eSefarad Noticias del Mundo Sefaradi
Keridos amigos, para este djueves, keryendo trokar un poko del apretamyento de korason del djueves pasado (sovre la shoa por kurshumes), aprovi de aparejar una emisyon mas alegre, i la konsagri a las reushitas de Israel, koza muy deskonosida en Fransya ande se avla de Israel en las gazetas solo por lo ke no va byen. Ama en vedra, lo ke esta azyendo este chiko pais sin kaji dinguna rikeza naturala es maraviyozo….
El program se puede sintir por Internet kada djueves a las 4 H O6 PM, ora de Paris, indo al sityo RADIO – la fréquence juive. Kale tener pasensya i asperar un poko, no se oye pishin.
Saludos a todos
Edmond Cohen
Paris, Fransya
LAS REUSHITAS DE ISRAEL
Saludos a todos los oyentes de la emisyon Muestra lingua, la emisyon en djudeo-espanyol fundada por el profesor Haïm-Vidal Sephiha i prezentada agora por vuestro servidor Edmond Cohen, kon Philippe en la kabina.
No komo a kada vez, vos tengo de dizir ke el proksimo atelye de konversasyon de la Asosyasyon Vidas Largas no va ser komo los otros: se tendra el martes 19 de fevrero, ama esta vez de las dos asta las kuatro, en el Centre Communautaire, 119, rue Lafayette Paris (10°), métro Cadet o Poissonnière, esta vez en la Sala de fyesta de abasho.
Deke este trokamyento? Porke el martes 19 va ser amostrado el filmo «Era una vez la juderia de Rhodes», filmo realizado durante el enverano de 2012 por muestro amigo Gilbert Sagues. En este filmo, entero en djudeo-espanyol, ay la partisipasyon de los senyores Isaac Habib i Samy Modiano. Isaac Habib, ke vino aze unas kuantas semanas a uno de muestros atelyes, es oy profesor de espanyol en la eskola de la Aliansa Israelita Universala de Cape Town, en Africa del Sur. Su famiya es orijinarya de Rhodes, i el konose la istorya de lo ke fue, antes de la shoa, la male djudiya de la sivdad. Es tambyen talentuozo en komediya, i poeta. En kuanto a Samy Modiano, sovrebivyo de los kampos nazis. Teniya 14 anyos kuando fue liberado en Bergen Belsen.
La entrada va kostar 5€ para los ke no son myembros de Vidas Largas, lo ke me parese ser un kastigo meresido!
Otro anunsyo: un mes despues de esto, el 19 de marso, por la okazyon de la partisipasyon de Vidas Largas a la selebrasyon de los sikuenta anyos del Centre Communautaire, dare aya una konferensya sovre la rezistansya espirituala de los djudeo-espanyoles de Paris durante la Okupasyon almana. Puede ser ke es una egzajerasyon de dizir los djudeo-espanyoles. Seriya mas djusto de dizir unos djudeo-espanyoles, es dizir los kapos de komunidad i los hazanim. Vos akodro ke los dos kales djudeo-espanyoles de Paris (Berith Shalom i Popincourt) kedaron avyertos durante toda la gerra. Munchos de los ke se okupavan de estos kales lo pagaron de sus vidas.
Bueno, trokaremos un poko de lakirdi. No kyero syempre aboltar a la istorya de la shoa, ke sea por kurshumes o por deportasyon, kyero a lo manko de vez en kuando avlarvos de kozas muncho mas agradavles, por egzemplo oy de las reushitas del Estado de Israel i de su puevlo.
Dishe trokar de lakirdi . Ama puediya dizir tambyen: kuando muncho eskurese, es para amaneser. Las reushitas de Israel mos amostran ke malgrado la shoa, Am Israel hay, el puevlo de Israel kontinua de bivir i de dezaroyarse.
Lo ke vos vo dizir agora, lo meldi en varyos artikolos ke travi de internet. Syertos fueron eskritos por djudyos, ama otros no.
Es klaro ke Israel, malorozamente, no tyene la paz. Ama yene, lo ke supo azerse en unos 65 anyos malgrado tantas gerras es una koza ke no egziste en otra parte del mundo.
