Muestra Lingua: EL KALENDARYO DJUDYO por Edmond Cohen

Keridos amigos, a la okazyon de tomar mis vakanzas asta septyembre, seran puvlikados en esta seksion los tekstos de emisyones pasadas.
 
El program se puede sintir por Internet kada djueves, indo al sityo RADIO – la fréquence juive . Kale tener pasensya i asperar un poko, no se oye pishin.

Saludos a todos
Edmond Cohen – Paris, Fransya
Para Ladinoomunita

EL KALENDARYO DJUDYO

De lo mas leshos ke puedemos irmos al empesijo de la istorya del ombre, vemos ke este kijo syempre kontar i kalkular el tyempo ke pasa. I de una manera ke sea la misma para dos personas o mas, si kyeren azer kozas en djuntos o tomar randevu.
 
Para el tyempo kurto, se puede tomar una kupa de agua o de safra, i kontar kuanto tyempo mete a inchirse, a kondisyon ke la agua o la safra kayga de manera regular, i ke kada uno inche la misma kupa ke los otros en el mismo tyempo.
 
De toda manera, para tyempo largo la agua o la safra no abasta. Kale topar otra koza ke sea regular i ke sea la misma para todos. I la koza la mas evidente para todos es el tyempo ke va de una noche a otra, i diré de una medya noche a otra, porke la noche puede ser korta en en verano, larga en invyerno, de toda manera del medyo al otro medyo, es syempre el mismo tyempo, ke se yama un diya.

Para tyempo mas largo, se puede mirar la luna. De una luna a otra, es kaji a kada vez el mismo tyempo, ke se yama un mes. Seriya kolay si un mes era una kantidad exacta de diyas. Ama malorozamente no. La luna torna al deredor de la tierra sin okuparse de ke la tyerra, de su lado, torna sovre si mismoen un diya i abolta al deredor del sol, en un tyempo ke yamamos un anyo. La luna torna al deredor de la tyerra en mas o menos 29 diyas i medyo. De tal manera ke si keremos ke un mes empese a kada vez por la mueva luna i ke tenga un nombre entero de diyas, kale dizir ke un mes tendra 29 diyas, i el de despues 30, i ansina a kada vez.

Kuando se mira la luna, es kolay de ver ke troka de forma a kada diya. Al empesijo aze un kroissan komo una D, despues de 7 diyas ve ve una mitad de luna en forma de D. Despues de 15 diyas la luna se ve entera, despues de 21 o 22 diyas no se ve mas keyene una mitad, ama la otra mitad, esta vez en forma de C. De tal manerake mirando la luna, kada uno puede saver en ke diya estamos. Por exemplo, en el mes de Nisan, si la luna se ve entera, estamos en medyo del mes, dunke enPesah. En tishri, si la luna empeso ay diez diyas i agora esta entre medya i entera, estamos en kipur, ets.

Ya savej tambyen ke la tyerra torna al deredor del sol en 365 diyas i un kuarto. Mismo si no saviyan ke la tyerra torna, los ombres ya aviyan kontado el tyempo ke se va de un invyerno a otro, en 365 diyas i un kuarto, dunke 12 diyas i un kuarto de mas ke dodje lunas, ke azen solo 354 diyas. Los krystyanos yamananyo este tyempo ke va de un invyerno al otro, i lo kortan en dodje pedasos ke no tyenen nada ke ver kon la luna, i ke azen sigun el pedaso 30 o 31 diyas, i yaman mes este pedaso. Ama es manera de avlar, porke en vedra un mes es una luna, i un mes krystyano no es una luna.

Los muzulmanos kyeren ke kada mes sea kon la luna, i yaman anyo el tyempo de dodje lunas, dunke un tyempo de 354 diyas, ke no va kon el sol i ke dunke no es un haliz anyo, porke faltan dodje diyas i un kuarto a kada vez, de tal manera ke kuando se pasaron 19 anyos para los kristyanos, se pasaron 19 anyos i syete mezes para los muzulmanos.
 
