eSefarad Noticias del Mundo Sefaradi
Keridos amigos, vos do el teksto de la proksima emisyon del programa.
El program se puede sintir por Internet kada djueves, indo al sityo RADIO – la fréquence juive. Kale tener pasensya i asperar un poko, no se oye pishin.
Saludos a todos
Edmond Cohen
Paris, Fransya
AGUAS/VIDAS, UNA POEZIYA DE H-V SEPHIHA
Komo a kada vez, vos akodro ke el proksimo atelye de konversasyon de la asosyasyon Vidas Largas se tendra el djueves 31 de marso, de las dos a las kuatro i medya-sinko, en el Centre Communautaire, 119 rue Lafayette Paris (10°) métro Gare du Nord o Poissonnière.
El djueves pasado, antes de azer mi emisyon a las kuatro, yo estava en el atelye de Vidas Largas, i kon mi amiga Ruth Arciniega, espanyola i Baska, lavorimos sovre una poeziya eskrita por muestro prezidente el profesor Haïm-Vidal Sephiha. Malorozamente, eramos pokos, i me vino la idea, kon el akodro de Haïm, de azervos konoser tan esta poeziya komo muestro komentaryo, de Ruth i de mi.
Empesare por meldarvos la poeziya, rika i literarya, de Haïm, i despues vo aprovar de komentarvola.
AGUAS/VIDAS
ESPEJO/ESPEJO ?
MAYIM/HAYIM
« Hayim te dimos por nombre
Vidal en Dzhudezmo
Hayim (vidas en ebreo)
El 28 de enero
VIDAS LARGAS KE TENGAS »
ME DEZEAVAN MIS PADRES
« Ke sos dzhudyo i espanyol
Lo ke seras a lo largo de tus vidas
Izho miyo ».
Vidal/Vidas, el Dzhudyo del
Poema de mio Cid
Vidas ke korren komo las aguas
Las aguas mil de avril
Aguas de piedra en piedra
Vidas de punto en punto
Muchiguandosen
Kada punto un kurso
Kada punto, una « bivensia »
Un prezente i un pasado
Bivir, futuro de « bivensias »
Komprar, futuro de kompras
Infinitivos, futuro de « finitivos »
Komo las mocedades del Cid
Si, kada 28 de enero
« El Dio ke te de Vidas largas i dulses ! »
« Ke me bivas sin dolor ! »
Kumpleanyos o kumpleanyo ?
Manan aguas, manan vidas
Aguas korren, vidas korren.
Munchos pokos azen un muncho
Por el ilo se saka el oviyo.
Aguas mansas, aguas bivas
Entre vida i muerte
De la vida.
Empesizhos, mediados, finales,
Vidas son.
Ristras de piedras,
Ristras de vidas
Aguas klaras, nieves, yelos,
Rizas, yoros, lamentos.
Aguas pretas, el abizmo
Aguas negras, el infierno.
El infierno de Auschwitz
Aguas, sangres a chorros
Korren.
Enero 1945
Marchas de la muerte
Entre gritos, entre tiros
« Muerte ke a todos kombidas… »
Dante ! Goya ! ke savesh ?
Trenos de la muerte
Trenos de la Meduza
28 de enero
Sentado sovre kalavrinas
Ken pudiera bivir siete vidas !
« Muerte ke a todos kombidas… »
Asta oy, me deshatesh bivir !
Vidas largas ke tengas ijo miyo !
Kon Baudelaire
« J’ai plus de souvenirs que si j’avais mille ans »
Tengo mas rekodros ke un ser de mil anyos !
Haïm-Vidal Sephiha
Sceaux, 28 de Enero de 2011
Antes de empesar de komentarvos esta poeziya, voz akodro ke fue eskrita por un profesor de linguistika espanyola, diplomado (entre otras linguas) de ebreo, i ke la eskrivyo el diya de su kumpleanyo de 88 anyos, savyendo ke fue deportado en Auschwitz i ke izo la marcha de la muerte serka del 28 de enero 1945, el diya de su kumpleanyo de 22. Voz akodro tambyen ke sus nombres son Hayim i Vidal, i ke Hayim en lashon kyere dizir la vida, ama komo Hayim es un byervo plural, se traslada en ladin por vidas i no vida.
