Muestra lingua: LEON COHEN, MI TIYO por Edmond Cohen

Keridos amigos, aki toparash el teksto de la emisyon de esta semanada.

El program se puede sintir por Internet kada djueves a las 4 H O6 PM, ora de Paris, indo al sityo  RADIO – la fréquence juive. Kale tener pasensya i asperar un poko, no se oye pishin.

Aki toparesh el teksto de mi emisyon del djueves 29/3/2012

Saludos a todos
Edmond Cohen
Paris, Fransya

 LEON COHEN, MI TIYO

 Saludos a todos los oyentes de la emisyon Muestra lingua, la emisyon en djudeo-espanyol fundada por el profesor Haïm-Vidal Sephiha i prezentada agora por vuestro servidor Edmond Cohen, kon Philippe en la kabina.

Komo a kada vez, vos akodro ke el proksimo atelye de konversasyon  de la Asosyasyon Vidas Largas se tendra  el martes ke vyene 27 de marso, de las dos i medya asta las sinko, al muevo adereso del 17 rue Pierre Semard Paris (9°), arriva del Square Montholon, métro Cadet. La entrada es la del lokal i no la del han.

I vos akodro de muevo el anunsyo ke ya vos ize el djueves pasado: Guadradvos sovre vuestros kalendaryos el alhad primo de avril, no por kualkyer shaka, ama porke va ser el diya del  livro djudeo-espanyol en Paris. Desde las tres, en el mismo lokal del 17 rue Pierre Semard, munchos eskrivanos i eskrivanas van a venir para prezentar, vender i dedikar sus livros:  Meri Badi i su famozo livro de kozina,  Ariane Bois i su livro Le Monde d’Hannah, Caroline Bongrand i su livro L’Enfant du Bosphore, Marcel Cohen i su famoza Lettre a Antonio Saura, Evelyne Lagardet, ke vino a dos de mis emisyones, i su livro Un rêve Français, Henri Nahum i sus livros Juifs de Smyrne XIXe-XXe siècle, i La Médecine Française et les Juifs, muestras amigas Mathilde Pessah i Evelyne Nahmias, ke eyas tambyen vinyeron aki para una de mis emisyones, por sus livro La Robe Couleur Abricot El Fostan de Pitagra, Rosie Pinhas-Delpuech por sus livros Anna une histoire Française, i Suite Byzantine, Aure Recanati i su livro Memorial de la Déportation des Juifs de Grèce, Angèle Saül, ke tambyen resivi dos vezes aki, por su livro Djoha, Djohaya, nouveaux contes judéo-espagnols, sin olvidar muestro kerido Prezidente, el Profesor Haïm-Vidal Sephiha, por sus livros L’agonie des Judéo-espagnols, i Le judéo-espagnol. I agora me ambezi ke en mas de estos todos eskrivanos va venir tambyen mi amigo Jimmy Pimienta, para un livro de Gladys i Sidney Pimienta sovre un eskrito de la Komunita de Tanger en el Maroko del kavo del siglo 19. Deke digo mi amigo Jimmy Pimienta? Porke izimos en djuntos muestros estudyos de derecho ay un poko manko de 60 anyos, i despues  tuve muy pokas okazyones de verlo. Siguro ke kuando mos vamos a ver, kada uno va dizir al otro:  « Asi bivas tu, a parte los kaveyos blankos ke te kedan, no trokates! »

Syertos de estos livros no se topan mas en libreriyas, i un diya komo este va ser una okazyon unika de pueder dainda toparlos i merkarlos.

Este anunsyo echo, oy pensi de avlarvos de mi tiyo Leon Cohen. Puede ser vos vash a pensar:  kuanto mos inche de saver kyen era el tiyo de Edmond Cohen? Es vedra ke no fue un ombre famozo komo los Cristobal Colon, Maimonides o Ben Gurion de los kuales vos avli antes. Ama, komo ya lo savesh, el Talmud mos dize ke kada ombre es a el solo komo el mundo entero, i penso ke  de vez en kuando puede ser interesante de avlar de uno de los muestros ke tuvo una vida komo kada uno. I komo no puedo avlar del tiyo de kada uno de vozotros, keridos oyentes, kual ke sea el interes de la koza, va ser mi tiyo a mi…

