Muestra lingua: LA LEY DEL RITORNO EN ESPANYA por Edmond Cohen

Keridos amigos, mi emisyon de amanyana djueves va ser konsagrada al proyekto de ley permityendo a los djudyos sefardim de obtener la nasyonalidad espanyola ande ke sean.Esta ley, si sera votada, valdra mas o menos abrogasyon del edikto de ekspulsyon de 1492…

El program se puede sintir por Internet kada djueves a las 4 H O6 PM, ora de Paris, indo al sityo  RADIO – la fréquence juive. Kale tener pasensya i asperar un poko, no se oye pishin.

Saludos a todos
Edmond Cohen
Paris, Fransya

LA LEY DEL RITORNO EN ESPANYA 

Saludos a todos los oyentes de la emisyon Muestra lingua, la emisyon en djudeo-espanyol fundada por el profesor Haïm-Vidal Sephiha i prezentada agora por vuestro servidor Edmond Cohen, kon Philippe en la kabina.

Komo a kada vez, vos akodro ke el proksimo atelye de konversasyon de la Asosyasyon Vidas Largas se tendra el martes 19 de marso, de las dos i un kuarto asta las sinko, en el Centre Communautaire, 119, rue Lafayette Paris (10°), métro Cadet o Poissonnière.

Esto dicho, vos tengo de kontar ke, si no pude azer emisyon el djueves pasado por modo de baby sitting de mi inyetiziko, a la kontra fue kombidado para azer el shabath pasado, 16 de fevrero, una konferensya en el Hotel Mercure ke se topa en la sivdadika de Coudray-Montceaux, a unos 35 kilometros al sur de Paris. Esta konferensya se dava en el kuadro de Limoud 2013, una koza ke yo no konosiya, i por tanto 600 personas eran asperadas para una reunyon de tres diyas, de vyernes a alhad, kon munchas konferensyas en mizmo tyempo kada ora.

En esto todo, kualo era el sujeto de mi konferensya? Kale dizir ke este anyo, el Limoud teniya dos temas prinsipales, Espanya de una parte, el par (le couple) de otra parte. Yo, komo ya lo endevinatesh, me topava de la vanda de la Espanya, i apareji mi konfrensya sovre Angel Pulido, sovre el kual ya vos aviya echo una emisyon aki mismo el primo de novyembre del anyo pasado. Yo no me estrecheava, porke teniya solo de dizir aya en franses lo ke aviya dicho aki en espanyol. Es solo el djueves a la noche ke me ambezi ke estava asperado, no sovre Angel Pulido, ama sovre « La ley del ritorno de los djudyos en la Espanya de oy ». Atyo Santo, dinguno me lo aviya dicho! Tuve, komo se dize en franses, de trokar mi tufenk de ombro, kijo dizir lavorar noche entera para aparejar una konferensya sovre una ley ke, komo lo vamos a ver, no egziste dainda.

Enfin, pude azer mi konferensya, djusto despues muestra amiga Ruth Arciniega, ke eya avlo del rolo de los brigadistas djudyos durante la gerra de Espanya.

Komo me paresyo ke mi konferensya intereso a la djente, por esto me pensi de azervos mi emisyon de oy sovre esta ley…afillu si no egziste dainda!

Empesaremos por el empesijo, ke es el edikto de ekspulsyon de Espanya de todos los djudyos, ombres i mujeres, vyejos i kriaturas, edikto maldicho ke fue tomado el 31 de marso se 1492 por los yamados Reyes Katolikos, kijo dizir Isabel de Castilla i su marido Fernando de Aragon.

Este edikto desho 4 mezes a los djudyos para irsen, deshando no solo sus byenes immobilyares ke ivan a la korona, ama tambyen sus valutas de oro, plata, ets. En mas de ser echados, eran arrovados. Los djudyos ke no se izyeran katolikos topados en Espanya despues del 31 de julyo eran kondenados a muerte.