Esto akodrado, agora puedemos empesar :
Mayim/ Hayim: las aguas i las vidas se miran i se responden en lashon. Kaji el mismo byervo, a kada vez al plural. Solo la primera letra troka.
Hayim te dimos por nombre, Vidal en dzhudezmo. No es enteramente la vedra. En vedra, Hayim no es Vidal. Es Vidas. I vamos a ver un poko mas leshos ke ay un djudyo ke se yama Vidas en el Poema de mio Cid. Vidal es un nombre espanyol ke seriya la traduksyon de Haï, el ke bive. El poeta lo dize djusto despues: Hayim (vidas en ebreo).
Dunke muestro poeta Hayim tyene un nombre ke son las vidas, un nombre ke tyene una letra solo de diferensya kon mayim, las aguas. I vamos a ver mas leshos ke va djugar kon esta semejansa de los dos byervos.
El 28 de enero: diya de su kumpleanyo, okazyon para sus padres de dezearle buenas kozas:
Vidas largas ke tengas !Me dezeavan mis padres
El diya de su kumpleanyo es la okazyon para el poeta de akodrarse de sus padres i de lo ke le diziyan este diya de kalor i de alegriya, antes de la shoa.
Vidas largas… Deke un plural? Deke munchas vidas? Los hahamim responden en jeneral : porke el ombre tyene a lo manko dos vidas: la de aki en basho i la de arriva despues de la muerte (kale dizir ke los plurales en ayim son en jeneral plurales de dos: oznayim : las dos orejas, enayim: los dos ojos, ets).
Ama para el poeta, vamos a ver mas leshos ke para el las vidas son al plural
porke son echas de munchos momentos de vida, i kada uno es komo una vida
entera…
Ke sos dzhudyo i espanyol, lo ke seras a lo largo de tus vidas, izho
Despues de 450 anyos, los padres del poeta kontinuan de verlo komo espanyol i no komo turko…Esto a mi me vyene muy kuryozo. Yo nunka entendi este atadijo kon la Espanya ke mos echo kon una punta de pye, i no kon la Turkiya ke mos arrekojo kon umanidad en la ora preta. Mi padre miyo se konsiderava muncho mas komo turko ke komo espanyol, afillu la lingua ke avlava.
Vidal/Vidas, el Dzhudyo del Poema de mio Cid
Komo vos dishe, la haliz traduksyon de Haïm es Vidas, i es ansina, Vidas, ke se yama una persona en el Poema de mio Cid, una ovra espanyola anonima del siglo XII. En jeneral, afillu si el Poema no lo dize, por lo ke se sin tenerlo meldado, la djente entendyo ke este Vidas era un djudyo.
Vidas ke korren komo las aguas
Ansina empesa la komparazon ke aze el poeta entre vidas i aguas. Las dos korren : las aguas korren, i en franses se dize la vie s’écoule.
Las aguas mil de avril. Kale saver ke ay un refran espanyol ke dize: « En avril, aguas mil ». Es para dizir ke en avril ay muncha luvya, ama yene es interesante de ver ke esto no es una traduksyon del ebreo, i ke por tanto las aguas son mil, dunke al plural…
Aguas de piedra en piedra, vidas de punto en punto, muchiguandosen.
De la misma manera ke las aguas korren de piedra en piedra, las vidas van de un momento a un otro, i a kada muevo momento, a kada muevo punto, las vidas se enrikesen de muevas eksperyensas, se muchiguan komo las aguas korriendo de piedra en piedra ke se van enrikesiendo de muevas aguas, de muevas luvyas.
Kada punto, un kurso, kada punto, una biviensa. Es lo ke vengo de dizir: kada muevo momento trae su mueva eksperyensa.
Un prezente i un pasado.
Ansina son las vidas, ama el poeta mos va dizir despues ke el futuro ya esta inkluido en el prezente.
