Muestra lingua: CCJE Al Syete – 22 DE JANVIER por Edmond Cohen

Keridos amigos, aki toparash el teksto de la emisyon de esta semanada.

Akavido los ke me oyen sovre internet desde paizes ajenos ke aki en Fransya entrimos el alhad pasado en la ora de invyerno, i atrazimos muestras oras de una ora

El program se puede sintir por Internet kada djueves, indo al sityo RADIO – la fréquence juive. Kale tener pasensya i asperar un poko, no se oye pishin.

Saludos a todos
Edmond Cohen
Paris, Fransya

CCJE 22 DE JANVIER

Saludos a todos los oyentes de la emisyon Muestra lingua, la emisyon en djudeo-espanyol fundada por el profesor Haïm-Vidal Sephiha i prezentada agora por vuestro servidor Edmond Cohen, kon Philippe en la kabina.

Keridos oyentes, no puedo empesar esta emisyon sin dezearvos una anyada sivil buena i saludoza (yo digo sivil, ama teniya un primo ke diziya komersyala : es komo keresh !)

Komo a kada vez, vos akodro ke el proksimo atelye de konversasyon de la Asosyasyon Vidas Largas se tendra el martes 17 de janvier, de las dos i medya asta las sinko, al muevo adereso del 17 rue Pierre Semard Paris (9°), arriva del Square Montholon, métro Cadet. La entrada es la del lokal i no la del han.

Esto dicho, mi emisyon de oy la kyero konsagrar a la manifestasyon ke se va tener el alhad 22 de janvier, de las 2 i medya a las 6 de la mediudiya, en la Mayoriya del onzen arrondissement de Paris, Place Léon Blum, métro Voltaire, por prezentar a la djente la organizasyon yamada CCJE Al Syete, kijo dizir Sentro Kultural Judeo Espanyol . Deke Al Syete ? Porke, si kyere el Dyo, se va avrir en 2013 este sentro kultural al 7 de la rue Popincourt en Paris, ama entremyentres va empesar sus aktividades en 2012 en el lokal de la UISF ande tenemos muestros atelyes de konversasyon.

Esta manifestasyon del 22 de janvier va ser muy importante, i tyene por eskopo de arrekojer lo mas muncho de djente de los Muestros, ama kale empesar por el empesijo, i akodrarvos syertas kozas ke ya vos dishe en otras emisyones, sovre la istorya de los djudeo-espanyoles en Paris.

Komo ya vo lo dishe aki, es en un 17 de marso 1909, aze mas de syen anyos, ke 35 djudyos de los muestros, vinidos del Imperyo osmanli, aunidos en una asosyasyon yamada Association Cultuelle Orientale Israélite de Paris, alkilaron un lokal ke serviya de sinema, el sinema ke aviya sido inventado 14 anyos mas antes, para fraguar en este lokal un kal. De 35, se toparon 155 en septyembre del mismo anyo 1909 para las fyestas de Tishri.

Ya konti esto todo en la emisyon ke ize aki aze dos anyos, el 14 de janvier 2010. Ama era importante de akodrarlo, porke desde 1909, el 7 de la kaye Popincourt kedo un lugar de los Muestros, syempre avyerto afillu durante la okupasyon almana : kale dizir ke el kal Popincourt no fue el solo de los kales ke kedaron avyertos, i ke entre tantos ke kedaron avyertos uvo el otro kal de los Muestros, el kal Berith shalom de la rue Saint-Lazare. I esto es para mi un egzemplo ekstraordinaryo de rezistansya spirituala djudiya, ke kosto muy karo, i kale syempre guadrar en muestra memorya i en muestro korason los giborim ke pagaron esta rezistansya de sus vidas, komo Behar Parali, Elie Danon, Robert Bahsi, o el hazan Israel Razon, ke aziya los ofisyos del kal Popincourt al lado de Shapat Mizrahi. Dainda oy no se ande estos ombres toparon el koraje de kedarsen en sus lugares, savyendo ke la polisiya estava bushkando a kada djudyo. I si el kal se kedava avyerto, esto kyere dizir ke aviya djudyos para irsen a los ofisyos, i estos tambyen tuvyeron un koraje ke fuersa la admirasyon.

