eSefarad Noticias del Mundo Sefaradi
Keridos amigos, aki toparesh el teksto de mi emision de amanyana djueves, konsagrada al Gaon de Vilna, afillu si era ashkenazi. Ama kale ser piyadozo: dinguno es perfekto.
El program se puede sintir por Internet kada djueves a las 4 H O6 PM, ora de Paris, indo al sityo RADIO – la fréquence juive. Kale tener pasensya i asperar un poko, no se oye pishin.
Saludos a todos
Edmond Cohen
Paris, Fransya
EL GAON DE VILNA
Saludos a todos los oyentes de la emisyon Muestra lingua, la emisyon en djudeo-espanyol fundada por el profesor Haïm-Vidal Sephiha i prezentada agora por vuestro servidor Edmond Cohen, kon Philippe en la kabina.
Komo a kada vez, vos akodro ke el proksimo atelye de konversasyon de la Asosyasyon Vidas Largas se tendra el martes 19 de marso, de las dos i un kuarto asta las sinko, en el Centre Communautaire, 119, rue Lafayette Paris (10°), métro Cadet o Poissonnière.
Despues del atelye, a las 6 de la tadre, vo azer el mismo diya 19 de marso, si kyere el Dyo, una konferensya en el kuadro del sinkuenten aniversaryo del Sentro Komunitaryo ke mos akoje para muestros atelyes. Esta konferensya, ke ya vos anunsyi en mi emisyon pasada del 7 de fevrero i ke va ser en franses – avlo tambyen esta lingua – va tener por titolo « La résistance spirituelle des judéo-espagnols de Paris sous l’Occupation » (la rezistansya espirituala de los djudeo-espanyoles de Paris basho la Okupasyon). Esta konferensya va sovre todo toparse fundada sovre un livriko eskrito en avril 1945, antes dunke ke s’eskape la gerra ama unos kuantos mezes despues de la Liberasyon (kavo de agosto 1944), por Jose Papo, ke fue hazan en el kal Berith Shalom durante la gerra. Lo ke izyeron los ombres de este kal komo los del kal del 7 rue Popincourt (al syete), i ke mos konta Jose Papo en este livriko, merese mil vezes de ser rekodrado.
Esto dicho, oy pensi de avlarvos de un grande haham de Lituaniya, un ashkenazi dunke, ama ya vos aviya dicho ke no me kontentariya de avlar solo de hahamim o eskrivanos sefaradis. De vez en kuando, vos avlare de grandes ashkenazim, komo ya vos avli, por egzemplo, de Rashi, ke era franses. Este grande haham de Lituaniya es el haham Eliya ben Shelomo Zalman, mas konosido komo syendo el Gaon de Vilna. Un Gaon, en ebreo, es un haham muy alto, i Vilna es la sivdad de Vilnius, kapitala de la Lituaniya, ande nasyo (el 23 de avril 1720) i muryo (el 20 de oktovre 1797).
Kon las primeras lettras de Gaon Rabenu Eliyau es tambyen konosido komo el Gra (savyendo ke la e de Eliyau se eskrive kon un alef).
Ya tuve dos vezes la okazyon de avlarvos del Gaon de Vilna: la primera vez solo vos di su nombre entre los hahamim yamados aharonim, los ke vinyeron despues del Shulhan Aruh de Yosef Karo en el siglo 16. Kale ke sepash ke la jenerasyon de hahamim ke vinyeron despues de los Geonim, verso la mitad del onzen siglo, asta Yosef Karo i su Shulhan Aruh, Rashi por egzemplo, son yamados Rishonim. I la tradisyon kyere ke kuando ay diverjensya entre rishonim i aharonim, es la opinyon de los rishonim ke prevale. Esto es la tradisyon. Ama para el Gaon de Vilna, es tan alto entre los aharonim ke ay unos ke lo kyeren meter entre los rishonim afillu si vino despues de eyos en el tyempo de los aharonim.
