Muestra lingua: Las seremoniyas de las Djustas Gasset i Carayol por Edmond Cohen

Keridos amigos,
El djueves pasado no pude aparejar emisyon porke estava okupado kon las seremoniyas en rekodro de las dos Djustas ke me salvaron en 1944.

Para el djueves ke vyene, no puediya azer otra koza ke kontarvos estas dos seremoniyas: la de Paris el alhad 21 para Gabrielle Gasset i la de Herepian el myerkoles 24 para Laetitia Carayol.

Fueron diferentes, porke la de Paris era organizada solo por djudyos: el Memoryal de la Shoah, Yad Vashem i la Embashada de Israel. A la kontra, la seremoniya de Herepian, syerto fue organizada por Yad Vashem i el Cosulado de Israel en Marsilya, ama tambyen la Mayoriya de Herepian kijo aprovechar esta seremoniya, ke se paso en la sala de fyestas de la Mayoriya, para inogurar tambyen en el kazal una plaseta redonda yamada Rond-point des Justes parmi les Nations, kon un monumento al sentro, i un olivar.

A la radyo no es posivle de amostrarvos lo ke fue en Herepian, ama aki lo puedo, dizyendovos de ir sovre el sityo internet de la Mayoriya – http://www.mairieherepian.fr/événements/cérémonies-inaugurations/  Aya se pueden ver las fotos.

Me kedi semana entera komo si era arriva en la nuve…i dainda aya me kedi. No abashi.

Los ke van a kerer oirme en direkto lo podran indosen a las 4 h 06 PM, ora de Paris, sovre www.radioj.fr  Kale klikar arriva a la derecha sovre Ecouter Radio J en direct. I si no es en direkto, abasta asperar un diya o dos, i despues ir a oirme en redifuzyon sovre http://www.radioj.fr/node/145

Saludos a todos
Edmond Cohen Paris Fransya

Las seremoniyas de las Djustas Gasset i Carayol

Saludes a todos los oyentes de la emisyon Muestra lingua, la emisyon en djudeo-espanyol fundada por el profesor Haïm-Vidal Sephiha i prezentada agora por vuestro servidor Edmond Cohen, kon Philippe en la kabina.

Mi emisyon se puede oir en el mundo entero sovre internet, al sityo de Radio J, http://www.radioj.fr ,sea en direkto (el djueves a las 4 i sesh, kale klikar arriva a la derecha, sovre Ecoutez Radio J en direct) sea en redifuzyon, indose al kavo de la redifuzyon de las emisyones de la medyudiya del djueves.

De otra parte, a la kontra de lo ke vos dishe mez entero, no se tuvo atelye el martes primo de marso, por la buena razon ke el Sentro Comunitaryo era serrado este diya por modo de las vakansas de invyerno. Dunke el proksimo atelyé  se tendra el 15 de marso, de las dos a las kuatro i medya, en el Centre Communautaire. Estos atelyes son avyertos a todos, mismo a los ke no saven avlar. Solo de oir les aboltaran a poko a poko los byervos olvidados, komo lo fue para vuestro servidor, ke no avriya ni la boka al empesijo. Dunke venid munchos.

Si no ize emisyon la semana pasada ande uvo una redifuzyon de mi emisyon sovre Moshe Dayan, vos dishe ke fue porke  yo iva ser muy okupado por las dos seremoniyas de entrego de la medaya de djusto a las desendyentes de las dos mujeres ke me salvaron en la sivdadika de Herepian, en el sur de Fransya.

Ya vos avli de estas dos mujeres, en una emisyon intitolada Las djustas ke me salvaron, emisyon ke ize el 5 de desyembre 2013. Para los ke no oyeron esta emisyon o ke se la olvidaron, les diré ke, en fevrero 1944, despues de munchas aventuras, me topava, a la edad de syete anyos, bastante kyeto kon mi padre i mi madre en la sivdadika de Lamalou-les-Bains en el sur de Fransya. Yo me iva a la eskola. No es ke no aviya Almanes. Eran munchos. Ama eran askeres ke no se okupavan de djudyos.

Ama un diya el amo de la kaza ande mos topavamos, ke era ayudante del mayor de Lamalou, resive un papel de la Gestapo dizyendole ke va venir instalar un buro en Lamalou i, antes mismo de venir, demandandole kyen son los djudyos bivyendo en esta sivdadika.