Bivir, futuro de bivensias, komprar, futuro de kompras.
Asigun el poeta, de la misma manera ke el infinitivo komprar es el anunsyo de los aktos ke son las kompras, de la misma manera el infinitivo bivir es el anunsyo de todas las eksperyensas de vida ke el ke bive va konoser mas despues.
Infinitivos, futuro de finitivos
Asigun el poeta, komo lo dishimos, el infinitivo es el anunsyo de aktos ke el yama finitivos. Finalmente, para el, el infinitivo es un akto por venir (futuro)
Komo las mocedades del Cid.
Kale saver ke las Mocedades del Cid (kijo dizir la manseves del Cid, o mas presizamente las mansevezes del Cid) es una pyesa de teatro eskrita en 1618 por Guillen de Castro, ke inspiro a Corneille su pyesa Le Cid, eskrita en 1636. Deke el poeta mos avla en supito de esta piesa? A mi me parese por a lo manko dos razones:
En primero, puede ser, para amostrarmos ke las mocedades del Cid yevavan en eyas la sembradura de lo ke fue despues su vida de ombre maduro.
En sigundo, para amostrarmos ke mismo en la lingua espanyola kristyana ke no tyene de ver kon los djudyos i kon el ebreo, la mansevez se yama al plural las mocedades. Kale dizir ke Ruth Arciniega se demanda si en vedra no uvo una influensa djudiya en esta manera kristyana de eskrivir el espanyol, uzando plurales. I es vedra ke mocedades podriyan ser la traduksyon del ebreo neurim…
Si, kada 28 de enero: « El Dyo ke te de Vidas largas i dulses! Ke me bivas sin dolor!»
El poeta se akodra de lo ke le diziyan sus padres el diya de su kumpleanyo. Nostaljiya, ama puede ser ironiya tambyen, syendo ke, komo vamos a verlo mas leshos, es djustamente el dya de su kumpleanyo de 22 anyos ke sus vidas fueron las mas amargas i kon dolor…
Kumpleanyos o kumpleanyo?
En espanyol moderno, se dize solo kumpleanyos, mismo, komo mo los akodro Ruth, si es el del primer anyo kumplido. Ama el poeta toma la libertad de demandarse si no kale dizir kumpleanyo, puede ser porke 1945 fue un anyo uniko, el del 28 de enero en la marcha de la muerte.
Manan aguas, manan vidas, aguas korren, vidas korren.
El poeta kontinua su komparazon entre aguas i vidas, ke nasen komo las aguas salen de la tyerra i las vidas de la mujer, i despues korren…
Munchos pokos azen un muncho.
Momentos uno detras de otro eskapan por azer una vida entera.
Por el ilo se saka el oviyo
Es un refran de espanyol. El oviyo es la pelota. Travas un ilo, i a poko a poko te vyene toda la pelota ; i ansina es la vida…
Aguas mansas, aguas bivas, entre vida i muerte de la vida.
De la misma manera ke ay aguas bivas i aguas durmyendo, dizimos en franses, de la misma manera ay momentos bivos de la vida, i momentos muertos en la vida misma. Ansina entyendo muerte de la vida.
Empesizhos, mediados, finales, vidas son, ristras de piedras, ristras de vidas
Una ristra es un teshpil. Los momentos de vida, uno detras de otro, son komo las pyedras del teshpil, una detras de otra.
Aguas klaras, nieves, yelos, rizas, yoros, lamentos
De la misma manera ke las aguas son varyas, son diferentes los momentos de vida.
Aguas pretas, el abizmo, aguas negras, el infierno, el infierno de Auschwitz.
De la pretor de las aguas de noche, el poeta pasa a la negrigura de las aguas ke aogan i matan, i las mas negras son las del infierno de Auschwitz, en ke estuvo el poeta.
Aguas, sangres a chorros korren.
En el infyerno, no son solo las aguas ke korren, son las sangres, al plural komo en Bereshit 4, pasuk10, el Dyo dizyendo a Cain: «Boz de sangres de tu ermano (demei ahiha) esklamantes a mi de la tyerra».
