eSefarad Noticias del Mundo Sefaradi
Keridos amigos, vos do el teksto de la proksima emisyon del programa.
El program se puede sintir por Internet kada djueves, indo al sityo RADIO – la fréquence juive . Kale tener pasensya i asperar un poko, no se oye pishin.
Saludos a todos
Edmond Cohen – Paris, Fransya
LOS DJUDYOS DE BAYONNE
Saludos a todos los oyentes de la emisyon Muestra lingua, la emisyon en djudeo-espanyol fundada por el profesor Haïm-Vidal Sephiha i prezentada agora por vuestro servidor Edmond Cohen, kon Philippe en la kabina.
Komo a kada vez, vos akodro ke el proksimo atelye de konversasyon de la asosyasyon Vidas Largas se tendra kon bueno, i si las fortunas de inyeve no lo impiden, el djueves 6 de janvier 2011, de las dos a las kuatro i medya-sinko, en el Centre Communautaire, 119 rue Lafayette Paris (10°) métro Gare du Nord o Poissonnière.
Esto dicho, oy pensi de avlarvos de unos djudyos sefaradim ke, sin ser del imperyo osmanli ni del norte del Maroko, i dunke sin tener la misma istorya, yene son halizes sefaradim djudeo-espanyoles, o a lo manko lo fueron, afillu si son, en el mismo tyempo, halizes djudyos fransezes, i de muncho tyempo, kyero avlar de los djudyos de Bayonne. una sivdadika al sur oeste de Fransya, al bodre del rio Adour, muy serka del oseano atlantiko ama no djusto al bodre, i no leshos de la frontera espanyola (unos trenta kilometros).
Lavori sovre todo sovre un artikolo del senyor Gerard Nahon ke se topa en el livro dirijido por mi amigo Henri Mechoulan, intitulado Les juifs d’Espagne, histoire d’une diaspora 1492-1992.
En vedra, uvo djudyos en Bayonne, komo en kada lugar de Fransya, desde muncho tyempo, i a lo manko desdel empesijo de la Edad Medya. Ama no es de estos antiguos djudyos ke vos kyero avlar, porke fueron echados afuera, komo todos los djudyos de Fransya, por los reyes fransezes, i esto durante la Edad Medya.
Se avla muncho mas de la ekspulsyon de los djudyos de Espanya en 1492 por los reyes katolikos ke de la ekspulsyon de los djudyos de Fransya por los reyes fransezes, por empesar Philippe le Bel en 1306, despues de el Charles VI, el rey loko, en 1394, i otros despues de el. Munchas vezes me demandi deke, porke la terrivle krueldad fue la misma en Fransya ke en Espanya. Sivdades i rejyones enteras de Fransya ande aviyan djudyos famozos se vazyaron en entero de sus djudyos, ke dezaparesyeron para syempre. Ande se fueron i kualo afito alos djudyos de Rouen, de Posquières ou de Troyes? No so istoryano, ama kreo ke no se save muy byen. Una de las diferensyas kon los djudyos de Espanya me parese ser ke los djudyos de Espanya guadraron asta oy la lingua espanyola, myentres ke los djudyos echados de Fransya no guadraron la lingua franseza en dinguna parte del mundo. Esto me parese ser unas de las razones por las kuales se avla menos de la ekspulsyon de los fransezes ke de los espanyoles. Otra razon, puede ser, es ke el reyno de Fransya, del tyempo de Philippe le Bel, era mas chiko ke los reynos de los reyes katolikos, i los djudyos aharvados deviyan ser menos numerozos.
Esto todo era para dizir ke, al kavo de la Edad Medya, no kedavan mas djudyos en Bayonne, komo en el kusur de todo el reyno de Fransya. Syerto, aviyan unos kuantos djudyos en el Kontado Venaissin (Carpentras, por enshemplo) ama djustamente porke el kontado Venaissin no pertenesiya al reyno Franses, ama al papa, i los djudyos de Carpentras eran yamados por esta razon los djudyos del papa. De la misma manera, kedavan tambyen djudyos en Provence porke la Provence no aziya dainda parte de la korona franseza. Se konta komo los djudyos de Marsilya ayudaron komo pudyeron a 118 refujyados djudyos aragonezes en 1492. Ama syete anyos despues, en 1499, la Provence entro basho la korona franseza, i pishin el rey de Fransya Louis XII se apresuro de echar afuera los djudyos de Provence, inkluyendo estos mismos djudyos de Marsilya ke aviyan ayudado poko antes a sus ermanos Aragonezes.