Lo ke fue esta ekspulsyon, es una desgrasya ke se puede imajinar. Tenemos un testimonyo por el kura de la sivdadika de Los Palacios, Andres Bernaldez, ke mos konta:

« Desharon sus pais de nasimyento, chikos i grandes, vyejos i kriaturas, a pie o sovre aznos o kualkyer otro animal, i kada uno verso el puerto ande se teniya de ir. Kaminavan al largo de las karreteras i de los kampos en kondisyones muy duras i aventurozas, los unos kayendo, los otros alevantandose de muevo, unos muryendo, otros nasyendo, unos kayendo hazinos, de tal modo ke no aviya kristyano ke no tenga piyadad por eyos, i ande se ivan, le demandavan de azerse baftizar. Algunos se konvirtyeron por modo de la situasyon, i kedaron, ama muy pokos, i sus hahamim no kedavan de enkorajarlos. Aziyan kantar las mujeres i los mansevos, i tanyer pandero para alegrar a la djente, i ansina es ke salyeron de Castilla i ayegaron a los puertos ande los unos embarkaron, i los otros ayegaron al Portugal. »

Ansina mos konta un papas. En kuanto a un djudyo, Joseph Hacohen, en su livro emek abaha, el vaye de los yoros, eskrito en 1560, el mos konta lo ke fue el viaje en las naves.

« Los djudyos se fueron ande el ayre los empusho, en Afrika, en Asia, en Gresia i en Turkiya. Sufrieron dolores terrivles, los marineros djenovezes los aharvaron. Unos dezmazalados se moriyan de dezespero en kamino; muzulmanos les avrieron las tripas para bushkar en eyas el oro ke aviyan englutido para eskonderlo. Otros fueron konsumidos por la pesta i la ambre. Otros fueron echados desnudos por el kapitan de la nave en islas vaziyas. Otros tambyen vendidos komo syervos en el puerto de Genova i sivdadas a eya sometidas. »

Por esto es ke a mi me vyene kuryozo ke la Iglesya kyera azer una santa de esta kriminala de Isabel la negrinyada.

En kuanto a los ke pensaron topar la salvasyon en el Portugal, ya vos konti en una otra emisyon lo ke les izyeron los reyes del Portugal. Los ke fueron los mijores tratados i akojidos fueron los ke pudyeron ayegar al Imperyo osmanli.

Se konta ke munchas famiyas se fueron de Espanya guadrando la yave de la kaza, pensando ke, un poko mas tadre, puedriyan aboltar a kaza.

El martes pasado, kuando vide el filmo de Gilbert Sagues sovre Rhodes (ke vos aviya anunsyado en mi ultima emisyon) me ambezi de una koza ke me toko muncho: en los kales sefardim de al tyempo, i es el kavzo del kal Shalom de Rhodes, ke fue fraguado a la venida de los Espanyoles ay 500 anyos, ay dos aron akodesh: uno mirando a Yerushalayim, komo es el uzo, i el otro mirando a Espanya.

Esto es para dizir la nostaljiya ke se guadraron syertos djudyos por sus tyerra pedrida de Espanya, i sus gana de aboltar aya.

Ama esto es para syertos djudyos. I los espanyoles kristyanos? Es ke keriyan ver aboltar a los djudyos? En jeneral, parese ke, al empesijo, no. Kuando digo al empesijo, es un empesijo ke tura astal siglo 19.

Ama yene, en bushkando, se topa ke, afillu en estos tyempos, syertos espanyoles, ke no kale konfundir kon el governo espanyol en jeneral, se interesaron a los djudyos sefaradim.

Por egzemplo, meldi ke en 1670, Manuel de Lira, embashador de Espanya en Holanda, izo una propozisyon a su rey Carlos II para ke los djudyos (i los protestantes) sean permetidos de morar, sino en Espanya, a lo manko en las koloniyas espanyolas. Por lo ke se, esta propozisyon no fue achetada.

De la misma manera, el 21 de marso 1797, Pedro de Varela, sekretaryo de Estado a la marina del rey Carlos IV, izo la propozisyon ke los djudyos sean permetidos de aboltar en Espanya. Ke da komo razon? « Asigun la opinyon jenerala, esta nasyon (los djudyos) tyenen las mas grandes rikezas de Evropa »… No se avla de los djudyos proves, ke no tyenen dingun interes, ama de los mas rikos, los bankeros olandezes, kon la esperansa ke van a arrebivir la flaka ekonomiya de la Espanya.

Nada de sentimental en esta propozisyon, komo se ve, i de toda manera no va ser achetada por el rey.