Un gazetero yamado Bruno Rivière, i asigun su nombre no parese ser djudyo, eskrivyo en 2008 un artikolo muy interesante en la revista Le spectacle du monde. Desde 2008, muevas kozas se izyeron, ama me vo kedar por el momento sovre lo ke eskrivyo este gazetero aze sinko anyos de esto. Este gazetero se enkanta de sesh reushitas del estado de Israel:
1°) Primera reushita, mos dize Rivière, el pais konosyo, entre 1948 i 2008, uno de los mas grandes desvelopamyentos de povlasyon en el mundo. En 1948, los israelyanos eran 720.000, entre los kuales 600.000 djudyos i 120.000 arabos (muzulmanos, kristyanos, druzes). En 2008, son 7.300.000: 5.800.000 djudyos i un milyon i medyo de arabos. La povlasyon de Israel se izo diez vezes mas. Dingun otro pais konosyo tal desvelopamyento de su povlasyon.
Syerto uvo la aliya, unos 4 milyones de djudyos, i 600.000 non-djudyos, entre los kuales 300.000 arabos de Palestina. La aliya fue en parte kompensada por la yerida de unos 900.000 israelyanos. Ama kale dizir ke la mujer israelyana tyene 2, 88 kriaturas, kijo dizir serka de tres, lo ke es muncho mas ke en Evropa. I no son los solos arabos ke tyenen munchas kriaturas. Los djudyos relijyozos tambyen pueden ir asta 9 kriaturas por mujer. Es vedra ke eran solo 8% de la povlasyon en 2008, ama por siguro la proporsyon va pujando.
2°) Sigunda reushita: el desvelopamyento de la povlasyon no es una reushita si en el mismo tyempo no ay una reushita ekonomika. Halbuki, djustamente, la reushita ekonomika es un enkanto. En dolares konstantes de 2008, el PNB en 1948 era entre 1 i 2 milyardas. En 2008, 180 milyardas. Solo los paizes de benzina, i syertos de Asia (Singapur, Japon) izyeron mijor.
En sus trenta primeros anyos, el desvelopamyento fue klasiko. Despues de los anyos 80, el desvelopamyento fue mas espesyalizado, en la alta teknolojiya, bioteknolojiya, industriyas medikales i de farmasiya, armas, avyones, espasyo.
Mismo desvelopamyento en la edukasyon: 70% de la povlasyon eskapa estudyos segundaryos, 35% estudyos post segundaryos, 20% el sigundo siklo. Israel tyene mas de 200 institutos universitaryos, i tyene la mas grande proporsyon en el mundo entero por los bushkadores en syensyas puras (130 por 10.000, kontra 80 en los Estados Unidos i 45 en Fransya). En proporsyon de la povlasyon, Israel se topa en los primeros por las lisensyas de fabrikasyon i las puvlikasyones en revistas syentifikas. Israel tuvo 9 premyos Nobel, entre los kuales 5 syentifikos, 3 de la paz i uno de literatura.
3°) Tresera reushita, mos dize Rivière en 2008, mantener malgrado tantas gerras, una demokrasiya de tipo oksidental, lo ke, ya lo savemos, no egziste en dingun pais al lado.
4°) Kuatrena reushita, el renasimyento de la lingua ebrea, fenomeno uniko en el mundo. Todos en Israel avlan i eskriven en ebreo, esto inkluyendo los arabos. El premyo Israel de literatura 1997 fue ganado por un eskrivano arabo.
5°) Sinkena reushita, asigun Rivière: el renasimyento del djudaismo. Si 68% de los djudyos israelyanos de mas de 60 anyos se deklaran non pratikantes, son solo 37% en los ke tyenen menos de trenta anyos.
6°) Sejena reushita, la defensa del pais. Israel gano todas sus gerras, i intervino en vezes leshos de sus bazas: Uganda (1976) Irak (1981) Tunisiya (1986) Siria (2007) ets. I, no es un sekreto para dingunos, tyene un potensyal nuklear stratejiko.
Ansina eskriviya Bruno Rivière en 2008. Oy estamos en 2013, sinko anyos despues, i Israel se desaroyo dainda mas.
En demografiya, la povlasyon, ke era, vos dishe, de 7.300.000 en 2008, es agora de 7.881.000. Mos aserkamos muy presto de los 8 milyones. La proporsyon de djudyos se keda de 75%.
No avlimos de agrikultura. Las kondisyones, komo ya lo savesh, eran al empesijo muy negras para Israel: un pais chiko (21.000 kilometros kuadrados) sovre los kuales 80% son dizyerto. I sovre lo ke keda, ay munchas montanyas ke no son kolay de kultivar.
Malgrado esto, Israel es un pais muy adelantre en agrikultura .
