Muestra Lingua: BYZANCE, CONSTANTINOPLA, ESTAMBOL, I SUS DJUDYOS

 
Keridos amigos, vos do el teksto de la proksima emisyon del programa.
  
El program se puede sintir por Internet kada djueves, indo al sityo RADIO – la fréquence juive . Kale tener pasensya i asperar un poko, no se oye pishin.
      

Saludos a todos
Edmond Cohen – Paris, Fransya     

BYZANCE,  CONSTANTINOPLA, ESTAMBOL, I SUS DJUDYOS 

Saludos a todos los oyentes de la emisyon Muestra lingua, la emisyon en djudeo-espanyol fundada por el profesor Haïm-Vidal Sephiha i prezentada agora por vuestro servidor Edmond Cohen, kon Philippe en la kabina.

Komo a kada vez, vos akodro ke el proksimo atelye de konversasyon de la asosyasyon Vidas Largas se tendra el djueves ke vyene 2 de desyembre, (primer diya de Hanuka) de las dos a las kuatro i medya-sinko, en el Centre Communautaire, 119 rue Lafayette Paris (10°) métro Gare du Nord o Poissonnière.

Para oy, me demandi de kualo avlarvos, en primero pensi avlarvos de los fabrikantes i merkaderes de teshido (lana, seda, algodon) del imperyo osmanli en jeneral i de Selanik en partikolar, ama me demandi si vos iva enteresar, i despues troki de idea i vos vo avlar de la sivdad de mis paryentes, kyero dizir Estambol : la istorya de la sivdad, i la istorya de sus djudyos.

En vedra, la istorya de Estambol se komparte en kuatro epokas, i tuvo tambyen kuatro nombres, ama no kale kreerse ke los kuatro nombres korresponden a las kuatro epokas : es un poko mas komplikado:

Primera epoka : le epoka grega. Los ke fundaron a la sivdad en 667 antes del kristo, i ke eran gregos, la yamaron Byzance. La sivdad de Byzance se topava en la parte evropea del Bosfor, a la punta sur, i sovre la vanda sur de la Kuerna de Oro. Aya se topan agora, para los ke konosen Estambol, el palasyo de Top Kapi, Aghia Sofya  i las grandes meshkitas Suleymaniye i Sultan Ahmet. Esto es para ke sepash de ande avlo, ama ya entenditesh ke todo lo ke vos dishe fue fraguado muncho mas despues. La epoka grega  va turar menos de 500 anyos, asta los 200 antes del kristo, kuando los Romanos van a konkistar la sivdad. Fin de la primera epoka, la epoka grega de Byzance.
 
Sigunda epoka, muncho mas larga ke la grega, la epoka romana, ke va turar de 200 antes del kristo astal 29 de mayo de 1453 despues del kristo, kuando los osmanlis tomaron a la sivdad, ke desde 330 despues del kristo no se yamava mas Byzance, ama Constantinopla.

Antes 330 Byzance kontinuava de yamarse Byzance de basho de los Romanos. A la muerte del emperador Commodo en 192 despues del kristo, uvo gerra sivil i Byzance no tomo el buen partido, i Septimo Severo, el muevo emperador de Roma, enserro a Byzance i  la tomo despues de tres anyos de rezistensya de los Byzantinos. En primero se amostro muy duro, ama despues, oyendo a su ijo Caracalla, la embelesyo i le dyo un muevo nombre : Antoninia, asigun su ijo Caracalla se aziya yamar Antoninus. Ama este nombre no tuvo sukseso, i pishin despues de la muerte del emperador Caracalla, la sivdad tomo de muevo su nombre de Byzance.

En 324, el emperador romano ke suve al poder en Roma se yama Constantino. Este emperador es muy importante en la istorya romana en jeneral i en la istorya de Estambol en partikolar, porke va azer kuatro kozas :

La primera, en avril 313, kuando dainda kompartiya el poder de emperador kon Licinius, aviya dado, por el Edito dicho de Milano, libertad de relijyones a todos, inkluyendo los kristyanos.

La sigunda, en 324, kuando toma el poder solo, dechida de embeleser la sivdad de Byzance para morar en eya i azerla mueva kapitala del Imperyo, sigunda Roma, i mas sigura ke Roma menasada por los barbaros.

