Muestra Lingua: EL VINO I LOS DJUDYOS por Edmond Cohen

EL VINO I LOS DJUDYOS

Saludos a todos los oyentes de la emisyon Muestra lingua, la emisyon en djudeo-espanyol fundada por el profesor Haïm-Vidal Sephiha i prezentada agora por vuestro servidor Edmond Cohen, kon Philippe en la kabina.

Por empesar vos akodro ke los atelyes de konversasyon de la asosyasyon Vidas Largas empesaran el djueves 4 de novyembre, de las dos a las kuatro i medya-sinko, en el Centre Communautaire, 119 rue Lafayette, Paris (10°) métro Gare du Nord o Poisssonnière.

 La semana pasada yene me tomaron kuatro minutos, ama komo lo presentiya aviya preparado de avlar mas kurto, i ansina pude eskapar mi emisyon sovre un pan inesperado en el tyempo ke teniya. Ama yene tengo gana de adjuntar dos kozikas ke me vinyeron a la idea despues de la emisyon de la semana pasada : 

La primera koza, es ke el kastigo del primer ani de pedrer de si mismo a los dukados i djoyas le vino de su manko de  konfyansa no solo en el Santo Yitbareh, ama tambyen en en basar vadam ke le dyo el pan. Si aviya achetado kon konfiansa lo ke el rey le aviya dado, uvyera guadrado dukados i djoyas. Ama el, ke no metiya su konfiansa en el Santo Yitbareh, no la metyo tampoko en el basar vadam. 

La sigunda koza, es ke el rey ke penso ke basar vadam no es nada, se yerro de muevo: nunka disho el sigundo ani ke es nada basar vadam. Un basar vadam puede azer muncho bueno , pensaremos a estos djustos ke mos salvaron la vida durante la gerra. La sola koza ke disho el sigundo ani, es ke el Santo Yitbareh es arriva del basar vadam, kual ke sea su zahut. 

Esto dicho por lo ke es de la semana pasada, de kualo avlarvos oy ? Yene es mi amigo Jose Molho, ke no me manke, ke me topo una idea ke me kuadro : avlarvos del vino ande los djudyos. Por dizirvos la vedra, en primero me kuadro, ama despues kuando empesi de estudyar i de bushkar, me apersivi ke me enkashi en una koza muy komplikada, porke el vino aze parte de muestra relijyon i ke los hahamim se apesgaron muncho sovre lo ke se puede azer i no azer kon el vino. 

Al kontraryo de los muzulmanos, i mismo si lo beven en jeneral muncho menos ke los kristyanos, los djudyos beven vino, no es solo un derecho, en varyas okasyones relijyozas es kaji una ovligasyon (digo kaji porke si no se kyere bever vino ya se puede bever sumo de uva en vez de vino).

 Empesaremos por el empesijo, kijo dizir el tanah. Asigun syertos hahamim, no todos, mismo si no esta eskrito, el fruto defendido, el fruto del arvole de la konosensya del byen i del mal,  no era otro ke la uva. 

En todo kavzo, lo ke es siguro, es ke en Bereshit meldamos, kapitulo 9, pasuk 20, ke, salyendo Noah de la arka, la primera koza ke izo fue :  « y començo Noah, varon de la tierra, y planto vinya ». 

La uva esta yamada 19 vezes en el tanah, i el vino 141 vezes. 

Entre estas 141 vezes, vos dare solo kuatro pesukim bastante konosidos : 

Bereshit, 49, pasuk 11 (Yaakov bendizyendo a su ijo Yehuda) : Atan a la vid (la vinya) su burrico, y al sarmiento ijo de su asna ; lavo en el vino sus vestidos, i en sangre de uvas su cobertura. (Asigun Rashi, esto kyere dizir ke una vinya abastese para kargar a un asno, i la uva de un sarmyento a kargar un asniko) 

Kantar de los kantares , pasuk 2 : Besasseme de besos de su boca, porque mejores sus querencias mas que vino 

Tehilim, 104,pasuk 15 : Y vino alegra corason de varon… 

Koheleth 10, pasuk 19 : Vino alegra a los bivos… 

En kuanto al Talmud, meldamos en Eruvin : Tanto ke el vino no korrera en tu kaza komo agua, no verras bendisyones! 

Por esto no kale enkantarse si a kada fyesta djudiya, alegre o mismo grave komo Rosh Hashana, semos ovligados de bever a lo manko una kopa de vino, la del kidush, ande el djudyo bendize al Senyor del mundo, kreador de la fruta de la vinya. Ay tambyen fyestas komo Pesah ande tenemos de bever kuatro kopas de vino. I en Purim es din de emborracharse un poko, asta no saver kyen es el bueno de Aman o de Mordehaï.