La sigunda vez ke vos avli del Gaon de Vilna, es en mi emisyon konsagrada a los hasidim, i vos dishe ke el fue el kapo de los mitnagedim, los ke se opozaron al hasidismo.
Ama esta vez kyero konsagrar la entera emisyon a este muy alto haham.
I por esto vamos a empesar por el empesijo, el nasimyento, el 23 de avril 1720, en la sivdad de Vilnius, kapitala de la Lituaniya, de Eliya ben Shelomo, un ijiko muy espyerto i meoyudo ke va enkantar a la djente al deredor, syendo ke, a lo manko asigun lo ke se konta, a tres anyos ya konosiya el Tanah de kavesa. Es puede ser una leyenda, ama en todas las leyendas ay una parte de vedra. I ya savemos ke syertas kriaturas son kapaches de kozas inkreivles. Vos akodro, por egzemplo, el chiko Jean-Philippe Baratier, nasido en janvier 1721, kijo dizir kaji en mismo tyempo ke Eliah ben Shelomo, i ke a la edad de kuatro anyos avlava latino kon su padre, franses kon su madre i alman kon los mosos; a onze anyos traslado del ebreo al franses Los viyajes de Binyamin de Tudela, komentandolos tambyen kon una erudisyon inkreivle. Esto para dizir ke en la leyenda del chiko Eliahu tan savyo a tres anyos, es posivle ke ayga una grande parte de vedra.
Se konta tambyen ke kuando Eliyau dainda no teniya kuatro anyos, le demandaron ande ay en el Humash un pasulk de 8 byervos eskapandosen todos por la letra mem final. Pishin respondyo ke era el pasuk 15 del kapitulo 32 de Bereshit: « Izim matayim utyashim esrim, rehelim matayim veeylim esrim » (cabras dozientas i cabrones veinte, ovejas dozientas i barvezes veinte).
A los syete se metyo a ambezarse el Talmud del haham Moses Margalit, i se dize ke a esta edad ya konosiya de kavesa munchos tratados del Talmud. A los ocho, se metyo a estudyar astronomiya kuando teniya un poko de tyempo, por egzemplo a la ora de la komida. A la edad de onze anyos, se konta ke konosiya el Talmud entero de kavesa.
Muy mansevo es kazado a una mansevika de la sivdadika de Kaidan (oy Kedainiai) ke se topa a unos 100 km al noroeste de Vilnius, i aya se va morar. Pasa dias i noches a estudyar en su kamareta. Su ijo konto komo, kon taleth i tefillin, se kedava en su kamareta ke no kaentava mismo en invyerno, pandjures serrados mismo en el diya, meldando kon kandela, los pies untados en un legen de agua yelada para no endormeserse, i durmiya solo una medya ora a kada vez, i no mas en todo ke dos oras por noche. El savyo, lamdan, no era, asigun el, el ke saviya munchas kozas i puediya estudyar, era solo el ke aziya del estudyo su okupasyon permanente.
Avlava poko, i nunka por bavajadas. Se konta ke un diya su ermana, ke no teniya visto desde munchos anyos, vino a darle vijita. Kuando entro en su kamareta, su ermano la saludo, le demando haberes de su famiya i despues le disho:
– « Ermana, mos veremos de muevo en el olam aba (el mundo el vinyen). Aki, en este mundo, no ay tyempo. Devo estudyar la Tora ».
Komo era el uzo en este tyempo, se va mansevo en galut, kijo dizir komo un sedakero sin paras, a vijitar las komunidades de Polonya i Almanya. De todo se ambeza, i despues, en 1748, kijo dizir a la edad de 28 anyos, abolta en Vilna ande, malgrado su grande umeldad, va ser muy presto rekonosido komo un savyo eksepsyonal. De todas partes hahamim muncho mas aedados ke el vyenen a verlo para demandarle kuestyones de alaha, i el les da repuestas kon muncho meoyo i muncha savidurya.
