eSefarad Noticias del Mundo Sefaradi
Keridos amigos, vos do el teksto de la proksima emisyon del programa.
El program se puede sintir por Internet kada djueves, indo al sityo RADIO – la fréquence juive. Kale tener pasensya i asperar un poko, no se oye pishin.
Saludos a todos
Edmond Cohen – Paris, Fransya
UN
ALBERT COHEN, EL ESKRIVANO
Saludos a todos los oyentes de la emisyon Muestra lingua, la emisyon en djudeo-espanyol fundada por el profesor Haïm-Vidal Sephiha i prezentada agora por vuestro servidor Edmond Cohen, kon Philippe en la kabina.
omo a kada vez, vos akodro ke el proksimo atelye de konversasyon de la asosyasyon Vidas Largas se tendra el djueves ke vyene 17 de marso, de las dos a las kuatro i medya-sinko, en el Centre Communautaire, 119 rue Lafayette Paris (10°) métro Gare du Nord o Poissonnière.
La semana pasada vos avli de Albert Cohen mi padre, dizyendovos ke avlariya en otra emisyon de Albert Cohen el eskrivano. I deke no oy ? Si los dos Albert Cohen fueron muy diferentes, yene ay entre eyos kuatro semejansas, a parte ke yevavan el mismo nombre : primera semejansa, nasyeron kaji en mizmo tyempo, el eskrivano en 1895, mi padre dos anyos mas dospues. Sigunda semejansa, fueron los dos sefaradim osmanlis, mi padre de Estambol, el eskrivano de la isla de Corfu. Tresera semejansa, los dos fueron imigrantes en Fransya. Kuatrena semejansa : los dos izyeron estudyos de derecho, i los dos se okuparon de derecho. Kon esto se kedan las semejansas.
Dunke oy vos vo avlar de Albert Cohen el eskrivano, salvo ke, komo vengo de dizirlo avlando de derecho, no fue solo eskrivano, fue tambyen un diplomat, i el mismo disho ke su mas grande orgulyo no le vyene de lo ke eskrivyo, ama de lo ke izo komo diplomat, i sovre todo el akodro internasyonal del 15 oktovre 1946 para la proteksyon de los refujyados. No kale nunka pedrer esto de vista avlando de Albert Cohen, no fue solo un eskrivano, fue tambyen un muy importante diplomat.
Esto akodrado, kale agora kontar un poko su vida. Albert Cohen nasyo el 16 de agosto 1895, en la sivdad de Corfu, en la isla del mismo nombre, ke se topa entre la Gresya i la Italya, i ke aze agora parte de la Gresya, ama kuando nasyo estavamos en el imperyo osmanli. Su papu era prezidente de la komunita djudiya de la sivdad. En su famiya eran fabrikantes de shavon.
Meldi munchas vezes ke su padre i madre dechidaron de fuir de Corfu en 1900, despues de un pogrom. Bushki para saver mas sovre este pogrom i me apersivi ke si es vedra ke uvo un pogrom en Corfu, se tuvo en 1891, kuatro anyos antes del nasimyento de Albertiko, i izo 139 muertos ande los djudyos. Deke su famiya aspero mueve anyos para fuir de Corfu, no se. Lo ke es siguro, es ke se van a instalar en Marseille, i avrir un komersyo de uevos i azete. Su padre mete el chiko ande las relijyozas katolikas, ke lo toman de baldes.
