eSefarad Noticias del Mundo Sefaradi
Keridos amigos, aki toparesh el teksto de mi emision de este djueves, konsagrada (en komemorasyon del diya mundyal del olokosto, el alhad pasado 27) a la shoa por kurshumes, o por balas. No fue koza kolay de lavorar ensima…Il faut avoir le cœur bien accroché…
El program se puede sintir por Internet kada djueves a las 4 H O6 PM, ora de Paris, indo al sityo RADIO – la fréquence juive. Kale tener pasensya i asperar un poko, no se oye pishin.
Saludos a todos
Edmond Cohen
Paris, Fransya
LA SHOA POR KURSHUMES
Saludos a todos los oyentes de la emisyon Muestra lingua, la emisyon en djudeo-espanyol fundada por el profesor Haïm-Vidal Sephiha i prezentada agora por vuestro servidor Edmond Cohen, kon Philippe en la kabina.
Komo a kada vez, vos akodro ke el proksimo atelye de konversasyon de la Asosyasyon Vidas Largas se tendra el martes 5 de fevrero, de las dos i un kuarto asta las sinko, en el Centre Communautaire, 119, rue Lafayette Paris (10°), métro Cadet o Poissonnière.
El alhad 27 fue el diya mundyal del olokosto. En Fransya, tenemos kuatro diyas diferentes por la deportasyon:
- el diya djudyo i franses para la memorya de la deportasyon, el alhad antes de Rosh ashana
- el diya mundyal del olokosto, de la ONU, el 27 de janvier
- el yom ashoa, israelyano, el 27 de nissan
- i el diya nasyonal de la deportasyon, franses i no solo de los djudyos, tambyen de los deportados rezistantes, el ultimo alhad de avril.
Komo este anyo tenemos ensima el setenten aniversaryo de las deportasyones de 1943, kon la meldadura de los nombres de kada treno el mismo diya ande se fue, i fueron 17 en 1943 – 43 en 1942 – lo ke aze 17 diyas mas de komemorasyon, se puede dizir ke este anyo komo el anyo pasado va ser muy yuch de olvidarse ke uvo una shoa aze 70 anyos.
I para dizirvos la vedra, ay diyas en ke me agradariya de olvidarmelo un poko. Lo digo, ama no puedo entender ni soportar ke ayga djente ke se olvida. Es mi kontradiksyon…
Dunke vos estava dizyendo ke alhad pasado fue el diya mundyal dicho del olokosto, ke mozotros en Fransya yamamos la shoa komo en Israel.
Asta agora no fui kapache de avlarvos de la shoa por kurshumes (por balas, por tufenk) tan es koza de apretamyento de korason. Oy vo aprovar de tener este koraje, ama vos akavido ke va ser koza muy muy pezgada.
Se pensa ke los djudyos, i no uvo solo djudyos, ama tambyen chinganes, prezoneros rusos, i tantos otros, matados en Evropa del Este por kurshumes, fueron mas de un milyon, puede ser un milyon i medyo.
Un milyon i medyo, es mas o menos la misma kantidad ke en Auschwitz, la diferensya syendo ke la muerte en Auschwitz era industriala, kuando las matansinas por balas fueron mas artizanales.
El 22 de agosto 1939, la gerra dainda no empeso. Ama Hitler dize a sus jenerales, asigun lo ke meldi sovre Wikipedia ke lo tomo de un artikolo kolektivo de 2007 puvlikado en la Revue d’histoire de la Shoah: « Muestra fuersa depende de muestra prestez i de muestra brutalidad. El eskopo de la gerra no va ser de ayegar a tal linea, va ser de matar al enemigo. Por esto meti – solo al este por el momento – mis unitades kon kavesa de muerte; resivyeron el orden de matar sin dinguna piadad munchos ombres, mujeres i kriaturas polakos. Es la sola manera para mozotros de konkistar el espasyo vital ke tenemos de menester ».
La gerra dainda no empeso, ke los ordenes venidos de lo mas arriva son muy klaros. Las kozas ya fueron preparadas desde julyo 1939 por Heydrich, ke konstituyo sinko Einsatzgruppen (grupos de intervensyon) para azer este lavoro de matansina. Estos einsatzgruppen i einsatzkomandos van a ser unos 3.000 ombres. Los ordenes de Heydrich para la Polonya: los aristokratos, los papazim i los djudyos deven de ser matados.