En vedra mi padre Albert Cohen tuvo dos ermanos mas chikos de el, Victor i Leon. Leon, nasido en Estambol en 1902, ay dunke 110 anyos, era el mas chiko de los tres ermanos. Kualo dizirvos de su chikez en Estambol? La famiya de mi papu, si no era prove prove, era, vamos a dizir, bastante estrecha, i mi tiyo, a parte de la eskola de la Aliansa, no pudo azer estudyos. En vedra, no solo por manko de paras, ama tambyen porke no se interesava a los estudyos kuando era chiko, i su mama, mi vava Sultana, diziya ke kadal diya pedriya su kalem, i kadal diya kaliya darle muevo kalem.

Leon era kuryozo por esto. Otra maka kuryoza teniya kuando fue mas grande:  nunka pudo tener una ora ke kamine. Se merkava una ora para yevar al pulso, i dos diya despues la ora se kedava para syempre. Deke? No lo supimos nunka, ama ansina era.

Esto dicho, komo ya vos dishe, mi tiyo se fue a la eskola de la Alyansa, i tengo una koza de kontarvos sovre esto:  aya en su klasa aviya otro Leon Cohen. Dos Leon Cohen en la misma klasa. Komo azer? A mi tiyo los profesores lo yamaron Leon Cohen A, i a su amigo lo yamaron Leon Cohen B.

Pasaron unos sinkuenta anyos.   Entremyentres mi tiyo aviya vinido en Fransya en 1922, i en los anyos 1960  mi tiyo se va por las vakansas en Turkiya despues de unos 40 anyos de absensia. En Estambol toma el vaporiko de las Islas, i en el vaporiko un ombre de su edad lo mira i le dize: «Leon Cohen A!» Mi tiyo lo mira i le responde «Leon Cohen B!»

Se rekonosyeron despues de kuarenta o sinkuenta anyos sin verse. Mi tiyo era bekyar i el otro tambyen…Fue, komo se dize, una topada de kosuegros…salvo ke era de dos bekyares.

Agora aboltaremos en 1922, kuando mi padre dechida, por temor de Mustafa Kemal, ke dainda no se yamava Ataturk, de instalarse en Fransya, i toma kon el padre i madre, i tambyen sus dos ermanos.

Leon, aedado de vente anyos, se topa bivir en djuntos kon su famiya en un apartamento rue de Nemours, en el 11en arrondissement, muy serka de lo ke se yamava en este tyempo la chika Turkiya, syendo ke todos los djudyos venidos de Turkiya se arrekojiyan en esta chika male de Paris.

No se lo ke izo komo lavoro en estos anyos, lo uvyera savido si le aviya demandado, ama nunka antes de oy me vino a la idea…ansina es.  Lo ke es siguro, es ke en 1926 mi padre, ke asta este tyempo lavorava komo empyegado, se metyo a su kuenta para lavorar komo konsilyo de derecho, i ke tomo Leon, su chiko ermano, kon el, para ayudarle i servirle en vedra de sekretaryo, syendo ke no aviya echo estudyos, sovre todo de derecho. Ama kon los anyos Leon se troko, i empeso de si para si a meldar i ambezarse todo lo ke le pasava por la mano. Poko antes de la gerra, verso los anyos 1938, se ambeza el derecho i obtyene el diplomo dicho de kapachedad en derecho, un diplomo para los ke no pueden entrar a la Universidad porke no tyenen el bakaloreato.

De solo sekretaryo de mi padre, se aze a poko a poko kolaborador i ayudante, ambezandose el ofisyo. Entremyentres Victor, el ermano de en medyo, se kaza i se va de kaza, Leon, el, no se kaza i se keda bivir kon mi padre, afillu despues del kazamyento de mi padre en 1935 i mi venida al mundo en 1936.  De tal manera ke yo syempre konosi mi tiyo bivyendo en kaza, i ke por siguro, el ke no teniya kriatura, se izo komo un sigundo padre para mi. Teniya dos papas para tomarme en los brasos i kontarme konsejikas.

