Muestra lingua: BINYAMIN DE TUDELA por Edmond Cohen

Keridos amigos i amigas,
Sovre Binyamin de Tudela, este viajador djudyo de Espanya ke izo en los anyos 1160 un grande viaje desde Espanya asta Bagdad i buelta por el Kayro i la Sisilya, ize en franses una konferensya de dos oras  el 29 de junyo 2007, por el festival de las kulturas djudiyas en Paris.  Ize tambyen despues, el 11 de oktobre 2007,  una emisyon en djudeo espanyol a la radyo, ama esta vez avli un kuarto de ora i no dos oras. El teksto de esta emisyon era eskrito a la mano kon pluma, i por esto no se topava en mi komputadora. Agora ize una kopya para la komputadora i me ago un plazer de entregarvosla.

Esto kae byen, porke no embiyare esta semana el teksto de mi emisyon de djueves, syendo ke resivire una kantadera. El program se puede sintir por Internet el djueves 17 de marso, indo al sityo RADIO – la fréquence juive.  Kale tener pasensya i asperar un poko, no se oye pishin. 

Kyero dizir tambyen ke, despues de mi konferensya komo de mi emisyon, topi sovre internet una defensa de la vedra de los eskritos de Binyamin.

En el empesijo del siglo 19 Eliakim Carmoly i Joachim Lelewel eskrivyeron en una revista una notice historique sur Benjamin de Tudele, i el teksto de esta defensa se topa en internet. Los ke entyenden el franses lo toparan en indo sovre Google kon los byervos Benjamin Tudele notice historique Carmoly Lelewel.

Saludos a todos 
Kon karinyo
Edmond Cohen
Paris, Fransya 

UN 

BINYAMIN DE TUDELA

El 29 de junyo de 2007, komo ya lo dishe, ize una konferensya en franses sovre Binyamin de Tudela, un haham del siglo dodje ke izo un grande viaje desde su sivdad de Tudela en Espanya asta Bagdad i el Kayro, i ke konto esto todo en un livro eskrito en lashon, ke despues fue imprimado i trezladado en munchas linguas, i entre eyas el franses.

Para los ke no pudyeron venir a oirme, vo aprovar de dizirvos en un kuarto de ora lo ke dishe en franses en dos oras. Esto es vuestro mazal ke no tengo mas tyempo, i ke so ovligado de azerlo kurto.

Ke dizirvos en primero? Me parese ke lo ke kale azer en primero, es amostrar kualo era el mundo para un djudyo espanyol en los anyos 1160.

En primero, la Espanya.

Tudela es una sivdadika de Navarra, kijo dizir al norte de Espanya, ande estan los Baskos. Fundada por los arabos, i tomada en 1119 por los kristyanos empesando la rekonkista, a poko a poko, de toda la Espanya. Ama dainda, kuando bive muestro Binyamin, mas de la mitad de la Espanya esta dainda okupada por los arabos, i aya tambyen ay djudyos. Por egzemplo, en Cordoba, en Andaluziya, ay en el mismo tyempo un haham ke es Rambam, Maimonides. En Tudela, en Navarra, nasyeron otros djudyos muy famozos komo Yeuda Halevi, el ke eskrivyo el Kuzari, i tambyen Abraham Ibn Ezra, famozo por sus komentaryos del Tanah. Se ve en los arshivos de la sivdad ke moravan munchos djudyos en Tudela en estos tyempos, en una male ke se yamava la djuderiya. I los muzulmanos tambyen teniyan su male ke se yamava la moreriya.

El mundo konosido, en estos tyempos, era sovre todo el mundo alderedor de la Mar Mediterranea, i diremos en djeneral ke el norte i el este de la mar eran de los kristyanos, i el sur de los Muzulmanos. A los kristyanos katolikos la Espanya del norte, la Fransya, los reynos de Italya, i a los kristyanos del imperyo romano bizantino, ke no eran mas katolikos desde 1054 kuando se kortaron kon el papa, la Gresya i una parte de la Turkiya inkluyendo Estambol. A los muzulmanos (los turkos seldjukis) la otra parte de la Turkiya, i de muevo a los kristyanos kruzeros el Levanon i Israel. I de muevo a los muzulmanos Ayifton i de manera mas djeneral el norte de la Afrika.