No kale pensar ke estos asasinos son de basha klasa. Al kontraryo. Son en jeneral intelektuales diplomados, doktores en derecho, ets. Por la mayoriya azen parte de la SS i vyenen de la Gestapo, del SD (Sicherheitsdienst, Servisyo de Seguridad) etc.
Entre septyembre 1939 i la primavera de 1940, las matansinas de los einsatzgruppen en Polonya azen entre 50.000 i 60.000 viktimas. Es solo un chiko empesijo. No es nada komparado kon lo ke va ser kuando los Almanes van a entrar en URSS, lo ke van azer el 15 de mayo 1941.
Los Einsatzgruppen entran en URSS detras de la Wehrmacht, i la primera matansina de masa empese el 23 de junyo, en la sivdadika de Garsden serka de la frontera kon la URSS. La sivdadika es tomada el 22, la matansina, ke va surear dos diyas, empesa el 23. Los 700 djudyos de la sivdadika son todos matados.
(Aki me devo de avrir una paranteza:En Fransya uvo en 1944 (el 10 de junyo) una matansina, no de djudyos, ama de todos los kazalinos del kazal yamado Oradour sur Glane: los ombres fueron fuzilyados i las mujeres i las kriaturas enserradas en la iglesya ke fue kemada kon eyos adyentro. Esta orror esta konosida de todos los fransezes ke nunka la olvidaron. Yo la ambezi despues de la gerra en la eskola ande el profesor tomo ora entera para kontarmola. En Garsden, los djudyos eran 700, mas ke los 642 de Oradour sur Glane: ama aki la matansina de Garsden es djusto una lagrima en el oseano de las matansinas almanas en Evropa del Este.. Syerro la paranteza.)
El kapo de los Einsatzgruppen, basho los ordenes de Himmler, va ser en primero Reinhard Heydrich, el kual va ser matado por los partizanos de Tchecoslovakiya el 4 de junyo 1942. Despues de su muerte, es el SS gruppenfuhrer (jeneral de divizyon) Ernst Kaltenbrunner ke va venir en su lugar para komandar a los einsatzgruppen.
El einsatzgruppe A se okupa del norte, kijo dizir de la Prusa Oryentala verso Leningrad, los paizes baltos i el norte de la Rusiya. Eyos van a azerlas matansinas de los djudyos de Kovno, Riga, Vilno.
El einsatzgruppe B se okupa de la Bielorussia verso Smolensk. Eyos van a azer las matansinas de los djudyos de Minsk, Brest Litovsk, Gomel, Mogilev.
El einsatzgruppe C se okupa de la Ukranya verso Kharkov i Rostov sovre el Don. A eyos las matansinas de Nikoloyew, Simferopol, Sebastopol, Kherson.
Los einsatzgruppen no se kontentan de matar eyos mismos, enkorajan tambyen la povlasyon lokala a azer eyos mismos pogromes, dizyendo ke los djudyos son de la NKVD, la polisiya sekreta sovyetika. Poko importa ke sea falso, la NKVD es tan aborresida por la povlasyon ke ya aborresiya de toda manera a los djudyos, ke los Almanes munchas vezes no tyenen menester de nada azer.
Heydrich, el 29 de junyo 1941, eskrive ke no kale impedir a los antisemites lokales de matar eyos mismos a los djudyos; al kontraryo, kale enkorajarlos, ama kon diskresyon.
De toda manera ya entenditesh ke 3.000 ombres no uvyeran podido matar a milyon i medyo de ombres, mujeres i kriaturas sin el ayudo de la povlasyon lokala, de las polisiyas almanes i lokales i de la Wehrmacht.
Por egzemplo, este mismo 23 de junyo 1941 de la matansina de Garsden, el einsatzgruppe A no tyene difikultad para solevantar a un pogrom en la sivdad de Kaunas, sigunda sivdad de Lituaniya.
