Muestra Lingua: EL KAZAMENTERO

 
 
Keridos amigos, vos do el teksto de la proksima emisyon del programa.
  
El program se puede sintir por Internet kada djueves, indo al sityo RADIO – la fréquence juive . Kale tener pasensya i asperar un poko, no se oye pishin.
     

Saludos a todos
Edmond Cohen – Paris, Fransya    

EL KAZAMENTERO

Saludos a todos los oyentes de la emisyon Muestra lingua, la emisyon en djudeo-espanyol fundada por el profesor Haïm-Vidal Sephiha i prezentada agora por vuestro servidor Edmond Cohen, kon Philippe en la kabina.

Komo a kada vez, vos akodro ke el proksimo atelye de konversasyon de la asosyasyon Vidas Largas se tendra el djueves 2 de desyembre, (primer diya de Hanuka) de las dos a las kuatro i medya-sinko, en el Centre Communautaire, 119 rue Lafayette Paris (10°) métro Gare du Nord o Poissonnière.

Aze mas de dos anyos de esto, el 14 de fevrero 2008, vos avli del kazamyento djudyo, i al empesijo de mi emisyon, vos aviya dicho lo ke sige :

La primera koza, la mas yuch, para kazarse, es de topar a la persona kon kyen kazarse. Esto puede tomar anyos, i en vezes nunka se topa. Siguro ke ne es koza kolay de topar kon kyen kazarse, syendo ke no solo kale ke el otro tenga todas las grasyas i kualidades para azer su vida entera kon el, ama ensima kale ke el otro vos tope las mismas grasyas i kualidades. Lo mas kuryozo, es ke la mayoriya de la djente ya reushe a topar kon kyen kazarse, i ke munchas vezes el kazamyento ya tura vida entera. Esto me parese ser uno de los mas grandes misteryos de la vida…

Al tyempo no era ansina. El kazamentero veniya a ver el padre de la mansevika, i le diziya ke el padre de fulano pensava ke seriya byen si su ijo kazava a su ija. El padre de la ija, despues de tratar i baratar un poko, diziya si, i ya s’eskapava la koza antes ke los mansevos ni sepan lo ke se dechido detras de eyos. Se lo ambezavan despues. Kale dizir ke no eran ovligados de achetar la koza dechidada por los paryentes. Ni el ombre, ni la mujer. Se konta en Bereshith, kapitulo 24, pesukim 57 i 58, ke kuando vino Eliezer, el servidor de Avraham, para tomar a Rivka por Izak, disheron su ermano i su madre : « Yamaremos a la manseva i le demandaremos ». Yamaron a Rivka i le disheron : « te kyeres ir kon este ombre ? » i Rivka respondyo : « Me iré. » Esto amostra ke syempre se kijo el akodro de los dos. Agora en vez de kazamentero ay internet, son los mansevos eyos mismos ke se topan, ke se kyeren, ama kon esto no es mas kolay de topar. Al kontraryo, es muncho mas yuch, i la djente se kaza mas i mas tadre…

Oy me vino la idea  de apezgarme un poko mas de lo ke vos dishe en 2008 sovre el kazamentero, syendo ke meldi varyos artikolos en internet, akodrandomos de lo ke fue su rolo antes ke, komo lo eskrivyo Luc Ferry en su livro La révolution de l’amour, ke salyo ay djusto unos kuantos diyas, el kazamyento de amor e tomado el lugar del kazamyento organizado por los paryentes.

Ama si la djente se konose agora grasyas a internet, kale akodrarse ke internet egziste desde unos diez o kinze anyos, kuando el kazamentero, el, egziste desde kaji el empesijo de la sosyedad umana, en todo kavzo de la sosyedad djudiya.

