eSefarad Noticias del Mundo Sefaradi
Keridos amigos,
Muestro amigo Edmond Cohen, mos desho esta semana pormodo ke tyene ke okuparse de sus enyetas, i se fue en viaje. Me desho la karga de avlar a su lugar.I para ayudarle aksepti. Komo se de natura pessimista no se si lo vo azer byen, ma de otra vanda si va aver mas de 5 personas ke me van a sintir avlar, ya va ser muncho, kontando ke tres de eyas ya estan aki delantre de mi kon Filippo in la kabina, alora no importa muncho i no va aver danyo
El program se puede sintir por Internet indo al sityo RADIO – la fréquence juive.
Saludos a todos!
Renaud Souhami
Fransia
Franz KAFKA
Esta emisión fue empesadada por el Professor Hayim Vidal Sephiha ke devemos rengrasyar para todo los esforsos grandes ke izo para mantener muestra lingua. Devo dizir tambyen ke fue grasyas a una de sus emisiónes de radyo, ke tuvi el mazal de sintir, ke me meti a bushkarlo i me anferri el ilo suyo ke me travo fina aki. Pensava a esta epoka ser uno de los ultimos a avlar muestra lengua, in kualo me yerrava, i me topi munchos amigos sefardis espartidos in el mundo.
Yo no se avokato. Avlar i aparejar eskritos no es tanto mi koza. Alora ke me perdonen si no konvyene.
El publiko de aki in esta sala de Radio J, es muy muy chiko.Son teknikos. No se fregan enteramente de lo ke vo dizir i ni lo entyenden. Sus lavoro es de respektar el orario de las emisiones. Povereto de mi: Nunka yo no pudi respektar un orario. Ni in la skola ni en otra parte. Fue grasyas a este defekto ke no me topi in prezion in Egito kon otros amigos.
Edmond me disho ke devo de aparejar 2459 byervos para estar in el tyempo ke me dyeron. A Dio Santo, komo vo azer?? I esto es asigun el ritmo suyo, para el, no para mi. Sera un milagro si lo puedo azer!
Mi madre kerida ke esta in el Gan Eden, diziya para las personas ke avlavan muncho: Avlistinas.
“Este es:” mi pitika, mi pishkadiko” i yo, me kedi kon este konsejo a mas sintir los otros avlar.
Una vez vidi i sinti un polítiko, ke ,sin dingun papel delantre de el, avlo durante 7 oras sin kedarse un segundo. In el publiko la gente de kanserya se dormían, i kuando se despertavan el avlador no se aviya kedado .Pudya azerlo 24 oras i mas in di una. No es mi kavzo.
Ayde, mos echaremos a la mar.
Oy vos vo avlar de un djidio konosido in el mundo entero: Franz KAFKA: Edmond ya mos avlo de el in su emisión: Los djidios de Praga del 7 Octobre 2013, ma kero ir un poko mas leshos.
Franz Kafka nasyo in una familla djudya in 1883
Era el bohor de kuatro kriaturas i bivió solo 41 anyos. Ma este breve pasaje in la tyerra abasto para ke deshe una ovra literaria ke marko el siglo 20 i por siguro kedara in todas las generensas futuras. Lo merese. Invento una manera mueva, su djornal es una eskriturya i ovra filosofika del mas alto nivel.
Kafka es konosido para sus kuentos visionarios i fantástikos ke dan a pensar. Sus personajes biven in un mundo sin kavesa ni kola i se syenten kulpables de lo ke son. Biven una vida de angusya in un mundo ke no entyenden, todos los esforsos ke azen ma no reushen.
Mabulana de djentes bushkaron de explikar la atmosfera ke sale de sus livros, sin poder darle un nombre. Asta ke se invento un byervo: KAFKAYEN o KAFKAESKO para lo ke no tyene lojika. Para deskrivir situasyones ke no se pueden entender, ande la razon no tyene mas nada ke aver.
Kafka diziya: Tengo menester de ser solo para eskrivir.
No solo komo un ermita o un mondje, ma komo un ombre muerto. Fue dispues de su muerte ke se izo sintir.
In sus ovras, el tyempo no tyene dinguna valor, los lugares halis no existen. No se puede dizir esto akontesyo a tala epoka o in tal lugar. Son de todos los tyempos i de todos los lugares. Es universal. Valen para todo el mundo. Las kozas arivan, se van, komo in un esfuenyo sin entendimyento. Komo si la djente son djugetes de una entita ke no se frega de lo ke akontese i kontra la kuala no se puede azer nada. Una ronda ke no eskapa. Un mundo sin lojika, inintelijible.
Un eskrivano aviya dicho: Una ovra es el espejo de una vida.
Es su alma i penseryos ke metyo in sus livros. Se kere meldarlo para entender lo ke dize i mas lo ke no dize.
