eSefarad Noticias del Mundo Sefaradi
Keridos amigos, aki toparash el teksto de la emisyon de esta semanada.
Akavido los ke me oyen sovre internet desde paizes ajenos ke aki en Fransya entrimos el alhad pasado en la ora de invyerno, i atrazimos muestras oras de una ora
El program se puede sintir por Internet kada djueves, indo al sityo RADIO – la fréquence juive. Kale tener pasensya i asperar un poko, no se oye pishin.
Saludos a todos
Edmond Cohen
Paris, Fransya
HANUKA I SHARANSKY
Saludos a todos los oyentes de la emisyon Muestra lingua, la emisyon en djudeo-espanyol fundada por el profesor Haïm-Vidal Sephiha i prezentada agora por vuestro servidor Edmond Cohen, kon Philippe en la kabina.
Komo a kada vez, vos akodro ke el proksimo atelye de konversasyon de la Asosyasyon Vidas Largas se tendra en 2012, el martes 3 de janvier, de las dos i medya asta las sinko, al muevo adereso del 17 rue Pierre Semard Paris (9°), arriva del Square Montholon, métro Cadet. La entrada es la del lokal i no la del han.
Oy mos topamos en el sigundo diya de Hanuka, i es la okazyon de avlarvos de esta fyesta, sin kontarvos de muevo lo ke ya savesh todos i me ya konti munchas vezes aki.
Por esto, oy pensi ke vos puedriya interesar la istorya del primer Hanuka de Natan Sharanski en el Gulag. Es una ermoza istorya ke el mismo konto, i ke meldi sovre el sityo del movimyento Habad (los Lubavitch).
Ama antes de meldar esta istorya, seriya byen ke vos akodre kyen es este famozo refuznik, Sharansky.
El 20 de janvier 1948 nase en Donetsk, en Ukranya, un djudyo yamado Anatoli Borissivitch Chtcharanski. El aze estudyos en el Instituto de Fizika i de Teknolojiya de Moskva ande va ser diplomado de matematikas aplikadas.
En 1973, tyene 25 anyos, demanda un visa para pueder irse en Israel, i le es refuzado, azyendo de el un refuznik komo tantos otros rusos de la misma epoka. Se va lavorar andel grande savyo Andreï Sakharov. I a su lado va ser, en mas de syonisto, un aktivisto para los derechos umanos, i dunke un dissidente.
En 1974 se kaza basho la hupa kon Natalya Steiglitz, ke despues trokara de nombre i en vez de Natalya se yamara Avital. Eya, ke supo solo a la edad de 14 anyos ke era djudiya (i ke agora es muy sufu) obtyene su visa i se puede ir en Israel. Anatoli, el, se keda solo en Rusiya.
Syonisto i dissidente, es muncho para una misma persona. En marso 1977, es aferrado i kondenado en julyo 1978 a 13 anyos de prezo komo syendo un espyon para los Estados Unidos, lo ke nunka fue.
Despues de 16 mezes en el prezo de Lefortovo, es embiyado en Siberiya en un gulag yamado Perm 35 ande va estar durante 9 anyos. Es kuando estava en el gulag ke se tuvo esta istorya ke Sharansky mos konta agora. Agora es el ke avla :
«Hanuka se aserkava.Yo era el solo djudyo en mi prezo, ama kuando di a entender a mis kompanyeros de prezo ke Hanuka simbolizava la libertad de una nasyon, el renasimyento de una kultura frente a okupantes poderozos i negros, mis kompanyeros dechidaron de selebrar la fyesta a mi lado. Mismo fraguaron una menora en madera, la dekoraron i toparon unas kuantas kandelas.
A la noche, pude asender la primera kandela i dishe una kurta orasyon ke aviya inventado por la okazyon. Se sirvyo chay i yo konti la lucha eroika de los Makabim para salvar a muestro puevlo. Kada ZEK (prezonero del Gulag) ke me eskuchava kon atensyon sentiya en su alma la importansya de este akontesimyento. A un momento, el zabit de guarda aparesyo, izo la yamada de todos los prezoneros prezentes ama no izo dingun komentaryo.
Kada noche, pude ansina asender una kandela de mas kon mi orasyon tan personala. Despues amatava las kandelas para guadrarlas para la noche de despues syendo ke no teniya otras. Gavriliuk, el sorvelyante ke se echava en frente de mi, mirava i mashkareava: «Lokura! Se pyensa en un kal! I si aviya fuego?»
La sejena noche de Hanuka, las otoridades konfiskaron mi materyal sözde ke la menora aviya sido fraguada kon madera arrovada al Estado. Ademas los otros prezoneros pretendiyan ke el peligro de fuego era enorme.