Kon la informatika, los israelyanos toparon manera de pujar el rendimyento de una tyerra de 40%. Este sistem, yamado Autoagronom, uza 50% menos de agua i 60 % menos de produktos kimikos. Ay kaptores en la tyerra atados kon komputaderas ke saven todo lo ke ay de saver sovre esta tyerra i komandan otomatikamente lo ke ay de azer.
No se save muncho, ama las vakas ke dan la mas grande kantidad i la mijor kualidad de leche por vaka en el mundo entero no son las vakas fransezas de Normadiya, de Holanda o de Amerika ke tyenen buena yerva de komer en una rejyon ande ay luvya. Son las vakas israelyanas! Produsen mas de 11.650 litros de leche por vaka kontra menos de 10.000 por la vaka amerikana, 8.000 por la vaka de Evropa, 5.000 para la de Australia (la kampeone israelyana, kampeone del mundo, yamada Sufa, del kibuts Karmiya, ke se topa djusto al norte de Gaza, produse a eya sola 20.000 litros al anyo,lo ke aze, si no me yerro, la kantidad inkreivle de unos 55 litros de leche kadal diya!. Le izyeron una fyesta kon flores…) Me ambezi mismo ke las vakas israelyanas produsen 80% de metano menos de las otras. Komo es posivle esto todo? Son los savyos ke lavoraron sovre la kuestyon.
Por lo ke es de la agua, ke es koza presioza en la rejyon, los Israelyanos inventaron la irrigasyon gota por gota, ke a sido adoptada por munchos paizes.
Meldi sovre internet ke, un mez i medyo despues de la operasyon pilar de defensa, unos trenta agrikultores palestinyanos de Khan Yunes vinyeron partisipar en Eshkol a un kongreso agrikolo para ambezarse las teknikas israelyanas.
Kale saver ke Israel invento i kontinua de inventar muevas varyedades de frutas i zarzavates. La tomat sereza, por egzemplo, ke se ve agora en todos los merkados, son una invensyon israelyana. Israel inventa tambyen teknikas para kultivar syertas frutas kuando no es la sazon.
Israel eksporta flores en el mundo entero, al punto de vender tulipas a la Holanda, i esto solo me parese marafet grande!
De la misma manera, Israel produse algodon kon rendimyentos muy fuertes (5 tonas i medyo por ektaro, un rendimyento de los mas altos en el mundo).
No tengo menester de avlarvos de la politika israelyana de sembrar arvoles malgrado el manko de agua. Sembrar arvoles en un pais ande ay luvya es una koza. Sembrarlos kuando no ay agua es otra koza, i esto save azer Israel, i lo ambeza a los otros.
Esto dicho sovre la agrikultura, kale avlar de la alta teknolojiya (High tech), dizyendo ke Israel tyene la sigunda plasa en el mundo, solo detras de los Estados Unidos, en la industriya mundyala de la alta teknolojiya.
Israel es el pais ke tyene lo mas de komputaderas por morador: En 2008, aviya en Israel 122,1 komputaderas por syen moradores, lo ke kyere dizir ke kada israelyano tyene mas de una komputadera sovre si o en su kaza.
Son los israelyanos ke inventaron la yave USB, el « chat » entre munchos, el « firewall » i munchas otras invensyones. Savesh ke la teknolojiya uzada por la NASA para embiyar videos de la planeta Mars a la tyerra a sido inventada por Israelyanos?
En kaji todas las komputaderas del mundo ay kozas inventadas en Israel.
Avlando de reushitas de Israel, Rivière mos avlo en 2008 de las reushitas militares de Israel. Ama en 2008 no vos puediya avlar de la kipa de fyerro (iron dome en ingles, kipat barzel en lashon). No tengo de ambezarvos ke los Israelyanos biven kadal diya basho la menasa de ser bombardados por roketas, missiles i otras angusyas. I komo ya lo savesh muy byen, no es solo una menasa. En 2006 el Hezbollah embiyo del Levanon 4.000 roketas (lo mas katyusha) en el norte de Israel, asta Haifa. En el sur, entre 2000 i 2008, Israel resivyo del Hamas mas de 4.000 roketas (lo mas Qassam) i 4.000 obuzes de mortero.