Sovre esto vino la gerra, i kon eya los aferramyentos de djudyos. Kon mi papu i mi vava, somos sesh en kaza ke mos vamos kada noche eskondermos arriva en una kamaretika debasho el techo, asta ke la famiya se patladee en 1942:  mi padre se fuye en zona dicha libera, yo so eskondido en primero ande mi tiya ermana de mi madre, despues ande una kristyana , i despues yo i mi madre mos arrekojemos kon mi padre en zona de okupasyon italyana. Por su parte mi tiyo se va eskonder kon mi papu i mi vava en un oteliko serka de Paris . Aya se muere mi papu en 1943, lo ke va salvar la vida de mi tiyo i de mi vava porke van a pueder eskabuirse a la yegada de los pulises venidos una  demanyana para aferrarlos.

Una demanyana verso las syete, la polisiya ayega a la pensyon de famiya para aferrar todos los djudyos ke se topan aya. I los aferran. Por mazal, Leon i su madre no moran en la pensyon misma, ama en una aneksa. Los pulises ya saven ke ay una aneksa, i demandan a la ama de kaza komo irse aya. Les da un itineraryo charpik, i korre akavidar a los djudyos de la aneksa. Por sigundo mazal de mi tiyo i mi vava, malgrado ke estamos de muy madrugada, ya se topan vestidos i tyenen tyempo de fuir, mazal ke no tuvyeron los otros djudyos. La vida o la muerte, todo se djugo este diya en unos kuantos puntos.

De vez en kuando, mi tiyo se va kon koraje en Paris para ver si ay letras de mushteris i para ver tambyen si todo no a sido arrovado. Un diya ke mi tiyo viene a kaza, la kapidjiya le dize: «no suvid al apartamento, los Almanes estan arriva!» I mi tiyo se keda a basho ande la kapidjiya, asperando ke los Almanes se vaygan…Una vez ke se fueron, suve al apartamento, i ve ke la puerta esta serrada kon un mur de los Almanes, ke van a vinir amanyana para tomar la mobilya. Mi tiyo aze saltar el mur, entra kon su yave, i empesa a desmontar la mobilya para suvirla i aprovar de eskonderla en una kamareta de mosa al sejen. I todo el diya ograshea i suve a poko a poko la mobilya, i despues se fuye presto, antes ke los Almanes vengan de muevo.

El diya despues, vienen los Almanes, kon un kamyon para yevarse la mobilya, suven al apartamento, topan el mur dezazido, entran i no topan la mobilya. Bashan i demandan a la kapidjia ke afito. «No se, responde la kapidjiya, yo no vide nada». «Si una koza ansina se pasa por demuevo, te vamos a tomar», le dizen los Almanes, i se van birrotos sin la mobilya. Por mazal, no tuvyeron tyempo de tomar el apartamento, i a la Liberasyon, mi tiyo vino i suvyo al sejen para bashar la mobilya i montarla de muevo, komo pudo…

Munchos anyos mas despues, tuvimos ke dar una mobilya a un lavorador para un adovamyento, i mos demando: «kien es el azno ke vos monto la mobilya de esta manera?» El azno, era mi tiyo…Grasyas a el, bien o mal montada, mobilya teniyamos!

Mi tiyo, despues de la gerra, ya teniya 43 anyos. Se kedo bekyar vida entera.

Afillu si los mushteris asemejavan mi padre i su ermano komo si eran buchukes, al punto ke les era kolay de azerse pasar el uno por el otro, Leon era sovre munchos puntos a la djusta rovez de su ermano Albert, kon kyen bivyo vida entera.

Tan Albert se amostrava bivo i enerjiko, tan Leon se amostrava – lo ke en vezes era un yerro – kalmo i kyeto. Kuando uno de los dos aboltava de la kaye, yo no teniya menester de verlo para saver kyen era. De la oreja, ya teniya endevinado:  el paso no me yerrava. Si era rapido, nervyozo, era Papa. Si era lento, podom podom, era Leon. Me akodro de un diya ande sonaron en djuntos el telefono, la puerta prinsipala, i la puerta de la kozina (bastante leshas la una de la otra). Sin apresurarse, tomo el telefono i demando al mushteri de asperar.  Despues,  kon un paso de senator, se fue a avrir la puerta prinsipala, para arresivir al otro mushteri i azerlo asentar en el salon, i despues, sin azer mas presto, se fue podom podom a avrir la  puerta de la otra eskalera, azer lo ke kaliya, i despues aboltar al telefono kon la pacha larga…

