eSefarad Noticias del Mundo Sefaradi
Keridos amigos, aki toparash el teksto de la emisyon de esta semanada.
El program se puede sintir por Internet kada djueves a las 4 H O6 PM, ora de Paris, indo al sityo RADIO – la fréquence juive. Kale tener pasensya i asperar un poko, no se oye pishin.
Aki toparesh el teksto de mi emisyon de este djueves, la ultima ke vo azer antes de mis vakansas de julyo i agosto (en estos dos mezes va ser redifuzyones). Para esta emisyon me tomi koraje i vo avlar del Talmud, una ovra monumentala eskrita por munchos i munchos durante munchos siglos ( a lo manko sinko, sino mas) ke aze mas de 5.000 pajinas. No vos espantesh: no las vo meldar todas. Solo dos chikitikos pedasikos.
Vamos a ver lo ke van a pensar de mi lavoro el haham Farhi, i tambyen Tito Jacob, el kunyado de Liliane.
Saludos a todos
Edmond Cohen
Paris, Fransya
LOS DJUDYOS DE BULGARIYA
Saludos a todos los oyentes de la emisyon Muestra lingua, la emisyon en djudeo-espanyol fundada por el profesor Haïm-Vidal Sephiha i prezentada agora por vuestro servidor Edmond Cohen, kon Philippe en la kabina.
Keridos oyentes, kon las vakansas de enverano, me kedi dos mézès sin avlarvos, i ya me eskarinyi de vozotros. Vos dezeo de toparvos todos sanos i rezyos, para empesar en pokos diyas un anyo muevo kon salud i kon vida.
Por lo ke fueron mis vakansas, kale ke sepash ke me fui dos semanas, entre djulyo i agosto, en Bulgariya, al bodre de la Mar Preta, ke en vedra, komo ya lo endevinatesh, no es preta ama de un muy ermozo blu. Era tyempo de una kalor de atabafar, i vos dire ke mos kedimos kon mi mujer, la demanayana a la plaj para banyarmos, i despues de mediudiya en la kamaredta kon klimatizasyon, de tal manera ke no vimos nada de la Bulgariya. I por tanto, el senyor Nisim Koen, ke bive en Sofia i se yama komo mi, savyendo ke mi nombre djudyo es Nisim, i ke aviya ambezado por un mesaj miyo sovre Ladiokomunita ke me iva en Bulgariya, me eskrivyo sovre internet para kombidarme por vinir a verlo en Sofia, ama mi mujer i yo estavamos a 400 kilometros de Sofia, i no tuvimos el koraje de achetar su kombite, malgrado la gana ke teniyamos de konoserlo. Pasado sea, sera por otra vez si kyere el Dyo.
Despues de la Bulgariya, mos fuimos a la montanya en Fransya para bushkar un poko de freskor, ama en primero fue, komo en la Fransya entera, el mismo tyempo de atabafar komo en Bulgariya, i esto afillu en las montanyas.
I en supito, kaji de un diya al otro, el tyempo troko, i de atabafar se izo buz entezador. Tuvimos de trokar de vestimyenta, i pasar del mayo de banyo a los puloveres i parkas.
En el mismo tyempo, mos ambezavamos mirando la talevizyon ke este mamzer de Izak – ke nombre toparon para nombrar una desgrasya – aharvava la Florida despues de Haiti.
Komo no pensar a muestra amiga Rosina Karako, ke este en Ganeden, ke sovre Ladinokomunita mos dava kada anyo haberes de las fortunas ke aharvavan su morada en Florida.
Bueno, esto dicho, ya entyendo ke no tomatesh la radio para oirme avlar de mis vakansas. Ama antes de empesar mi emisyon, tengo de meldarvos de muevo el anunsyo importante ke ya vos meldi ay dos mezes en franses:
2012 sera l’année du 70ème anniversaire des départs de convois de déportation de France en 1942.
Les Fils et Filles des Déportés Juifs de France (FFDJF) organisent tout au long de l’année la lecture des noms des déportés de chaque convoi à 12 heures sur le parvis du Mémorial de la Shoah, 17 rue Geoffroy l’Asnier Paris (4°).
Serge Klarsfeld a demandé à l’Association Muestros Dezaparesidos de prendre plus particulièrement en charge les commémorations du convoi 44 du 9 novembre 1942 dit « convoi des juifs grecs » avec lequel 900 judéo-espagnols ont été déportés, ainsi que du convoi 45 du 11 novembre 1942 avec près de 300 judéo-espagnols.