A Praga
In el semeteryo djidio ZiZkov ande esta enterrado, tomo kon el sus secretos, sus angusyas.
Eskrivyendo a su enamorada Felice Bauer, le dize
“Ken se yo?, los unos dizen ke se un eskrivano alleman, i otros un escrivano djidio.”
Ma, el byervo Djidio no fue eskrito in sus livros. La idea, esta aya todo el tyempo, de manera permanente komo lo diziya su amigo: Max Brod .
Le aviya demando de kemar sus livros dispues de su muerte. Ma no lo kijo azer. Salvo los eskritos kontra la vulontad de Kafka.
Salvo del fuego ovras konosidas oy in el mundo entero: El prosesso, el Castillo, la Metamorphosis, su djornal, sus letras, i munchos mas .
Antes de su muerte, no fue kuaje editado.
Praga su sivdad, era una sivdad ke no amava. No viyajo muncho. Es in eya ke topo estos esfuenyos terribles i estas ideas ekstraordinaryas
Komo pudiya saver lo ke iva akonteser in esta sivdad anyos dispues? Sivdad ande no kedo oy mas de 4000 djidios.
Praga. Es Una sivdad kurioza, ande se avlava munchas lenguas.
Los proves avlavan el tcheque.
Los aristokrates avlavan franses, la minoridad alemana avlava alleman. I los djidios sus munchas lenguas.
Praga no es nombrada ni una vez in sus eskritos, ma es de eya ke avla. Es su golor ke sale de sus livros, komo la sudor amarga sale de un ombre.
Praga sin Kafka no existe. Fue el ke le trusho una glorya universala.
Un museo, su kaffe, su kaza rekordan su memorya, les traye turistos ke vyenen ver el lugar ande Kafka bivyo.
Solo in 2003, fue fraguada una statua a su honor.
Ez una statua de bronze muy partikolara, ande Kafka esta asentado ensima del garon de un gigante ke no tyene ni kavesa ni manos.
Metyeron la estatua entre el viejo ghetto djidio de Josefov i la sivdad kristyana.
Su nombre Franz es un homenage ke su padre kijo azer a François-Josef ke permetyo a los djidios de tener sivdadinad in 1848.
Ma Franz Kafka kedo a la frontyera entre dos kulturas, sin kayer in la una o la otra. Se le kedo los espantos, las terrores, i el dolor de la alma.
Assimilarse komo lo keriya su padre?, trokar de nombre?, azerse kristyano? komo las munchas familias djudias ke esperavan trokar de mazal?.
Sus personajes bushkaron de trokar. I nunka reusheron.
Yama su personage principal kon una sola lettra: K.
El nombre entero no esta eskrito.
-Ken sos?
-So la lettra K. Un empesijo de nombre para este pedaso de ombre ke no tyene todos los derechos de un ombre. Komo es ke un pedaso de ombre se puede azerse entender i sintir? Komo tener derechos?.Ser rekonosido?
Ni los servisios al paes ke puede azer, ni la konfiensa in la djustisya, ni el kazamyento mixto, o los sakrifisyos van a permeter a estos personajes de ser akseptados in la sosiedad ande keren bivir. I la muerte ya esta eskrita para eyos. In una de sus novelas kon titolo: “La Ansia del padre de famiya”
una persona media humana, medio objeto ke se yama Odradek no puede kaminar sin una moleta – este baston ke le tyene lugar de pyerna.
Esta koza, metad de ombre, a ken se demanda ande bives? Komo azes? Aresponde. No tengo kaza .No se intero. No tengo domisilyo. No se dingunos.
Esta koza bive i da angusyas a su padre, ke no save komo ayudarlo in la vida.
Kualo azer de el??? Se eskapa el livro in demandandose es ke Odradek es mortal?. Esta demanda es un shamar a el egotizmo, a l’inhumanidad.
O otra storya de un puevlo sin tyerra, Ke si no tyene memorya, se va assimilar i dispareser.
Bialik i otros eskrivanos ya lo aviyan pensado.
Ma ke posibilidad keda? Kualo puede azer uno pedrido in medyo de ajenos? Alora ulvidar ken uno es? ulvidar de ande vyene? Azerse komo eyos? Trokarse?. O luchar kontra la metamorfosis? ma es ke va servir? Es ke lo va salvar? Mos amostra ke no.
El djudezmo de sus parientes no le konvyenen.
Su padre kere azer parte de la buena sosyedad, de la klasa alta. Kere asimilarse.
Kafka el, no save ande se topa, no kere kedar entre dos siyas. Kere topar su lugar, ser el, no el pareser de los otros.
Todos sus eskritos avlan de esta erensya, de esta lucha.
I un dia akontesyo un evenimyento ke le troko la vida.
Enkontro in 1911, unos saltimbankos aktores djidios de un teatro Yiddish.
Esto es de ande vengo, se disho. No de lo ke bushka mi padre, komo lo dize in la Lettra al padre.
