eSefarad Noticias del Mundo Sefaradi
Keridos amigos, vos do el teksto de la proksima emisyon del programa.
El program se puede sintir por Internet kada djueves, indo al sityo RADIO – la fréquence juive. Kale tener pasensya i asperar un poko, no se oye pishin.
Saludos a todos
Edmond Cohen – Paris, Fransya
UN
EL DIYA MUNDYAL DEL OLOKOSTO 2011
Saludos a todos los oyentes de la emisyon Muestra lingua, la emisyon en djudeo-espanyol fundada por el profesor Haïm-Vidal Sephiha i prezentada agora por vuestro servidor Edmond Cohen, kon Philippe en la kabina.
Komo a kada vez, vos akodro ke el proksimo atelye de konversasyon de la asosyasyon Vidas Largas se tendra el djueves ke vyene 3 de fevrero, de las dos a las kuatro i medya-sinko, en el Centre Communautaire, 119 rue Lafayette Paris (10°) métro Gare du Nord o Poissonnière. Este diya tendremos una konferensya de muestro amigo Frederic Viey sovre los djudyos rusos en Kina al kavo del siglo 19. Para los ke no son myembros de Vidas Largas o de JEAA kostara 6 €, lo ke kyere dizir ke va ser de baldes para los myembros de la una o de la otra asosyasyon…Los ke son interesados son rogados de rezervar en eskrivyendo a Vidas Largas, 23 rue du Dr Potain, escalier B, boîte 27, 75019 Paris.
Komo ya lo savesh, oy 27 de janvier,es, komo kada anyo, el dya mundyal del olokosto, asigun lo dechido la ONU.
Para onorar este diya, me tomi de antes, i, el djueves pasado vos meldi los rekodros de muestro amigo Sabi (Sabetaï) Soulam, sin topar tyempo de eskapar mi meldadura.
Mi entisyon, oy, es de eskapar esta meldadura, despues de meldarvos mi traduksyon del franses al djudeo-espanyol de una letra eskrita de Beaune la Rolande a su mujer por un internado, i si tengo tyempo, eskaparé dizyendovos syertas kozikas ke meldi sovre internet a propozito de la Suisa i de los djudyos durante la Gerra.
Empesaremos por la fin de los rekodros de Sabi Soulam. El djueves pasado, vos meldi sus rekodros del tyempo de la gerra, agora me keda de meldarvos sus rekodros de la vida en su malé antes de la Gerra.
Empeso mi meldadura : La vida de la malé antes de la gerra :
El onzen arrondissement era una malé popular, ande los djudyos del ex imperyo osmanli (Turkiya, Gresya, Bulgariya) se instalaron al empesijo del siglo 20.
Esta malé al deredor del Boulevard Voltaire era la chika Turkiya, kon sus merkaderes en chamachir de kaza, teshidos, kafes oryentales (el Bosphore, el Istanbul, el Athènes) sus bakales (Valenci, El preto, les 5 continents) yenos de komidas turkas (halva, pitagra, sarsicha, azitunas, abudaraho…). Sus chikas lokandas chez Sotil, rue Sedaine, chez Bouco, chez Behar en el Bosphore.
En la malé Voltaire la avla koryente en la kaye era el djudeo-espanyol. La vida era reglada por las fyestas djudiyas ; sin ser de ortodoksiya tan sufu, aziyamos las fyestas de una manera alegre i sin hadras ; era la okazyon de grandes sidutas familyales.
Kada fyesta teniya sus komidas partikolares i sus uzos : en Rosheshana era el uzo de merkar kalsados i vestimyenta mueva. En Kipur me iva kon mi padre desde la demanyana al chiko kal del 7 kaye Popincourt (Al Syete) ke era lo mizmo ke un kal turko, kon la teva en medyo, ande oravan los hahamim frente al « ehal », i arriva aviya la medyana para las mujeres. En Pesah mi padre aziya el seder en lashon i en ladino, era una vida sin hadras sentrada alderedor de la famiya. Kaji todos muestros amigos eran djudyos.
El djueves i el alhad demanyana me iva al Talmud Tora de la kalejika Charles Dallery dirijido por el haham Catarivas, para resivir un ambezamyento djudyo. Todos los haverim de mi male estavan aya.
Frente a la mayoriya del onzen, estava el kafe de la Mayoriya ande se teniyan las sidutas syonistas a la primera tabaka ; mi padre me yevava munchas vezes kon el. Despues de los diskorsos aviyan munchas vezes filmos sovre las realizasyones en Palestina de los halutsim. Las sidutas se eskapavan por la Hatikva kantada en judeo-espanyol.
La atmosfera no era muy favoravle en Fransya para los djudyos i los ajenos. Kon la viktorya de la frente popular en 1936 i la nominasyon de Leon Blum komo Primo Ministro, aviya una ksenofobiya muy fuerte en el puevlo i en las gazetas. I l’Almanya se aziya mas i mas amenazante.
En la eskola eran ensultos kontra los ke no teniyan alkunya franseza : « sale youpin, va dans ton pays » (mamzer de tchifut, vate en tu pais).
