Muestra Lingua: LOS DJUDYOS DE BUKHARA por Edmond Cohen

Keridos amigos, a la okazyon de tomar mis vakanzas asta septyembre, seran puvlikados en esta seksion los tekstos de emisyones pasadas.
 
El program se puede sintir por Internet kada djueves, indo al sityo RADIO – la fréquence juive . Kale tener pasensya i asperar un poko, no se oye pishin.

Saludos a todos
Edmond Cohen – Paris, Fransya
Para Ladinoomunita

LOS DJUDYOS DE BUKHARA

Los yamamos djudyos de Boukhara, ama seriya mas djusto de yamarlos djudyos de Uzbekistan, esto inkluyendo, en mas de los djudyos de Boukhara, los de Tashkent i los de Samarkand.

Antes de avlarvos de los djudyos de Uzbekistan, me  parese nesesaryo de avlarvos un poko de este pais, en ke lugar se topa i kualo fue su istorya.
 
El Uzbekistan es oy, i desde 1991, un estado independyente laiko, ama de povlasyon muzulmana, de serka de 27 milyones de djente, ke tyene por kapitala Tashkent, i komo kapo del Estado desd’el empesijo en 1990 i asta 2014 Islam Karimov.
 
Ande se topa ? Es syempre yuch de dizir a la radyo, sin pueder amostrarvos una karta.  Vamos a dizir, para azerlo kurto, ke es un pais grande komo la Espanya ke se topa al norte de Afganistan i Turkmenistan, el kual Turkmenistan lo separa del Iran, al este i al sur del Kazakstan ke lo separa de la Rusiya, al oeste del Kirggizistan ke lo separa de la Kina, i del Tadjikistan ke lo separa de la Indya. No se si agora vej mijor, lo ke es importante es ke sepaj ke estamos en Aziya sentrala, i ke Boukhara, Samarkand i Tashkent eran en la Edad Medya sovre lo ke se yamava el kamino de la seda.

El Uzbekistan es un pais de dezyertos ande solo 10% de las tyerras son kultivadas (dezyertos del Kizil-kum i de Karakum). Es tambyen un pais yano, i kuando se dize pais yano, se dize pais de invazyones. La istorya de esta rejyon del mundo da el mareo. Sin avlar de los primeros moradores de esta tyerra ande uvo umanos desde unos 40 a 50.000 anyos, sin avlar de la epoka entre 2.200 i 1.700 antes del kristo, ande uvo una sivilizasyon dicha del Oxus,el riyo ke se yama agora Amu-Darya, sivilizasyon ke dezaparesyo enteramente, vamos a vinir a los ke moravan en esta rejyon en los 500 antes del kristo, i ke eran persos yamados Sogdyanos. Son eyos ke fundaron Samarkand. Eran buenos agrikultores ke konosiyan muy byen las teknikas de irrigasyon. Serka de Samarkand los arkeologos toparon los pyones del djugo de echecs los mas vyejos ke se konoskan.

Entre 545 i 540, invazyon de los Persos i integrasyon de la Sogdyana en el imperyo Akemenido. 

En 327, es Alexandro de Makedonya ke toma al rey perso Darius la Sogdyana. En Samarkand, se kaza kon Roxana,  ija de un kapo lokal ke a echo prezonero. En 323, toma la kale (citadelle) ke se yama agora Tashkent. Despues de su muerte, kuando sus jenerales s’esparten su imperyo, la rejyon kae basho la dominasyon de Seleucos i de los Seleusidos – lo ke mos aserka de la fyesta de Hanuka, syendo ke vos akodro ke es kontra un rey seleusido ke los Makabim kombatyeron para rekonkistar su patria. Ama esto se paso en un tyempo ande los Seleusidos dainda estavan en Yerushalaim ama no estavan mas en Sogdyana, syendo ke verso 250 antes del kristo, un greco-bactryano yamado Diodotos se izo rey independente. 

Ama entre el primer siglo antes del kristo i el sigundo despues de el, uvo las invazyones de nomades vinidos de Kina, los Yuezhi i los Sakas. I despues de eyos, son los Partos ke okupan la rejyon en 115, i despues de eyos  es el imperyo Kuchan, un trivo de los Yuezhi vinidos de Kina, ke okupa una parte de la rejyon. Estos de Kuchan van a ser el atadijo entre la Kina i el oksidente, i es en grande parte grasyas a eyos ke se avre el kamino de la seda, ke no vale solo por la seda, ama tambyen las espesyas, el chay, el papel, la porselana : dainda asta oy dizimos los chinis . Este kamino muy importante en el empesijo de la Edad medya va azer la rikeza de una sivdad komo Samarkand.

