eSefarad Noticias del Mundo Sefaradi
Keridos amigos,
En medyo de las fyestas no fue kolay de aparejar una emisyon, i tuve de kopyar (esta noche i esta demanyana) artikolos de otras.
Los ke van a kerer oirme en direkto lo podran indosen a las 4 h 06 PM, ora de Paris, sovre http://www.radioj.fr Kale klikar arriva a la derecha sovre Ecouter Radio J en direct. I si no es en direkto, abasta asperar un diya o dos, i despues ir a oirme en redifuzyon sovre http://www.radioj.fr/node/145
Saludos a todos
Edmond Cohen Paris Fransya
EL AMANESER: KAREN SARHON, MASARU EMOTO, MATILDA KOEN-SARANO, RACHEL BORTNICK
Saludes a todos los oyentes de la emisyon Muestra lingua, la emisyon en djudeo-espanyol fundada por el profesor Haïm-Vidal Sephiha i prezentada agora por vuestro servidor Edmond Cohen, kon Philippe en la kabina.
Vos akodro ke agora las emisyones de Radio J se pueden oir sovre internet. Si el tekniko lo kyere byen, mi emisyon se puede oir kuando se kyere, eya sola, o de toda manera se puede oir indose kuando se kyere al kavo de la redifuzyon de la emisyon del djueves a la tadre.
Estos diyas, pasimos los dos diyas de Rosh Ashana, i por lo ke es de mi, los pasi en kaza kon mis ijos i sus mujeres mis ermueras, las dos muncho mas sufus ke mis dos ijos i yo. De tal manera ke no era kuestyon de lavorar, solo de ir al kal, de komer asta patladear, i de djugar kon mis inyetiziko i inyetizika. Ama komo topar el tyempo de aparejar una emisyon?
Orozamente, djusto ayer arresivi de Estambol la gazeta El Amaneser de septyembre, i aya meldi la primera pajina eskrita por Karen G. Sarhon ke es la kapo de la gazeta. El titolo de su artikolo me travo el tino: «El mesaje sekreto en la agua»…Kualo puediya ser este mesaje sekreto?
Lo savresh komo yo, syendo ke vos vo meldar sin trokar ni un byervo el artikolo tal ke fue eskrito por la kerida Karen Sarhon (ke ensima de su savidurya es tambyen la kantadera de los Pasharos sefaradis, de la mizma manera ke Michèle Tauber, ke eya tambyen es a la vez profesora i kantadera, ama esta vez en yidisch).
Antes de empesar su artikolo, Karen Sarhon eskrive de basho del titolo «El mesaje sekreto en la agua» la sentensya sigiente: «Si se tyene la intension de paz enverso la agua, si se pensa, o se avla o se trata la agua kon la intension de paz, la agua puede traer i por siguro traera la paz a muestros puerpos i al mundo» (Masaru Emoto, 1943 – 2014)
I despues empesa el artikolo, adornado kon fotos ke malorozamente no vos puedo amostrar a la radyo:
La agua. El elemento esensial para la vida. 70% de muestro puerpo konsiste de agua. Sin agua, no se bive i no se aze nada. Alora es importante de bever agua limpia i sana, no? Komo se aze la agua ke bevemos sana?
Un doktor japonezo, Masaru Emoto izo investigasiones sovre los molekules de la agua. Kon una teknolojiya bastante sofistikada pudo egzaminar los molekules de agua en forma de kristal. I lo ke topo fue muy muy sorprenante. El topo ke:
1- Los sintimientos ke una persona tyene enverso la agua troka la struktura de los molekules. Si tiene sintimientos de amor o de rekonosensia, los molekules salen komo diamantes, briyando i kon una ermozura selestial. Si la persona tiene sintimientos de odio o de malfezensia, los molekules salen desgrasiadamente feos, komo lodo.
