eSefarad Noticias del Mundo Sefaradi
Keridos amigos, vos do el teksto de la proksima emisyon del programa.
El program se puede sintir por Internet kada djueves, indo al sityo RADIO – la fréquence juive . Kale tener pasensya i asperar un poko, no se oye pishin.
Saludos a todos
Edmond Cohen – Paris, Fransya
LOS DJUDYOS DE BAYONNE (2) PARO KOMO HITLER MEAM LOEZ
Saludos a todos los oyentes de la emisyon Muestra lingua, la emisyon en djudeo-espanyol fundada por el profesor Haïm-Vidal Sephiha i prezentada agora por vuestro servidor Edmond Cohen, kon Philippe en la kabina.
Komo a kada vez, vos akodro ke el proksimo atelye de konversasyon de la asosyasyon Vidas Largas se tendra, kon bueno, el djueves 6 de janvier 2011, de las dos a las kuatro i medya-sinko, en el Centre Communautaire, 119 rue Lafayette Paris (10°) métro Gare du Nord o Poissonnière.
El djueves pasado, no pude eskapar, por manko de tyempo, la emisyon ke vos aviya aprejado sovre los djudyos de Bayonne. Deke manki de tyempo? Porke empesi mas tadre ke mi ora. Deke empesi mas tadre? Por una vez no es la kulpa de la radyo. Si empesi mas tadre, es porke por la primera vez desde los sinko anyos i medyo ke vos avlo aki, ayegi atrazado a la radyo. I deke ayegi atrazado a la radyo? Porke es solo en el metro ke me apersivi ke me aviya yerrado de tefter i ke no aviya tomado el teksto de mi emisyon. Me kedava solo de salir del metro en korryendo, de aboltar a mi kaza en suvyendo las kayes i las eskaleras, lo todo en korryendo. Ya lo dishe munchas vezes, yo me kedi mansevo, ama estas buen mal de eskaleras se izyeron mas i mas altas agora…Si algunos se apersivyeron ke era un poko soflamado al empesijo de mi avla, agora saven deke…
Por siguro, la ora se korryo mas presto de mi, i por esto no empesi al tyempo i no pude eskapar.
Kapara. Es un mal por un byen. Porke vo aprovechar ke vos tengo de eskapar la emisyon de antes para adjustar unas kuantas kozikas mas sovre Bayonne i sus djudyos.
Me aviya kedado el djueves pasado sovre la sivdadaniya franseza ke los djudyos sefaradim de Fransya, inkluyendo los de Bayonne, obtuvyeron el 28 de janvier 1790, mas de un anyo i medyo antes de los ashkenazim de Alsace i Lorraine.
Una vez fransezes, los djudyos de Bayonne se komportaron komo los otros djudyos de Fransya, entrando en todas las profesyones i los ofisyos ke les aviyan sido serrados tanto tyempo. Munchos se fueron a bivir en Paris, i aya, a poko a poko, van a tener kales de mas en mas grandes. Fraguan en 1851 un kal kaye Lamartine, no leshos de la rue Buffault, para 300 personas, ama muy presto no va abastar.
Kale dizir ke los djudyos de Bayonne no eran los solos djudyos dichos portugezes, ni indimas los solos sefaradim de Fransya. Al lado de los de Bayonne, aviya los djudyos de Bordeaux, ke eran eyos tambyen dichos portugezes, i komo vos dishe aviya los djudyos del papa, los del kontado Venaissin, ke eran eyos tambyen sefaradim. I aviya tambyen en Paris, en el siglo 19, unos kuantos djudyos, muy pokos, venidos del imperyo osmanli. Estos todos sefaradim de Paris se van a aunar para fraguar, no leshos del kal de los ashkenazim rue de la Victoire, un kal ke sea sefaradi, i ke sea, si es posivle, tan ermozo komo el de la Victoire. Kale muncha para. Todos dan, i dan muncho, ama yene no abasta. Vyene un ombre, un djudyo de Bordeaux, muy konosido por ser hovarda, i ke tyene un nombre kuryozo, se aze yamar Daniel Osiris, afillu si en vedra se yama Ifla. El es ke da las paras ke mankan, i ansina es ke se fragua en 1877 el kal de la rue Buffault, ke esta vez puede arrekojer 900 personas, 600 ombres i 300 mujeres. Vos puedo yo dizir ke para la neila de kipur ay una mar umana ke inche el kal, la entrada del kal, i asta la kaye Buffault.