El amo mos dize ke kale fuir pishin antes ke vengan, mozotros i tambyen otra famiya de tres personas djudiyas morando tambyen ande el. Mos embiya en medyo de la noche para kaminar a eskondidas, los sesh ke semos, asta el kazal de al lado, a unos dos kilometros de Lamalou, ke se yama Herepian, i ande mora una balukchiya ke, puede ser, podra avrigarmos i eskondermos. Mos vamos ande eya, se yama Laetitia Carayol, nasida de Italya, bivda, i mos dize ke no tyene lugar para mozotros, porke su kaza ya esta yena kon un djudyo eskondido arriva kon su kompanyera kristyana, un ijo eskondido para no ir al lavoro ovligado en Almanya, otro ijo, otra ija kon marido i bebiko, eya misma i su madre. Ama, mos dize ke tyene una prima de su defunto marido, ke mora no leshos en el mismo kazal, i ke, eya, podra puede ser akojermos.

I mos vamos los sesh, en medyo de la noche, ande esta mujer, una kazalina de 42 anyos, ke bive kon su madre i kon uno de sus dos ijos. Lo ke no savemos, es ke esta mujer es hazina. Se va morir kuatro anyos despues, a la edad de 46.

No mos asperava, no mos konose, semos sesh, ke chapreamos a su puerta en medyo de la noche. Si no mos akoje, semos bolados. No temeos dingun lugar ande ir, i vamos a ser aferrados por la polisiya. I esta mujer, mallah de los syelos, ke se yama Gabrielle Gasset, mos toma a todos los sesh para eskondermos en la tabaka de arriva, ande se topan dos kamaretas (una para kada famiya) i una kozina para las dos famiyas.

No mos akoje para una sola noche. Mos akoje asta la Liberasyon. En fevrero 1944, no se puede endevinar ke un desbarkamyento va reushir en djunyo, ni indimas ke vamos a ser liberados a la fin de agosto. Mos akoje sin saver por kuanto tyempo.

Ama yo, de kedarme diya i noche sin avrir ni ventana ni pandjures, en este aire enmofesido, al kavo de solo dos mezes me kaygo hazino (de astma) i kale salirme, sino me vo atabafar. I es la balukchiya, Laetitia Carayol,  ke me toma ande eya – sesh personas no puediya, ama yo solo si. Me ago pasar por un chiko kristyano, Marcel Colin, refujyado de Marsilya por modo de los bombardamyentos. I me vo kada alhad a la iglesya. Yo, i el otro djudyo eskondido, mos kedamos ande la famiya Carayol asta la Liberasyon. Ansina es ke estas dos djustas salvaron, a eyas dos, syete djudyos.

Kuando supe ke Yad Vashem achetava de avrir un tefter kon mi solo testimonyo, pude, en 2013, empesar una demanda de medaya para estas dos mujeres, afillu si ya eran muertas las dos. De Gabrielle Gasset keda una inyeta, i de Laetitia keda una ija de 96 anyos.

Ansina es ke las dos mujeres obtuvyeron sovre papel la medaya de Djusto, kedava de organizar la seremoniya de entrego de esta medaya a la inyeta de la una i a la ija de la otra.

En primero pensi ke las dos seremoniyas se pasariyan en djuntos en la sivdadika de Herepian ande todo se paso, ama no pudo ser ansina, porke la inyeta de Gabrielle Gasset mora en Paris kon su madre aedada i hazina ke no puediya azer el viaje, i su ija no la keriya deshar sola. De otra parte, la ija de 96 anyos no puediya tampoko venir a Paris, de tal manera ke por eskapar uvo dos seremoniyas, una en Paris para Gabrielle Gasset, la ke salvo a sesh djudyos inkluyendo mi, i otra en Herepian  para Laetitia Carayol ke salvo a dos djudyos, yene inkluyendo mi.

La seremoniya para Gabrielle Gasset se tuvo el alhad 21 de fevrero pasado, en el auditorium del Memoryal de la Shoah en Paris, en mismo tyempo ke Yad Vashem aziya lo mismo para un otro par de Djustos, los Duchesne, marido i mujer ke aviyan eskondido una ijika djudiya lehliya nasida Cynamon.

