kyen save? Tanto ke avra djudyos en Corsica, un nes puede afitar…
Astal djueves ke vyene, si kyere el Dyo!
Edmond Cohen