2- La mizma koza ke okurre kon las plantas okurre i kon la agua. Si avlas palavras dulses i kerensiozas a las plantas, eyas se arebiven. Si las gritas i las kifureas, se mueren. El Dr Emoto topo ke palavras de amor trokan las molekulas de la agua en diamantes, i palavras de odio las trokan en lodo. Esto kiere dizir ke si avlamos siempre a los otros kon palavras dulses les trokamos sus molekulas en diamantes. Si todos se avlan kon amor i kerensia, sus molekulas se trokan en tan forma ke nunka avra gerra despues. Ke bueno si esto lo entendiya el mundo entero i kudiavan lo ke kitavan de la boka!
3- El Dr Emoto tambien topo ke las molekulas de las aguas yenas de polusyon se pueden trokar en diamantes si se aze orasion i si se da sintimientos de amor. La konsekuensia de esta topadura es importante porke si azemos muestras orasiones kada dia de korason i si avlamos palavras pozitivas mos se trokan las molekulas de las aguas ke tenemos en el puerpo!
4- El tipo de muzika tambien aze una diferensia en las molekulas de la agua. La muzika klasika i melodioza transforma las molekulas en diamantes. La muzika heavy metal ke es mas bruido deskonfortavle ke muzika per se, las transforma en formas feas i desgrasiadas. Porke dizen ke kale ke las prenyadas eskuchen muzika de Mozart o otros klasikos? Si todas las aguas de su puerpo se transforman en aguas kon molekulas de diamantes, imajinavos el bien ke le azen al fetus en el sako yeno de agua! I la muzika heavy metal kualo evoka? Evoka los inyervos, la birra, el kolor kolorado, la agresividad i la inimidad! Ama una muzika spiritual ke evoka? La serenidad, el repozo, el kalmo i la kerensia por el mundo entero.
Alora esto todo ke kyere dizir? Ke se puede azer para transformar las molekulas de las aguas de muestros puerpos? Muy simple. Puedemos eskrivir las palavras «Amor», «Kerensia», «Serenidad» ensima las boteyas de agua ke tenemos en kaza. Siempre ay ke kudiar komo estamos avlando a lo manko a los miembros de muestras famiyas, a muestros amigos etc. Siempre tener buenos sintimientos para los otros. Todos resienten las enerjias pozitivas ke emanan de los de enfrente i dezean responder en la mizma forma.
Si keresh meldar mas profundamente sovre esto, meldad los livros del Dr Masaru Emoto, «The message in the water», ke fue tradusido en munchas linguas. Vos vash a enamorar.
Ke tengash todos un anyo muevo yeno de salud, de alegria, de amor i ke vuestras molekulas se transformen en diamantes. Shana tova.
Ansina s’eskapa este ermozo artikolo de Karen Sarhon en la primera pajina del Amaneser de septyembre.
Para dizirvos la vedra, yo no konosiya ni la egzistensya ni los lavores de este Masaru Emoto, ke se muryo el anyo pasado.
Pishin me fui a meldar lo ke se diziya sovre internet, i por empesar sovre Wikipedia, a propozito de este ombre i de su ovra. Ansina me ambezi ke si doktor fue, no tuvo su diploma de doktor de una universita publika, ama obtuvo un diploma de doktor en medikeriya alternativa de una universita de medikeriya alternativa ke se topa en Indya.
En vedra, asigun lo ke dizen sovre Wikipedia, el mismo atorga ke no es un syentifiko. I de fakto los syentifikos no dan dinguna valuta a los lavores de Emoto, ke no sigyeron las reglas de la bushkedad syentifika.
Yo vos teniya de akavidarvos sovre esto, ama tengo tambyen de akodrarvos kuanto fueron kontestados los lavores de Louis Pasteur, ke no era doktor en medikeriya. De otra parte, ke una koza no es establesida sientifikamente no kyere dizir de manera sigura ke es koza falsa. Una koza shupeliya puede ser yene vedra.
Esto dicho, i si se pensa bien, puede ser mijor seriya ke los lavores de Emoto sean yerrados. Deke? Porke si se puediya mezurar syentifikamente, mirando la agua o kualkyer otra koza, kualo es ermozo i kualo no es, kualo es byen i kualo es negro, seriyamos un poko komo en el livro El mijor de los mundos, de Aldous Huxley.