Ama malgrado su reputasyon, no keda de ser muy umilde, komo son los mas altos kaji syempre. Nunka acheto de ser kapo de kualkyer komunidad. Afillu su grande provedad dava 20% de su ganansya para la sedaka. I si oiya ke alguno se topava en menester, tomava de sus propyos menesteres para darle.
La komunidad de Vilna pagava una chika renta para el Gaon, malgrado ke el nunka kijo tener responsabilidades. Ama el shamash ke teniya de trasmeterle esta renta la guadrava para el. El Gaon lo saviya, ama nunka lo akuzo, nunka se kesho a dinguno, porke no keriya azerle verguensa. De tal modo ke esto no se uvyera nunka savido si el kulpavle no aviya kaido hazino i no lo aviya atorgado el mismo sovre su lecho de muerte.
Este ombre umilde era por tanto rekonosido por todos komo syendo de un tal nivel ke asta oy es konosido komo el Gaon de Vilna. Su ensenyamyento fue muy importante, ama, komo Socrate, era en grande parte oral. Son sus pokos elevos ke guadraron su ensenyamyento, i lo puvlikaron. I es agora grasyas a eyos ke lo konosemos.
No es ke no eskrivyo muncho; al kontraryo, no kedo de eskrivir komentaryos sovre todo lo ke estudiava. Ama estos eskritos kedavan para si, es solo despues de su muerte ke sus elevos puvlikaron sus munchas ovras. Kale dizir ke para el Gaon, solo se puediya eskrivir sovre la Tora eskrita (Tora shebihtav) ama sovre la Tora orala (she ba’al pe) no kaliya eskrivir, salvo ovligasyon por las sirkonstansyas.
Lo ke mos keda del Gaon de Vilna son su komentaryo del Talmud Bavli i del Shulhan Aruh intitolado, despues de su muerte, Bi’ure aGra (Elaborasyon por el Gra), su komentaryo de la Mishna, Shenot Eliyau (Los anyos de Eliya), sus komentaryos del Humash, Aderet Eliyau (La esplendor de Eliyau). Ama izo tambyen komentaryos de los Mishle (Proverbos del rey Shelomo) i otros livros del Tanah (Kantar de los Kantares, Yona), komo de ovras kabalistikas.
A propozito de la Kabala, kale saver ke el Gaon no veiya opozisyon entre el Talmud i la Kabala ke estudyo i komento. Vamos avlar un poko despues de su opozisyon kontra el hasidismo. Ama esta opozisyon no teniya nada de ver kon el fakto ke los hasidim eran mistikos i se fundavan muncho sovre la Kabala.
Es el estudyo del Zohar i de la Kabala ke aserka de la delivransia. Asigun lo ke meldi sovre internet, uno de los ensenyamyentos del Gaon era el sigyente: Kada livro del Humash korresponde a un milenaryo. Estamos agora en el milenaryo ke korresponde al ultimo livro del Humash: Devarim. (Aki avro una paranteza: estamos oy en 5773, i eramos del tyempo del Gaon en los 5500, dunke, asigun mi, ya estamos, no en el sinken milenaryo, ama en el sejen. Syerro mi paranteza i kontinuo lo ke meldi) El Livro de Devarim es dividido en diez parashiot, ke korresponden a kada siglo de muestro milenaryo. La perasha de muestra epoka es la de Ki tavo (ande se avla de la shoa), i despues vyene la perasha nitsavim- vayeleh ande es prometido el ritorno a Israel a los ke azen teshuva.