Mismo por lo ke es de la kara, para mi ke biviya kon eyos, no puediya entender ke la djente les tope semejansas ke yo no veiya. Ama esto aze parte de los misteryos de la vida:  las asemejansas ke saltan a la kara de la djente de afuera no aparesen a los serkanos ke solo ven las diferensyas. Komo si la vizyon analitika proibiya toda vizyon sintetika.

Esto dicho, mi tiyo Leon era una kuryoza persona. Komo ya vos dishe, antes ke obtenga su diplomo de kapachedad en derecho, no teniya otro ambezamyento ke el de la eskola de la Alyansa Israelita Universala. Maraviyozo ambezamyento, ama yene ambezamyento primar. Su kultura, ke era grande, se la izo de si para si, kon sus meldaduras munchas i varyas. En la chika bivlioteka de su buro aviya un alay de livros klasikos a presyo barato ke ivan de la literatura grega a la franseza, pasando por la latina. I tambyen, al kavo de su vida, se aviya metido, kaji a eskondidas, a ambezar el ingles. Kale dizir ke era, no se deke, bolado para los inglezes, al punto ke sosteniya la pozisyon de los inglezes en Palestina en los anyos 1946 o 47, lo ke dava soflamas a mi madre su kunyada, i empesavan diskusyones sin fin. Kale dizir ke en este tyempo eramos abonados a La Riposte (la Replika), la gazeta del Irgun en Fransya, i lo manko ke se pueda dizir es ke esta gazeta no iva en el senso de la politika ingleza en Palestina. Me akodro ke en esta gazeta, no se avlava de djudyos ama de ebreos.

Para aboltar a mi yiyo Leon, puro otodidakto, no aviya sido influensado por dinguna eskola de pensamyento, i deve ser por esto ke pensava de si para si, de manera munchas vezes orijinala, kon una meskla de umor i de meoyo.

Si la djente akuzava tal ombre politiko de ser korrumpido, a mi ke me inche? me diziya mi tiyo. Ke se meta un milyarda en la aldikera (eramos en los vyejos frankos, agora diriyamos milyon i medyo de euros) i ke aga buena politika. Sera syempre mijor ke un inkapache onesto ke va azermos todo pedrer.

O me sosteniya ke el mas grande danyo ke pueda afitar a un ombre era de ser muy riko. Riko, si, es bueno. Muy muy riko? Barminan! No lo dezeo a mi peor enemigo, adjustava.

Se burlava del chay:  metesh unas kuantas yervizikas en agua kalyente, i lo yamad infuzyon…Pensash ke va trokar kualkyer koza? Ke menester? I el se beviya la sola agua kayente, sin dingun chay ni asukar!

Ama lo ke me aziya lo mas reir, es kuando me diziya ke solo los djudyos avlan el buen espanyol. I los espanyoles? No, los espanyoles no saven avlar el haliz espanyol…

No tengo menester de dizirvos, keridos oyentes, ke este tiyo era para mi muncho mas ke un tiyo. Era a la vez un sigundo padre, un ermano bohor kon kyen durmi muncho tyempo en la misma kamareta, un kompanyero para diskutir o viyajar en djuntos (en Israel dos vezes, i tambyen en la ekspozisyon de Bruxelles en 1958, por egzemplo). Nunka lo yami tyo Leon, syempre Leon.

A parte de una ploreziya a la edad de 17 anyos, nunka mi tiyo fue hazino. Ni mismo una chika abashada. I en supito, a la edad de 74 anyos, en medyo del invyerno, se tomo una hazinura kon una muy fuerte kaintura, rezistyendo a todas las kuras, i se muryo en unas kuantas semanas. Eramos en 1976. Mi padre, por tanto mas aedado de el de sinko anyos, le sovrebivyo asta 1990.

Espero ke supe interesarvos a una persona ke dinguno de vozotros konosyo, i vos digo al djueves ke vyene, si kyere el Dyo!

Edmond Cohen