No es porke las vakas dan mas leche kuando oyen tango ke kuando oyen jazz ke el tango es mijor del jazz, i ke mozotros devemos solo oir tangos.
Ke un ombre pueda dizir a una mujer ke la kyere byen sin ke eya pueda meldar en la agua kuanto la kyere…
I, sovre todo, el poder de la orasyon me parese dever kedarse en el dominyo de la fey, i no mezurarse asigun la forma de la agua.
Esto dicho, no kale pensar ke lo ke vos meldi agora es la sola koza de meldar en el Amaneser de septyembre. Komo syempre, kada artikolo es yeno de savrozor, i komo tuvimos aze solo dos o tres diyas de esto la fyesta de Rosheshana, me vo azer un plazer de meldarvos un artikolo de Matilda Koen-Sarano (ke no tengo menester de prezentarvos, syendo ke ya meldi a esta radyo munchos e sus artikolos. En mas de sus artikolos, Matilda eskrivyo un alay de livros konsagrados a los djudeo espanyoles i a sus lingua, inkluyendo diksyonaryos). En el artikolo de Matilda ke vos vo meldar, mos konta sus rekodros de Rosheshana intitolados «Rosh Ashana en la kaza de mis djenitores». Para mijor entender sus rekodros, kale saver ke Matilda nasyo en Italia.
«El primer rekordo de Rosh Ashana lo tengo de kuando yo tinia kuatro anyos i estava kon mi madre, mi nona i mi ermanika en Pesaro, ande mos fuimos para reskapar de las persekusiones rasiales.
El papa estava deinda en Milano, lavorando en la Komunita djudia, ma kuando entraron los Almanes en Pesaro i sus komando fue mitido al lado de la kaza onde moravamos, vinieron a avizar a la mama ande la Sinyora Marina ande moravamos, ke estavan bushkando a los djidios.
Pishin arivo mi padre de Milano kon el tio Arturo, tomo un’araba kon un azno, mos metio enriva a mozotros kon lo poko ke tiniamos, i mos mitimos en viaje para Mombaroccio, ande riusho a alkilar un ahir en negro estado, de un kazalino de nombre Igino Ciaffoni, al kual deskuvrio ke eramos djidios. El no lo revelo nunka, mizmo en los dias mas trajikos de la muerte de mi nona.
Este viaje de Pesaro a Mombaroccio lo izimos viernes de Rosh Ashana. Komo lo sé yo kon sigureza? Porke me akodro ke en el kamino vimos al bodre de una kaleja una ijika albina, ke estava vendiendo agranadas.
Disho la mama al papa: «Alfredo, dile al ombre ke kede la araba, ke kero merkar dos agranadas para la sigunda noche de Rosh Ashana!»
El ombre kedo la araba, i mi mama merko la presioza agranada, i ansi tuvimos kon kualo azer «sheeheyanu», sigun las reglas de muestra tradision.
Es enteresante ke dingun otro en famiya no se akodra de este partikolar, i solo yo no mi ulvidaré nunka de la ijika albina al bodre del kamino vedre, kon en mano las agranadas koloradas.
Un anyo pasimos en este kazal pidrido, en una situasion de espanto i de mankura de lo esensial, ma mis djenitores izieron de todo para mantener muestros uzos i kostumbres, i sovre todo muestras fiestas.
Kuando eskapo la gerra i tornimos a Milano, empesimos kon difikolta la vida de kada dia.
Rosh Ashana tinia en la kaza de mis djenitores una savor partikolar i la tiene en mi kaza tambien. La primera koza ke se deve aprontar kon kura es el Seder de Rosh Ashana, ke tiene una grande emportansa para los sefaradis. Las kozas ke la patrona de kaza deve aprontar son los yirasones (de la bindision «yei ratson», ke se dize sovre kada koza ke komposza el Seder, ke se aze antes de komer).
Enriva la meza se meten datiles, kuchunduria, kalavasa, prasa, mansanas i miel, kavesa de pishkado i mas. La sigunda noche mozotros metemos i agranadas, komo fruto muevo, para dizir «sheeheyanu». Kada koza tiene su sinyifikasion simbolika i su beraha.