Kalya pelearse para azerse respektar. Mi eskola estava en frente de mi kaza, i era frekuentada por munchos djudyos.
Mas de 36 elevos de esta eskola fueron deportados, una laja kon sus nombres i sus edades fue metida en la eskola en sus memorya.
Ansina se eskapan los rekodros ke keriya meldarvos de Sabi Soulam, ke por modestiya no avla de la parte ke djugo el mismo en estas lajas ke se topan agora en kaji todas las eskolas de Paris.
I agora, komo ya lo ize para un diya de la shoa, en 2006, kon una letra de Raphael Eskenazi eskrita a su mujer del ospital Rothschild ande estava kurado komo internado de Drancy ande lo embiyaron atras una vez kurado, i de aya fue deportado, komo ya lo ize tambyen este mismo diya de la shoa kon las kuantas letras eskritas por la chika Marie Jelen (10 anyos) a su padre desde el kampo de Pithiviers unos kuantos diyas antes de ser deportada, vos vo meldar una letra eskrita el 8 de agosto 1942 del kampo franses de Beaune la Rolande a su mujer Rica por Nissim (Max) de Toledo.
Ama antes no se si ya vos dishe ke el ermano de Marie Jelen, morando en un kibuts en Israel, meldo sovre internet ke yo aviya avlado de su ermanika en la radyo, i kijo konoserme. I kuando paso por Paris vino a komer un shabath a mi kaza. Mos konto ke kuando se muryo su padre, el topo las letras de su ermanika guadradas en su portofolyo ; i el es ke las metyo sovre internet ande las topi.
Esto dicho, aboltaremos a la letra de Nisim de Toledo, eskrita en franses i ke trasladi en muestra lingua:
8 de agosto 1942
Kerida Rica,
Ayer uvo una sigunda ida verso una destinasyon deskonosida ; i mozotros, mos kedimos yo i Albert komo Espanyoles, i kuatro turkos. Bueno ke guadri los pasaportes i los papeles. El lugartenyente mos disho ke no mos vamos, mozotros. Orozamente aki kedan solo 500 personas, el kusur ya se fue. Arresivi los 2 sertifikatos por Albert por la Kruz Korolada, ama no ay liberasyon por hazinura ; ama la nasyonalidad mos va salvar ; a lo manko no mos yevaran i ya es una koza. Aki no semos malorozos, no te sikilees, ya me ize kurandero, i esto diya entero en la enfirmeriya. No me enfasyo del todo kurando las kriaturas, me agrada mismo. Aki es largo de kontarte, te eskrivo, te eskrivo, i no se si mis letras te ayegan, porke no tenemos el derecho de eskrivir. En todo kavzo, si te toman, no tomes muncha para i dinguna djoya. No kreo ke tendras dertes.
La salud i el moral van muy muy byen, i para la komida mos desbroyamos muy muy byen, dunke no te sikilees para mozotros. No me kedo de akavidartelo porke no ay menester de merekiyarse kuando no sufrimos. Zaten no mos merekiyamos del todo, semos los oryentales en djuntos i no mos enfasyamos.
Da haberes a Fifi de mis letras, la sola koza ke me da ansya, es de nada saver de vozotros.
Tenemos gazetas kadal diya i las meldamos.
Da saludos a los Farhi, i a Mme Babeau, Mme Hatrel.
Abraso fuerte a Mama i Lulu
Te abraso muy muy fuerte
Max
Kale saver ke solo 20 diyas despues de esta letra, sea el 28 de agosto 1942, Nissim fue deportado por el treno 25, kon su ijo Albert, ke veniya de tener 16 anyos . I kale saver tambyen ke su mujer Rica fue eya tambyen aferrada i deportada un poko mas de dos mezes mas tadre, el 4 de novyembre 1942, por el treno 40. Komo lo vesh, la nasyonalidad espanyola no les fue de dingun ayudo.
I djustamente, a propozito del ayudo o no de los paizes neutros a los djudyos, vengo de meldar sovre internet un artikolo de la gazeta suisa L’Hebdo, n° 1339 del 20 de janvier, kijo dizir del djueves pasado, artikolo non firmado ama muy dokumentado a propozito del ayudo , i tambyen del refuzo de ayudo, de la Suisa a los djudyos kuando teniyan menester.
Este artikolo syendo muy largo, no lo puedo trasladar entero, solo vos kyero dar un rezumen de lo ke dize.
Empesa por akodrarmos ke, el 7 de mayo 1995, unos dos mezes antes del Prezidente Chirac en el Vel d’Hiv, Kaspar Viliger, prezidente de la Konfederasyon suisa, demando ofisyalmente, frente a la Asamblea federala, pedron a los djudyos por lo ke izo, o sovre todo lo ke no izo la Suisa, durante la Gerra. « Izimos en este tyempo el negro eskojo en nombre de un interes nasyonal tomado en el sentido lo mas estrecho… El Consilyo Federal se arrepyente profundamente de este yerro i kyere demandar pedron, todo en savyendo ke tala aberrasyon no es pedronavle. » Estos byervos mos azen pensar a los de Jacques Chirac, prezidente de la Republika franseza el 16 de julyo de este mismo anyo 1995 delantre de lo ke keda del Vel d’Hiv : « La Fransya en estos tyempos a kometido lo ke no se puede reparar ».