Agora va empesar una lucha entre los Persos del imperyo sasanido, al sur,  i los Hunes blankos yamados Hephtalites, vinidos en Azya sentrala desde la Kina. Verso los anyos kinyentos los Sasanides son arrepushados i son los Hunes Hephtalites, terrivles gerreros ke espantan a todos,  ke okupan la rejyon.

Ama la rueda de la istorya no s’eskapo de aboltarse. Volo ago kolay, no vos avlo de los Ruanruan ke no reusheron, ama vos tengo de avlar de los Köktürks ke, komo ya lo entenditesh, son turkos, i ke, alyados kon los Persos, arrepushan o los Hunes blankos Hephtalites despues de una bataya de ocho diyas serka de Boukhara, en los anyos 560.

Los turkos se pelearon entre eyos, i son los Kinezos, alyados kon los Uygures, ke ganaron kontra los Turkos en 657 i les tomaron toda la Azya sentrala.

Agora van a vinir los Arabos. En 712 toman la rejyon del Uzbekistan a los Kinezos i ovligan la povlasyon, ke era zoroastriana, a azerse muzulmana. Vos akodro ke kaji en el mismo tyempo, los Arabos no son leshos de Poitiers, en Fransya, de ande van a ser arrepushados por Charles Martel, el papu de Charlemagne, en 732.

A poko a poko, los kinezos pedren la Aziya sentrala ke kae en las manos de los arabos. Es de este tyempo ke los arabos se ambezan de los kinezos la teknika de la fabrikasyon del papel. Se ambezan el sekreto de fabrikasyon de los prezoneros kinezos. . I mismo los arabos van a mijorear la fabrikasyon en kulaneando hrandajos. Samarkand va ser el primero sentro de produksyon de papel del mundo muzulmano. Harun al Rashid, el famozo kalife de Bagdad ke ofresyo una ora a Charlemagne, en los anyos 800, uza el papel para todas las administrasyones de su imperyo. El papel va solo ayegar en Fransya en el empesijo del siglo XIV.

Kale dizir ke los puevlos de Uzbekistan se solevantan munchas vezes kontra los Arabos, ama no reushen. Entre 750 i 850, del tyempo de los kalifes Abbasides, la syensya arabo-muzulmana es a su altura. En Uzbekistan nasen Al Farabi, grande filozofo, Al Khwarizmi, grande matematiko, ke dyo su nomgre al algoritmo, Al Farghani, astronomo, i mas despues Avicenne, el famozo mediko, serka de Boukhara.

Ama los arabos van a ser arondjados por los Persos Samanides entre 900 i 1000, i en 992 yene vyenen los Turkos, esta vez son los Turkos karakanides ke arrondjan a los persos Samanides. Pokos anyos despues, en 1040, otros turkos muncho mas famozos, los Seldjukis, toman el poder, ama van a ser eyos mismos arondjados por las invazyones mongolas despues de 1200. Genghis Khan toma Samarkand en 1220. Despues de los Mongoles, los Turkomongoles kon Tamerlan toman el poder i Tamerlan aze de Samarkand su kapitala en 1369. Tamerlan fue un muy grande konkistador, ama despues de su muerte, sus desendyentes no pudyeron guadrar a su imperyo, ke kayo en 1507 entre las manos de los uzbeks de la dinastiya de los Haybanides, una dinastiya muzulmana mongol. El byervo mizmo de Uzbek vyene de özbeg, prinsipe mongol del siglo XIII ke metyo el Islam en la orda de oro.

Despues de estos todos trokamyentos ke mos dan el mareo, la situasyon se stabilizo un poko, i uvo el khanat de Bukhara , kon Bukhara komo kapitala, ama tambyen Samarkand. El Khan de Bukhara era un Djanid, desyendyente de Djöchi, ijo bohor de Genghis Khan. Ama la povlasyon avlava el persano.

El khanat de Bukhara se izo emirato en 1785, i en 1868, vyene a ser protektorato de Rusiya. Los Uzbeks azen una rebuelta kontra el tsar en 1916, ama no reushen. Despues de la revolusyon rusa, la armada kolorada toma Bukhara en 1920, i el emirato vyene a ser una republika sosyalista sovyetika de Bukhara, i en 1924 de Uzbekistan. En 1991 el soviet de Uzbekistan se aze independyente, ama es un prezidente, Islam Karimov, ex kapo del partido komunisto,  ke toma el poder, un poder kaji diktatoryal ke no admite dinguna opozisyon, sovre todo islamika. Este prezidente esta dainda al poder oy, i komo fue yene elijido para syete anyos en 2007, deve kedarse al poder, en prinsipyo, asta 2014.