Si vous souhaitez faire partie de ceux qui, le vendredi 9 novembre 2012 et/ou le dimanche 11 novembre 2012, liront leurs noms, que vous ayez ou non des membres de votre famille déportés dans l’un de ces convois, veuillez vous faire connaître auprès de (prenez de quoi écrire):
Gisèle Nadler: 06 82 37 65 05 (après 18h)
Ou Mathilde Pessah: mathilde.ph@noos.fr
Despues de este triste anunsyo, de kualo avlarvos oy? Komo estuve en Bulgariya, afillu si no vide nada del pais, me vino la idea de avlarvos oy de los djudyos de aya i de sus istorya.
Asigun lo ke topi sovre Wikipedia en ingles, el primer eskrito amostrando la prezensya de djudyos en Bulgariya es en latino, de unos 150 anyos antes del Kristo, en Ulpia Oescus – agora se yama Gigen i se topa al norte de la Bulgariya, kaji a la frontera kon la Rumaniya. Este dokumento, kon una menora, mos avla de un archisynagogos Joseph.
Munchos anyos despues, en 379 despues del Kristo, un edikto del emperador Theodosus Iero avla de los djudyos i de la destruisyon de kales en Illiriya i Trakya.
Me vyene un poko yuch de avlarvos de la istorya de los djudyos de Bulgariya sin avlarvos de la istorya de la Bulgariya en jeneral, salvo ke esta istorya es koza muy larga. Embiyo los ke son interesados a meldar Wikipedia.
Kale ke sepash ke despues del establesimyento del primer imperyo bulgaro en 681, munchos djudyos persekutados en el imperyo bizantino se fuyeron en Bulgariya, tambyen kristyana, ama enemiga de los Bizantinos.
Ama son los Bizantinos ke eskaparon por okupar la Bulgariya en 1014. El emperador bizantino Basileo II, yamado el Bulgaroktonos, el matador de Bulgaros, asyego 14.000 soldados prizoneros bulgaros, deshando yene un ojo a un prezonero sovre 100, para ke pueda yevar los 99 otros…
Despues, en 1186, los Bulgaros lograron de echar a los Bizantinos i de formar un sigundo imperyo bulgaro. De muevo vinyeron djudyos estableserse en Bulgariya, malgrado una iglesya ke les keriya mal.
En los anyos 1400, vyenen los Osmanlis ke a poko a poko toman toda la Bulgariya. Komo ya lo savemos, los djudyos se topan byen basho los Osmanlis, i vyenen en Bulgariya de todas partes. Los primeros djudyos son Romanyotes fuyidos de los Bizantinos, ama despues vyenen Ashkenazim fuyendo la Ungariya, i despues de 1492 son los Espanyoles ke ayegan. Las tres komunidades (romanyotes, ashkenazim, sefaradim) biven en djuntos en Sofia, por egzemplo, i en 1640 se toman un solo haham para las tres.
Esta situasyon va surear asta la kaida de los Osmanlis kuando los Rusos van a echarlos de Bulariya en 1878. Un muevo estado bulgaro ve la luz, i el haham de Sofia, Gabriel Mercado Almosnino, resive los Rusos i va entrar en la Asamblea de Bulgariya en 1879.
In 1920, ay 16.000 djudyos en Bulgariya, ama kon lo ke se pasa en Almanya vyenen a ser mas de 48.000 en 1934.
Desde el empesijo de 1941, salen leyes kontra los djudyos, komo en Fransya o Italya. Los djudyos pyedren munchos derechos, i en agosto 1941, los ombres djudyos son ovligados, komo lo demandan los almanes, de lavorar en kampos de lavoro para ombres djudyos, yevando la estraya amariya. Son 3.300 en junyo 1942 i 10.000 en la primavera 1943.
La povlasyon i la Iglesya kristyanas van a luchar para impedir a los Almanes de deportar a los djudyos, komo lo kyeren azer.
El 26 de agosto 1942, a la demanda de Hitler, el governo bulgaro sale un Komisaryato a los Echos Djudyos, i empesan las negriguras komo ovligar los djudyos a kedarse en sus kazas, tener menos de komer ke los otros,yevar estreya amariya, etc.