De su lado, el istoryano Daniel Bourgeois eskrivyo ke la Suisa fue a la vez ayudante de los Almanes en arrondjando afuera miles de djudyos kuando era posivle de akojerlos, i ayudante de los Djudyos porke, al kavo de 1944, es la Suisa ke avrigava el mas grande numero de djudyos refujyados asigun su superfisiya : mas de 27.000 en los kuales 21.500 entrados de manera illegala. En el mismo tyempo, los Amerikanos desharon solo entrar 21.000 refujyados, kontra 40.000 en Hollandia antes ke sea tomada por los Almanes en 1940 i 70.000 por la Fransya entre 1933 i 1939.
Primera kuestyon: Es ke las autoridades suisas saviyan lo ke se pasava en Evropa del Este kontra los Djudyos ? La repuesta es si, grasya a los diplomatos suisos en la Evropa entera. Franz Rudolf Von Weiss, konsul jeneral de Suisa en Kolonya, René de Weck, ministro de Suisa en Bucarest, embiyan en Berna, desde 1941, letras dizyendo ke no se puede ni deskrivir lo ke se esta pasando. « Los djudyos mueren komo moshkas ». Los soldados almanes ke dezyertan la Wehrmacht kontan las matansinas. El 24 de novyembre 1941, Paul Ruegger, ministro en Roma, eskrive a su ministro suiso de los echos ajenos ke los Almanes estan organizando una eksterminasyon biolojika de una grande parte de las povlasyones okupadas. En 1943 , Heinrich Rothmund, kapo de la divizyon jenerala de polisiya en Suisa, eskrive ke ay kampos de eksterminasyon. Ama esto no troka la politika de la Suisa . En agosto 1942 , dunke despues del aferramyente de masa en Fransya de mujeres i kriaturas, (el aferramyento del Vel d’Hiv) el Konsilyo Federal deklara ke las persekusyones rasyalas no justifikan el azilyo politiko para los djudyos. Va asperar julyo 1944 para trokar de politika. En agosto 1942, Rothmund dekara ka la barka es yena. Kontra esto el deputado Albert Oeri responde en septyembre 1942 ke no es vedra, ama el katoliko Heinrich Walther responde ke kale tener un egoismo sagrado.
Los kapos de Suisa disheron despues de la gerra, para diskulparsen, ke teniyan espanto de los nazis. Esto tampoko no vale : los Almanes teniyan menester de la Suisa i no le demandaron nunka de serrar sus fronteras. Ama un Rothmund, el mismo ke avlava de kampos de eksterminasyon en sus raportes de 1943, eskriviya a un diplomato : « No luchimos durante vente anyos grasya a la Polisiya de los ajenos kontra la surpovlasyon ajena i partikularmente el endjudyamyento de la Suisa para desharmos forsar por los imigrantes »…
De la misma manera los istoryanos amostran ke la Kruz Kolorada de Suisa saviya lo ke se pasava, ama no se meneo.
I la povlasyon suisa ? Eya tambyen save lo ke se esta pasando en la Evropa del este. La gazeta La Nasyon del 13 de agosto 1942 eskive sovre dos ojas lo ke se pasa i dize ke ya se mataron 700.000 personas desdel empesijo de la gerra. Otra gazeta, el mismo diya, konta lo ke se paso en el Vel d’Hiv, « una Saint-Barthelemy moderna en Paris » i kuatro diyas despues konta komo syenes i syenes de poveretos ke kyeren topar refujyo en Suisa son arondjados por las otoridades suisas. Para algunos, es la muerte, eskrive el gazetero, Paul Graber. Esto dicho, la povlasyon suisa no se menea en jeneral.
Ay komo syempre, eksepsyones, i djustos ke izyeron todo lo ke pudyeron para ayudar a los djudyos. No kale olvidar , por enshemplo, a Paul Gruninger, kapo de la Polisiya de Saint-Gall ke fue echado de su lavoro i kondenado para tener deshado pasar la frontera. Va ser reabilitado solo despues de su muerte, en 1995.
Uvo tambyen Carl Lutz, consul de Suisa en Budapest, la sivdad ande aviya Wallenberg i Sanz Bris. A el solo, ayudado por su mujer, salvo a mas de 62.000 djudyos, dandoles papeles de salvasyon.
En todo, unos sesenta suisos resivyeron de Yad Vashem el titolo de Djusto. Ama lo ke izyeron, lo izyeron de manera individuala, munchas vezes kontra los ordenes resividos de arriva.
Ama kon esto todo no kale olvidar a los 27.000 refujyados djudyos ke pudyeron kedarse en Suisa, en estos mis primos i los ke ivan a ser muncho mas tadre mis kosuegros…Sin la Suisa, ivan a ser bolados…
Kon esto me kedo, i vos digo al djueves ke vyene, si kyere el Dyo!
