eSefarad Noticias del Mundo Sefaradi
Keridos amigos, aki toparash el teksto de la emisyon de esta semanada.
El program se puede sintir por Internet kada djueves a las 4 H O6 PM, ora de Paris, indo al sityo RADIO – la fréquence juive. Kale tener pasensya i asperar un poko, no se oye pishin.
Aki toparesh el teksto de mi emisyon de este djueves, la ultima ke vo azer antes de mis vakansas de julyo i agosto (en estos dos mezes va ser redifuzyones). Para esta emisyon me tomi koraje i vo avlar del Talmud, una ovra monumentala eskrita por munchos i munchos durante munchos siglos ( a lo manko sinko, sino mas) ke aze mas de 5.000 pajinas. No vos espantesh: no las vo meldar todas. Solo dos chikitikos pedasikos.
Vamos a ver lo ke van a pensar de mi lavoro el haham Farhi, i tambyen Tito Jacob, el kunyado de Liliane.
Saludos a todos
Edmond Cohen
Paris, Fransya
EL HASIDISMO
Saludos a todos los oyentes de la emisyon Muestra lingua, la emisyon en djudeo-espanyol fundada por el profesor Haïm-Vidal Sephiha i prezentada agora por vuestro servidor Edmond Cohen, kon Philippe en la kabina.
Keridos oyentes, ya dishe munchas vezes aki ke no es porke esta emisyon esta echa en djudeo-espanyol ke se deve por esta razon de avlar solo de djudeo-espanyoles.
Oy me vino la gana de avlarvos de unos ashkenazim polakos ke tuvyeron i tyenen dainda una muy grande importansya en el djudaismo, kyero avlar de los hasidim i del hasidismo.
Vos dire por empesar ke kuando teniya unos 15 anyos i me topava en el liseo, no saviya nada de los hasidim. En vedra no saviya nada de munchas otras kozas, ama entre eyas los hasidim. I un diya, en klasa de istorya, me ambezi una koza mueva. Teniya un profesor bastante mansevo ke se yamava Olivier Clément, ke se muryo aze poko, un profesor de istorya muy espesyal ke despues de ser profesor de istorya se konvertyo de katoliko para azerse teologo ortodokso, eskrivyo munchos livros i avlo en la televizyon en las emisyones de Ortodoksiya. Es este profesor ke un diya mos disho en klasa ke aviya nasido en la Evropa del Este en el siglo 18 un movimyento espiritual djudyo muy muy fuerte i importante, ke se yamava el hasidismo. Yo, lo ke konosiya del siglo 18, era a la kontra ke fue el siglo dicho de las luzes, el siglo de Swift despues de Locke en Ingletyerra, el siglo de Montesquieu, Voltaire, Rousseau i tantos otros en Fransya. Ama lo ke mos ambezo este profesor, es ke el siglo 18 es tambyen el del nasimyento en la Evropa del Este de un movimyento djudyo mistiko, el hasidismo, i este profesor kristyano avlo kon tanta konsiderasyon, tanta admirasyon de este movimyento, i le dyo tal importansya, ke no me olvidi la lisyon.
Munchos anyos mas despues, en 1972, aze agora kuarenta anyos, el eskrivano Elie Wiesel, ke fue despues Premyo Nobel de la Paz, salyo un livro intitolado Célébration hassidique. Penso ke no tengo menester de dar la traduksyon de este titolo. Es un livro ande Wiesel mos konta sovre los grandes nombres del hasidismo, empesando por el primero, Baal Shem Tov, i eskpando por Menahem Mendel de Kotsk.
A partir de su livro, vos kyero avlar de este movimyento ke egziste asta oy, sovre todo el movimyento Lubavitch, ke todos los djudyos fransezes konosen.