En enero 1943, vyene de Fransya el nazi Dannecker, espesyalizado en la destruisyon de los Djudyos (era el kapo de Drancy en Fransya). Su eskopo es la deportasyon de los djudyos. Lo va azer en los territoryos okupados por los Bulgaros, Trakya i Makedonya. De aya son deportados, en avril 1943, 4.221 djudyos de Trakya (sovre unos 6.000) i 7.122 de Makedonya (sovre unos 8.000).
Vyendo esto, Dimitar Pesev, vise-prezidente del parlamento bulgaro, se opone a la deportasyon de 6.000 djudyos de Bulgariya bivyendo en la Bulgariya misma. Es ayudado por Stefano, el Metropolito de Sofia. En mayo 1943, una manifestasyon es organizada ke reune 10.000 personas delantre del palasyo real.
Finalmente, los 50.000 djudyos de la Bulgariya no van a ser deportados i van ansina salvar sus vidas.
Los djudyos bulgaros de los otros paizes okupoados por los Almanes, komo la Fransya, eyos van a ser tomados i deportados sin piadad.
Kuando van a vinir los Rusos i los komunistos en Bulgariya despues de la Gerra, la mayoriya de los djudyos, unos 44.000, se van a ir en Israel. Son kaji los solos ke sean otorizados a salir de Bulgariya. Solo kedan oy un poko mas de 1.000 djudyos en la Bulgariya entera.
Ay dos mezes, vos ambezi de la muerte de muestra amiga Sara Konfino Golub, ke fue tantos anyos la sekretarya tan kerida de la asosyasyon Vidas Largas, i vos dishe ke vos iva avlar de eya. Lo azere. Ama oy, kyero solo meldarvos lo ke eya, nasida en Karnobat, sivdadika de Bulgariya, aviya eskrito para La Lettre sépharade de junyo 1996, i ke yo vine meldar kon eya a mi lado aki en la radyo, en una emisyon ke izimos en djuntos el 15 de marso 2007.
Murir,bivir – todos en djuntos!
Ke pekados tuvimos mozotros, ke nasimos djidyos?
Ke mal podimos azer a los otros, ke deviyamos pagarlo kon tantas lagrimas, dolores i sufriensyas?
Lo tenemos eskrito esto todo en muestras frentes de las kualas tener verguensa?
Podemos topar las palavras djustas ke mijor konvyenen para eksprimar muestra amargura?
Kuando los grandes empesan a peleyarsen i a no entendersen entre eyos, son los chikos ke pagan en aharvandosen. Ansina es ke empeso la sigunda gerra mondyala en el 1939 i la vida perikoloza para la djuderiya entera de la Evropa.
Komo ke los syelos se avyeron i de ayi estuvyeron kayendo mezuras kruelas, pezgadas, unas mas negras de las otras.
De diya en diya la vida se estuvo azyendo mas eskura i dezesperada. Las butikas, las serraron, las puertas de las eshkolas para las kriaturas i los mansevos, tambyen serradas.
Las estreyas amariyas – malgrado ke no eran mas grandes de un boton normal – deviyan ser yevadas i kozidas en muestros vistidos.
De las mueve de la noche fin las dyes de la dimanyana, dinguno no tenia el derecho de salir de su kaza, mezmo en su kurtijo, para ir al bedakise; pishar, kagar, deviyamos azer todo aryento de muestras moradas. La polisiya bulgara bekleyava la male djudiya noche entera, no seya alguno ke se fuyera de su kaza.
Entre todas estas mezuras, la mas kruela era ke muestros ombres de 18 anyos fina 55 anyos estuvyeron arrankados de las famiyas i inbiyados a lavorar echos pezgados – kampos de echos forsados. Kon una palavra dicho: inbiyados al « djenem tepe » ande ni gayo kantava, ni pasharo bolava.
De esta manera los anyos pasaron unos atras de los otros. Los Alemanos i los Rusos se estavan peleyando sin piyadad.
Stalingrad ya kayo en las manos de los rusos kon 300 000 yesires nazistos en el empesijo del 1943.
En los kampos de lavoro, los echos estavan muy pezgados, eyos eran mas presto para matarlos moralmente. A las sinko de la dimanyana todos ya estavan en pyes, prontos para ir al lavoro i kavakar las tyerras muy duras, azyendo karreras i kaminos de trenos.