Los djuyos de Bayonne i de Bordeaux van a dar a la Fransya ombres de primera altura : Bordeaux va dar Pierre Mendes France, ke fue asigun mi el ombre de poder politiko el mas popular de Fransya a parte del jeneral de Gaulle, i Bayonne va dar René Cassin, ke va servir de Gaulle durante la Gerra, i va ser despues de la gerra premio Nobel de la paz : el es ke eskrivyo la Deklarasyon de los derechos umanos de la ONU.
Las dos gerras kostaron muncho a los djudyos de Bayonne. Los almanes se yevaron, entre otros, el haham de Bayonne, ke era de orijen de Alsace, Ernest Ginsburger, ombre de grande valor, muy savyo i muy korajozo.
Esto dicho, i komo ya lo dishe munchas vezes aki, el kal de Buffault en Paris seriya vaziyo oy si se asperavan djente de Bayonne, Bordedaux, kontado Venaissin i osmanlis. Agora son los djudyos de Afrika del Norte ke inchen este kal. De Bayonne, solo keda el Prezidente de onor de Buffault, Philippe Ginsburger, ijo de Ernest, el haham de Bayonne matado por los Almanes komo vos dishe.
I mismo en Bayonne agora, los djudyos no son los antiguos muevos kristyanos, ke dezaparesyeron, sea matados por los almanes durante la gerra, sea engrutidos en el puevlo fransez. Los djudyos de Bayonne, agora, son eyos tambyen djudyos venidos de Afrika del Norte. Sin eyos, me demando ke seriya oy el djudaismo franses en jeneral, i sefaradi en partikolar.
Sovre esto me kedava sovre lo ke aviya aparejado para el djueves pasado, ama kuando la djente meldo sovre internet este teksto ke aviya aparejado, unos izmirlis eskrivyeron uno despues de otro ke aviya en su famiya una tradisyon asigun la kuala esta famiya veniya de Bayonne : los Amado, famiya de la fundatrisa de Ladinokomunita, Rachel Amado Bortnick, los Chicurel, los Suhami, famiya de muestro amigo Renaud Suhami.
Kuando i deke tres famiyas a lo menos, i puede ser mas, kyen save? se fueron de Bayonne a Izmir, esto dinguno lo save. Yo reushi de topar sovre un sityo de internet las alkunyas de los djudyos ke biviyan en Saint-Esprit, al lado de Bayonne, en el siglo 17, i no topi estos tres nombre Amado, Cicurel i Suhami. Ay un misteryo, i va ser interesante de bushkar.
La ultima koza ke vos keriya dizir antes de eskapar sovre Bayonne es ke es agora una sivdad muy alegre, ke se topa ande los Vaskos fransezes, i ke despues de aver deshado afuera, en Saint-Esprit, los muevos kristyanos, agora es orgulyoza de sus djudyos. Ama es tambyen orguyoza de ser vaska, i agora, desde 1932, kada anyo, en prinsipyo del primer myerkoles de agosto astal alhad, dunke durante sinko dias, es la fyesta. El anyo 2011, no se deke, va ser del myerkoles 27 de julyo asta el alhad primo de agosto. Kada uno, a la manera de lo ke se pasa en Pamplona, se viste de blanko kon una vita kolorada, i la djente kanta i bayla en las kayes, se va a mirar korridas de toros a la manera espanyola…i komo se pasa en Fransya, por siguro beve tambyen, i no solo agua, i kome la espesyalidad de Bayonne, el jambon de Bayonne, puro puerko, komo dizen kon orguyo, ama nunka pretendi ke toda la povlasyon de Bayonne era djudiya…
Agora ya eskapi sovre Bayonne i sus djudyos, i para el tyempo ke me keda, pensi se meldarvos un pedasiko travado del Meam Loez, ayudandome de la transliterasyon en karakteres latinos ke se topa en el livro de Michael Molho intitulado (en espanyol) Literatura sefardita de Oriente, publikada en djuntos por La Lettre Sepharade i l’Alliance Israélite Universelle. Tomi un komentaryo de Shemot, por Yaakov Khuli, sovre los dos ordenes de Paro , en el primer kapitulo : en los pesukim 15 i 16, dyo el orden a las komadres ebreas de matar a los ijos ebreos rizin nasidos, i komo no lo izyeron, en el ultimo pasuk (22) dyo el orden a todo su puevlo de echar al riyo todo ijo rizin nasido. Es este ultimo pasuk del primer kapitulo ke vamos a ver, sovre este sigundo orden de Paro.