El 7 de la rue Popincourt no se kedo syempre un kal, porke en 1962 se fraguo kaye de la Roquette un muevo kal mas grande, yamado Don Isaac Abravanel, i el lokal de la kaye Popincourt se izo restorante de baldes para los proves (yamado la kantina), administrado por la asosyasyon UISF, asta ke el Consistoire, ke se aviya echo proprietaryo de las paredes de este lokal, i ke teniya menester de paras, dechide en 2004 de venderlo a kinezos interesados por azer aya sus echos de konfeksyon.

Los dirijantes de la UISF (su prezidente Jacques Saltiel, su vise-prezidente Jacques Mitrani, vuestro servidor Edmond Cohen, sekretaryo Jeneral, i su trezorero Marcel Gotlib) mos fuimos en djuntos en julyo 2004 al Consistoire para ver su Prezidente, ke era en este tyempo Moïse Cohen, para protestar kontra este proyekto de vendita, i me akodro ke tomi la palavra dizyendo a estos ombres kon kipa del Consistoire : « Y levantosse rey nuevo sobre Egypto, que no conoscio a Yoseph ». Me paresyo ke estas palavras los tokaron, i mos aprometyeron de pensar sovre la koza.

I un mez a penas despues de esta reunyon, una noche de agosto 2004, un atavanado metyo el fuego al lokal, ke por siguro se kemo kon toda la mobilya del restorante.

Komo se dize en franses : « A chaque chose malheur est bon (para kada koza desgrasya tyene bueno) ». Este fuego tuvo lo bueno de impedir al Consistoire de topar kinezos para merkar un lugar kemado, i todos los Muestros aunidos aprovecharon esta akalmiya para mobilizarse en favor del mantenimyento del lokal para los djudeo-espanyoles, lokal ke asta oy kedo serrado, dinguno tenyendo bastante paras para azer los lavoros de rekonstruksyon.

Se fundo una asosyasyon dirijida por Claire Romi, yamada Al Syete, ke lasdro para topar ayudos tan de las otoridades publikas, sovre todo la munisipalidad de Paris, komo de las ovras djudiyas, entre las kualas la Fundasyon para la Memorya de la Shoa.

Finalmente esta fundasyon se deklaro dispuesta a ayudar a los djudeo-espanyoles, kon dos kondisyones, la primera ke sean todos aunidos en una sola asosyasyon, la sigunda ke prezenten un proyekto de lo ke se va azer en el lokal del 7 rue Popincourt una vez eskapados los lavores de reparasyon.

Las asosyasyones djudeo-espanyolas mos mirimos i mos kontimos :

– UISF (Unyon de los Israelitos Sefaradim de Fransya) : uno

– ACIP Don Isaac Abravanel (la asosyasyon del kal de la Roquette) : dos

– Centre Culturel Popincourt Al Syete : tres

– Vidas Largas : kuatro

– Judeo-Espagnol A Auschwitz : sinko

– Aki Estamos : sesh

– Muestros Dezaparesidos, ke ya era una asosyasyon kompozada de todas las otras : syete.

Lo mas kolay fue de toparmos un nombre i un prezidente. El nombre : « Centre Culturel Judéo-Espagnol. Al Syete », amostrando ke keremos avrir un sentro kultural (i tambyen sosyal por la UISF) i ke este sentro no se tope en kuakyer lugar, ama en el lokal del 7 rue Popincourt, ke kedo un sentro judeo-espanyol durante mas de un siglo.

Topar un prezidente fue tambyen muy kolay, syendo ke todos fuimos d’akodro para elijir a esta funksyon el haham Daniel Farhi, ombre de grande valor, reputado i estimado de todos, i ke se aviya metido desdel empesijo a muestro lado para la defensa del proyekto. Alhad pasado me ambezi ke veniya este mismo diya de ser dekorado komo Zabit de la Lejyon de Onor (kavayero ya lo era desde 1993), lo ke meresyo mil vezes, no solo por su lavoro de haham, ama tambyen por su lavoro por la memorya de los deportados de la Shoa.