La tresera, el mismo anyo 330, da a Byzance el muevo nombre de Constantinopolis, la sivdad de Constantino, ke va ser yamada Constantinopla. De este diya no se devriya mas avlar de byzantinos, syendo ke no uvo mas Byzance. I de fakto, este byervo no se uzo mas. Es solo en la epoka moderna ke syertos istoryanos avlaron de imperyo byzantino para yamar lo ke se yamava el imperyo romano de Oryente.

La kuatrena koza ke izo Constantino, en 337, al momento de murir, es de azerse kristyano. Va ser el primer emperador kristyano, i todos los emperadores romanos despues de el, salvo uno, Juliano, ke se abolto al paganismo, van a ser kristyanos.

En 395 muere Theodose, ke era solo emperador del imperio romano, ama a su muerte mete uno de sus ijos, Honorius, al kapo de un Imperyo de Oksidente, kon Roma por kapitala,  i mete Arcadius al kapo de un imperio  de Oryente, kon Constantinopla por kapitala. De este diya va aver dos imperyos romanos, el de oksidente ke no mos interesa oy, i ke va kaer en 476, Roma syendio tomada por los barbaros, i el de oryente, ke, el,  va turar asta 1453, kon Constantinopla por kapitala.

La sivdad de Constantinopla se engrandese a poko a poko, i en 414 el emperador Theodose II fragua una mueva pared de la sivdad, yamada pared de Theodose,  en vez i mas leshos de la de antes, yamada pared de Constantino.

I los djudyos, en esto todo? De ke son kristyanos, los emperadores romanos se amostran muncho mas duros kontra los djudyos ke eran los paganos, afillu si ya vimos komo Hadriano, por enshemplo, tratava a los djudyos de Judea. Ama era la gerra. Los djudyos ke no biviyan en Judea eran kyetos en el imperyo romano, i teniyan los derechos de todo svdadino romano. Las kozas van a trokar a poko a poko kon los emperadores kristyanos, asta ke Thedose II, en 412, echa los djudyos a fuera de la sivdad i los ovliga a morar en una male de la otra vanda de la Kuerna de oro, yene en Evropa, ama al norte. Esta male se yama agora Beyoglu, i antes se yamava Pera. Aya se topa, o se topara mas despues, un merkado de pishkados serka del kual van a morar los djudyos.

No se puede avlar de Constantinopla sin avlar del emperador Justiniano, ke va renyar sovre Constantinopla de 527 asta su muerte en 565. Su eskopo, ke no reusho enteramente, ama ke reusho en grande parte, fue de rekonkistar el imperyo romano inkluyendo el imperyo de oksidente ke no egzistiya mas, okupado por los barbaros. El es tambyen ke izo el grande lavoro de arrekojer en un grande ensemblo todo el derecho romano, el es tambyen ke izo fraguar a la Aghya Sofya, una iglesya monumentala ke despues los osmanlis van a azer meshkita, i la repuvlika turka muzeo.

Enfortese tambyen la pared de Theodose, ke va arrepushar a todos los enemigos asta 1204.

Muy katoliko, se konsidera komo el papas superyor. El es ke mete la fyesta de Noel el 25 de desyembre (antes era el 6 de janvier). Para los djudyos se amostra negro persekudor. De toda manera, ya vos dishe, i esto va ser syempre, los djudyos no son byen tratados por los emperadores de Constantinopla.

Despues de la muerte de Justiniano, los romanos van a pedrer de muevo kaji todo lo ke aviyan konkistado sovre los Barbaros, i son eyos ke se van a topar atakados, en primero por los Persos Sassanides ke enserran A Constantinopla en 627 ama son arrepushados, despues por los Arabos ke atakan por la mar a Constantinopla en 673, ama  eyos tambyen arrepushados por los Romanos.

Esto no va traer la paz, porke Constantinopla va kontinuar a toparse atakada de todas partes. I empesa en los anyos 700 i 800 la epoka de los iconoklastos, lo ke va ser una epoka de persekusyones terrivles ke van azer tanto sufrir a los djudyos ke van kaki dezapareser de la sivdad.  Las kozas se van un poko enderechar al kavo del mueven siglo, ama yene la vida es muy dura para los djudyos.

