Muestra Lingua: LOS BENE ANUSIM por Edmond Cohen

Keridos amigos, a la okazyon de tormar de mis vakanzas, vos do el teksto de la proksima emisyon del programa, ke no tiene todavia data de salidura en la radio.
 
El program se puede sintir por Internet kada djueves, indo al sityo RADIO – la fréquence juive . Kale tener pasensya i asperar un poko, no se oye pishin.
 

Saludos a todos
Edmond Cohen – Paris, Fransya

LOS BENE ANUSIM

Saludos a todos los oyentes de la emisyon Muestra lingua, la emisyon en djudeo-espanyol fundada por el profesor Haïm-Vidal Sephiha i prezentada agora por vuestro servidor Edmond Cohen, kon Philippe en la kabina. 

Keridos oyentes, ya m’eskarinyi de vozotros, syendo ke aze muncho tyempo ke no tuve el plazer de avlarvos aki, por modo en primero del baby sitting de mis inyetizikos, i despues de las vakansas del enverano. 

Ke dizirvos oy ? Me vino la idea de avlarvos de los bene anusim, porke desde unos kuantos anyos se avla muncho de eyos, i ke asigun lo ke me parese se va avlar mas i mas de eyos kon el tyempo. Bene anusim kyere dizir en lashon ijos de los forsados. Forsados a kualo? Forsados, djudyos, a konvertirse al kristyanismo, en djeneral en Espanya i Portugal del tyempo de la Inkizisyon, ama no solo. Kontra esta fuersa de la Inkizisyon, unos anusim rezistyeron en sekreto, lo ke la Inkizisyon yamava «judaizar», krimen punido de muerte, syendo kemado bivo. Miles i miles de anusim deskuvyertos judaizando fueron kemados bivos en Espanya, Portugal, i en las koloniyas espanyolas o portugezas de Amerika ande los anusim, yamados marranos, puerkos, por los kristyanos, pensavan alesharse de la Inkizisyon. 

Esto todo ya lo savemos, ama pensavamos ke kinyentos o sheshentos anyos mas despues, en los diyas de oy, no aviya mas djente judaizando en sekreto, i ke todos los bene anusim, los desendyentes de estos forsados, sea aviyan sido kemados, sea se aviyan olvidado sus orijenes djudiyas, i se aviyan echo halizes kristyanos.

Ama lo ke s’esta pasando agora, es ke, a poko a poko, djente ke se kreiya kristyana se esta apersivyendo ke teniya orijenes djudiyas, i unos kuantos entre esta djente, vyendo esto, dechida de aboltar al djudaismo de sus antepasados.

No kale konfundir los bene anusim, desendyentes de djudyos, kon otros ke kyeren tambyen aboltar a la relijyon djudiya, dizyendo ser, no desendyentes de djudyos, ama desendyentes de uno de los dyez trivos pedridos de Israel. Ya vos dishe munchas vezes aki ke los djudyos, los yeudim en lashon, son los desendyentes de los dos trivos de Yeuda i Binyamin ansi ke del trivo de Levi, los ke estavan en el reyno dicho de Yeuda, kuando los diez otros trivos eran en el reyno de Israel. Son bene israel o israelitos, ama no son djudyos, yeudim.

Por egzemplo, los Beta Israel de Etyopiya son konsiderados – ke sea vedra o no – komo desendyentes del trivo de Dan. Los ke vyenen del Mizoram, a la frontera entre Indya i Birmaniya, son konsiderados komo desendyentes del trivo de Menase.

No kale konfundir tampoko los bene anusim, ke kyeren aboltar  al djudaismo de sus antepasados, kon los ke no tyenen antepasados djudyos, ama ke yene kyeren konvertirsen al djudaismo. El mijor egzemplo son los kazalinos de esta sivdadika italyana de San Nicandro, ke, en medyo del siglo pasado, se izyeron djudyos de si para si sin mismo saver ke kedavan djudyos en el mundo, i ke agora moran en Israel.

I, por siguro, no kale konfundir tampoko los bene anusim, ke kyeren aboltar al djudaismo, kon los ke se dizen djudyos de Jesus, ke konsideran Jesus komo el mashiah, i ke en vedra no son djudyos, ama kristyanos, afillu si se amostran kon kipa i tefillin.