Yo vine a la seremoniya kon mi mujer, mis dos ijos, sus mujeres i sus tres kriaturas (i medyo, syendo ke una de mis ermueras, la ke ya tyene dos kriyaturas, es prenyada de una tersera). Kon eyos, vinyeron mis kombidados, ke eran mi kunyado , su mujer i su ija, dodje primos i primas miyos, un amigo i una amiga.

De su parte, Isabelle Gasset, la inyeta ke teniya de resivir la medaya en nombre de su vava, vino kon su madre, i varyos paryentes i amigos, entre los kuales unos kuantos eran djudyos.

Kuando ayegi al auditoryum, ya estava kaji yeno, kon los miyos i los de la otra vanda, los de Duchesne i Cynamon. Tan se incho el auditoryum ke al kavo uvo djente (unos mansevikos) se tuvo de kedarse en pyé.

Mi mujer i yo, komo Isabelle i su madre, eramos asentados al primer rango. En frente de mozos, un poko arriva, los ofisyales del Memoryal i de Yad Vashem, ansi ke una mujerika de la Embashada de Israel (ke avlava el franses komo una franseza). I detras de eyos, una tabela djigante, kon las photos de Gabrielle Gasset a la syedra, i de los Duchesne a la derecha.

Despues ke los desendyentes de la ijika salvada i de los Duchesne avlaron, la reprezentante de la Embashada de Israel remityo la medaya de los Djustos…i despues fue a mi de suvir para avlar, lo ke ize kon todo mi korason, delantre de Isabelle i su madre asentadas en frente de mi. Eskapi dizyendo ke si era katoliko, uvyera demandado ke Gabrielle Gasset sea rekonosida komo santa, porke lo era. Despues dishe ke trasladar haside umot aolam por djustos entre las nasyones no era syempre una buena traduksyon, syendo ke en ebreo un hasid no es tanto un djusto, ke se dize tsadik, ke un sufu. Adjunti ke syerto era mijor de trasladar Djusto avlando de libros pensadores, i uvo munchos en loske salvaron a djudyos, ama para Gabrielle ke era una katolika muy relijyoza, no era solo Djusta, era tambyen Sufu de las nasyones del mundo. Dishe tambyen ke avlando de una persona defunta, tenemos el uzo de dizir zihrona livraha, su rekodro por bendisyon. Syerto puede kerer dizir ke su rekodro resive muestra bendisyon, ama puede kerer dizir tambyen ke es su rekodro ke mos bendize a mozotros. Akodrarmos de la defunta es una bendisyon para mozotros, mos aze byen.

Despues de mi es Isabelle ke avlo para dizir ke no konosyo a su vava, ke se muryo dainda muy manseva, ama ke su padre le avlava syempre de eya kon amor i admirasyon. I Isabelle adjunto kuanto esta seremoniya le tokava el korason.

I despues Isabelle Gasset resivyo la medaya al nombre de su vava Gabrielle.

Ama kon esto no se eskapo la seremoniya. Uvo los diskorsos de la reprezentante de Yad Vashem, i de la reprezentante de la Embashada de Israel. Ermozos diskorsos. Despues vinyeron mansevikos para meldar una poeziya de Albert Passes, intitolada el Badge, ke es la estreya amariya ke el chiko djudyo ke la resive, sin entender ke los ke se la dyeron lo keriyan arrebashar, a la kontra yeva kon orguyo este magen David.

Despues oimos el kante de los Partezanos, asigun mi uno de los mas ermozos kantes del siglo vente, https://www.youtube.com/watch?v=rve9dfo1bDM.

Despues oimos Nuit et Brouillard (Noche i duman) un kante de Jean Ferrat, de su haliz nombre Tenenbaum, ke tuvo su padre deportado i matado.

https://www.youtube.com/watch?v=S6qv2ZAjpSs

I para eskapar, todos mos metimos en pye i oimos la Hatikva i la Marseillaise.

I despues? A komer i bever arriva, i toparmos todos en djuntos para  bezos i fotos.

Ansina se eskapo kon alegriya esta seremoniya ke aviya empesado kon muncha emosyon.

Esto todo era alhad. Myerkoles, ke era el  24 de fevrero, a la demanyana, teniya de empesar la seremoniya en Herepian en onor de Laetitia Carayol. Para toparmos aya, kaliya tomar el treno el martes a la tadre, lo ke izimos a sinko: mi mujer i yo, mis dos ijos i mi inyetiziko. Mis dos ermueras i sus ijikas se kedaron en Paris por razones de salud (la una prenyada, la otra kon bebiko).