Muy kolay fue tambyen de nombrar a Haïm Vidal Sephiha komo Prezidente de Onor, todos savyendo ke sin el ke desperto el primero a los djudeo-espanyoles, nada iva a akonteser.

A la rovez lo mas yuch fue de topar entre mozotros kualo azer i no azer en el lokal del syete una vez reparado, i kuanto teniyamos menester de paras para esto. Los dirijantes de la asosyasyon Aki Estamos pensaron tener menester de muncho mas paras ke la Fundasyon para la Memorya de la Shoa era dispuesta para darmos, i por esta razon se salyeron de muestra mueva asosyasyon. Todos los otros kedimos kon proyektos por syerto yenos de ambisyon, ama yene mas baratos.

Agora tenemos de dar la prova a la Fundasyon ke meresemos de ser ayudados, savyendo ke kual ke sea el ayudo de la Fundasyon, no sera bastante a la vez para pagar los lavoros de rekonstruksyon i para pagar los gastos de kadal diya. Tendremos menester del ayudo de todos, i por esto dechidimos de azer una grande manifestasyon en un lokal bastante ancho para resivir a lo mas muncho de djente posivle, i aya de dar a entender lo ke keremos azer, i tambyen, por siguro, de oir las ideas de kada uno.

Estash todos, keridos oyentes, kombidados de venir el alhad 22 de janvier 2012, a las 3 de la mediudiya , en la Sala de las Fyestas de la Mayoriya del onzen arrondissement de Paris, Place Léon Blum, métro Voltaire. Vash a ver el filmo « Sépharades d’ici (Sefaradim de aki) » echo en 1991 en la male de la chika Turkiya.

Despues, o antes, vos prezentaremos muestros proyektos, i tambyen penso ke puede ser vash a ser interesados de ambezar ke avra un bufe djudeo-espanyol. No mos puedemos arrekojer sin unas kuantas borrekas, imposivle !

Esta reunyon sera de baldes i avyerta a todos.

No vos tengo de dizir aki todo lo ke tenemos las entisyones de azer en muestro proyekto, esto es muestro Prezidente Daniel Farhi ke lo dira el 22, ama yene me parese bueno de darvos unas kuantas luzes sovre muestras direksyones :

En primero, kale dizir ke a lo mijor, los lavoros de rekonstruksyon, si se pueden azer, no seran eskapados antes del anyo 2013, i ke en asperando alkilimos syertos diyas en el lokal de la UISF 17 rue Pierre Semard, para tener aya muestras aktividades en 2012.

Una vez eskapados los lavoros, kualo azer en este lokal ? Ya savemos lo ke no se va azer : no se va azer mas un kal, syendo ke desde 1962 egziste rue de la Roquette el kal Don Isaac Abravanel, fraguado djustamente para remplasar el del 7 rue Popincourt, ke era demazyado chiko.

Tampoko no se va azer mas un restorante, porke por razones teknikas no va ser mas posivle de fraguar una kozina de benadam. Para arrekaintar, si, ama para gizar, no.

Mozotros de la UISF, (kuando digo mozotros, kale azer dikat : en vezes avlo en tanto ke myembro del CCJE, en vezes de la UISF, en vezes de Vidas Largas ; aki avlo en nombre de la UISF) mozotros, dunke, de la UISF, ke tuvimos aya un restorante para los proves mas de kuarenta anyos, keremos mantener, afillu si va ser de otra manera, muestra ovra sosyala. Por egzemplo, kon komida pronta de dar, o bonos de merkar komida ande kyere el prove, ay munchas posibilidades.

Ama, komo su nombre lo amostra, keremos todos (agora avlo en nombre del CCJE) tener aya un sentro kultural oryentado en munchas direksyones, entre las kualas el mantenimyento de la memorya de la istorya del kal i de su male, antes, durante, i despues de la gerra. A mi, komo vos dishe, me parese importante de guadrar prezente la memorya de estos giborim ke vos dishe, ke mantenyeron el kal avyerto en las oras las mas pretas.