Yo insisti: solo kedavan dos diyas i yo aprometiya de «dar atras a la gloryozo madre Rusiya» este pedaso de madera ke amenasava de meterla en falita… El zabit de guardya se arrepenso, telefoneo a su kapo – en kurto metyo en aksyon toda la burokrasiya sovyetika – i resivyo la repuesta sigiente: «Un kampo no es un kal i dingun Zek es otorizado de orar aki!»
Indignado por la sekadura de esta repuesta, deklari una grev de la ambre. Lo ke yo no saviya, era ke una komisyon deviya vinir de Moskva para inspektar el kampo, lo ke puede ser da a entender deke me topi yamado, el ultimo diya de Hanuka, en el buro de Osin el Komandante.
Este Osin era un ombre énorme, aunflado, kon ojos chikitikos chikitikos pedridos en una masa de gudrura. Todo lo ke le interesava paresiya ser la komida ama tambyen los embrolyos i el poder. Le plaziya de ver sufrir los Zekes, ama no se olvidava ke estos eran la yave de su karrera.
Osin me miro de arriva a basho kon un ojo ke se keriya amavle para konvenserme de eskapar mi grev de la ambre, puede ser para no tener problemas kon sus kapos. Me aprometyo de tener dikat ke agora dinguno me impida de azer orasyon.
-Estonses, and’esta la belà? yo respondi. Dadme atras mi menora i deshadme asender las ultimas kandelas de la fyesta!
-Kualo es una menora?
-Mi kandelaryo
La belà era ke los dokumentos sovre este terrivle rovo de la proprietad puvlika ya aviyan sido firmados, i Osin no puediya pisharse delantre todo el Kampo. Myentres ke yo estava mirando a este arrevatador, asentado del otro lado de una elegante meza alustrada, me vino una idea divertyente : « Para mi, esta ultima noche de Hanuka es muy importante. Si yo puediya asender las kandelas aki mismo, agora mismo, dire mis orasyones i eskaparé mi grev de la ambre!»
Osin se penso un momento, i despues…la menora konfiskada aparesyo komo por azardo sovre la meza. Dyo el orden a Gavriliuk de traer una grande kandela.
«Tengo menester de ocho kandelas!» ,le dishe sin parpadear.( En vedra me kaliya mueve kon el shamash, ama yo en estos tyempos no saviya todos los detalyes). Gavriliuk tomo un kuchiyo i aprovo de kortar la kandela en ocho pedasos. Ama su kuchiyo no era muy bueno, entonses Osin salyo de su aldikera un kuchiyo magnifiko i pronto korto ocho pedasos de kandela.
Vate! disho a Gavriliuk. El puediya solo obedeser, ama me echo una mirada birrota.
Meti las kandelas, tomi mi chapeo de sovre el klavo para el palto, dando a entender a Osin ke: «Durante la orasyon, devesh de tener la kavesa kuvyerta, i al kavo, vash a dizir Amen!»
Ovedesyente, metyo su kasketa de zabit i se alevanto. Yo asendi las kandelas en resitando una orasyon ke yo mismo aviya kompozada en lashon: «Bendicho seas, Senyor muestro Dyo, por tenerme permetido de fyestar muestra liberasyon, la fyesta ande topamos las tradisyones de muestros padres. Bendicho seas, el Dyo ke me permite de asender estas kandelas. Puedas desharme asender estas kandelas de Hanuka en tu Sivdad Santa Yerushalayim, kon mi mujer Avital!»
Enkorajado i engleneado de ver un Osin en pye i empalado komo militar delantre de mis kandelikas, adjunti en lashon: «Venga el diya ande todos muestros enemigos – todos los ke kyeren muestra estruisyon – se tendran kon respekto delantre de mozotros , eskucharan muestras orasyones i respondaran Amen!»
Amen! respondyo Osin. Alivyanado, tomo un suluk, se asento, i kito su kasketa. Endjuntos durante muncho tyempo mirimos en kayadez las kandelas ke kemavan. Al kavo las puntas se derrityeron i la sera se espandyo kon alegriya sovre la meza alustrada. Osin se tomo komo si se espertava en supito i yamo Gavriliuk para ke enchuge.
Me abolti a la baraka en un estado de alegriya imposivle de deskrivir. Mis kompanyeros me sirvyeron chay i en djuntos fyestimos la kaji konversyon de Osin. En este momento, supe kon syerteza ke un diya seriya liberado!»
Ansina s’eskapa este artikolo de Sharanski, ke vos keriya meldar en onor de Hanuka. Ama komo me keda dainda tyempo, vos kyero avlar un poko mas sovre lo ke afito a Sharansky despues de esto.
Esto siguro, keridos oyentes, ke ya vos akodrash todos de la lucha de kadal diya ke fue para los djudyos en el mundo entero, yevados por siguro por su mujer Avital, en favor de la liberasyon de Sharansky. No se si esta lucha uvyera sido ganada sin la vinida de Gorbachev al poder en 1985, afillu si Eduard Kuznetsov, otro dissidente, ya fue liberado en 1979.