El myerkoles a las onze de la demanyana, mos topimos todos delantre de la mayoriya de Herepian. Muncha djente: no solo los numerozos desendyentes de Laetitia, inkluyendo su ija de 96 sovre un fotolyo kon karuchas, ama tambyen los amigos i los ofisyales: el mayor de Herepian kon sus tres ayudantes, todos kon la sharpa de las tres kolores blu blanko i kolorado, el mayor de antes, el mayor de la sivdadika de al lado yamada Lamalou les Bains, ande moravamos antes de la venida de la Gestapo, los reprezentantes del departamento del Herault, de la rejyon, el reprezentante de Yad Vashem, ke era el istoryano Michael Iancu, i la Consula de Israel en Marsilya. I todos en djuntos mos fuimos a pye de la Mayoriya asta la plaseta redondika yamada Rond-point des Justes parmi les Nations, para azer su inogurasyon. Al sentro de la plaseta, un olivar, simbolo de paz, i un monumento amostrando una mujer dando la mano a un ijiko djudyo (deviya ser yo) i a una ija, la suya. El mayor travo la savana ke eskondiya el monumento, korto, kon el ayudo de la Consula Israelyana, un kordon de las tres kolores blu blanko i kolorado, i izo un kurto diskorso. Todos dimos palmas, i ayde mos aboltimos a pye a la sala de la Mayoriya ande se aviya aparejado la seremoniya de entrego de la medaya.

Un ombre vyene a verme, muy esmovido, i me dize ke es djudyo, ke sus paryentes eyos tambyen fueron eskondidos en Herepian, i ke el tambyen kyere avrir un tefter de Djustos, i no save komo. Le digo de empesar por ir a ver a Michael Iancu, ke es el reprezentante de Yad Vashem para la rejyon. Este ombre mora en Paris.

I ansina ayegimos a la sala de la Mayoriya. Jeannette, la ija aedada de Laetitia, fue asentada en primenro frente a los ofisyales, i delantre a lo menos 200 personas sino mas, empesaron los diskorsos, inkluyendo el miyo. Yo, muy esmovido,  estava un poko en las nuves … ama kuando fue mi torno deshi  avlar mi korason, i konti deke estas dos mujeres, no solo Laetitia ama Gabrielle tambyen, no solo Laetitia, ama su famiya tambyen, fueron los ke lavaron el onor de la Fransya ensuzyado por su kapo, un mareshal ke aviya eskojido de lavorar kon el enemigo.

Kuando eskapi de avlar, las palmas fueron fuertes i largas, i entendi ke venidas de mi korason, mis palavras se teniyan ido a los korasones de los oyentes.

Despues de los diskorsos, la Consula de Israel i el reprezentante de Yad Vashem remityeron a Jeannette, muy esmovida, la medaya en rekodro de su bendicha madre.

I kon esto no se eskapo la seremoniya: el mayor de Herepian me izo sivdadano de onor de Herepian, koza ke no meresko del todo, syendo ke yo no ize nada para este kazal, ama yene fue para mi un grande onor i un grande orguyo de resivir de sus manos una medaya de Herepian.

I despues, komo en Paris, era tyempo de komer i bever. La Mayoriya aviya aparejado un bufé kon muncho de komer, sovre todo pishkado, penso para si no sea ke komyera kasher, lo ke no era tanto mi kavzo ama ke era el kavzo de mi inyetiziko, ke es de la vanda de su madre bizinyeto de hahambashi.

Tuve de asperar buena ora antes de pueder aserkarme del bufé, syendo ke kada uno veniya para bezarme, rengrasyarme por lo ke aviya dicho, i yo me topi, komo diré? undido de basho de las alavasyones i la afeksyon de todos para mi. Kada uno, ke yo no konosiya, se prezentava diizyendome komo era paryente kon Laetitia, ke tuvo 5 ijos i una ija, todos kon munchos inyetos, bizinyetos i tarabizinyetos.

Ensima de esto vinyeron varyos gazeteros para entrevistarme para la radyo o ke se…

Al kavo pude komer i bever, i ya vino tyempo de aboltar en Paris, i una vez aki de embiyar a kada uno i uno mis mijores rengrasyamyentos.

Agora ya vino el tyempo de eskapar mi emisyon, i vos digo al djueves ke vyene, si kyere el Dyo!

Edmond Cohen
Paris – Fransya