Los artikolos ke meldi son un artikolo sovre el sityo Lamed.fr del haham Maurice Laam, intitulado Marieur, marieuse, mariez-moi ! (kazamentero, kazamentera, kazadme !), un artikolo de Moshe Shaul en el sityo ladiokomunita.tripod.com intitulado El kazamentero, una konseja de Albert Kontente intitulada Kazamentero de Izmir, kontada por Rosina Karako Smeraldi en su mesaj n° 20077 del 23 de djunyo 2007 en Ladinokomunita, i tambyen un artikolo de Laurence Abensur-Hazan en el sityo Sefaradinfo, intitulado Le mariage chez les juifs de Turquie, (el kazamyento ande los djudyos de Turkiya) i travado de un dokumento  eskrito por un V. Gerson en 1896 i ke topo en los arshivos de la Alliance Israélite Universelle en Paris.

Empesaremos por el empesijo : el primer de todos los kazamenteros, dizen los savyos del Talmud, es el Dyo. El es ke empeso por kazar Adam kon su mujer. Solo el Dyo es kapache de azer ke ombre i mujer agan una mizma karne . Los kazamyentos se azen en los syelos, dizen los hahamim. 40 diyas antes ke naska una kriatura, ay una boz del syelo ke dize : la ija de Fulano se kazara kon el ijo de Mengano.

El Talmud mos konta ke asigun Rabi Yosi, el Dyo pasa su tyempo en enderechar kazamyentos . Oyendo esto, una pagana romana le disho ke eya tambyen puede azer esto ; ke kual ke sea la kuantidad de sus mosos i mosas, eya los puede kazar. Puede ser ke tu lo topas kolay, le respondyo Rabi Yossi, ama para el Dyo, es tan yuch komo de kortar la mar en dos.

La pagana mete mil de sus mosos en frente de mil de sus mosas i dize: este kon esta, este kon esta, ets, asta azer mil pares.

A la demanyana del diya de despues, los dos mil mosos i mosas vinyeron chaptear a su puerta, dizyendo : no kyero mas de este, no kyero mas de esta.

La pagana entendyo la lisyon, ke no es tan kolay de azer kazamyento.

La razon es ke si el Dyo save todo, yene el ombre tyene su libertad…i se puede, el, yerrar ! Le toma muncho tyempo para bushkar la ke le konvyene, i munchas vezes se yerra…

De aya vyene ke tyene menester de un kazamentero, shadhan en lashon, shadhen en yidisch.

El primer schadhan de la istorya djudiya fue Eliezer, el servidor de Avram avinu, del kual ya vos avli al empesijo de esta emisyon. El Tanah, en Bereshit, kapitulo 24, mos konta komo Avraham, kuando se izo viejo, no keryendo ke su ijo Itshak tome mujer kenaaniya, demando a su siervo, viejo de su kaza, « el podestan en todo lo que a el »,en lashon amoshel behol asher lo, de andar a su tyerra i a su nasimyento, kijo dizir en Mesopotamia, i aya en su famiya de topar mujer para su ijo.

Aki tengo de avrir una paranteza ke no tyene nada de ver kon los kazamenteros, ama ke me parese interesante por lo ke es de la lingua : En vedra nunka el Tanah mos dize el nombre de este syervo ; son solo los hahamim ke mos dizen ke se yama Eliezer, travandolo del kapitulo 15, pasuk 2, ande Avram dize al Dyo (en lashon) ben meshek beti u Damesek Eliezer. Ben es ijo, beti es mi kaza, Damesek es la sivdad de Damas. I kualo es meshek ? La Biblia katolika franseza, dicha de Yerushalaïm, mos dize ke este byervo meshek no se save lo ke kyere dizir, i dunke no lo traslada. La Biblia de Ferrara, ke dize trasladar palavra por palavra, por una vez toma libertades kon el teksto, i traslada ijo despensero de mi kaza, el Damasceno Eliezer. Ama Damesek es Damas, no es Damasceno. Damasceno seriya ben Damesek, ijo de Damas. Por esto Chouraqui traslada : la administrasyon de mi kaza es a un ijo de Damesek : Eliezer. Es muy byen, salvo ke ben, ijo, se topa apegado kon meshek, si kyere dizir administrasyon, i no kon Damesek…Palavra por palavra, si meshek kyere dizir administrasyon, lo ke los katolikos dizen no saver, kale meldar ben-meshek beti u Damesek Eliezer : el ijo de administrasyon de mi kaza es Damas Eliezer, lo ke no kyere dizir nada…