En 1166, muestro haham de Tudela yamado Binyamin Bar Yona, se va de su sivdad i empesa un viaje de syete anyos por Espanya, Fransya, Italya, Gresya, Estambol, las Islas, Kipris, i la costa de Sirya, del Levanon, Israel, Bagdad, i buelta por Ayifton, Sisilya i Fransya. Binyamin abolta en 1173 i konta su viaje en un livro en lashon yamado Sefer Amasaot, «livro de los viajes». Este livro va ser kopyado, i despues, kuando se va inventar la basmaane, los djudyos van a ser los primeros ke van a imprimar este livro. Despues va ser trezladado en varyas linguas. Una de las traduksyones las mijores va ser la traduksyon en franses, echa en 1734 no por un franses, ama por un alman de orijen franseza ama nasido en Almanya, yamado Jean-Philippe Baratier. Lo ke es muy kuryozo, es ke me apersivi ke este Baratier, ke izo un lavoro muy savyo i syentifiko, teniya onze anyos kuando izo este lavoro.

Kale dizir de esta kriatura ke, a 3 anyos, ya saviya eskrivir. No esto avlando de meldar a tres anyos, ama de eskrivir. A los 4, avlava latino kon su padre, franses kon su madre, i alman kon los mosos. A los 7, ya saviya el grego i el ebreo. A los 9 anyos, eskrivyo un diksyonaryo de los byervos ebreos i gregos los mas yuches del vyejo i del muevo testamento, kon komentaryos de 300 a 400 pajinas kada uno.

A onze anyos, komo lo dishe, izo la traduksyon del livro de Binyamin, kon dodje komentaryos ke amostran su syensya tan de la lingua ebrea ke de la istorya del mundo del dodjen siglo.

Despues de esto, kontinuo sus lavoros en teolojiya, en matematika, en astronomiya, ets. Aviya empesado de estudyar la eskritura ejipsyana (los yeroglifos) kuando se muryo en 1740, a la edad de 19 anyos.

Por dizir la vedra, empesi por interesarme al haham djudyo, ke eskrivyo en lashon el livro de su viaje ekstraordinaryo, ama despues me enteresi mas muncho al ke lo traslado en franses a onze anyos.

Ama agora kale aboltarmos al viajador. Este Binyamin mos konta su viaje sin dizirmos komo se iva de un lugar a un otro, sino kuando tomava una nave. No digo un vapor, digo una nave, ¡porke en 1166 no aviya dainda vapor! Sovre la tyerra, puedemos pensar ke muestro viajador kaminava sovre una mula…

A kada sivdad ande se va, bushka si ay djudyos, kyenos son, kualos son los mijores hahamim de la sivdad, i mos da sus nombres. Se deve de pensar ke teniya a lo manko tres razones para bushkar kazas djudiyas, i mismo kuatro. La primera razon es ke todo da a pensar ke esto era la razon de su viaje: mirar a los otros djudyos. Sigunda razon, pueder avlar i darse a entender en paizes ande se avlan linguas ke el no konosiya. El deviya avlar lashon kon los hahamim de kada sivdad. I la tresera razon es ke deviya ser mas kolay de topar abrigo, ayudo, kama i komida ande los djudyos. La kuatrena razon es ke komida no es todo: ¿ande topar komida kasher sino ande los djudyos?

I de esta manera, muestro viajador mos konta komo se fue de Espanya al sur de Fransya, asta Marseille ande ay dos komunidades de djudyos, la una abasho, al bodre de la mar, i la otra arriva, en la sivdad fortifikada.

De Marsilya suve sovre una nave i se va en Italya, a Genova, ande ay torres i la djente se aze la gerra de una torre a la otra. I de aya abasha a poko a poko asta Roma, ande ay 200 djudyos, entre eyos unos son ministros del papa. Ama aya en Roma, vyene muy kuryozo: mos konta sovre palasyos de los reyes romanos, palasyos ke nunka egzistyeron, i no mos dize nada sovre los monumentos ke se ven komo la nariz en medyo de la kara, komo el kolizeo o el Partenon. De tal manera ke uno ke lo melda se puede demandar si muestro viajador se fue por vedra ande mos esta kontando. Si se fue en vedra, ¿deke kontar mintiras?, i si no se fue, ¿deke eskrivir un livro?

Parese ke ya izo un viaje, ama kale meldar kon dikat lo ke mos eskrive, porke todo no es vedra.

Despues de Roma, muestro viajador abasha en Italya, pasando por una sivdad, Sorrento, ande ay petroleo, ke sirve de melezina por la pyel. De aya se va asta Otranto., ande ay 500 djudyos. De aya toma una nave asta Korfu, ande topa un solo djudyo, i de Korfu se va en Gresya, ande reyna el Emperador de Bizansya, Manuel Primero Comnene.

De aya se va a poko a poko a Estambol, la kapitala del imperyo bizantino. Sivdad rika i ermoza, ama ande los Gregos toman ajenos para sus armadas, porke no kyeren kombatir eyos mismos. Ama dainda mankan 300 anyos antes ke los turkos podran tomar la sivdad.