La djente aharva a los djudyos kon palos asta matarlos. Las mujeres se meten un poko mas leshos kon las kriaturas para mirar el espektakulo.
En Ukranya, los primeros diyas de su entrada, el sonderkomando 4b del einsatzgruppe C dize ke no tyene kaji nada de azer. Solo dizen ke los djudyos son de la NKVD, la polisiya sekreta rusa.
En la sivdad de Brzezany, por egzemplo, la mayoriya de los djudyos son matados por los Ukranyanos kon palos de eskova ande metyeron klavos. Se meten de dos lados i azen pasar los djudyos entre los dos lados, i ansina los matan kon los palos.
Esto dicho, esto no kamina syempre. En Jitomir, los Almanes se keshan ke la povlason no los kyere ayudar, i ke de si para si no aze nada.
En julyo 1941, para ayudar a los 3.000 ombres de los einsatzgruppen, Himmler les embiya diezenas de miles de la SS, de la Waffen SS, i de la Ordnungspolizei. El 25 de julyo, Himmler da el orden de konstituir fuersas de ayudantes lokales i amigos de Ukranya, Letonia, Estonia i Bielorussia. Estos ayudantes van a ser 33.000 a la fin de 1941.
Himmler se va personalmente en viaje durante el enverano 1941 para mirar komo se pasan las matansinas. I el eskrive para ke se bushke una manera de matar a los djudyos sin meter los matadores frente a sus viktimas, de manera a « no azer danyo » a los matadores. De aya bushkaron si era posivle de matar a las viktimas kon gas.
Kale dizir ke para matar a la djente, los Almanes aprovan varyas maneras: los gazes, los eksplosivos.
Aprovan los gazes de kamyones, i munchos djudyos van a ser matados de esta manera, enserrados en kamyones i gazados adyentro. Ama esto kosta benzina. Despues los Almanes van a topar una koza mas ekonomika kon las falsas duchas de los kampos. No kosta benzina, solo el gas. Ama kale transportar a la djente asta los kampos, en vezes de paizes leshanos, i afillu en vagones de behemot, kosta paras.
Los eksplozivos azen morir munchos en una vez, ama de una kosta paras i munisyones de gerra, i los almanes kyeren gastar lo manko posivle para sus matansinas. De otra parte ay pedasos de puerpos en todas partes, en los arvoles, ets, ke despues kale alimpyar, para no deshar provas. I esto toma tyempo i djente.
En Minsk i Vitebsk, los almanes uzan de lo ke yaman la manera militar, azer fuzilyar a kada djudyo por tres matadores en djuntos. Ama esto kosta tres kurshumes por djudyo, lo ke es de maziya karo.
En Minsk, en agosto 1941, Himmler se aze amostrar komo azen: azen desnudar a la djente, lo ke permite de rekuperar los vestidos antes ke sean sin valuta kon los burrakos i la sangre, despues azen espandirse a las viktimas a basho, una al lado de otra, i son matados una despues de otra kon un kurshum en el piskueso o en la kavesa.
En Kamenets-Podoslski, 23.600 djudyos son matados kon mitrayadora en dos diyas.
Ama esto kosta paras i munisyones. Los Almanes van a tomar un prinsipyo: un djudyo, un kurshum. Los djudyos son forsados de kavakar grandes tombas i de meterse delantre, frente a la foya. Son matados por detras, de un kurshum en la espalda. Poko importa, en vedra, si son muertos o solo firidos: lo ke importa es ke kaigan en la foya. Munchas vezes son solo firidos, i lo ke va matarlos es la pedrita de sangre de una parte, i la tyerra echada sovre eyos. Se mueren aogados.
Kale dizir ke en Fransya vino agora un papas katoliko, el padre Patrick Desbois, prezidente de la asosyasyon Yahad in Unum, ke konsagro munchos anyos de su vida – i no eskapo – a bushkar ande fueron echados i kuvyertos de tyerra los djudyos, i por esto se va ver los kazales de Ukranya. Va ver al papas de kada kazal, ke al kavo de la misa lo prezenta a los kazalinos para ke le konten lo ke vyeron. Lo mas eran kriaturas i a eskondidas vyeron lo ke se paso, lo kontan al padre Desbois i lo yevan al lugar de basho del kual se topan los uesos de los djudyos.