Syerro la paranteza ke avri solo para amostrarvos kuanto es yuch de trasladar, porke antes de trasladar kale entender, i la vedra es ke aki el teksto no se entyende.

Esto dicho, este vyejo syervo ke el Tanah no yama ama ke mozotros yamamos Eliezer, se fue kon diez gameyos en la sivdad de Haran, ande biviya Nahor, ermano de Avraham.  I aya, delantre del pozo a la salida de la sivdad, a la ora ande las mujeres salen para travar agua del pozo, se disho ke la mujer ke le dariya agua de bever para el i para sus diez gameyos, esta seriya bien para kazar kon Itshak. I fue  Rivka, inyeta de Nahor, ke djustamente le ofresyo de bever i travo agua par dar tambyen de bever a sus diez gameyos. Kurta la vamos azer, Eliezer se fue a la kaza de Rivka para demandarla a su famiya por kazar al ijo de su amo, i komo vos dishe, su famiya acheto, ama despues de tener demandado su konsentimyento a Rivka. Para dizirvos la vedra, no es ansina : en vedra la famiya acheto sin demandar nada a Rivka, ama kijo guadrarla un anyo mas en kaza. Eliezer demando de tomarla pishin kon eya, i es por esto i no por el kazamyento ke se fueron a demandar a Rivka si keriya. Es vedra tambyen ke si Rivka no keriya kazarse, uvyera respondido no, i ke respondyo si. I ansina es ke Itshak se kazo kon Rivka, la amo, i ansina se konsolo de la muerte de su madre.

Eliezer, si el es, fue dunke el primer kazamentero ande los djudyos. Kazamentero en lashon se dize shadhan, ke vyene del byervo shiduh, ke kyere dizir arreglamyento.

Del tyempo del Talmud i durante toda la Edad Medya, el shadhan era una persona muy onoravle, munchas vezes un haham, i lo ke bushkava no era solo la ermozura, afillu si no es koza sin valor – el Tanah toma el tyempo de dizirmos ke Rivka era ermoza, i Eliezer lo toma por siguro en kuenta. Ama la ermozura no es todo, i el kazamentero bushkava tambyen, i mismo sovre todo, las kualidades moralas.

Por esto kale bushkar en vezes leshos. El Dyo, mos dize el Talmud, el Dyo, ke, komo ya lo dishimos, es el primero de los kazamenteros, aune a dos personas, mismo si las deve traer de las kuatro direksyones del universo.

I de fakto, el kazamentero se iva de sivdad en sivdad para bushkar la ke konveniya a tal i tal. Al empesijo los kazamenteros lavoravan de baldes, topando ke este lavoro de kazar a la djente era una mitsva. Ama komo tomava muncho tyempo i munchos gastes, el kazamentero se izo pagar, por enshemplo un syerto por syen de la dota (3%, 2 pagados por el novyo, uno por el padre de la novya).
 
Vos kombido de meldar los rekodros sovre los kazamenteros de Turkiya en los artikolos ke vos dishe al empesijo de mi emisyon.
 
Albert Kontente mos deskrive Baruh, el kazamentero de Izmir, de todos konosidos i respektado, indose en kada famiya para tomar informasyones ke eskriviya kon muncho dikat sovre su tefter. Kuando pensava tener topado la mansevika ke konveniya para tal mansevo, se iva a ver  en kaza al padre i la madre de la mansevika, i les diziya : Azeme un kave ke tengo buenas notisyas (yo uvyera dicho haberes). Komo ya lo entenditesh, la mansevika oia todo detras de la puerta.