Komo ya vos dishe, Khuli eskrive en un espanyol puro de byervos turkos, por enshemplo en este teksto no topi ni uno, ama yeno de byervos ebreos, munchas vezes sin menester. Deke eskrive kefi en vez de asigun, por enshemplo, no se, porke esto va a la kontra de su eskopo ke era djustamente de dar a entender en muestra lingua kozas relijyozas ke eran eskritas solo en ebreo. Bueno, ansina es.
Empeso mi meldadura:
En akel diya nasyo Moshe Rabenu. Le disheron los estreyeros a Paro : kefi (asigun) de nuestra hohma (savidurya) vemos ke oy nasyo el salvador de los djudyos, ma non savemos si es mitsri (edjipsyano) o djudyo. I su enganyo fue ke savresh ke Moshe lo krio la ija de Paro i lo tomo komo un ijo suyo, sigun avizaremos de largo en el kapitulo vinidero, por esto no supyeron determinar los estreyeros si es mitsri o es djudyo, porke lo ke ven en las estreyas es unas sinyales delgadas ke kyere muncho meoyo para entenderlas, i esto era lo ke les mankava, por esto no entendiyan byen lo ke veiyan. Los akojo a todos los mitsriyim i enkomendo Paro a todo su puevlo dizyendo : « Todo ijo ke nasera de oy endelantre al rio lo echaresh i todo ija abediguaresh »(Aki yo Edmond Cohen avro una chika paranteza : no se de ande Khuli tomo esta traduksyon ; puede ser es la suya. Ama kale azer dikat al byervo abediguar, ke Nehama traslada por dar ayudo. Aki no es esto. De toda manera la Biblia de Ferrara no dize abediguaresh, ama abiviguaredes, ande se andevina la rais bivir, i de fato el byervo ebreo es tehayun, ande se oye la rais hai, bivo, i ke yo trasladariya desharash bivir. Serro la paranteza i mos aboltamos a Khuli).
Ke syendo los Mitsriyim eran zonim (pervertidos), keriyan tener las nekevot (las embras –les femelles- aki las chikas) para tomarlas por mujeres ; por esto komando ke las ijas las rijan de buen modo por ke bivan sanas i rezyas.I si tambyen ke syendo vido ke Israel ivan pujando shelo ke dereh teba (ke no komo el kamino de la natura, kijo dizir mas presto ke la norma) disho vadaï (por siguro) ke la avera (el pekado) esta entre eyos, por esto kijo abediguar las nekevot (vamos a dizir salvar las ijas) para azer avera kon eyas, ke avyendo zenut (prostitusyon) se aparta la shehina, i kon esto avra modo de apokarlos (azerlos pokos).
(Otra paranteza : komo vos dishe, no ay byervos turkos, ama vitesh komo un byervo sovre dos es en lashon. Esto me da a pensar ke en 1733, kuando eskrivyo Khuli, los djudyos de Turkiya deviyan puede ser avlar i entender el ebreo muncho mijor de oy. Syerro la paranteza, i mos aboltamos a Khuli).
I esta gezera (sentensya) fue tanto sovre Israel komo sovre los Mitsriyim, i por esto disho kol aben ayilod ayeora tashlihuu (todo el ijo ke nasera al riyo lo echaresh). Ke esta avla amostra ke kualkyer ijo ke nase, aun ke es mitsri, ke lo echen al riyo. I ay kyen dize ke al principyo asentensyo solo sovre Israel i despues asentensyo tambyen sovre los Mitsriyim. I el taam (la razon) ke komando de echarlos al riyo, i no otro modo de muerte milevad (ademas) de lo ke avizo arriva, ay otro kavzo ; i es ke le disheron los estreyeros ke vyeron kon su sensya ke el salvador de Israel tyene de murir kon agua. I verdad es lo ke vyeron, ke por kavza del agua fue niftar (muerto) Moshe Rabenu, por lo ke harvo a la penya para ke kite agua, sigun avizaremos en la parasha de Hukkat. Ma eyos se enganyaron i entendyeron ke una kriatura ke era rauy (digno) de ser salvador de Israel kefi (asigun) de su maaraha (destino) se kevranto agora su mazal, i sea de murir aogado dyentro del agua ; por esto komando Paro ke a todos los ijos ke nasen ke kos echen al riyo para afitar tambyen ke se eche el salvador de Israel i se muera en su chikez antes ke alevante kavesa.