Los djudyos, eyos, izyeron un kalendaryo uniko en el mundo, porke es el solo ke kamine i kon la luna i kon el sol. Los mezes de muestro kalendaryo se van kon la luna, i tenemosdunke anyos de 354 diyas komo los muzulmanos, ama para seguir tambyen el sol, adjuntamos 7 lunas en dizimueve anyos. Esto es un grego ke se yamava Meton el ke topo ke 19 anyos solares aziyan kaji djusto 235 mezes lunares. 235 es 19 vezes dodje, i mas 7. Kyere dizir ke para adjuntar estos syete mezes sovre 19 anyos djudyos, tenemos syete anyos de 13 lunas en dizimueve anyos. Este tredjen mes se yama veadar i vyene despues de adar, entre adar i nisan.

 Si eran 6 vezes en 18 anyos, iva ser mas kolay, seriya un anyo de 13 mezes kada tres anyos, ama 7 en 19 es mas komplikado: ay sinko vezes tres anyos i dos vezes dos anyos, de la manera siguiente:3,3,2, 3,3,3,2. Este anyo 5766, por exemplo, es un anyo sin veadar, ama el anyo pasado era un anyo kon veadar porke estamos este anyo en el empesijo de la sira de tres vezes tres, kyere dizir ke este anyo 66 es el mueven de la sira de dizimueve. El anyo el vinyen, 67, sera sin veadar komo agora, ama el anyo mas dospues, 68, sera kon veadar.

I kon esto todo ya vos dishe ke 19 anyos eran KAJI235 lunas. Kaji solo, porke ay una differensya de una ora i medya. Una ora i media en 19 anyos, no es muncho, ama la istoryza djudiya es larga, i en miles de anyos aze muncho. Los hahamim se tomaron la kavesa i ke disheron? Disheron ke kuando vendra el Mashiah, el mos va topar la solusyon!

Penso ke lo ke vos esto dizyendo vos parese entrafikado, ama esto no es nada; vo los ize kolay, porke en vedra es muncho mas entrafikado ke lo ke vos dishe. Por egzemplo no vos dishe ke, en vedra,los anyos de dodje lunas no son siempre de 354 diyas. Ay anyos de 353 diyas i anyos de 355. Un anyo normal de 354 diyas tiene 29 diyas en heshvan i 30 en kislev. Ama ay anyos ande kislev tambyen tyene 29 diyas en lugar de 30, dunke el anyo tyene un diya manko, i ay anyos ande heshvan tambyen tyene 30 diyas en lugar de 29, dunke el anyo tyene un diya de mas. Esto lo izyeron los hahamim para pueder trokar Rosh ashana de un diya, de tal manera ke Kipur no salga ni un vyernes ni un alhad, ni Hoshaana Raba un shabat.

I komo ay otras komplikasyones tambyen, se konta 14 posibilidades de anyos djudyos. Por esto ay muy poka djente kapache de dizir kualo va ser el kalendaryo. Yo tengo un livro eskrito en 1891 por un franses, Emile Lacoine, kelavorava al Observatoryo Imperial de Estambol, i ke eskrivyo: «le calendrier israëlite, qui est luni-solaire, est un des plus élégants, et des plus exacts, mais il est très compliqué.» Kon pokas palavras, todo esta dicho!

Lo ke esto avlando aki, el Kalendaryo djudyo, vyene de los lavoros de syertos hahamim komo Rabbi Hillel, Rabbi Shemuel, del kyen diziyan ke konose los kaminos del syelo tan byen komo los kaminos de su sivdad, Rav Ada Bar Ahuva, i otros. Ama yo miri solo sovre dos estudyos en franses: un livro de Roger Stioui «Le calendrier hébraïque» éditions Colbo, i un sitio internet «le calendrier juif»de Gabriel Zerbib.