Ay tambyen mas i mas, i estos tampoko no tyenen nada de ver kon los bene anusim, kristyanos evanjelistas ke puedej ver sovre internet kantar i baylar en ebreo, en vezes kon bandyeras del estado de Israel. Es vedra ke es muy kuryozo: vide el otro diya sovre internet a unos mil kinezos de Singapur kantando en djuntos en ebreo, o amerikanos kantando en djuntos Hava Nagila en una sivdad del Texas, o mansevos i mansevas baylando la hora en Porto Rico, etc. No kale yerrarse: eyos son halizes kristyanos, ke nunka pensaron aboltarse a muestro djudaismo.

El mijor egzemplo ke se puede dar de bene anusim son syertos kazalinos de la sivdadika de Belmonte, en el Portugal. Kuando empeso la Inkizisyon, los djudyos de Belmonte se konvirtyeron al katolisismo para salvar sus vidas, ama afillu esta sözde konversyon, eyos guadraron el djudaismo en sus korasones, i kontinuaron de azer la relijyon djudiya en el sekreto de sus ogares. Sin haham, sin dingun livro de orasyones o de kualkyer koza djudiya, sin kalendaryo, eyos mantuvyeron en sekreto la relijyon djudiya asta oy. I kuando digo eyos, en vedra  devriya dizir eyas, porke son las mujeres ke transmetiyan los sekretos de madre a ija.

Lo kuryozo, es ke la Inkizisyon no egziste mas en el Portugal desde 1821, i ke el sekreto no era mas menester desde este tyempo, sovre todo ke todos los vizinos halizes kristyanos ya aviyan endevinado, i de muncho tyempo,  ke eran djudyos. Afillu si se ivan kada alhad a la misa, afillu si se kazavan  en la iglesya, afillu si se aziyan enterrar komo kristyanos, los papazes de Belmonte ya saviyan muy byen, komo todos los kazalinos de Belmonte, kyen era haliz katoliko i kyen era falso. I esto es tambyen lo ke permetiya a los anusim de kazarse solo entre eyos, sin mesklarse kon los otros kristyanos. Alora deke este sekreto de agua de pozo? La repuesta se topa en la tradisyon, la kostumbre. La relijyon se izo sekreta, agora se deve de kedarla, afillu si todos konosen el sekreto.
 
Kale dizir tambyen ke afillu si la Inkizisyon no egziste mas, eya a deshado dainda su tufo en el Portugal. Una marrana nasida en Lisboa mos konta: «En muestra sivdad, una vez al anyo, azen una prosesyon asta la plasa de la sivdad ande keman a una kukla ke reprezenta a los djudyos, en memorya de la Inkizisyon. Muestra madre mos ordenava de serrar los pandjures para no ver tal angusya».
 
Kale dizir tambyen ke munchas vezes los marranos eyos mismo ya se olvidaron la razon de lo ke azen. La mujer marrana aze kozas de relijyon, por egzemplo asender dos luzes eskondidas en un almaryo el vyernes a la tadre,  porke su madre, i la madre de su madre aziyan ansina. Ama deke aziyan ansina, ya no lo save mas.
 
Es solo en 1917 ke un djudyo lehli yamado Samuel Schwarz deskuvryo, no se komo, a estos djudyos eskondidos en Belmonte. Afillu esta deskuvyerta los anusim de Belmonte se kedaron yene eskondidos asta ke en 1990 un fotografo djudyo franses yamado Frederic Brenner aga kon  Stan Neumann una emisyon de televizyon sovre eyos.
 