Ya entenditesh ke no es porke kada siglo ay un espanyol o dos ke pensan de azer aboltar a los djudyos ke se puede dizir ke el governo o el puevlo espanyol lo kyeren. El ritorno de los djudyos no esta en las primeras preokupasyones de los Espanyoles, de tal manera ke, kual ke sea la nostaljiya de syertos djudyos, en jeneral aboltar en Espanya, syendo ke no es posivle, no es tampoko en las preokupasyones de los sefaradim.

Las kozas van a trokar en el siglo 19.

En la primera mitad del siglo 19, una parte de los Espanyoles, la vanda liberala, pensa ke kale rekonsiderar la ekspulsyon de los djudyos. En vedra no es solo para eyos la kuestyon de los djudyos, es de manera mas jeneral la lucha kontra la intoleransa relijyoza. Kontra eyos, por siguro, toda la vanda de los konservadores katolikos i antisemites, ke luchan kon fuersa a la kontra de estas ideas. Vos akodro ke si la Inkizisyon fue abrogada por el rey Joseph Bonaparte, ermano de Napoleon, en 1808, la primera koza ke izyeron los Espanyoles despues de echarlo a basho fue de azer aboltar la Inkizisyon, en 1813. Yene los liberales eskaparon por obtener, ama solo en 1834, ke la Inkizisyon sea definitivamente abrogada.

Por parte de los liberales, ay por egzemplo el istoryano Adolfo de Castro, ke eskrive en 1851 un livriko intitolado « Examen filosofico de las principales causas de la decadencia de Espana ». En este livro, el autor empesa por rekonoser ke la Espanya esta en dekadensya, lo ke es la vedra ama no era kolay de rekonoserlo, i en sigundo, entre las kavzas de esta dekadensya, pyensa ke una de eyas fue la ekspulsyon de los djudyos. Agora esto se dize muncho, i yo lo meldi munchas vezes. I kuando yo estava en el liseo, mi profesor de istorya mos ambezo la mizma koza, es dizir ke la ekspulsyon tan de los djjudyos komo, mas despues, de los Moriskos fue la kavza de la dekadensya de la Espanya despues del Siglo de Oro.

Meldi ke agora syertos istoryanos son mas shupelis sovre esta kuestyon, i pyensan ke la ekspulsyon de los djudyos, ke en vedra eran en jeneral chikos artezanos modestos, no toko tanto a la Espanya.

Komo yo no so istoryano no vos puedo dizir kyen tyene razon a propozito de las konsekuensas para la Espanya de la ekspulsyon de sus djudyos. Mi idea es ke los mijores istoryanos no sabran nunka lo ke se uvyera pasado si los djudyos se uvyeran kedado en Espanya. La istorya konjekturala es koza en vedra imposivle. Lo ke se paso se paso, lo ke no se paso no se paso, i nada mas!

De toda manera, yo tambyen me kedo shupeli. De una parte, a mi me parese ke tan los antisemites komo los djuyos dan a los djudyos mas importansya ke tyenen en vedra. Ama de otra parte, esto siguro ke la fuersa de los Estados Unidos, por egzemplo, les vyene entre otras kozas de sus djudyos, i ke si oy los Estados Unidos echavan a fuera a sus djudyos, seriya una pedrita para eyos i un enrikesimyento para el pais ke los tomariya kon el. Ama los Estados Unidos de oy no son la Espanya de 1492.

Enfin, esto todo mos alesha de lo ke vos estava kontando sovre la evolusyon de los espanyoles liberales verso los djudyos en el siglo 19.

De una manera jenerala, los diplomates i otros espanyoles ke lavoran en Turkiya, i sovre todo en su kapitala Estambol, konstatan la prezensya de muncha djente djudiya ke avla espanyol, i esto no puede desharlos indiferentes.

En 1854, el Duke de la Torre responde a hahamim djudyos demandandole la abrogasyon del edikto de 1492 ke esta abrogasyon no es de menester, syendo ke los djudyos podiyan venir instalarse en Espanya si lo keriyan.

En 1866, Pedro Felipe Monlau, Direktor de la Eskola Diplomatika en Estambol trae a Juan Eugenio Hartzenbusch, Direktor de la Biblioteka Nasyonala en Madrid, varyos livros eskritos en djudeo-espanyolo en ladino, lo ke lo esmove i lo empusha de promover una influensa de la kultura espanyola ande eyos.

Esto es otra koza. No se avla de azer aboltar a Espanya los djudyos; solo de mantener la lingua espanyola ande eyos, lo ke no es la misma koza.