En Estambol, los djudyos no son byen tratados. Biven, mos dize Binyamin, en una male yamada Pera. 900 anyos mas dospues, es aya en Pera ke nasyo mi madre. Ama agora, la mayoriya de los djudyos se fueron de Pera asta Shishli, ama esto es otra istorya…

De Estambol, Binyamin toma una nave ke lo yeva en las Islas de la mar Ejea, i de aya a Rodes i Kipris, ande topo no solo djudyos komo todos, ama tambyen Karaïm, ke azen Shabath no el vyernes a la tadre, ama Shabath a la tadre. Dainda oy ay Karaïm, ke kreen solo en el tanah, i no en el Talmud.

De aya tomo la nave verso la Sirya i el Levanon, ande estan los kristyanos, los kruzeros instalados aya i ke estan en gerra kon los Muzulmanos, ke son turkos seldjukis i arabos. Entre eyos, los asasinos, ke moran en las montanyas del Levanon, i de kyenes todos tyenen espanto, porke vyenen a matar a la djente de noche.

En el Lervanon, Binyamin basha de Biblos a Beyrut, Saïda i Tir, ande los djudyos lavoran el mijor vidro.

Mas al sur se topa Ako, i ya estamos en el Reyno Latino de Jerusalem, ke muestro djudyo yama Erets Israel.

Binyamin se va de Ako a Haïfa, i despues a Cesaree, i despues a Lod ande ay un solo djudyo, i Shomron, ande no ay djudyos, ama ande ay los Shomronim, o Samaritanos.

I a poko a poko, Binyamin ayega a Yerushalaïm, ande kedaron solo 200 djudyos. Kale dizir ke los kruzeros ya aviyan matado a todos los djudyos de Yerushalayim kuando tomaron la sivdad. Estos djudyos ke kedaron tyenen un echo de tintura.

Aya, mos dize Binyamin, ay una pared ke es un resto de la del Templo. Todos los djudyos se van a orar a este lugar.

De Yerushalayim, Binyamin se va a Bethlehem ande ay la tomba de Rachel, i despues a Hevron ande estan las 6 tombas de Abraham, Itshak, Yakov, Sara, Rivka i Lea. Se va a Ashdod, Ashkalon, Tveria al bodre del lago, i, mas verso el norte, Dan i Banias. I de aya se va a  Damas, en Sirya, ande mos deskrive komo la agua esta despartida, o komo ay en la meshkita una pared de kristallo, fraguada por arte majiko, kon burakos para kada diya del anyo, i se puede saver la ora grasyas a estos burrakos.

De sirya se va a Baalbek, i despues a Mossul, i, a poko a poko, ayega a Bagdad, ande esta el Kalif. Aya mos konta komo el kapo de los djudyos, kuando se va vestido komo un prinsipe al pajasyo del Kalif, esta kon una eskorta de kavayeros, komo esta resivido kon onores grandes por el Kalif de Bagdad.

Despues muestro viajador mos konta sovre la Persa, sovre las Indyas i mismo sovre la Kina, ama ya se ve ke no se fue a estos todos paizes. Sovre la Kina, mos konta ke aya aze tanto frio ke la mar se yela i las naves son tomadas por el yelo i no pueden mas menearse. Los marineros se mueren de ambre i de sed. Solo se pueden sovresalir los ke se meten en un sako kon un kuchiyo. Vyene un grande pasharo yamado grifo, ke los toma i los yeva a la tyerra para komerlos. Kale avrir el sako kon el kuchiyo i matar al grifo. Esto es lo ke savemos de la Kina por muestro Binyamin. Kale asperar a Marco Polo para saver un poko mas! 

Despues muestro viajador se va en Ayifton, i aya mos konta ke se fue al Kayro, mos konta komo azen los peshkadores para tomar los pishkados, mos konta komo vido las sivdades de Pitom i Pi Ramses fraguada por los esklavos ebreos, ama no mos dize ni un byervo de las piramidas. Es un poko komo lo ke vos dishe para Roma. Es de demandarse si se fue en vedra ande dize.

De Ayifton, toma una nave i se va en Sisilya, i mos konta komo es ermozo el palasyo del rey i sus uertas. I despues abolta en Italya, de Italya se va en Almanya, en vedra se va en sivdades ke oy son de Fransya ama ke en esta epoka eran del Grande Imperyo Romano Jermaniko, i eskapa su istorya por Paris ande mora el rey Louis VII. En Paris, los djusyos son savyos, ermanos i amigos, mos dize Binyamin. I yo adjusto:¡dainda lo son!

Muncho uvyera dainda de dizir, ama esto vyendo ka ya vino la ora de eskapar la emisyon. ¡Buena semana mos de el Dyo!