eSefarad Noticias del Mundo Sefaradi
Estuve en Siatli sesh semanas, en la parte ke se yama Seward Park. Komo savesh, en esta sivdeka se topan los dos kales sefaradis: Ezra Bessaroth i Sephardic Bikur Holim. Los miembros de estas keilot son muy amistozos i tienen muncho orgolio de sus komunita, kultura, istoria, i liturjia.
Komo miembros de Ladinokomunita, muncho de lo ke savemos de Seattle es achakes de unas kuantas personas ke mos eskriven en vezes: Devin Naar, Izak Azouz, i Molly FitzMorris. Tambien tenemos visto varios artikolos interesantes de Ty Alhadeff. Vide a estas personas muncho durante mi vijita, ma oy vos kero eskrivir un poko sovre un grupo de djente ke tambien konose muy bien la lingua i save muncho de los miembros de muestro foro.
Ya savesh de Los Ladineros, ke es un grupo ke empeso anyos atras pormor de pratikar, avlar, i meldar el djudeo-espanyol. El hazan Izak Azouz es el direktor i maestro del grupo. Kada semana avia/ay alderedor de kinze miembros, la mijorita ke se engrandesio kon esta lingua dekadas atras ma no tiene menester de uzarla komo en pasadas. Kale entender ke, para munchos de los miembros, esta klasa es la unika oportunita de uzar la lingua, ansi ayuda a prezervarla. Kada semana los miembros meldan mesajes de Ladinokomunita i estonses los traduizen al inglez. Meldimos munchos mesajes de Yehuda Hatsvi, Eliezer Kapuya, Rachel Bortnick, i Simon Geron. No saviash, ma sosh famozos entre los Ladineros!
Los Ladineros kon Bryan Kirschen
A mi me plazia muy muncho kuando los miembros deshavan de meldar i empesavan a avlar de lo ke pensavan de estas istorias o demandavan sovre los biervos. Kon turkinos i rodeslis en la mizma klasa, siempre avia diskusiones de diferensas leksikas (por enshemplo: ken dize aguera i ken dize agora). Munchos me kombidaron a sus kazas para komer i/o avlar en la lingua i sovre la rika istoria de sus komunita. Algunos me tomaron en sus arabas/otos para amostrarme sitios importantes de sus chikez, espesialmente en la area sentrala. A mi me dio muncho plazer sintir todas las istorias de la eskola ande munchos ivan: el lise de Garfield. Keshke pudiera estar mas kon este grupo!
Puede ser ke vos estash demandando de ke no saven mas de este grupo o kenes son sus miembros. Malgrado ke ay munchos miembros de este grupo, ay pokos ke son miembros de Ladinokomunita. Supongo ke es porke ya resiven los haberes del foro kada semana i semana durante sus enkontro. Tambien ay algunos ke no uzan el komputer del todo. Espero ke Los Ladineros ke si son miembros de Ladinokomuita mos eskrivan mas i mos konten de todo lo ermozo ke azen ande eyos.
Puede ser ke un dia el grupo va meldar i este mesaje; ken save? Ma, si es el kavzo, vos kero rengrasiar a kada uno i uno, por averme permetido konoservos, i estar, partisipar, avlar, i reir kon vozotros. Al vermos.
Bryan
Fuente: Ladinokomunita