I se organizava la famoza entrevista, ke syempre se aziya en un kafe o una patiseriya. Si los mansevos se plaziyan, empesava entre los paryentes el pazarlik sovre la dota, o si no se puediya pagar dota, la meza franka, ke komo ya lo dishe en otras emisyones konsistiya de la parte del padre de la novya en arresivir en su kaza a su yerno kon su mujer durante un anyo (komer i durmir). Esto fue lo ke se izo kon mi papu, ke bivyo kon su mujer el primer anyo del kazamyento ande su suegro.

El ofisyo de kazamentero era yuch kuando la persona de kazar era prove, o fea, o los dos. Kaliya prezentarla komo buen partido afillu todo lo negro. I ay munchas shakas sovre lo ke estos poveretos de kazamenteros eran ovligados de topar de dizir para prezentar las kozas. Vos kyero kontar unas de estas shakas.

Munchas shakas, no se deke, sovre las koshas. Kualo dizir?

Kosha? Solo kuando kamina…

O: un poko koshika es, ama kuando la tyenes engajé ( byervo franses para dizir al braso) no se ve.

O (esto lo topi en el artikolo de Moshe Shaul) el kazamentero demanda al ombre, despues de la entrevista : komo la topates ?

– No entyendo : dishites ke es mujer kumplida ma veo ke es tartamuda!

– Ah…esto no es nada…Esto es mismo un avantaje. Ansina avlara manko i no te atagantara kon sus avlastinas.

– Eya es tambyen medya sodra.

-Ainda mijor! Ansina no piedrera oras enteras avlando kon las vizinas.

– Ma, eya es tambyen kosha!

–  I kualo kyeres? Entre tantas kualidades ya puede tener i un chiko defekto komo a este…

Otra shaka : el ombre dize al kazamentero, a  boz basha porke la mujer esta al lado : es vieja, fea i shashuta.  – Ya puedes avlar kon boz alta, le responde el kazamentero, es tambyen sodra.

O el padre del novyo dize al kazamentero : te burlates de mi ; me enganyates ; la manseva chanakaleliya ke me propozates, me ambezi ke tyene muy negra reputasyon, i ke tuvo relasyones kon todos los mansevos de Chanakale.

-Bueno…Chanakale no es una tan grande sivdad…

O un kazamentero se va, akompanyado de su ayudante, ande una famiya ke tyene uno de kazar, i les avla de una mansevika.

Una ermozura!

I ke ermozura!, adjusta el ayudante

Kaveyos maraviyozos!

I ke kaveyos!, adusta el ayudante

Ermozos ojos mavis (blus)!

I ke ojos!, adjusta el ayudante.

Ay un solo chiko defekto ke vos tengo de dizir : tyene una korkova…

I ke korkova! adusta el ayudante…

En vezes, mijor es de no tener ayudante…

Agora las kozas se modernizaron : un haham amerikano invento el speed dating ke tuvo un sukseso kuryozo ke no entyendo, ama ansina es. El kazamentero a la vieja dezaparesyo, ama las ajensiyas de kazamyento enfloresen ,i de toda manera kyen es el djudyo ke no aprovo, a lo manko una vez en su vida, de areglar una entrevista ! Yo, para dizirvos la vedra, aprovi unas dos o tres vezes, ama nunka reushi. Devo de ser komo la pagana de Rabi Yossi. A mi djente me paresen echos para ir en djuntos, ama a kada vez me yerri.  No embarasa : yene aprovare!

A propozito : no konosesh buena mansevika para mi ijo bohor ? Ni este tampoko pude kazarlo asta oy ! Por tanto, es de buena famiya, syendo ke su padre avla en djudeo-espanyol en la radyo…

Kon bueno, vos digo astal djueves ke vyene, si kyere el Dyo !