Son estos kazalinos ukranyanos ke kontaron al padre Desbois komo se pasavan la koza. Vos dishe un kurshum, un djudyo. Esto era para azer ekonomiyas. Dunke no era menester de gastar un kurshum para las kriaturas i los vyejos ke eran echados bivos en las foyas. Abastava ke se mueran aogados, lo ke puediya tomar tres diyas. Los kazalinos kontaron a Desbois ke la tyerra se moviya tres diyas asta ke todos sean muertos.
Uvo syertas kriaturas o personas poko firidas ke pudyeron salir de la tyerra i salvarse, i despues kontarlo. Muy muy pokas, ama sus testimonyos son terrivles.
Meldi sovre internet el testimonyo de Khiena Katz, travado de un livro kolektivo en franses de 1995 intitolado Le Livre noir: eya mos konta komo vido kon sus ojos morir su padre, bastonado i matado por kurshum. Eya, desvestida, era espandida a tyerra al lado de su ermana ke teniya su ijiko en los brasos i le kantava una kantika yiddisch « Luli Luli mi ijiko ». Despues los almanes las izyeron alevantar i kaminar en la foya sovre los puerpos de los muertos, i aya les travaron ensima. Su ermana se muryo kon su ijiko. Eya se kayo ama no se muryo, solo se esvanesyo. Kuando se esperto, se topava de basho de los puerpos de los otros. Pudo salir de entre los muertos i topar de kualo vestirse, i se fuyo.
Los matadores no solo teniyan dinguna piadad, ama munchas vezes teniyan un sadismo syerto, afillu si, kuando fue djuzgado despues de la gerra, uno de estos matadores (Viktors Arajs, un ayudante leton) disho ke si echavan a los bebikos en el ayre para travar ensima, no era para djugar, ama solo para ke no ayga risko de kurshum ke venga atras. En vedra toparon tambyen mas ekonomiko de azer kaer el bebiko sovre la bayoneta del tufenk. Esto no lo meldi sovre internet, es koza ke me akodro tener meldado de los testimonyos en Israel durante el djusgamyento de Eichmann. Oyi tambyen el padre Desbois kontar ke, para ekonomizar un kurshum, los matadores demandavan a la madre de meterse en frente kon su bebiko en los brasos, para matar en djuntos a la madre i al bebiko kon un solo kurshum.
Kale saver ke estas matansinas kontinuaron asta 1944, en mas de lo ke se pasava en Treblinka, Auschwitz i tantos otros kampos de esksterminasyon.
Orozamente no so un istoryano. No fui ovligado de meldar todo lo ke se disho, amostro i eskrivyo sovre todas las maneras utilizadas por los matadores. Lo poko ke me ambezi ya me abasto.
Los ke tyenen mas koraje ke mi i ke konosen el franses pueden ir a demandar sovre Google.fr Un juif une balle, i Google los va embiyar a Daily Motion para un pedaso de 18 minutos ande el haham Josy Eisenberg tyene entrevista kon Patrick Desbois. La video se yama Un juif une balle.
I los ke tyenen mas koraje, si demandan a Google.fr Shoah par balles video youtube, podran ver (en franses) una video en 6 pedasos intitolada Shoah par balles: l’Histoire oubliée. Es una emisyon ke paso a la televizyon. No la keriya ver, ama yene la miri.
Pueden tambyen meldar el livro (en franses) de Patrick Desbois intitolado Porteur de mémoires. Si no me yerro, es este mismo livro ke paresyo en ingles kon el titoloThe Holocaust by Bullets: A Priest’s Journey to Uncover the Truth Behind the Murder of 1.5 Million Jews.
Este Desbois ya salyo unas 500 foyas, i kuando topa los uesos, yama a un haham ke aze lo ke kale para ke estos poveretos tengan una sepultura djudiya.
Aki me vo kedar de mi emisyon. La keriya azer desde muncho tyempo, ama no teniya el koraje. Esta vez la ize. No fue koza kolay.
Al djueves ke vyene, si kyere el Dyo!
Edmond Cohen