Desde este  tyempo, ke una gazeta yamo un coming out, vinyeron a la luz, i los hahamim de Israel ansi ke los movimyentos syonistos se interesaron a eyos, embiyandoles livros, kalendaryos, un haham, esto todo para azerlos aboltar al djudaismo avyerto, ke los anusim de Belmonte yaman, lo ke aze sonreir, la «mueva relijyon»! Los mansevos achetaron esta mueva relijyon, los vyejos preferyeron guadrar sus tradisyones. «Guadrimos muestras kreensyas durante tantos siglos, no es para trokar agora», disheron…

Djente komo los de Belmonte egzisten dainda en Espanya, en Portugal, en el Brazil, i en los paizes de Amerika latina. Ama se puede dizir ke en los anyos 1980, a parte de los de Belmonte, los marranos aviyan eskapado de guadrar kualkyer uzansa relijyoza. Solo saviyan mas o menos ser de asendensya djudiya, i nada mas. A poko a poko, despues de una rezistansya de sinko siglos, koza unika en el mundo, komo lo eskrivyo Cecil Roth, se puede dizir ke ya se aviyan echo todos halizes kristyanos.

Las kozas trokaron desde aze poko, i es de esto ke vos kyero avlar agora.

Una organizasyon djudiya de Israel, ke se yamava Amishav, fundada por el haham Avihail, del kual vos avli kuando ize mi emision sovre los djudyos partikolares, organizasyon ke se yama agora Shavei Israel i es dirijida por el senyor Michael Freund, ayuda a los bene anusim, ijos de forsados komo vos dishe, en primer a aboltar al djudaismo de sus atepasados, i en sigundo a instalarse en Israel. La organizasyon se okupa tambyen de los ke se dizen desendyentes de los diez trivos pedridos, i se okupa tambyen de djente ke vyene al djudaismo sin tener raises de antes.

A los ke tyenen un ordinador, les akonsejo, sea de ir, lo ke es muy kolay, sovre el sityo www. Shavei.org, sea de ir sovre el sityo Google i de bushkar al byervo anusim, i mijor anusim Youtube, i lo ke van a topar los va muy enkantar, kuando van a oir un ombre, Michael Freund, dizir muy seryo i muy kyeto ke los bene anusim no son syenes o miles, ama syenes de miles.

En Yerushalaim, la organizasyon Shavei Israel arresive a bene anusim venidos de Espanya, entre eyos munchos chuetas de la isla de Mayorca, ama no solo estos, venidos tambyen de todos paizes de America Sentrala komo del Sur, ke todos nasyeron kristyanos i se apersivyeron, kada uno a su manera, ke era de orijen djudiya. Uno mos konta ke se kreiya kristyano kuando, a los 16 anyos, vido murir su padre  resitando el shema al momento de su muerte. No le aviya dicho nada antes!                                                                     Lo mismo mos konta otro: es su madre, antes de morir, ke le dize: «provenimos de una famiya djudiya, la famiya Toledano, de Cordoba».

Sovre You tube se pueden ver emisyones de la televizyon de Colombia ande mos amostran una komunidad de bene anusim aboltados al djudaismo, kijo dizir azyendo orasyones kon talet , tefillin, sefer tora, i todo lo djusto. Ay en Colombia syete komunidades komo esta, mos dize el haham de Colombia. I ay otras tambyen, ande la djente no kyere deshar su kreensya en Jesus, i solo abolta a las formas ke vos dishe de las orasyones djudiyas, ama  kedandosen kristyanos…

Kale dizir tambyen ke todos los anusim no kyeren aboltarse a  la relijyon djudiya, ama solo a sus raises djudiyas, a la kultura djudiya, todo en kedandosen kristyanos. La mujer de Lisboa de la kuala vos avli a propozito de la kukla kemada en prosesyon, no se kyere azer djudiya por respeto a su marido katoliko ke no kyere ser djudyo, ama sus kriaturas, eyas, las va edukar en la relijyon djudiya.

Esto dicho, meldi un artikolo muy interesante en el Tribune Juive de djunyo de este anyo 2010, escrito por un senyor Sam Banon, djudyo marroki bivyendo agora en Barcelona, el mismo muy sorprendido de ver ke en toda la Espanya, i desde solo aze tres o kuatro anyos, syenes de anusim vyenen a deklararsen, i, komo dize, a chaptear a la puerta del djudaismo. Deke desde tres o kuatro anyos i no antes ? No se save…

Kualo azer kon estos todos? Komo ya lo savesh, el djudaismo no arresive katilokay a los ke kyeren konvertirse al djudaismo. Aki estamos frente a djente ke se dize de antepasados djudyos forsados. No es una entrada ke demandan, es un retorno. Yene kale azer dikat ke lo ke kyeren es azerse haliz djudyos, i no medyo djudyos medyo kristyanos, komo los djudyos de Jesus o komo unos de Colombia (ke de toda manera, eyos, no demandan la konversyon). Ay los ke tyenen espanto ke si achetamos a miles de ajenos, no mos troken muestra relijyon, i los ke, komo mi amigo Renaud Souhami, se espantan a la rovez ke si no achetamos ayre muevo mos vamos atabafar i dezapareser.