En los anyos mas despues de 1160, un viajador djudyo venido de Espanya, Binyamin de Tudela, vyene a vijitar Constantinopla. Es tresalido de la ermozura de la sivdad i de la rikeza de los palasyos. Ama kuando avla de los djudyos, despues de ambezarmos ke ay munchos karaitos, mos dize ke los djudyos son muy malorozos, aharvados, mal tratados por los kristyanos.  Dize en ebreo, a propozito de los kristyanos, « mahbidim ulam aleem », lo ke un franses yamado Constantin l’Empereur traslada en latino, en 1633, eksitan el mundo kontra eyos. Vyene un siglo despues el chiko Baratier, onze anyos, un jenyo komo ay uno en dozyentos anyos, ke se puede komparar a Mozart o a Leonardo da Vinci, ke mos dize ke mahbidim no kyere dizir eksitar ama apezgar, i ke ulam no es olam, afillu si en ebreo se eskrive lo mismo, olam, syerto, es el mundo, ama ullam es sus yugo, i ke kale meldar « apezgan sus yugo sovre eyos ».

Aprovecho esta sitasyon para avrir una paranteza ke no tyene nada de ver kon Constantinopla, ama kon Binyamin de Tudela. Kuando ize mi konferensya ay unos tres anyos sovre el, influensado por Baratier, me demandi deke Binyamin eskrivyo tantos yerros, asta demandarse si izo su viaje por vedra. Agora topi un papel de Joachim Lelewel, istoryano polako del empesijo del siglo 19, eskrito para tomar la defensa de Binyamin i dizir ke no es Binyamin ke se yerro, son sus traduktores. En vedra no me paresyo aklarar todo, ama de toda manera me teniya de sinyalarvolo.

Para aboltar a Constantinopla, kale saver ke en 1054 uvo lo ke se yamo el grande schismo, lo ke kyere dizir ke la iglesya de Constantinopla no rekonosyo mas a la otoridad del papa de Roma.

I en 1204, se paso una koza terrivle : Constantinopla fue atakada i tomada por los Kruzados de la kuatrena Kruzada, ke, en vez de luchar contra los turkos o arabes, se metyeron kontra los kristyanos de Constantinopla i izyeron de eyos una matansina enorme. En jeneral los kruzados matavan solo a los djudyos, esta vez los kruzados degoyaron tambyen a miles i miles de kristyanos. La vedra es ke los  Veneziyanos keriyan arrebashar a la sivdad de Constantinopla ke les aziya konkurrensya en el komersyo.

Es un Venezyano ke se va azer en 1204 emperador de Constantinopla, de lo ke se yamo el reyno latino de Constantinopla, komo aviya el reyno latino de Yerushalaïm. Los Romanos se fuyen en Nicee i de aya, 57 anyos mas tadre, en 1261, Michel VIII Paleologo rekonkyere Constantinopla. Ama esto todo aflako muncho el imperyo romano, ke no teniya mas nada de un imperyo. Los turkos , a poko a poko, se komen todo. Empesan por tomar todo Anadol, i en 1355 entran en Evropa, i a poko a poko el imperyo Romano de Oryente se va kedar a ser djusto la sivdad de Constantinopla defendida por sus paredes.

Ya vos konti en una otra emisyon komo el sultan Mehmet II, ke va ser yamado el Fatih, tomo la sivdad de Constantinopla el 29 de mayo 1453, i komo el ultimo emperador romano Constantino XI Paleologo muryo en la bataya. Fin de la sigunda epoka de Estambol, la epoka romana.

En 1453 empersa la tresera epoka de Estambol, ke es la epoka osmanliya, ke va turar asta 1923, kuando Mustafa Kemal va echar a basho el ultimo sultan, i instalar la kapitala de la mueva republika turka en Ankara. Asta 1930, la sivdad kontinua de yamarse Constantinopla, en turko Constantiniye, afillu si en avlando se yama munchas vezes Istanbul, ke los djudyos pronunsyan Estambol. De toda manera, Istanbul va ser deklarado el nombre ofisyal de la sivdad en 1930.

Los djudyos son tresalidos de la yegada de los turkos en Estambol en 1453, en vez de los Romanos ke los persekutavan i los tratavan mal, komo vos dishe. Ya vos ize aki una emisyon sovre los sultanes turkos , en primero Seldjukis i despues osmanlis, ke syempre se amostraron tolerantes verso los djudyos, ke munchos ivan a morar basho la dominasyon turka antes ke los turkos ayegen a Estambol.