Ama por esto kale empesar por el empesijo, i dizir ke, en el medyo del siglo 17, se aviyan pasado dos kozas ke izyeron muncho danyo a los djudyos i al djudaismo. La primera koza fue, en 1648, las matansinas de los kozakos ukranyanos yevados por Bogdan Chmielnitsky, ke mataron entre 50.000 i 100.000 djudyos, asigun los istoryanos. Esto dicho, Chmielnitsky es konsiderado komo un gibor tan por los Ukranyanos komo por los Rusos, syendo ke aharvo a la Polonya i es el padre de la Ukranya.
Despues de estas matansinas, los djudyos se emprovesyeron muncho, i tuvyeron de lavorar sin eskapasyon para pueder komer, sin topar el tyempo de irsen en les eskolas djudiyas.
Laé sigunda koza ke izo danyo a los djudyos es, poko anyos despues, la istorya de Shabetay Tsvi, falso mashiah ke dyo muncho espanto a los hahamim de su epoka.
De tal manera ke en el empesijo del siglo 18, los hahamim se toparon aflakados i espantozos de todo lo ke era mistiko i popular, i metyeron el aksento sovre el solo estudyo, lo ke tuvo por konsekuensa de alesharles del chiko puevlo.
Vyendo esto, vinyeron syertos mistikos yamados Baal shem, ama ke en vedra, si bueno entendi, no eran de grande valor.
I vino ke, al empesijo del siglo 18, o al ultimo kavo del siglo 17, no se save muy byen, nasyo un ombre yamado Israel Ben Eliezer ke va ser yamado por el puevlo el Baal Shem Tov, el Maestro del Buen Nombre.
Ay mas leyendas ke haliz provas istorikas sovre este ombre ke, komo Socrates o Jesus, no eskrivyo dingun livro – todo lo ke esta eskrito de lo ke ensenyo a sido eskrito por elevos – i por tanto tuvo una influensa muy grande sovre el djudaismo, influensa ke sureo asta oy.
El Baal Shem Tov, o mas kurto el Besht, bivyo en la sivdadika de Ukranya yamada Meddzybizh, ande se muryo en 1760. Tuve la kuryozidad, en aparejando mi emisyon, de bushkar esta sivdadika sovre una karta de Ukranya, i me apersivi de dos kozas: la primera, es ke se topa a unos pokos kilometros de la sivdad de Khmielnistky, ansina yamada en 1954 (dunke un anyo despues de la muerte de Stalin) en honor del grande matador Chmielnistsky. La sigunda koza ke me ambezi en bushkando, es ke en esta misma sivdad de Khmielnisky ke dainda no se yamava ansina, se tuvo un terrivle pogrom en 1919, del tyempo del hetman Petlioura. Buen nombre le toparon en 1954. Syerro esta chika paranteza, para aboltar a muestro amigo el Baal Shem Tov, ke el no dyo su nombre a una sivdad: es vedra ke, el, no mato a dingunos.
En pokos byervos, lo ke kijo el Besht es aserkar el chiko puevlo de la relijyon, no en indo a la kontra del estudyo, ama en dando la mas grande importansya a la orasyon i a la alegriya, alegriya kon kantes i bayles.
Kale dizir ke munchos hahamim se espantaron no sea ke empese de muevo una istorya komo la de Shabetay Tsvi, i se metyeron a la kontra del hasidismo – ansina se yamo el movimyento del Besht – i eyos fueron yamados los mitnagedim: los ke van a la kontra. El kapo de los mitnagedim i de la rezistansya kontra el hasidismo fue el grande haham de Lituaniya, Eliau Ben Shelomo, el muy famozo Gaon de Vilna.
Esta rezistansya no aflako el movimyento de los hasidim, ke al kontraryo se dezaroyo en primero en Ukranya i Polonya.
Despues del Besht vinyeron munchos de sus partzanes i elevos, por egzemplo Rabbi Leib, yamado el papu de Schpole. En su orasyon diziya: « Salva a tu puevlo, Senyor, antes ke sea demaziya tadre. Sino lo ke puede afitar es ke no tendras mas dinguno de salvar. »
Otro elevo del Besht, Rabbi Wolf de Sbarazh, diziya a su arabadji: « kedate de aharvar al kavayo. Afillu si merese de ser kastigado, kyen te disho ke sos tu ke deve kastigarlo? »
Ama el mas grande elevo del Besht, el ke kontino su ensenyamyento fue Rabbi Dov-Ber de Mezeritch, yamado el Magid, el gia. « Despues de la muerte de muestro Maestro Rabbi Israel Baal Shem Tov, la Shehina (la prezensya divina) tomo su chanta i su baston i desho Medzibizh por Mezeritch », konta la leyenda.