Entremyentres, estos anusim, sin asperar ke mos dechidemos, empesan por ambezarse el ebreo, manera mas soft, para emplear el byervo de Sam Banon, de aserkarse del djudaismo. La primera koza ke tyenen de azer, es de luchar kontra la opozisyon de sus propyas famiyas. Este movimyento ke Banon a estudiado en Catalunya, no se pasa solo en Catalunya, ama tambyen, mos dize Banon, en Oviedo, Gerona i el norte de Espanya, ama tambyen en otros paizes, Portugal, Italya, Corsica, i mismo Polonya ande se avlo de un marido i mujer neo-nazis ke se deskuvrieron orijenes djudiyas i ke dechidaron de aboltar al djudaismo.

Veremos en los anyos ke vyenen lo ke va salir de esto todo. Al lado del retorno al djudaismo, ay tambyen un atadijo muy fuerte kon el syonismo i el estado de Israel, i de este sigundo punto de vista ya vos dishe unos kuantos byervos de los kristyanos evanjelistos, mas syonistos ke munchos djudyos, i ke fueron aze poko en Yerushalaïm para azer defiles kon bandyeras de Israel.

Ama aki, en lo poko de tyempo ke me keda asta la fin de mi emisyon, vos kyero kontar kozas ke disheron a Sam Banon unos kuantos de los anusim ke vido en Barcelona.

Un avokato, ke agora se aze yamar Haï, konta ke en los anyos 70, un diya su madre le disho: «semos djudyos…» El era manseviko, no se intereso muncho a lo ke le aviya dicho. Ama mas tadre este avokato se metyo a bivir kon una djudiya lehliya, i se akodro ke su madre le aviya dicho ke el tambyen era djudyo. Esta vez demando mas a su madre, ke le konto sus orijenes, sus antepasados, sus kostumbres, las fyestas, el shabat, el Shema, las kandelas eskondidas…Kuando su vida lo abolto a Barcelona, se aserko de la komunidad djudiya i de un haham ke lo izo estudyar, asta ke un Bet Din lo rekonoska komo haliz djudyo. « Fue el diya el mas importante en mi vida…aboltar al seno del puevlo de Israel».

Este Haï, komo vitesh, era un haliz ben anusim al empesijo. Ama kuando se meldan los dichos de otros, se ve ke en vedra nunka fueron bene anusim, solo kristyanos travados, en medyo de la Espanya katolika,  por el djudaïsmo.

Salvador, ke se aze agora yamar Elisha, empeso por interesarse al sistemo de seguridad israelyano. Empeso a meldar livros, i de la seguridad se intereso al estado de Israel i a su puevlo. «Grasyas a mis meldaduras, dize, me apersivi ke mi relijyon katolika era leshos de  satisfazerme, i dunke dechidi de ir mas leshos verso el djudaismo…Espiritualmente, so djudyo, ya lo se. Los otros no lo saven dainda. Agora, ago todo lo ke kale para ser rekonosido en tanto ke djudyo. Kuando vo reushir ? No se. Ama kuando este momento yegara, me sentire orozo…»

Estos todos se reunen en komunidad yamada Beth Shalom, en un garaj de Barcelona, lugar de orasyones, de reunyon, de estudyo o de komida.

Myentras ke por varyas razones, la primera de todo syendo los kazamyentos mikstos, vamos pedryendo miles i miles de djudyos, me parese esmovyente de ver la pena ke se dan otros para entrar ande mozotros. Afillu si kale azer dikat, no kale serrarles la puerta. 

Al djueves ke vyene, si kyere el Dyo!