Despues de la revolusyon de 1868 i la venida de la Primera Republika en Espanya (ke no va turar muncho tyempo) el liberal Emilio Castelar aze delantre las Cortes, el 12 de avril 1869, un diskorso en favor de la libertad relijyoza. No kale olvidar ke en este tyempo, el edikto de ekspulsyon es dainda en yena vigor, el ke dize ke si un djudyo se topa en Espanya sera kastigado de muerte.

Ama el jeneral Serrano, kapo del Governo provizoryo, responde a la Aliansa Israelita Universala ke le demanda la abrogasyon del edikto de 1492: « Tengo de dizirvos ke muestra gloryoza revolusyon a proklamado la libertad relijyoza, en el mismo tyempo ke rekonosiya los otros derechos del ombre – le ke abroga de fakto el edikto del siglo 15. En konsekuensa, las personas de todas konfesyones son liberas de entrar en muestro pais i egzersar libremente sus kulto ».

Komo lo puedesh ver, una vez mas, el governo espanyol dize ke no es menester de abrogar ofisyalmente el edikto de ekspulsyon de 1492, i asta oy en diya, por lo ke se, i kual ke sea todo lo ke se tyene dicho i eskrito sovre esta abrogasyon, nunka se tuvo.

De otra parte, es falso ke la rekonosensya de los derechos umanos vale abrogasyon de fakto del edikto. Vale solo una abrogasyon parsyala, syendo ke la libertad de entrar no es la mizma koza ke el rekonosimyento de la nasyonalidad espanyola, i dainda en 1869, estamos leshos de esto.

Komo no me keda tyempo i ke ya avli de esto en mi emisyon sovre Angel Pulido ke paso el djueves pasado en redifuzyon, no vos avlaré oy del rolo de este espanyol liberal ke se peleo para azer konoser a los sefaradim a los espanyoles, ni vos avlaré tampoko del dekreto de 1924 tomado del tyempo de Miguel Primo de Rivera. No vos avlaré, ama yene lo kale akodrar, porke son kozas fundamentales. En esta emisyon pasada vos avli tambyen del tyempo de Franco, i komo el dekreto de 1924 permityo, kale akodrarlo, de salvar la vida de unos kuantos djudyos. Kale akodrarmos de Angel Sanz Briz en Budapest, i komo se sirvyo de este dekreto de 1924, ke en vedra no valiya mas desde 1931, para salvar a miles de djudyos ungarezos.

Esto dicho, el 13 de julyo 1982, el Kodigo sivil espanyol vyene dizir en su artikolo 22 ke la nasyonalidad espanyola puede ser adkirida por, entre otros, los sefardim kon una prezensya en Espanya de dos anyos solo, i no diez anyos para kualkyer ajeno.

Dunke kale ser venido en primero en Espanya komo ajeno antes ke dos anyos despues el sefardi pueda ser admetido komo espanyol.

Ama trenta anyos despues, el 22 de novyembre 2012, en la Kaza Sefarad-Israel en Madrid, en prezensya del Senyor Isaac Querub, Prezidente de la Federasyon de las komunitades djudiyas, dos ministros del Governo Rajoy, es dizir Alberto Ruiz-Gallardon, ministro de la Justisya, i José Manuel Garcia-Margallo, ministro de los echos ajenos, prezentaron a los gazeteros un proyekto de ley abrogando para los sefardim la obligasyon de tener morado dos anyos en Espanya para pueder demandar la nasyonalidad espanyola, esta demanda podyendo dunke ser echa en kualkyer lugar ande se topa el sefardi ke demanda la nasyonalidad espanyola.

Kale rekonoser ke esta ley, si un diya es votada, markara un paso importante verso la abrogasyon de fakto del edikto de 1492, afillu si dainda no uvo esta abrogasyon ofisyala.

Puedemos solo regretar ke tuvimos de asperar 521 anyos. Uvyeramos sido mas satisfechos si esta ley uvyera intervenido en 1940 en vez de 2013, i si miles de djudyos sefaradim uvyeran pudido ansina salvar sus vidas. Oy a mi esta ley me parese venir demaziya tadre, ama ke dizir? Mas vale tadre ke nunka.

Al djueves ke vyene, si kyere el Dyo!

Edmond Cohen