Ke lingua avlava Albert kuando ayego en Fransya a la edad de sinko anyos ? Es ke ya saviya avlar fransez ? No se. Lo ke es siguro, es ke avlava el dyalecto venetsiano de los djudyos de Corfu. Avlando de su madre, Cohen eskrive : « Es la sola falsa felisidad ke me keda, de eskrivir sovre eya, no arapado, kon la muzika ineskuchada de la radyo, kon mi gata, a kyen, en secreto, avlo en el dyalekto venetsyano de los djudyos de Corfu, ke avlava en vezes kon mi madre. Mi impasivle gata, mi ersatz de madre, mi desgrasyada chika madre tan poko kerensyoza. En vezes, kuando esto solo kon mi gata, me aboko verso eya i la yamo mi chika mama. Ama mi gata me mira i no entyende. I me kedo solo, kon mi ridikola kerensya en batallik (en chômage). »
Ama muy presto Albert va aprender no solo de avlar fransez, ama tambyen de eskrivirlo. I por tanto, tyene un aksento tan oryental ke sus kompanyeros de eskola se burlan de el i le dizen ke nunka podra avlar i eskrivir en franses komo eyos. I Cohen eskrive agora « zaten teniyan razon : Bernadet, Miron, Louraille, en supito sus gloryozos nombres me vyenen en memorya. »
El diya de su aniversaryo de diez anyos, el 16 agosto 1905, el chiko Cohen va konoser la peor umilyasyon de su vida, kuando se va azer insultar en publiko komo djudyo por un vendedor de kaye antisemit. Este negro diya va kedar para syempre en su memorya. Despues de la gerra lo va kontar en una revista de Geneve kon el titilo : el diya de mis dyez anyos. I muncho mas tadre, en 1972, lo va salir en livro kon el titolo « O vozotros, ermanos umanos » sitasyon de una ermoza poeziya, la balada de los enforkados, de François Villon, poeta fransez de la Edad Medya.
Cohen entra en este mismo tyempo en el liseo de Marseille, ande se va azer amigo por la vida kon Marcel Pagnol, ke el tambyen va ser despues un grande eskrivano fransez.
En 1914, a la edad de 19 anyos, Albert Cohen se va de Marseille para estudyar el derecho en Genève, en Suisa. Tres anyos despues obtyene su diploma i entra en la faculté de letras ande se keda dos anyos, asta 1919, el anyo ande va obtener, de osmanli ke era, la nasyonalidad suisa. I este mismo anyo 1919, a la edad de 24 anyos, se kaza kon Elisabeth Brocher, una protestanta ke le da una ija, Myriam, en 1921. En este mismo anyo 1921, a la edad de 26 anyos, Albert sale un livro de poeziyas intitulado Paroles juives (palavras djudiyas) .
Vos meldare un muy chiko pedasiko de Palavras djudiyas, ke trasladi del franses :
« Te alavaré, Salvador de los ombres, Yevador de dolores, Israel. Salvador por tus manos, por tus manos torsidas, por tus manos ke los puevlos torsyeron, por tus manos torsidas kon djestos bashos. Salvador por tu espalda, por tu espalda enkorvada, por tu espalda rayada de kolorado, por tu espalda ke los ombres aharvaron. Salvador por tu kara, por tu kara de ijo bohor del Eterno, por tu kara ofresida a los dedos pezgados de los kazalinos….
…Salvador por tus ojos, por tus ojos ke saven, por tus ojos ke vyeron, por tus ojos ke yoraron de los ensultos de las djentoryas, por tus ojos kemados de amor, por tus ojos syegos de amor…
…Alavad a Israel. Alavad a Israel por toda la tyerra ; alavaldo sovre los montes , alvaldo sovre las mares, alavad a Israel.
Alavad a Israel, ombres de la tyerra ; alavad a Israel, prinsipes i reyes, ombres salvados. Todos vendran al diya ke mi puevlo dira.Todos, en un alevantar en djuntos, se aserkaran del Templo ande korre a largos chorros el sol.
Todos kantaran i todos yoraran a tu grande bezo, Israel. »
Se eskrive ke Albert Cohen es un eskrivano suiso de lingua franseza. Es vedra ke fue de nasyonalidad suisa, vengo de dizirlo, i ke paso la mas grande parte de su vida en Suisa. I es vedra ke eskrivyo syempre en fransez.Ama la vedra keda ke sus eskritos kantaron un solo puevlo, i este puevlo no era ni el puevlo suiso ni el puevlo franses, ama syempre i solo el puevlo djudyo.
En 1924, malorozamente, la mujer de Cohen se muere muy manseva del kanser, i el se topa solo kon una ijika de tres anyos.