Kaliya topar una defensa. Esta defensa se esta azyendo de tres vandas:
Kontra los misiles balistikos de larga kapachedad, Israel, kon su Kompaniya Israel Aerospace Industries aliyada kon Boeing, esta lavorando a Arrow 3, ke son misiles antimisiles; kontra los misiles medyanos (70 a 200 kilometros) Israel aliyado kon los amerikanos tyenen David’s sling, la onda de David; i kontra las roketas Qasam o Grad , de mas chika kapachedad ,Israel se fraguo, kon el ayudo finansyaro de los Amerikanos, esta kipa de fyerro ke vos dishe. Durante la operasyon Pilar der defensa de novyembre 2012, la kipa de fyerro reusho a 90%, lo ke no kyere dizir ke 90% de las roketas enemigas fueron destruidas, ama ke fueron destruidas 90% de las roketas enemigas ke puediyan azer danyo. Si la makina kalkula ke la roketa se va kaer en un lugar vaziyo, no es menester de gastar unos 50.000 dolares, lo ke kosta kada antimisil, para destruir una roketa sin danyo.
Otra espesyalidad de la industria militar israelyana, los drones, kijo dizir los avyones sin pilota, komo, por egzemplo, el drono Heron, merkado i uzado por la armada franseza en Aghanistan i en el Mali kon el nombre Harfang.
Ay tambyen agora otro modo de gerra , ke ya empeso, afillu si es mas o menos sekreta, es la cyber-gerra. Un pais, Israel por egzemplo, embiya a un otro pais, diremos el Iran por egzemplo, un virus informatiko ke le bozdea toda su informatika, i agora nada se puede azer kon una informatika bozdeada.
Vos avli de armas i de gerra, ama no kale olvidar el rolo importante de Israel en medikeriya i todas sus invensyones. Kale ke vos diga ke ay en vezes un atadijo entre las armas i la medikeriya. Por egzemplo Israel invento una kamera tan minyaturizada ke un hazino la puede englutir, i la kamera se kamina de su boka asta la salida, filmando todo lo ke ay de ver, sin los rizikos de las endoskopiyas. Dishe ke Israel invento. No es el estado de Israel ke izo la invensyon: es un israelyano partikular yamado Gavriel Iddan, un injenyor en optika ke lavorava al empesijo en la firma militar Rafael. Las bushkedades militares le izyeron topar un sistema valyendo para la medikeriya.
En vedra las reushitas de la medikeriya israelyana son tan numerozas i importantes ke me tomariya una emisyon entera para avlarvos de estas, ke azen ke la povlasyon de Israel tyene una largura de vida en buena kualidad ke egziste en pokos paizes. Solo vos dire ke en 2009 la esperansa de vida al nasimyento era de 81 anyos koma sesh, metyendo Israel, en el mundo entero, a la sinkena plasa, al lado de la Australiya i detras del Japon (83 anyos) de la Suisa (82,3) i de la Italya kon Espanya, muy serkas kon 81,8 para las dos. Todos los otros paizes, inkluyendo Fransya, Almanya, Ingletyerra, Estados Unidos, ets, son detras de Israel.
Antes de eskapar esta emisyon, vos tengo de akodrar ke todo lo ke vengo de dizir no vale solo para los djudyos de Israel. Vale tambyen para el milyon i medyo de arabos israelyanos, ke biven, lavoran, estudyan, eskriven, azen sinema, tyenen un djusgo a la Corte Suprema, 10 deputados en partidos arabos i mas otros en partidos en mayoriya djudyos, i tuvyeron, komo vos dishe, un eskrivano premyo Israel de literatura en 19987, un ministro (de la Syensya) en 2007 en el governo Olmert, i mismo una Miss Israel en 1999. Esto todo no kyere dizir ke la integrasyon de los arabos israelyanos es una reushita perfekta, ama yene se puede dizir ke los arabos de Israel tyenen una vida muncho mas mijor ke los de kualkyer otro pais arabo vizino.
Estamos solo al empesijo. Kada anyo Israel se dezaroya un poko mas. Asperad un poko, i si kyere el Dyo, vos azere en poko tyempo otras emisyones sovre otras reushitas.
Por lo ke es de agora no vos digo astal djueves ke vyene, porke kon las vakansas de las kriaturas, el papu ke so va tener de okuparse de su inyeto una buena parte de la semana. I kon mi solo inyeto en la kaza, mismo sin su ermanika, no kale pensar pueder topar tyempo de aparejar kualkyer emisyon ke sea…tendrash una redifuzyon.
Al djueves 21, si kyere el Dyo!
Edmond Cohen