Esto todo mos alesho un poko de los djudyos, ama pensi ke no saviyaj muy byen de kual pais estavamos avlando, i agora vaj a mijor entender ke fue la situasyon de los djudyos en este pais.

Agora, por empesar, ya entenditej deke se avla de los djudyos de Bukhara, i no de Uzbekistan, es porke, asta 1924, se avlava solo del emirato de Bukhara, o de la republika de Bukhara, i el byervo Uzbekistan no se empleava.

La primera kuestyon es : de kuando ay djudyos en Uzbekistan? Algunos dizen ke los primeros fueron los israelitos del reyno de Israel, deportados por los Asiryanos en 722 antes del kristo. Ya ize aki una emisyon sovre la kuestyon de saver kualo se izo de estos deportados. El Tanah dize ke los Asiryanos yevaron a los deportados en las sivdades de Mediya. Ama de esto no sale ke se fueron en Bukhara, i lo mas pensan ke los djudyos vinyeron en Bukhara del tyempo de los reyes persos i del imperyo Akemenide, verso 520 antes del kristo, lo ke ya es bastante leshos.

Lo ke es siguro, es ke mi amigo Binyamin de Tudela, sovre el kual ize una konferensya el anyo pasado, eskrive en los anyos 1160 ke en la sivdad de Samarkand ay 50.000 djudyos, ke tyenen por kapo el prinsipe Rav Ovadia, i ke ay entre eyos djente savya i rika. Ya savemos ke no kale tomar todo lo ke dize mi amigo por lira syen, ama yene es interesante de ver ke en 1160 un djudyo de Espanya avla de Samarkand i de djudyos aya.

Los djudyos sufrieron komo los otros de las invazyones mongoles de Genghis Khan, i komo los otros se toparon byen de la vinida de Tamerlan ke fraguo de muevo a Samarkand i izo vinir a famiyas djudiyas.

Kuando se konstituyo el khanat uzbek de Bukhara, ya era la fin del kamino de la seda, i los djudyos sufriyeron muncho de la situasyon de dhimmi, kon vergis espesyales kontra los djudyos i munchas interdiksyones.

Los djudyos eran kortados de los otros djudyos del mundo, sin edukasyon, i muy aflakados, kuando vino en Bukhara, en 1800, un djudyo de Tetuan, en el Maroko espanyol, yamado Joseph Maman, ke dechido de okuparse de esta komunita korajoza, ke rezistyo durante vente siglos a todo lo ke vos konti sin kedar de ser djudyos. El se okupo de merkar livros de orasyones, avriyo eskolas, i arrebivyo a esta komunita.

Los djudyos de Bukhara empesaron a immigrar en Palestina. Ay asta oy en Yerushalaïm una male ke se yama Sh’hunat Buhori, la male de los djudyos de Bukhara.

Kuando vinyeron los rusos tsaristos, trokaron las kozas. Afillu el antisemitismo tsaristo, los vergis kontra los djudyos i las otras interdiksyones se kedaron, i se puede dizir ke los djudyos se enrikesyeron del tyempo de los tsares. Al kontraryo, kuando uvo la revolusyon i los komunistos, empesaron las persekusyones relijyozas i la serradura de las eskolas djudiyas.

La mayoriya de los djudyos de Bukhara profitaron de la independensya en 1990 para irse del pais, sea en Israel, sea en Amerika. Ama yene kedan unos mil djudyos en la male djudiya de Bukhara. 1.000 sovre 27 milyones, no es muncho.

El prezidente Karimov, afillu si es un kaji diktator, no es tan mal para los djudyos. En primero porke lucha kontra todo modo de influensa islamista en su pais muzulmano, i sigundo avryo relasyones dipomatikas kon Israel, i Uzbekistan Airways tyene una relasyon direkta kada semana kon Israel.

Lo ke va ser despues, dingun save, ama esto es vedra para todos los paizes.

Lo ke es siguro, es ke esta komunita djudiya de Bukhara tuvo muncho zahut de dayanear asta oy. A kada vez me enkanto de ver kuanta fuersa tyene el puevlo djudyo de rezistir a todo.

Antes de eskapar esta emisyon vos kyero dizir ke para azerla, me fui sovre internet al artikolo histoire de l’Ouzbekistan en Wikipedia, i para los djudyos meldi dos artikolos: uno de Armand Schmidt en la revista Regards, i uno de Fréréric Viey en la revista Communauté Nouvelle.

I agora vos desho dezeandovos de muevo una buena fyesta de Hanuka, i astal djueves ke vyene, si kyere el Dyo!