El vino es tambyen de bever a un kazamyento, antes ke el hatan rompa la kopa.

Esto todo mos amostra ke, leshos de ser proibido, el vino es una ovligasyon para los djudyos. 

Esto dicho, pishin kale adjustar ke, si es bueno de bever vino, es muy negro, salvo en Purim, de emborracharse, komo izo Noah ke despues de plantar vinya se emborracho i   se deskuvriyo, komo esta kontado en el tanah. I el mismo Talmud ke dize tanto bueno del vino dize tambyen kozas komo El vino es kauza de lamentasyones en el mundo (Yoma 76) o El vino yeva el ombre a los pekados, a las grandes desgrasyas i a la aniyut (provedad) (Midrash Tanhuma, Parasha shemini). 

Komo se dize agora en las reklamas para vino,  kale beverlo kon moderasyon… i malorozamente ay unos ke no saven azerlo! 

Esto dicho, es un fakto ke los djudyos, en jeneral, no beven muncho vino, a lo manko los ke yo konosko, ama no solo los ke yo konosko, meldi eskritos syentifikos muy seryozos, analizando statistikas, i konstatando de manera jeneral lo ke yo vide al deredor de mi. Deke los djudyos no beven muncho ? Esto no se save muy byen. Ansina es. 

De lo ke de una parte el vino esta uzado por los djudyos para azer bendisyones, de lo ke de otra parte el vino era uzado tambyen por los paganos por lo ke yamamos avoda zara, kozas de paganismo, los hahamim se amostran muy duros a propozito de la kasherut del vino. 

Por siguro, vos puedesh demandar deke el vino, ke es una bevyenda de uva, kijo dizir de una planta, tyene de ser kasher. A esto ay munchas razones : 

En primero, naturalmente, kale ke todo lo ke ay en el vino sea kasher, ke no ayga, por enshemplo, kazein o jelatin, ke son de orijen animal i por esto azen ke el vino no es mas una bevyenda de planta. 

Ama esto no abasta. Todo vino ke no fue echo, del empesijo astal kavo, por un djudyo, i no kualkyer djudyo, kale ke sea un djudyo sufu, shomer shabath, este vino echo por otro ke un djudyo sufu puede ser lo ke se yama yayin neseh. Yayin es vino en lashon. Por lo ke es de neseh, me va tomar un poko mas tyempo para eksplikarvos. 

En Devarim, el kapitulo 32 es la profesiya de Moshe Rabenu sovre Israel, i en el pasuk 38, avlando de los paganos, esta eskrito : ishtu yayin nesiham, ke el ladino traslada ansina : beven el vino de su templacion. Ama kualo es la templasyon ? Puedesh bushkar en kualkyer diksyonaryo, no toparash. La repuesta se topa en la tesis del Profesor Sephiha sovre el Ladino, ande ay un diksyonaryo de todos los byervos en ladino ke se topan en las traduksyones de Devarim por las Biblias de Konstantinopla i de Ferrara. I aya se dize ke el byervo templacion, o el byervo temperacion, ke trasladan el byervo ebreo neseh, kyeren dizir libasyon, aksyon de verter vino, sea para beverlo, sea sin beverlo ; ama kale entender no kualkyer libasyon, solo libasyon de paganos delantre idolos. Dunke yayin neseh es vino de libasyon de paganos delantre idolo. 

De espanto ke un vino ke no fue echo por djudyo sea echo por pagano kon idea de libasyon, el vino deve de ser echo por djudyo sufu para ser kasher. I kuando digo echo,  si uno ke no es djudyo sufu solo toka al vino kasher, ya no es mas kasher.

Dunke para ser kasher, kale ke sea un djudyo ke korta i toma la uva kon la mano. Despues kada tyempo, kada aksyon de vinifikasyon deve ser echo por djudyo i kontrolado por un shomer. 

Algunos aki se akodran puede ser de lo ke vos konti en avril del anyo pasado sovre este katoliko de Chablis ke fraguo un kal i un esprimedor de uva al lado, i ke esta azyendo vino kasher sin nunka tokarlo, i kon syempre el kontrolo de shomerim venidos de Paris espesyalmente a kada vez ke es menester de tokar al vino. Una istorya muy kuryoza… 

Kuando los djudyos tornaron a Erets en el siglo 19, aviya muy pokos djudyos ke konosiyan komo lo konosiya Rashi el lavoro de la uva, i los primeros vinos ke izyeron no eran muy famozos. Serviyan komo vinos de kidush, ama no komo vino de konosedores. Ama a poko a poko se ambezaron, tambyen tomaron el Golan, i agora el vino kasher ke vyene de Israel, sovre todo el ke vyene del Golan, es de mijor en mijor, asigun lo rekonosyo el mismo este ombre de Chablis ke vos dishe. 