I si demandaresh syendo ya vyeron en las estreyas ke sea de murir en el agua ke ehreah (menester) de esta sentensya i entrar en sangre de tantas almas. Savresh ke en todas las kozas se kere istadelut (aksyon) para ke se agan, sigun vemos en las naves ke van por mar, ke no basta kon tener buen tyempo si no tambyen es menester ke los marineros vayan travajando (Khuli dize travajando i no lavorando, komo dizimos agora) i adovando las velas i travar la nave kon remos, ke uno kon otro se tyene de menester para ke se aga la koza presto. Lo mizmo es esto. Ke aun ke el mazal ya ovliga ke el salvador de Israel sea de murir en la agua, kon todo esto es ehreah (menester) de prekurar para ke se afirme una ora antes ke bolte el mazal.
Los mitsriyim no kijeron resivir su komando kon taana (objeksyon) dizyendo, syerto ke el salvador de Israel es nasido de djudyos, i ke bushka a ser nasido de Mitsri. I syendo ansi, a ke tahlit (eskopo) keresh matar a nuestros ijos. I ay kyen dize ke resivyeron el komando del rey. I fue tornada dita gezera i asta ke lo echaron a Moshe dyentro del riyo, sigun avizaremos en el kapitolo vinidero.
I tenesh ke demandar ke es el kavzo ke la primera gezera la komando sovre las kumadres ke la izyeran i no la izo por mano de su djente, sigun izo agora en la segunda gezera. Savresh ke al prinsipyo kijo azer la koza inkuvyerto, porke se averguensava de azer tuerto a matar almas sin razon, por esto se deskuvrio kon las kumadres i no lo disho a ninguna persona otra. Ma syendo vido ke no izyeron su palavra, se determino en esta gezera i komando a sus esklavos ke lo agan, syendo no se konfio de otro. I si tambyen ke al prinsipyo no kijo azerlo por mano de su djente porke se espantava kisas el Dyo le demandara su sangre, ke, syerto sus esklavos son ovligados de azer su komando, i no pueden azer de menos, i el pekado lo tyene el. Por esto les disho a las kumadres ke eyas los maten, i su mehuvan (entisyon) fue syendo tenemos ke no ay shaliah (emisaryo) para koza de avera (pekado) , de ke se yama ke eyas los matan, i el Dyo se vengara de eyas, syendo no son mi shaliah. Ma syendo vido ke las kumadres no izyeron su komando, estonses se determino i disho lo ke sera, i komando a su djente ke eyos propyos tengan kargo de los ijos ke nasen a echarlos dyentro del riyo, ke tanto enemistad teniya kon Israel ke no le impidyo ke el Dyo se a de vengar de el, aun ke ya lo saviya.
I dizen ke la gezera de Paro no fue ke los echaran dyentro del riyo mammash (en vedra) porke sefihut damim (echar sangre, ama Khuli kyere dizir no echar sangre) es una de las syete mitsvot Bene Noah (las 7 leyes noahidas) i el, syendo era rey, no teniya kara de akometer azer tal koza fuera de su ley befarhesiya (en puvliko) syendo koza ke el kyen las aze es hayav mita kefi dinam (kondenado a muerte asigun sus leyes). Si no su gezera fue ke los echen en la oriya del riyo, i otra vez se konta esto kuanto aogarlos, syendo de ayi un punto veniya la ola i los arravdonava, si no ke el teniya de deskulparse kon la djente, dizyendo ke el no los mata kon su mano sino ke de suyo es ke se mueren. I se aviya enfortesido la gezera i despues ke los echavan en el rio los matavan i los metiyan en la fragua entre las pyedras i los maderos. I tambyen kyen no adjustava de azer los adoves ke le ataksavan, a oras de tadre lo enklavavan entre la fragua i lo tapavan, de modo ke lo enterravan bivo dientro de la pared en pies, o a el o a su ijo afillu por un adove ke izo manko en su taksa. I dyez mil kriaturas se echaron al rio disde ke se dyo esta gezera…
Aki me vo kedar de mi meldadura de este teksto eskrito 200 anyos antes de la shoa, ama ke aze pensar a esta misma velunta de matar a eskondidas.
Al djueves proksimo, si kyere el Dyo!