Topa in la kultura tradisyonala i el hassidismo, rayises fuertes. Se aserka de las tradisyones i rituales ke su padre avya rechezado.
Diskuvrir su origin, affirmarse komo djidio va ser la kaleja ke diskoje.
Un kamino a la roves de lo ke aviya echo su famyia.
Tyene alora 28 anyos. “Dize: “Me yamo Amshel, komo el papu de mi madre, un ombre piadozo i savyo”.
A ken? dize esto? En primero a el mizmo.
Dispues a los djidios verguensozos de lo ke son. Maymonas arastadas a ken ajenos ambezan komo baylar. Djugetes. Pedridos asta olvidar ken son.
De este dia, este mansevo pensador de un mundo sin Dio, se mete in kamino.
El anyo 1917, topa razones de esperar in un futuro idealistiko kon la Deklarasyon de Balfour. Lettra ke salyo el 2 Novembre de este mizmo anyo, ke apromete a ayudar a estableser in Palestina un lugar para el puevlo djidio.
Pishin, Kafka se aze sionisto.
Va estudyar el hebreo, no de el para el , ma kon profesores. Va meldar la torah in los Seferimes, los kommentaryos de Rashi. In una de sus letras a una de sus ermanas ke disparesyeron in la shoa. Tyene entuzyasmo:
“Dize: “ Ya es koza grande de tomar su famya ensima de su spalda, ma ke tantos ombres se unen para trayer las suyas, fina la Palestina, no es menos un milagro ke el de la mar Rosha.
———————————————————–
Ke diferensya kon un otro grande escrivano de la mizma epoka: Stefan Szweig.
Para el kual, los djidios pudiyan bivir sin tyerra , kon la sangre djudya, el espirito djidio i la fe!
Kon la sangre aviya eskrito.
Ma puedeser ke troko de idea kuando dechizo kon su kompaniya de matarse un dia del invyerno de 1942.
———————————————————–
Franz Kafka keriya bivir. Ma la tuberculosis no le desho tyempo de akompanyar sus amigos asta la tyerra prometida.
Sus ultimos momentos los paso kon Dora Dyaman ke no plaziya a su padre ,una poloneza serka de las tradisyones de su shtetl kon la kuala topo el amor, ayudo i la paz del espirito.
Va dizir antes de morir el 3 Junyo 1924 in el sanatorium de Kierling al lado de Vienna i sonyando in pies: “No tuvi tyempo, komo los siyonistas, de anferar el taleth ke se estava bolando delantre de mi fina la tyerra santa.
Su kuerpo fue interrado in la tomba de famiya in el Bet hahayim djidio.
Uno de sus eskritos: “La puerta de la ley” konta la storya de un ombre ke vyene de un kazal leshano i arriva in la sivdad. Demanda al zabit el derecho de pasar por la puerta ke va a la kaleja de la ley. El guarda le dize ke no es posivle a este momento i no lo desha entrar. El kazalino bushka alora de merkarlo. Ma la guardya le responde ke mizmo si lo desha entrar, se va topar delantre otros guardyas mas potentes ke lo van a kastigar, i tendra belas mas grandes.
In verdad el kazalino, no se asperava a tantas difikoltades, para una demanda naturala i simple.
Se asento delantre de la puerta asperando ke le den el derecho de pasar.
Al punto de morir, veye el zabit aserrando la puerta. Le grita su demanda: Komo se aze ke no me desharon pasar i ke dingunos vino a esta puerta?.
-Es ke esta puerta- le respondio el guardian- fue fraguada SOLO PARA TI”.
Para Kafka tambyen, la puerta se aserro. Sus myedos, sus duvdos, los sentimyentos de kulpabilidad, las espanturas (los espantos) no le permetyeron a ke aga su destino, a ke se aga konoser in su vida.
Komo un visionario, Kafka entendio las difikoltades ke su puevlo tuvo i iva tener in el futuro.
Es ke se muryo in paz? El biografo Ernst Pawel dize, ke se aboresiya.Lo ke era no le plaziya:
No por ke era djidio, ma por no ser lo abastante.
In la pared in frente de su tomba, yay una plaka a la memorya de Max Brod, ke fue interrado in Israel.
Franz Kafka le aviya demandado antes de morir de kemar todos sus eskritos. Ma no lo izo. Los guadro.
In 1939, Max Brod se fuyo de Praga i de los nazis, tomando kon el una chanta presioza. Los manuscritos ke konteniyan kayeron in las manos de la assistente de Max Brod, i dispues de aver sido guadrados 40 anyos, se topan agora in la biblioteca nasyonala de Israel dispues de un processo ke turo 4 anyos i se eskapo in 2012.
Aki se eskapa la storya de Franz Kafka.
Agora aspero ke Edmond abolte presto.
Grasyas a los oyentes.
Renaud Souhami