Puede ser vos pensah ke agora si un katoliko aze su vino, no es para azer libasyon delantre de un idolo, i ke dunke, en estas kondisyones, su vino no es yayin neseh. A esto los hahamim, no todos, ama los mas duros,  vos van a responder ke el vino keda sino yayin neseh, yene stam yeinam. Ke es stam yeinam ? Yeinam en lashon kyere dizir el vino de los otros. Stam es en jeneral. El vino de los otros, se puede azer komersyo kon el, merkar i vender, ama bever no. 

No me vo mas apesgar sovre la kasherut del vino, keridos oyentes, porke afillu mis esfuersos, es una koza ke no konosko ni entyendo byen. 

Ama antes de eskapar mi emisyon me parese nesesaryo de avlar del vino ande los kristyanos, porke tyene un sentido relijyozo muy espesyal ke vyene de lo ke disho Jesus en su ultimo Seder de Pesah, ande amostrando la kupa del kidush ansi ke la massa en su mano, disho a sus dodje disipulos: tomad i komed, esto es mi puerpo, i por el vino disho, beved todos, esto es mi sangre, el de la aliansa, vertido para munchos en remisyon de las kulpas. 

Komo ya lo savesh, esto es la orijen de la misa, ande el papas beve el vino de misa i da a kada uno la masa de la komunyon, dizyendo ke esto es el puerpo del kristo. I para los katolikos i asigun la teoriya de la transsubstansyasyon, lo ke se beve en la misa es haliz sangre del Kristo. 

Todos los kristyanos no son enteramente dakodro kon este dogmo asigun el kual detras de la aparensya de vino, la haliz natura del vino se troka en sangre del kristo, ama no vo entrar en los puntos de alguja ke los separan, keriya solo amostrarvos ke el vino , ande estos djudyos ke se kreeron en Jesus komo mashiah, untado, kristo, pudo trokarse en la bevyenda la mas aborresida por los djudyos, kyero dizir la sangre. Vos akodro ke  Vayikra 17, pasuk 14, mos dize : «  Que alma de toda carne, su sangre en su alma el, y dixe a hijos de Ysrael: sangre de toda carne no comades, que alma de toda carne su sangre ella…» No tengo menester de ambezarvos todo lo ke kale azer para kitar la sangre de la karne antes ke se pueda komer. Por esto me vyene muy kuryozo ke un djudyo komo Jesus tuvyera la idea de ordenar de bever su sangre, mismo si es kon aparensya de vino. 

En todo kavzo, me parese ke el vino marka agora una frontera muy profunda entra las relijyones djudiya i katolika, por las razones ke vos dishe. 

 Agora me keda la gana, en el poko tyempo ke tengo, de trokar de lakirdi i kontarvos una shaka travada del livro de Matilda Koen-Sarrano, ke bive en Yerushalaïm, intitulado: Kuentos del folklor de la famiya djudeo-espanyola: 

And’avia de ser de un riko, ke teniya el uzo de bever muncho vino, ma sikomo empeso a no sintirse bien, tuvo de adresarse a un doktor. El doktor lo vijito i le disho: kale ke te arremires en el komer i en el bever. Ma sovre todo kale ke no bevas mas vino! El ombre, ke estava ambezado a bever una buena kantidad de vino al dia, le demando muy desplaziente: I kualo ke ago la noche de Shabat ? No va poder gustar de kidush? 

Si, le disho el doktor. Ma solo un kidush ke sea! 

Pasaron semanas, i una noche de shabat, en lo ke el riko estava aziendo el kidush, entro el doktor, ke saliendo del kal kijo pasar por su kaza a saludarlo i a demandarle komo estava. 

Entro i no entro, i vido enriva de la meza un vazo de kidush de plata lavrada, muy ermozo, ma…este boy!…ke pudia kontener un bokal entero de vino.

Kualo es esto? se maraviyo el doktor.

I el riko le respondyo : Tu me dishites ke noche de shabat ya puedo bever el karar de un kidush, i esto es lo ke esto aziendo! 

Kon esta shakaika s’eskapa mi emisyon, i me keda de desharvos dizyendovos al djueves ke vyene, si kyere el Dyo!