Entre las aktividades previstas para 2012, tendremos de selebrar, en kolaborasyon kon la Federasyon de los Ijos i Ijas de Deprtados Djudiyos de Fransya, en el kuadro del setenten aniversaryo de las deportasyones de 1942, el treno 44 del 9 de novyembre 1942, dicho el treno de los Gregos, ke yevo en deportasyon a 900 djudeo-espanyoles, segido de otro treno kon 300 otros desmazalados de los muestros.

Esto dicho, muestro dever sera de mirar no solo detras de mozotros, ama tambyen delantre. Lo mas yuch, ama lo mas menesterozo, va ser de interesar a los mansevikos para ke eyos tengan la gana de mantener muestra kultura despues ke mozotros no estaremos mas aki. Muestra kultura es muestra lingua, muestras kostumbres, muestros gizados, ama tambyen muestros eskritos i la memorya de los ke los eskrivyeron, entre otros el Meam Loez i sus tredje autores, o los eskritos syonistos eskritos en muestra lingua por Yehuda Alkalay, ke pokos konosen. Esta toda rika kultura se deve de ser mantenida para muestra mansevez despues de mozotros.

Korsos, atelyes, livros, konferensyas, vijitas de chikos, el lavoro es yuch, ama , komo uvyera dicho Rabi Hillel, si no lo azemos mozotros, kyen lo azera ? I si lo azemos solo para mozotros, ke semos ? I si no lo azemos agora, kuando ?

Dos byervos para prezentarvos en muy kurto, para los ke no las konosen byen, las sesh asosyasyones aunidas en este proyekto :

La UISF, Union de los Israelitos Sefaradim de Fransya, dirijida oy por Jacques Saltiel, fue fundada en 1919, i su rolo fue syempre a la vez kultural i sosyal. Antes de Jacques Saltiel, fue muncho tyempo dirijida por su primo Joseph Nahmias, ke lavoro tambyen para munchas otras kozas, entre las kuales el Sentro Rashi, ke es, se puede dizir, su ijiko.

El ACIP Don Isaac Abravanel, dirijido por Serge Benhaim, es la Asosyasyon ke se okupa del kal de la rue de la Roquette i de sus ovras. El tambyen se okupa de dar de komer a los proves, komo lo aziya la UISF asta 2004 i no lo aze mas syendo ke su lokal esta kemado i serrado.

El Centre Culturel Popincourt Al Syete, asosyasyon dirijida por Claire Romi, es la asosyasyon ke se peleo para mantener la memorya de este lokal i luchar para ke no sea vendido.

Por lo ke es la Asosyasyon Vidas Largas, dirijida por el Profesor Haïm-Vidal Sephiha, no tengo grande menester de prezentarvola, syendo ke ya la konosesh, keridos oyentes, es la ke tyene por eskopo de defender muestra lingua, lo ke ago aki a la radyo en su nombre i ke izo antes de mi muestro prezidente durante 25 anyos. Me parese ke no se puede defender muestra kultura si no se lucha para el mantenimyento de su lingua.

La asosyasyon Judeo Espagnol A Auschwitz, tambyen dirijida por el Profesor Sephiha, se fundyo al empesijo par obtener en el monumento de Birkenau una laja eskrita en djudeo-espanyol al lado de las otras. Una vez este lavoro eskapado i ganado « de alta lucha », komo dizimos en franses, en 2003, i esto grasyas al ayudo de Michel Azaria, la asosyasyon no se kedo, pensando ke puediya guadrar el eskopo de mantener por livros i konferensyas la memorya de todos los djudeo-espanyoles matados, por la grande mayoriya, en Auschwitz.

No kale konfundir la asosyasyon Judeo Espagnol a Auschwitz kon la asosyasyon Muestros Dezaparesidos, dirijida por Alain de Toledo, ke tyene mas o menos el mismo eskopo, ama limitado a los djudeo-espanyoles de Fransya. Digo limitado, ama limitado no kyere malorozamente dizir ke se trata de pokos. Fueron miles, i el lavoro va surear munchos anyos.

Kon esto me vo kedar oy, dezeando ke mos topemos muy munchos en djuntos el 22 de janvier .

I entremyentres vos digo al djueves ke vyene, si kyere el Dyo !

Edmond Cohen