Se muere Mehmet el Fatih en 1481, i le suksede su ijo Beyazit 11. El es el sultan de Turkiya kuando, en 1492, los djudyos de Turkiya, yamados Romanyotes i ke avlavan grego komo toda la povlasyon romana de Estambol,  se ambezan ke en Espanya los djudyos son echados afuera. Pishin Moshe Capsali, el gran rabino de Turkiya ke reprezenta la komunidad djudiya frente al poder turko, se va ver al sultan i le arroga ke aga kualkyer koza en favor de los djudyos de Espanya. I no es a vozotros ke vo ambezar el famozo firman de Beyazit II ordenando a todos sus governadores de arrekojer kon bueno a todos los djudyos ke vendriyan en el imperyo osmanli.

I los djudyos de Espanya van a vinir a poko a poko, en primero los djudyos echados de Espanya, despues los djudyos fuyidos del Portugal, despues los bene anusim (yamados marranos por los kristyanos). Inchen males de Estambol, komo Balat i Hasköy, kuando los Romanyotes, komo vos dishe, biven en Pera, serka del merkado de los pishkados, en turko balik pazari, ke los djudyos yaman baluk bazar.

Los djudyos espanyoles traen kon eyos una savidurya ambezada en Espanya, komo la basmaane (imprimeriya) o syertas konosensyas en los teshidos, ets. Al empesijo, los espanyoles i los romanyotes no se mesklan, kada uno tyene su male i su kal. Ama a poko a poko los espanyoles se mesklan entre eyos i tambyen kon los romanyotes ke aviyan pedrido sus kales en estos fuegos komo aviya en Estambol (mi madre , k’este en Ganeden, me kontava komo, kuando era chika, oyia de su kama el bekchi gritando yangin var ! i komo eya era muerta de sar). Al kavo los romanyotes se meten a avlar eyos tambyen en espanyol, ama para la djente se dize ke son baluk bazarlis, manera de dizir ke son romanyotes, i esto afillu si no moran mas en la male del balik pazari.

Esto dicho, no kale olvidar ke, al lado de los djudyos romanyotes i espanyoles, los osmanlis arrekojeron tambyen en Estambol, sovre todo en la male de Pera, a munchos ashkenazim, munchas vezes refujyados de los pogromes de Evropa del este, djudyos de Austro-Ungariya, de Polonya, de Rusiya, ets. Mi madre, k’este’n Ganeden, era de estos.

En la sigunda parte del siglo 16, del tyempo de los sultanes Suleyman el Magnifiko i Ahmet I, los turkos van a fraguar, entre otras, dos meshkitas maraviyozas, la Suleymaniye (1550) i la meshkita mavi (1590).

Los djudyos de Estambol, salvo puede ser en los anyos 1650 del tyempo de Shabetay Tsevi,  tyenen una vida muncho mas kyeta ke los otros djudyos de Evropa, i lo aprovechan para empesar una ovra ke va kedar, kyero avlar del Meam Loez.

Es en Estambol ke Yaakov Khuli empesa en 1738 el Meam Loez, una ovra de komentaryo del tanah ke va tomar 170 anyos para eskrivir, kon tredje hahamim uno despues de otro.

Es en Estambol, la kapitala del imperyo, ke se pasan todos los evenimyentos politikos importantes, por enshemplo, en 1839,1856 i 1876, los tanzimat, politika de reformas i oksidentalizasyon, en 1908 la venida al poder de los djovenes turkos, entre 1918 i 1923 la okupasyon de Estambol por los alyados (fransezes i inglezes), en el mismo anyo la venida de Mustapha Kemal, i kon eya la fin de la epoka osmanliya.

En oktobre 1923, Mustapha Kemal funda en Ankara la republika turka, kon Ankara komo mueva kapitala, i ansina empesa la kuatrena epoka de Estambol, ke no va ser mas la kapitala de la Turkiya, i ke en 1930, komo ya lo dishe, va pedrer su nombre de Constantinopla para yamarse Istanbul.

No vos vo avlar oy de esta kuatrena epoka, de una parte porke ya no tengo mas tyempo, i de otra parte porke ya  konti un pedaso bastante trajiko de esta epoka en la emisyon ke ize aze un anyo de esto, el 10 de desyembre 2009, intitulada Turkiya i djudyos (40-44).

Por esto es ke vos tengo de deshar aki, dezeandovos al djueves ke vyene, si kyere el Dyo!