Komiendo la kavesa de pishkado se dize: » Para ke seamos kavesa i no kola». La mansana kon miel se kome diziendo: «Ke tengamos una anyada buena i dulse».
El «amotsi» se aze kon asukar en lugar de sal.
La kumida de la fiesta era kurada en manera partikolar i avian sus platos tipikos, aprontados kada anyo, sin trokar. Las fritadas de prasa, de espinaka, de kalavasika i de kalavasa no devian mankar sovre la meza de Rosh Ashana. El poyo, ke no se komia el anyo entero, a parte las fiestas, estava naturalmente en el menu. Para la fiesta se aprontavan los marunchinos de almendra , en vista de las vijitas de los ombres. Komo de fakto, saliendo del kal, en Turkia los ombres pasavan por las kazas de los parientes, para dizir «Anyada Buena», i tornavan a kaza kon las aldukeras yenas de marunchinos ke no avian pudido komer.
Mozotras, en Milano, mos ivamos al kal kon los fostanes muevos ke la mama mos avia kuzido de los pantalones de mi papa, i todos mos dizian «Ke ermozo fostan muevo!» i era verdad.
Para saludar diziamos «Moadim le simha». La repuesta era «Hagim uzmanim lesason». I esto es lo ke vos sueto agora: «Moadim lesimha».
Ansina s’eskapa este esmovyente artikolo de Matilda Koen Sarano. Puede ser mas esmovyente para mi ke para otros, porke kuando mos avla de la yegada de los Almanes, me akodro del mes de septyembre 1943 i de muestra fuida kon espanto de la zona de okupasyon italyana. Kuando mos konta su viaje sovre la araba de un azniko, yo me akodro kuando estavamos sovre una araba travada por un kavayo akompanyado de su amigo azniko ke no lo deshava…
I kuando Matilda mos konta la vijita de los ombres en kada kaza, me akodro de tener yo mismo meldado aki, en mi emisyon del 25 de septyembre 2008, los rekodros de Rachel Bortnick, la ke fundyo Ladinokomunita, travados de la gazeta Ke haber. Eya mos konta de su sivdad de nasimyento: Izmir, i vash a ver la semejansa kon los rekodros de Matilda: do la palavra a Rachel:
» El diya de Roshashana, la demanyana kuando saliyan los ombres del kal, aviya un dezayuno grande, kon boyos, burekas, guevos haminados, fritadas i frutas. Despues empesavan las vijitas rituales a toda la paryenté, i todos los amigos i konosidos.
Los ombres se ivan kon los chikos, i las mujeres kedavan en kaza para resivir a los vijitadores. Se tokavan manos de parte a parte, en dezeyandosen «tizku leshanim rabot» (ebreo) o «bonne année» (fransez) o «anyada buena».
(…)
«Siguro ke era verguensa de refuzar de tomar dulse kuando se ofresiya en las vijitas, ma no era posivle de komer tanto dulse en un diya. Por esto, los ombres tomavan los mogados i maronchinos i se los metiyan en una rida blanka i limpya espesyal para esto, i se los metiyan en la aldikera. Despues de tres kuatro vijitas era menester de aboltar a kaza, no solo para repozar un poko, ma tambyen para vazyar las aldikeras antes de kontinuar las vijitas i inchirlas de muevo.
Todos estavan alegres. Las kriaturas resiviyan bastante abrasos de los keridos, vizinos i konosidos. El sol ke briyava en el syelo paresiya komo ke estava alegre i kontente komo mozotros. Ma mas de todo me akodro ke Rosh-ashana en Turkiya mos adjuntava a todos kon un sentimyento de ermandad, de kerermos byen de uno a otro, i de orgulyo i alegriya en muestro djudaismo.»
Sovre estas ermozas palavras de Rachel Bortnick vos desho, dezeandovos un tanith livyano para Kipur ke kaye este myerkoles, i si kyere el dyo vos digo al diya de despues ke va ser el otro djueves!
Edmond Cohen
Paris – Fransya