Unos demandaron a Rabbi Levi-Itshak de Berditchev: « Kualo te ambezates al lado del grande Magid? – Me ambezi ke el Dyo egziste, ke es de este mundo, de todos los mundos. – Ama, Rabbi, esto es una vedra ke todos aki saven! – No, respondyo el famozo Rav de Berditchev: Todos lo dizen; a Mezeritch, lo saven. »
La partikularidad de los hassidim, es ke tyenen todos un atadijo muy fuerte kon un rebbe, i en jeneral el rebbe se kontinua de padre a ijo, o de maestro a elevo eskojido. Este atadijo para el rebbe es tan fuerte ke es una de las razones ke azen espanto a los mitnagedim. Ay en yiddish una kantika ande se dize: Wen der Rebbe singt, singen alle hassidim, kuando el Rebbe kanta, bayla, yora, durme, ets, todos los hassidim azen la misma koza…
El Maguid de Mezeritch tuvo munchos dertes kon los mitnagedim ke lucharon muy fuerte kontra el i los hassidim en jeneral, ama el nunka kijo entrar en esta gerra i responder.
Era diferente del Besht su maestro. El Besht se vestiya komo todos i se mesklava a todos. El Maguid se vestiya de blanko, i solo pokos hahamim puediyan venir a verlo.
A propozito de ser serkano del puevlo, vos akodro ke de la misma manera i en la misma epoka, vemos en la Turkiya osmanliya los hahamim eskrivir el Meam Loez en espanyol kon la misma entisyon, djustamente, de aserkarse del puevlo. Serro la paranteza. Tengo la maka de avrir munchas parantezas. Lo mas yuch no es de avrir parantezas, es de saver serrarlas despues!
Elie Wiesel, en su livro Célébration hassidique ke ya vos nombri, mos konta sovre un alay de estos Rebbes. Yo vos avlare solo de los mas konosidos, ama fueron munchos i munchos, i puedyeron konkistar a poko a poko el korason del puevlo de la Evropa del Este, tresalido ke ayga hahamim ke sepan avlar i dar a entender a los mas modestos.
Les diziyan kozas kolay de entender. Por egzemplo Rabbi Aaron de Karlin diziya: « O el Dyo es el rey del Mundo, i no ago bastante para servirlo, o no lo es, i es mi kulpa… »
Rabbi Levy-Yitshak de Berditchev nasyo en 1740 en Galisiya. Elevo del Maghuid de Mezeritch, se izo Rebbe en la sivdad de Berditchev. Era un haham ke pasava muncho mas tyempo en las orasyones ke en el estudyo. I su manera de orar era tipika de la manera de los hassidim: gritando, yorando, baylando.
Asperava el Mashiah. Kuando espozo a su ijo, meldo ke el papel aparejado por el espozoryo diziya ke el kazamyento se tendriya tal diya en Berditchev. – Kualo? en Berditchev? Izo arrasgar el papel para ke sea eskrito ke el kazamyanto se tendriya en Yerushalayim, salvo si el Mashiah no aviya dainda venido. Solo en tal kavzo, el kazamyento se tendriya en Berditchev.