En 1925, Albert toma en Paris la direksyon de la Revue juive (la revista djudiya), ke tyene en su komité de redaksyon ombres komo Albert Eistein i Sgmund Freud.
En 1926, entra en Genève komo diplomat en el Bureau International du Travail. Aya lavora la demanyana , i despues de medyudiya lavora a eskrivir. En 1930, Albert Cohen sale un romanso intitulado Solal, ke pishin va obtener un grande sukseso i va ser tradusido en todas las linguas. Es en este livro ke por la primera vez vamos azer konosensya kon los ke kedaran en los otros romansos de la vida de Cohen : en primero Solal, ke no es Albert Cohen ama ke le asemeja por munchas partes, su tiyo Saltiel i todos sus primos, entre los kuales Mangeclous (Comeclavos en espanyol)
Cohen eskrive kon muncha kerensya sovre Saltiel i los otros primos djudyos, ama a la vez kale dizir ke se burla de eyos kon muncha krueldad.
Albert Cohen, antisemit ? Munchos se lo demandaron, vamos a verlo mas despues , a propozito de Ezechiel, otra ovra de Cohen eskrita para el teatro. Por siguro no. Ya lo entenditesh kon lo ke vos meldi de sus palavras djudiyas, Cohen no es antisemit. Al kontraryo ! el, Albert Cohen, ama a su puevlo komo una madre ama a su ijo, kuales ke sean sus makas. I kyere ke los djudyos sean amados de los otros komo una kriatura es amada de su madre.
Entremyentres, en 1931, Albert konose una otra protestanta, Marianne Goss, i se kaza kon eya.
Despues de Solal, Cohen es un eskrivano konosido, al punto ke su teatro Ezechiel, eskrito en 1930, es djugado en 1933 en la Comédie Française, el teatro franses nasyonal, lo ke es un onor grande para un eskrivano dainda bivyendo i ke salyo solo dos livros antes. Es esta piesa de teatro ke no va ser entendida del publiko, la va topar antisemit, i en vedra, lo puede pareser. El anyo ande Hitler a tomado el poder en Almanya, salir a Ezechiel no era una buena idea. De toda manera, Cohen se djuro de nunka mas eskrivir para el teatro.
Ocho anyos despues de Solal, en 1938, Cohen sale un muevo romanso, konsagrado a uno de los ombres de su livro Solal, el djudyo Mangeclous (Comeclavos). El ke no konosyo a los djudyos levantinos de su tyempo se kree ke es una karikatura. Los ke, komo yo, konosyeron a estos ombres, saven ke no es una karikatura : es un retrato pintado kon amor.
La gerra se aserka. Desde muncho tyempo, Cohen lucha komo syonisto. El primero de todos los eskritos de Albert Cohen fue eskrito en la revista de Genève en avril 1921, el mismo anyo ke sus palavras djudiyas, i era intitulado Vista kompleta sovre la kuestyon djudiya i el syonismo.
Desde 1938, se puede dizir ke Cohen va deshar atras su karrera literarya, para konsagrarse enteramente a su lavoro de diplomat i de militante syonisto. Kuando empesa la gerra, eskrive al Prezidente del Consilyo Daladier, en kualidad de Karkado de Misyon de la Adjensiya djudiya por la Palestina, para la kreasyon de una Lejyon djudiya ke podriya kombatir, no en la armada franseza, ama al lado de eya, kon bandyera djudiya. Su demanda no va ser achetada, i en 1940 vyenen los Almanes. Cohen se topa en Fransya. Korre a ver el konsul de Inglatyerra en Bordeaux i le demanda papeles para irse en Ingletyerra kon su mujer i su ija. Kuando el konsul se da kuenta ke esta avlando kon el eskrivano que eskrivyo Solal, pishin le da los papeles.
Cohen puede topar un vapor i irse en Ingletyerra, ande se va a ver Chaim Wizmann, kapo de los sionistos, ke toma Cohen komo Konsilyero Politiko del Kongreso djudyo Mundyal. En agosto 1940, Cohen se va ver a de Gaulle para propozarle el ayudo de los djudyos syonistos, i de Gaulle le responde ke el tambyen ayudara al syonismo.