Indimas, kuando los reyes katolikos ekspulsaron a los djudyos de Espanya, el rey de Fransya Charles VIII se apresuro de serrar la Fransya a todo djudyo, syendo ke sus antepasados no aviyan echado a los djudyos para ke el los resiva de muevo.
Se puede dizir, zaten, ke esta politika de serradura de la Fransya a la yegada de djudyos se mantuvo ofisyalmente sino en vedra asta la Revolusyon.
Kale dizir ke este sejen siglo va ser terrivle para los djudyos de Evropa. En un siglo, entre 1492 i 1590, uvo las ekspulsyones de los djudyos de Espanya en 1492, de Arles en 93, de Sisilya i de Sardenya (pertenesyando a la korona de Aragon) tambyen en 93, de Firenze en 94, de Lituaniya en 95, de Portugal en 96, de Provernce, komo lo dishe, en 1501, del reyno de Napoli en 10, de Ratisbonne en 19, de las posesyones espanyolas de Italya del sur en 41, del Würtemberg en 51, de Baviere en 55, de Brandebourg en 73, de Brunswick en 1590. Agora ay munchos evropeos ke se burlan o se keshan, no sin razon, de la intoleransya del Islam, ama komo se dize en franses, kale en primero barrir delantre su puerta, o los inglezes dizen ke kuando tyenes una kaza de vidro, mijor es no echar pyedras andel vizino. Porke munchos de estos djudyos echados afuera de la Evropa kristyana fueron bastante kontentes de topar azilyo ande los muzulmanos.
Esto dicho, si la Fransya era serrada a los djudyos, no lo era a los kristyanos, ke sean kristyanos de munchas jenerasyones, o kristyanos konversos del djudaismo, lo ke se yamava muevos kristyanos.
Los muevos kristyanos empesaron a vinir en Fransya en medyo del siglo 16, savyendo ke la Inkizisyon se establesyo en el Portugal en 1536. En 1550, un punyado de muevos kristyanos dichos portugezes demandan al rey Henri II lo ke se yama lettres patentes, kijo dizir papeles de otorizasyon para entrar en Fransya kon derechos iguales a los de los fransezes.
Se avlava de portugezes i no de espanyoles, afillu si en fato eran en mayoriya espanyoles, porke veniyan del Portugal i no de Espanya ke en jeneral era enemiga de la Fransya. Asta oy se avla, en las sinagogas de Bayonne, de rito portuges kuando se ve ke kedaron dichas en espanyol i no en portuges. Estos sözde kristyanos eran por lo mas krypto-djudyos , afillu si no todos, i estos sözde Portugezes eran en vedra de orijen espanyola.
El rey Henri III en 1574 aze muevas letttres patentes, syempre para los muevos kristyanos, asigurando ke no sean « bushkados en sus vidas », lo ke es una manera de rekonoser ke se save ke en vedra son djudyos sekretos, porke si eran halizes kristyanos, deke espantarse por sus vidas ?
Esto dicho, los muevos kristyanos se komporten a la vez komo kristyanos, i komo djudyos. Komo kristyanos, son bavtizados, se kazan en la iglesya, i son enterrados komo kristyanos. Ama komo djudyos, biven entre eyos, se kazan solo entre eyos, i son enterrados en un pedaso separado del semetaryo. No son solo separados en el semetaryo. Son mismo separados en las kazas, porke kuando se avla de los djudyos de Bayonne, no es la vedra ; Los muevos kristyanos no son otorizados a bivir en la sivdad mizma de Bayonne. Biven en la sivdadika de Saint-Esprit, syerto serka de Bayonne, tanto ke oy aze parte de la sivdad de Bayonne, ama en estos tyempos era una otra sivdad. Aya es ke biviyan los muevos kristyanos, ke oy yamariyamos bene anusim, ijos de forsados. I lo mas kuryozo, es ke las kazas de Saint-Esprit pertenesen a la iglesya, i los bene anusim alkilan las kazas a papazes.