La kanserya, la ambyertura, los piyojos, las hazinuras – no mankavan. Los Bulgaros ke dirijavan estos kampos no mankavan de aharvar kon palos godros a estos ke no arrivavan a eskapar sus normas de echo del diya, en dizyendo ke los djidyos lo azivan maksus para sabotar el echo. Arrivava tambyen de meterles enriva del bel la karreta kon la kuala lavoravan, kuatro oras enfrente del sol, sin meneyarsen.
En este tyempo fue kompozada la kantika sigyente:
El gadol ya vyene
palo grande tyene.
Kuando lo veygo,
entero titireygo.
Kaminos largos pasare,
en mi kaza yo me topare,
en la kamika, kon mi mujerika
yo me durmire;
en la kamika, kon mi Rachelika,
yo me abrasare.
La gara del treno « Iktiman » se topava en medyo del kamino de Sofya-Filibe (Plovdiv).
En este mezmo lugar, en el mes de mayo de 1943, se topava una partida de djidyos adovando un kamino de treno. Penas del guerko.
La luvya ke aviya kayido la noche de antes dava una grande freskura.
Un poko mas lechos se topava un segundo kamino libero, por onde el kual pasavan los trenos.
En esta demadrugada yelada en la kuala la djente no estavan daynda bueno espertados i no aviyan ampesado a lavorar, en un momento solo el dirijente de los lavores arreto el echo i dyo el orden, todos ke se metan en pyes kon las palas i las kazmas en basho.
Un treno estava yegando en la gara.
De enfrente se estava vyendose. Un treno ke transportava merkansiyas, o komo lo yamavan los Bulgaros « de 8 kavayos u de 55 personas ».
Avagar avagar el estava avansando, las puertas estavan avyertas. De kada vanda aviya soldados alemanos kon un plomo en las manos, prontos a tirar si alguno se meneyava de su lugar.
El treno kedo de avansar enfrente de los djudyos.
Aryente del treno aviya muncha djente, asentados en basho. En este momento se oyeron bozes en djudezmo enkantados de oyer avlar la lingua muestra. Eran djudyos de la Trakia, Drama, Kavala, Dede-Agatch i otras sivdades ke los estavan deportando. En este treno eyos se topavan de mas de 24 oras, ambyertos i enserrados.
Los ombres, djidyos todos, echaron a los pasajeros el chiko pedasiko de pan ke arresiviyan por el diya. Entre los lavorantes aviya mansevikos de estas sivdades ke vyeron sus paryentes aryento del treno. En un solo momento se aboltaron, desharon lo ke teniyan en las manos i, komo unos liyones se echaron aryento del treno, gritando:
« Murir, bivir – todos en djuntos! »
Aryento del treno hue una topadura de famiyas, kon lagrimas, tristeza i kontentes. Partyeron kon los suyos. Los soldados alemanos no les defendyeron de entrar.
El treno partyo kon todos en djuntos. Lagrimas kayeron de los ojos de todos estos ke asistaron a esta sena. Poveretas famiyas, poveretos mansevikos!
A la yamada de la noche mankavan: Avramiko, Albertiko, Yosefiko, Nesimiko i muntchos otros… mas de siguro ke ninguno de eyos torno atras.
De esta manera los nazistos dyeron un echemplo a los djidyos bulgaros en apruvandoles: « si vozos no mos sintish a mozos, mira ke puede arrivarvos! »
Mas de 50 anyos pasaron de este diya, ma esto ke se vido kon los ojos nunka se pudiya ulvidar.
Algunas vezes, kon muestros uyidos buenos avyertos, uyivamos de las bokas de mis ermanos melodiyas de kantikas tristes. Mi Synyora madre no tardava de azer su remarka sigyenda:
« Ke estash kantando, ijikos miyos? Ke me estach angustyando el korason? No podech kantar una koza de ver? »
La repuesta ke davan mis ermanos era syempre la mizma:
« Mama, kada ves no se kanta de alegriya. Ay algunas vezes ke se kanta i de tristeza, komo los Turkos lo ke dizen en turko:
« Ya derten (una ves de mal)
Ya zeften ( otra ves de alegriya) ».
Sara Konfino, de Bulgariya
Kon esta meldadura ya vino tyempo ke vos deshe i vos diga: Al djueves ke vyene, si kyere el Dyo!
Edmond Cohen