Meldi en internet ke en el livro Hatekufa hagedola, eskrito por un elevo del Gaon, Rabbi Hillel Shaklover, el mos da otra manera de kontar ke vendriya del Gaon, asigun la kuala la kreasyon del estado de Israel deve venir en 5708, sea 1948, is es lo ke se paso. Es muy ermozo, salvo ke kale ser shupeli sovre lo ke se melda sovre internet. Yene vos kije kontar la koza, ama no asiguro nada…
Lo ke es siguro, es ke, komo vos dishe, si el Gaon de Vilna no teniya nada a la kontra de la Kabala, fue un opposante muy determinado kontra el movimyento de los hasidim. Lucho kon todas sus fuersas kontra este movimyento, komo ya lo konti aki kuando vos avli de los hasidim. El Gaon de Vilna es konsiderado komo el kapo de los mitnagedim, los opozantes (al hasidismo). El Gaon, ke se akodrava del danyo ke izo Shabetay Tsvi al djudaismo, se espantava ke uno de los hasidim sea tomado por mashiah. En vedra esto no afito de su tyempo, ama, en muestros tyempos, es vedra ke munchos hasidim tomaron – i toman dainda – a el rav Schneersohn, kapo de los Lubavitsch, ke se muryo en 1994, komo mashiah. Visto ansina, se puede entender el espanto del Gaon…
No se puede avlar del Gaon de Vilna sin avlar de su atadijo por la tyerra de Israel. Pensava ke era menester de ir a morar en Erets Israel para pueder azer aya las mitsvot ke solo se pueden azer en tyerra de Israel. I de manera mas jeneral, komo mas tadre el haham Yehuda Alkalay, konsiderado komo el primer syonisto, i unos kuarenta anyos antes de el, el Gaon de Vilna desvelopo la idea ke irse en Israel era un eskalon verso la salvasyon del puevlo djudyo i la venida del Mashiah.
No se kontento de dizirlo. Un diya, kuando ya era vyejo, se fue de Vilna i empeso por irse a Koenigsberg, de ande teniya, penso, de tomar una nave. Ama por una razon ke no se save byen, se troko de idea i se abolto a Vilna.El Gaon disho solo ke no obtuvo la otorizasyon del syelo. Es kuando se topava en Koenigsberg ke embiyo a su mujer una letra famoza kon el nombre igeret haGra (la letra del Gaon) ande da a toda su famiya instruksyones por lo ke ay de azer i no azer para byen komportarse.
Vos dishe ke se abolto en Vilna, ande se muryo en 1797, a la edad de 77 anyos. Ama lo ke el no izo, sus elevos lo izyeron: solo unos diez anyos despues de su muerte, entre 1808 i 1812, tres grupos de elevos kon sus famiyas, unas 500 personas, yamados Perushim, los separados, el mismo byervo ke los Farizyanos, se fueron en Erets Israel. Los muzulmanos no les permityendo de instalarse en Yerushalaïm (la istorya en vez no troka) se instalaron en Galilea., en la sivdad de Safed, konosida komo sivdad de los Kabalistos. Despues unos kuantos pudyeron ir a morar en Yerushalayim. Entre estos primeros sino syonistos, a lo manko presyonistos, aviya Menahem Mendel de Sheklov i Rabbi Saadia. Tambyen Rabi Israel de Sheklov va ser el kapo de la eskola del Gaon en Safed.
Un otro elevo del Gaon, uno de los mas serka, el Rav Haim de Volojin, avriyo una yeshiva en 1803 en Volojin, su sivdad de nasimyento, en lo ke se yama oy Belarus. Puede ser vos interesara de saver ke Shimon Peres, oy Prezidente del Estado de Israel, es un desendyente de este Rav Haim de Volojin.
Agora ya vino la ora de eskapar esta emisyon. Ya me do kuenta ke, no syendo haham, i komo a kada vez ke avlo de hahamlik, lo ke no es de mi kompetensya, no me era posivle de darvos a entender komo lo uvyera echo un haham kualo fue la importansya de la ovra de este Gaon, ke konsagro su vida al estudyo metodiko de todas las ovras kapitalas del djudaismo, para pueder komentarlas.
Ama en jeneral, keridos oyentes, vozotros tampoko no sosh hahamim, i lo ke importa es solo ke sepash ke, en el alay de grandes hahamim ke tuvimos, el Gaon de Vilna fue uno de los mas grandes, i ke sus ensenyamyentos kontinuan de enrikeser muestra kultura djudiya.
Al djueves ke vyene, si kyere el Dyo!
Edmond Cohen