Es muy interesante de ver komo, a poko a poko, los sözde kristyanos se izyeron rekonoser komo djudyos, a la grande birra de los Inkizidores venidos d’Espanya. Por enshemplo, en 1654, azen merkar a su nombre por el kura de Saint-Etienne (sivdadika al lado de Saint-Esprit, i ke agora, komo Saint-Esprit, aze parte de la sivdad de Bayonne) un terreno ke va servir de semetaryo para los muevos kristyanos. Ama este kura ya save muy byen lo ke aze, porke se save por los papeles de la Inkizisyon ke los enterramyentos se azen de manera djudiya, kon el akodro del kura.
Trenta anyos mas tadre, en 1689, los djudyos – no se dizen djudyos, se dizen portugezes – merkan el semetaryo. Ama ya antes, los portugezes aviyan tomado un haham (Isaac Israel de Avila) el kual, por enshemplo, va atestiguar por eskrito en 1673 ke kazo a Isaque Alvares kon Raquel Alvares de Almeda « asigun la ley de Moshe i Israel ».
Los inkizidores de Espanya saven esto todo i son lokos de birra. En kuanto a las otoridades fransezas, serran un ojo, i deshan el otro avyerto : De un lado, el kal no se eskonde mas ; es mismo vijitado por turistos, komo Mme d’Aunoy, una dama kristyana ke konta en 1679 komo los djudyos le amostraron este kal.
Ama del otro lado, vemos en 1722 una desizyon del Consilyo del rey ke aze komo si deskuvriya ke ay djudyos aya i preparando la tomada de sus byenes. Los djudyos van a obtener de anular esta desizyon, ama en pagando 100.000 liras . Esto mos amostra lo ke vos diziya sovre un ojo serrado i el otro avyerto…
No tengo aki bastante tyempo para kontarvos de kualo biviyan estos djudyos. Algunos se izyeron rikos, otros no, ama ay una koza ke ya es konosida sovre los djudyos de Bayonne : es ke son los djudyos de Bayonne ke izyeron la primera fabrikasyon de chokolata en Fransya. Kale saver ke es Hernan Cortes ke, en 1527, trucho de Mexico en Espanya la chokolata ke beviyan los Aztecas, mesklando kon agua kayente la ava de kakao majada.
Kuando Anne d’Autriche, ke malgrado su nombre era espanyola, se kazo kon Louis XIII en 1615, vino kon su chokolata traida de Espanya, i ansina es ke la chokolata entro por la primera vez en Fransya.
Vyendo esto, los Muevos kristyanos de Bayonne, ke en vedra eran djudyos, i aviyan guadrado atadijos kon los de Espanya, izyeron venir a Bayonne la ava de kakao, i se metyeron a fabrikar la chokolata… sin tener ofisyalmente derecho de venderla, lo ke yene aziyan a eskondidas. Yene fue una reyna de Fransya, Marie-Thérèse de Espanya, la mujer de Louis XIV, ke fue la mas famoza bevedora de chokolata, i komo ya se save, kuando el rey o la reyna aze una koza, toda la korte kyere azer lo mismo, i ansina la chokolata de los djudyos de Bayonne fue famoza en la Fransya entera. Los kristyanos de Bayonne se ambezaron presto de los djudyos, i asta oy en diya la sivdad de Bayonne se keda famoza por su chokolata, afillu si agora no son mas djudyos ke la azen.
Malgrado mi grande interes para la chokolata, me devo de kedar sovre la kuestyon i venir atras a este dezeo de los djudyos de Bayonne de toparse kyetos i kon los mismos derechos ke los fransezes kristyanos.
Ya vos konti aki mismo, el 22 de oktovre 2009, en mi emisyon sovre los djudyos fransezes del tyempo de la Revolusyon, komo el rey Louis XVI, en 1788, demando a su ministro Malesherbes, de estudyar lo ke se puediya azer kon los djudyos bivyendo en Fransya, ama este estudyo no pudo ir astal kavo syendo ke la Revolusyon s’estava aserkando ; i komo los djudyos de Bayonne, i no solo eyos ama tambyen los de Bordeaux i del Kontado Venaissin fueron rekonosidos ofisyalmente komo sivdadanos fransezes por la Assemblee Constituante el 1790.