Enero 1945. Marchas de la muerte, entre gritos, entre tiros
Este momento de las vidas de Vidal, en su kumpleanyo de 22…ke no podra nunka olvidar.
«Muerte ke a todos konvidas…»
El poeta se refyere a un verso de un poema de Juan de Mena, eskrito en el siglo XV, el siglo de la ekspulsyon de los djudyos de Espanya. El kombite de la muerte es un kombite al kual no es posivle de responder no…i por tanto, al kombite de enero 1945, Vidal respondyo no!
Dante, Goya ! Ke savesh?
Tu, Dante, ke kreites amostrar el infyerno, i tu, Goya, las brujeriyas, ke savesh en vedra de lo ke es el infyerno ? El poeta, el, lo save: aya estava!
Trenos de la muerte, trenos de la Meduza
Estos trenos al ayre en el invyerno yelado de la Polonya de 1945, ande fueron echados los deportados muryendosen, trenos de la muerte, el poeta los kompara a este barko de marineros de la nave la Meduza, ke se batireo en medyo del oseano al empesijo del siglo 19, i ke se kedaron sin bever ni komer, muryendose uno detras de otro, komo lo amostra una pintura de Gericault.
28 de enero. Sentado sovre kalavrinas Kyen pudyera bivir syete vidas!
Haïm fue el ultimo de entrar en el vagon yeno de patladear, i se topava arriva sovre la kavesa de los deportados, ke se moriyan debasho de el, asentado sovre kalavrinas…
Muerte ke a todos kombidas…Asta oy me deshatesh bivir!
Haïm disho no al kombite…
Vidas largas ke tengas, izho miyo…
El dezeo de sus padres, afillu Auschwitz, se realizo.
Kon Baudelaire, J’ai plus de souvenirs que si j’avais mille ans Tengo mas rekodros ke un ser de mil anyos!
Un verso famozo de Baudelaire. Kuantas vidas ya bivyo Haïm…
Kon este verso se eskapa esta tan rika i esmovyente poeziya, i kon eya esta emisyon. Al djueves ke vyene, si kyere el Dyo!
Do las grasias a Edmondi a Ruth, ke me entendieron muy bien.
Kijera enyadir ke mi formasion de kimiko tambien me ayudo para mijor analizar muestra erensia i ke lo ke mas me empusho a abandonar la kimika para emprender estudios linguistikos i literarios fue le muerte de mi baba(zal) en el kampo de Dachau el diya despues de la liberasion deste kampo en 1945, i la muerte de mi mama(zal) , en 1950 despues desu buelta del kampo de Ravensbrück, desgrasias ke me desharon guerfano de mis djenitores i de sus kultura ke kije rekovrar i ke sigo rekovrando en muestros ATELIERS.
Viniendo al atadero de mi padre kon Espanya, kale dizir ke komo turko en la Beljika, tuvo difikultades kon los Beljikanos a la fin de la primera Gerra Mundial i ke entonses, el governo espanyol lo mamparo i ke mi nona de parte de mi madre fue rekonosida komo espanyola a partir de 1924 i mamparada durante la 2da Gerra Mundial. Todo en su kaza era espanyol.
Los plurales ebreos i espanyoles me fasinan i me olvidi de dizir ke al lado de Haim, Mayim,Elohim (plural morfolojiko), Rahamim,ets., tenemos tambien bethulim(virjinidad), plural de
bethulah (virjen), bethulim ke fue ladinado por eskosedades komo si la virjinidad fuera una enkastelyadura muy difisil de konkistar.
Eskosedades es una kreasion de muestros rabinos a partir de eskosa (antigua palabra espanyola), ladino de bethula.
Kuantas rikezas en muestro vedradero ladino(djudeo-espanyol kalko , komo lo yami)! Rikezas ke van pedriendo los ke konfunden ladno i djudezmo( djudeo-espanyol vernakular).
Mah Yafah Yerushatenu!
Haim-Vidal SEPHIHA