El solo se atriviya de afrentar el Dyo i le diziya: « en diya de Kipur tu tambyen tyenes de demandar pedron a tu puevlo por las sufryensas ke le dates. Por esto kipurim es al plural: kada uno deve demandar pedron al otro. »
O le diziya: « Mozotros te damos muestros pekados i tu mos das tu pedron. Es buena ganansya para ti. Porke sin muestros pekados, ke azeriyas de tu pedron? »
El Rav Nachman de Brratslav, bisinyeto del Baal Shem Tov, nasyo en 1772 i se muryo bastante mansevo, en 1810, a la edad de 38. Ama es muy konosido i dainda oy tyene munchos elevos ka van en Ukranya para orar delantre su tomba. Por tanto, komo su bispapu el Besht, Rav Nachman no eskrivyo nada, o lo ke eskrivyo lo izo kemar por su elevo Rabi Nathan. Ama a parte ke acheto de todo kemar, keda ke este Rabi Nathan eskrivyo tiodo lo ke se ambezo de Rabi Nahman, i lo ke savemos oy de Rabi Nahman, es grasyas a Rabi Nathan.
La idea maestra de Rabi Nahman, es ke kale syempre ver lo bueno de las kozas komo de los ombres, komo de la vida. Asigun el, la alegriya es un komendamyento relijyozo tal i komo las otras mitsvot.
Me aze pensar a Jean-Jacques Rousseau kuando mos dize ke kale avlar kon el Dyo en un syerto lugar i en un syerto tyempo: el tyempo, la noche. El lugar, un kamino vaziyo.
Rav Nachman diziya tambyen: « El mundo entero es un puente muy estrecho, ama no kale tener espanto… » De esta dicha izyeron una ermoza kantika en Israel.
De Nahman de Bratslav mos kedan los eskritos de Rabi Nathan, de la misma manera ke de los ensenyamyentos de Socrates tenemos los eskritos de Platon.
I Menahem-Mendel de Kotsk? Komo no dizir unos kuantos byervos sovre este haham muy espesyal, nasido en 1787. De el tampoko no tenemos dingun eskrito. Un ombre severo, por kyen una sola koza tyene importansya: bushkar la vedra, emet en ebreo. Esta vedra se bushka en la Tora i el Talmud, i la bushkedad se deve de ser kompleta. Una bushkedad de la vedra mas o menos no tyene interes. Por la misma razon una orasyon dicha por uzo no vale, solo vale de bushkar la vedra.
Vos tengo tambyen de avlar de Zalman Shneur de Ladi, mas aedado de Menahem-Mendel porke nasido en 1745. Ama si avlo de el despues, es porke su ensenyamyento tura asta oy, syendo ke este Zalman se instalo en la sivadika de Lubavich, i tuvo una desendensya ke tomo por nombre el de Schneerson, ke kyere dizir el ijo de Schneur. En 1940, los hassidim de Lubavich puedyeron fuyirse kon el Rebbe i instalarse en New-York. Los hassidim de Lubavich guadraron el nombre de Lubavich.
Oy kada uno kyere o no kyere a los lubavich, ama una koza es syerta, todos los konosen, kon sus boralinos pretos, i este uzo ke tyenen de tratar de konvertir los djudyos para ser mas djudyos.
Ama no kale pensar ke oy kedan solo los Lubavich komo hassidim. Ay tambyen otros komo los Breslev o los Satmar, ansina yamados porke tyenen por kapo un haham venido de la sivdadika de Satmar. El Satmarer Rebbe es el mas antisyonisto de todos los hassidim. Los lubavich son mas serka del syonismo, afillu si el kapo se keda en New-York.
I los mitnagedim? Asta oy egziste la lucha entre mitnagedim i hassidim, ama no es agora tan fuerte komo antes. Hassidim i mitnagedim se an mismo aunidos en 1912 en el partido Agudat Israel, afillu si aunidos no kyere dizir unifikados.
Aki en Fransya se puede ver ke munchos djudyos de Afrika del Norte se entraron en el movimyento Lubavich, ke no es mas un movimyento solo lehli.
Esto todo dicho, agora ya vino la ora de eskapar mi emisyon, i no puedo azerlo sin dezearvos a todos, keridos oyentes, una anyada buena i dulse, i de pasar en famiya ermozas fyestas de Rosh Ashana ke van a empesar alhad a la tadre, i vos digo: al djueves ke vyene, en 5773, si kyere el Dyo!
Edmond Cohen