Cohen se menea en favor de los refujyados, myentres ke dos akontesimyentos van a afitar en su vida : la muerte de su kerida madre en 1943 i la separasyon kon su mujer en 1944. Va divorsyar en 1946, el anyo ande va ser firmado el akodro internasyonal del 15 de oktovre sovre los refujyados. Esto es la ovra de Cohen, de la kual lo oyi dizir a la televizyon ke era mas orgulyozo ke de todas sus ovras literaryas.
Por lo ke es de su madre, eskrive en 1943 en la revista La France Libre, en Londres, un Kanto de Muerte, ke dara despues de la gerra , en 1954, el livro intitulado Le Livre de ma Mère (el livro de mi madre) un kapo de ovra maraviyozo sovre el amor de una madre djudiya por su ijo, la suya. La djente, ke lo aviya olvidado komo eskrivano, se apersive ke es uno de los mas grandes.
Entremyentres, en 1955, Cohen se kaza kon una tresera mujer, una djudiya esta vez, Bella Berkowich, ke fue su sekretarya en Londres durante la gerra.
En 1968 Albert Cohen va konoser el sukseso mundyal kon Belle du Seigneur, un enorme livro komparavle a un romanso de Tolstoï, un otro kapo de ovra despues del livro de mi madre, ke aze de Albert Cohen, no solo el mas grande eskrivano djudyo de lingua franseza, asigun mi mas alto mismo ke Elie Wiesel, ama, por siguro, uno de los mas grandes eskrivanos del siglo en el mundo.. A mis keridos oyentes ke no meldaron El livro de mi madre i Belle du Seigneur, les puedo solo akonsejar de korrer pishin a la mas serkana libreriya para merkar estos dos livros, en kualkyer lingua ke sea – an sido tradusidos en todas linguas. El livro Belle du Seigneur entero es un kapo de ovra, ama en este kapo de ovra vos akonsejo de meldar la sena de la seduksyon por Solal de la Bella Ariane. Cohen va ser propozado por el premyo Nobel de literatura. No le dyeron, ama komo lo dishe en mi emisyon de la semana pasada, el va kedar kuando tantos premyos Nobel son agora olvidados.
Un anyo despues, en 1969, parese Les Valeureux (los valyentes) ke en vedra aziya parte de Belle du Seigneur ama fue kortado a la demanda del editor. Tuvo razon. Uvyera sido demaziya pezgado en un solo romanso. Este livro tambyen, konsagrado a los de la famiya de Solal (Saltiel, Mangeclous i los otros) es una haliz maraviya. Vos akonsejo de meldar la letra eskrita por Mangeclous a la reyna de Ingletyerra, ande le konta komo kozer un almodrote, komo Weizman tyene un kuryozo aksento, ets ets
En 1972, parese O vous frères humains, ande Cohen konta su deskuvyerta del antisemitismo este diya del 16 de agosto 1905, el diya de sus diez anyos, ke kedara toda su vida en su memorya, i ke ya aviya kontado en 1945 en la Revista La France Libre kon el titolo diya de mis diez anyos.
En 1977, tyene una entrevista a la televizyon franseza kon Bernard Pivot, ke izo el viyaje asta Geneve para verlo. Cohen lo resivyo kon aba i pantoflas, komo era syempre, el teshpil en la mano.
En 1979, dos anyos antes de morir, Cohen sale su ultimo livro, Carnets 1978, un poko su testamento, ande mos konta su relasyon kuryoza kon un Dyo en ke no kree ama ke revera. « So un ebreo inkonsekuente », aviya dicho a Pivot.
Albert Cohen se muere en Genève el 17 de oktovre 1981, a la edad de 86 anyos, ya va azer unos trenta anyos.
Al djueves ke vyene, si kyere el Dyo! Kon bueno, resiviré a la kantadera Rosy Morali, ke ya vino ande mi emisyon ay unos kuantos anyos, i ke mos kantara ermozas kantikas de muestro folklor.