Vos kyero solo akodrar un pedasiko de lo ke vos dishe en esta emisyon :
– el 21 de desyembre 1789, se da la sivdadaniya a los non-katolikos, ama en vedra son los protestantos. Clermont-Tonnerre demanda ke los djudyos obtengan la misma desizyon, syendo ke son non-katolikos. A su lado munchos deputados, i kon eyos Regnault de Saint Jean d’Angely, avokato liberal. Ama yene Rewbell toma la palavra para opozarse a toda medida en favor de los djudyos, i la ley no pasa. Si, pasa para los protestantos, ama no para los djudyos. Por lo ke es de los djudyos, la Asamblea dechida de ver mas despues…
– Vyendo esto, i ke la opozisyon vyene de los deputados de Alsace, los djudyos sefaradim de Bayonne, Bordeaux i Avignon, aprovan de obtener la sivdadaniya para eyos, syendo ke los djudyos de Bordeaux ya obtuvyeron lettres patentes del rey Henry II, ke les da derechos de sivdadanos. Deke tendriyan menos derechos oy ? El 28 de janvier 1790, Talleyrand demanda ke sean a parte de los otros djudyos, porke eyos ya son en vedra sivdadanos, i no kale ke pyedran sus derechos en asperando los otros djudyos.
I despues de un peleo furyozo, los djudyos de Bordeaux, Bayonne i Avignon se ven rekonoser la sivdadaniya. De este diya no se van mas okupar de los otros, kijo dizir de los del este .
Esto es lo ke vos diziya en 2009. Vos akodro por paranteza ke Talleyrand diziya la vedra : los djudyos de Bayonne i Bordeaux eran tanto sivdadanos ke partisiparon a las eleksyones de los Estados jenerales de 1789. A la rovez, si los djudyos del este (Alsace i Lorraine), van a eskapar por obtener la sivdadaniya franseza eyos tambyen, sera solo un anyo i medyo despues, el 27 septyembre 1791, por una ley promulgada por el rey el 13 de novyembre del mismo anyo.
Antes de eskapar mi emisyon sovre los djudyos de Bayonne, vos kyero dizir unos kuantos byervos sovre los ke vinyeron a Paris, i ke fraguaron el kal Buffault, ke es el kal ande me vo yo.
Kale dizir ke los djudyos de Bayonne no eran los solos djudyos dichos portuguezes, ni indimas los solos sefaradim de Fransya. Al lado de los de Bayonne, aviya los djudyos de Bordeaux, ke eran eyos tambyen dichos portugezes, i komo vos dishe aviya los djudyos del papa, los del kontado Venaissin, ke eran eyos tambyen sefaradim. I aviya tambyen en Paris, en el siglo 19, unos kuantos djudyos, muy pokos, venidos del imperyo osmanli. Estos todos sefaradim de Paris se van a aunar para fraguar, al lado del kal de los ashkenazim rue de la Victoire, un kal ke sea sefaradi, i ke sea, si es posivle, tan ermozo komo el de la Victoire. Kale muncha para. Todos dan, i dan muncho, ama yene no abasta. Vyene un ombre, un djudyo de Bordeaux, muy konosido por ser hovarda, i ke tyene un nombre kuryozo, se aze yamar Daniel Osiris, afillu si en vedra se yama Ifla. El es ke da las paras ke mankan, i ansina es ke se fragua en 1877 el kal de la rue Buffault, ke puede arrekojer 900 personas, 600 ombres i 300 mujeres. Vos puedo yo dizir ke para la neila de kipur ay una mar umana ke inche el kal, la entrada del kal, i asta la kaye Buffault.
Esto dicho, i komo ya lo dishe munchas vezes aki, el kal seriya vaziyo si se asperavan djente de Bayonne, Bordedaux, kontado Venaissin i osmanlis. Agora son los djudyos de Afrika del Norte ke inchen este kal.
I mismo en Bayonne agora, los djudyos no son los antiguos muevos kristyanos, ke dezaparesyeron, sea matados por los almanes durante la gerra, sea engrutidos en el puevlo fransez. Los djudyos de Bayonne, agora, son eyos tambyen djudyos venidos de Afrika del Norte. Sin eyos, me demando ke seriya oy el djudaismo franses en jeneral, i sefaradi en partikolar.
Sovre esto vos desho, dizyendovos al djueves proksimo, si kyere el Dyo!