De todo modo, es un fakto ke Sharansky fue liberado el 11 de fevrero 1986, en un kambyo kontra espyones rusos en Amerika. No puedo rezistir a la gana de meldarvos un pedasiko de los rekodros de Sharansky sovre su liberasyon, rekodros travados del sityo internet Autour de la liberté, es una entrevista por David Horowitz para el Jerusalem Post. De muevo es Sharansky ke avla:
«Yo ya sentiya ke se pasava kualkyer koza desde dos mezes. Me aviyan dado a komer de otra manera… Agora me tomavan mis vyejas vestimyentas i me davan muevas vestimyentas, las primeras desde 9 anyos, ama demaziya grandes para mi kalup. Demandi una vita para mi shalvar ke estava kaendo. En vez de vita me dyeron un espango. Me yevaron al aeropuerto, despues ke luchi para tomar kon mi mi livro de teilim. Era un avyon énorme djusto para mi i kuatro ombres del KGB. No me disheron ande mos ivamos, ama ya veiya me estavamos bolando verso el oeste. Despues me disheron kon una boz impozante, ke en konformidad de la desizyon del Soviet Supremo, syendo mi komportamyento indigno de un sivdadino Sovyetiko, era privado de la nasyonalidad sovyetika i echado de la Unyon Sovyetika. I yo les kije azer una deklarasyon. Me respondyeron ke no teniyan menester de mi deklarasyon i ke ya abastava. Ama yo yene ize mi deklarasyon. Les dishe ke despues de 13 anyos yo era muy orozo ke mi demanda fue akseptada. Adjusti – era muy importante para mi de dizirlo – ke yo nunka fui un espyon ; ke yo luchava para el derecho de los djudyos sovyetikos i de otros puevlos de ser liberos. I ke esperava ke el diya venga ande toda la djente sea tan libera komo yo este diya. I meldi teilim.»
Kuando Sharansky atraversa en medyo del puente de Berlin la linea de frontera, aze un salto, i el espango de su shalvar se rompe. I Sharansky adjusta: «Kuando la djente me demanda: ke fue vuestro primer penseryo entrando al oeste? Respondo: « ke estava pedriendo mi shalvar.»
Esto dicho, kale saver ke pishin ayegado en Almanya, Sharansky toma un avyon para Israel, i aya ve a su mujer Avital ke no vido desde 12 anyos, i le dize solo, no se en ke lingua: «Sorry, I’m late (diskulpame, fui atadrado)». I despues, la primera koza ke aze es trokar de nombre : Anatoli se aze Natan. I komo Chtcharanski es muy yuch de pronunsyar para kyen no es Ukranyano, su alkunya la aze Sharansky. I unos kuantos anyos despues, empesa una karrera politika. En 1995, dunke mueve anyos despues de su aliya, funda el partido politiko yamado Israel Baaliya (Israel en la aliya), un partido de syonistos rusos instalados agora en Israel, i, en 1996, diez anyos despues su liberasyon, este partido gana syete deputados en la Knesset, i Sharansky, en mas de toparse deputado, entra en el governo de Binyamin Netanyau komo ministro (de la industriya i del comersyo). Lo va kedar tres anyos, asta 1999, ande troka de ministeryo i se topa ministro del interyor en el governo de Ehud Barak, ama en 2000 se va, syendo en dezakodro kon las negosyasyones de Ehud Barak kon los Palestinyanos, en lo ke Barak era pronto para achetar una kortadiura en dos de Yerushalayim, lo ke iva a la kontra de las ideas de Sharansky, ke son de guadrar Yerushalaim una i djudiya.
Ama despues, komo ya lo savesh, es Ariel Sharon ke sale primo ministro en 2001, i Sharansky se topa de muevo ministro en su governo, esta vez de morada i konstruksyon.
En 2003 entra kon su partido en el likud i se ve kargado de Yerushalaïm, el ke es, komo ya vos dishe, un partizan de guadrar la soveraniya del Estado de Israel sovre Yerushalayim entera, sin kortarla.
En 2005 se trava del governo para protestar kontra la ekspulsyon de los israelyanos de Gaza. Si teniya razon o no, yo en las meseles del hukumet no me karishtereo…
Desde el empesijo del anyo 2009, es agora prezidente internasyonal de la Adjensiya Djudiya.
Bive en Yerushalaîm kon Avital, i tyene dos ijas.
Parese ke esto todo mos alesho un poko de Hanuka, ama en vedra no tanto : es grasyas a djente komo Yehuda Makabi o Natan Sharansky , i tantos otros ke nunka acheraron de bashar la kavesa, ke el puevlo djudyo dainda esta bivo i fuerte. I esto es la lisyon de Hanuka.
Al djueves ke vyene, si kyere el Dyo!
Edmond Cohen
