eSefarad Noticias del Mundo Sefaradi
MERKADA I NISSIM
de Miriam Sherman
En mi chikez demandí a mi mamá ke me kontara alguna kozika sovre muestra famiya. Ansí, esta istoria me vino de mi mamá, ke la eskuchó de su mamá, mi bizavuela. El nombre de eya era Fortuna i mi bizavuelo se yamava Avram. Siempre me paresió muy interesante ke los dos eskaparon algo terrivle en sus chikez i por esto les trokaron los nombres.
En su chikez, Fortuna estuvo muy hazina i kaji murió. Ansina, sus djenitores la “vendieron” i le trokaron el nombre a Merkada.
No vash a kreer, ma Avram kuando era un ijiko, ayudó a una mujer ke no podía salir de su kaza en un fuego. En aziendo esto, él también se kemó muy muncho – su kara kedó markada – i achakes de esto también trokaron su nombre a Nissim.
Nissim i Merkada se kazaron i tuvieron tres ijas i dos ijos. Nissim, era un ombre muy bueno ke le plazía muy muncho estar en su kaza kon su famiya i mantenerlos bueno. Malorozamente, su lavoro era vender vidros i espejos ke yevava de la Turkía a la Arjentina i kalía ke pasara muncho tiempo viajando. Ansina, él siempre traía a la kaza muncha komida para guadrar komo arina, mansanas, arroz, patatas, avas, ets. porke kería ke su famiya siempre tuviera buena komida kuando él no estava.
La famiya morava en una kaza grande ande Merkada lavorava muy muncho. Asegún disho, kada día de la semana era para un lavoro. Por eshemplo, los lunes avía de azer la kolada, ke era muy pezgado. Kalía meter las vestimentas a buyir en oyas i después eskurrirlas, enkolgarlas i plancharlas. Después de todo akeyo, ya era noche i era menester dar a senar, yenar agua i akomodar las kamas para echarse.
I ansí, kada día azía otros lavoros. Ma el djueves, la kaza tenía de estar más briyante ke el sol. El viernes pasava todo el día gizando para Shabat i las komidas para la semana, porke no avía tiempo para gizar kada día. Por esto, los otros días komían kozikas komo peshkado salado, kezo, azeitunas i kozas ansí.
Si alguna tadre avía un poko de tiempo, se metía a aprontar vedruras, arremendar kalsas o azer otros menesteres. Estas kozikas podía azer echando lashón kon las vezinas i ansí paresía más kolay.
Seguro ke kuando Nissim viajava, Merkada tenía de azer todo solika kon la kaza i los ijos. Komo dishe antes, avía muncho lavoro, ma a lo manko, los ijos se ivan a la eskola kada día por unas oras.
Un día, los ijos tornaron de la eskola muy kontentes en diziendo:
– No ay más eskola, no ay más klasas!”
– De ké no?, disho Merkada.
– Porke ay gerra!. respondieron los ijos.
Agora mozotros konosemos a esta gerra komo la Primera Gerra Mundiala, ama en akel tiempo, Merkada no supo muy bueno lo ke estava pasando. Komo eya era muy buena i kería a sus vezinas, pensó ke podía ayudarlas i les dió komida a todas de las rezervas ke Nissim le deshó. Dunke la komida se akavó muy presto i la gerra … no.
Al pasar el tiempo, sólo podían komer el pan ke el governo les dava ke era terrivle: asegún dezían, komo piedra i arena. I para esto, kalía estar en kola desde la madrugada para poder arresivir un poko. El enkargado de dar el pan era un pariente de Nissim. Un sovrino riko ke no avía ido a la gerra i por sus parás le dieron este posto. Lo más triste era ke este sovrino siempre mandava a Merkada atrás de todos, diziendo: “no kero ke otros pensen ke te do preferensia por ser de mi famiya”.
La povre de Merkada tuvo menester de vender poko por poko todo lo ke avía en su kaza i mandar a las ijas a lavorar en la kaza de la “tía rika”. Akéya las tratava muy mal i sólo les dava káshkaras o sovras de su komida. Malorozamente, las kozas se izieron más negras kuando la ija grande se hazineó izo hazino de mala hazinura i Merkada desidió de no mandar a sus ijas más ayí.
Entremientes, Nissim no estava bueno en la Arjentina. Estava dezesperado i kería aboltar a su famiya. No savía si estavan bivos i sanos… Se hazineó izo hazino de tanto merrekiarse i lo metieron al ospital. Kuando a la fin se eskapó la gerra, Nissim tuvo la shans de aboltar i kería traer un regaliko espesial para alegrar a su famiya. Kuálo merkó? ¡Un ermozo papagayo vedre al ke ambezó muestra lingua! Toda la famiya i todos los vezinos estavan enkantados de ver akeya “gaína vedre ke avla komo la djente”.
A la fin, bendicho el Dió sien mil vezes, estavan todos endjuntos otra vez. Ma kalía lavorar muy muncho para ke todo tornara a ser komo antes. ¡No era kolay! Agora Nissim ya no kería viajar más i deshar solika a su famiya. Endemás, salió otra belá: Las ijas ya estavan grandes i avía de kazarlas, i parás no avía!
Ma esta es otra istoria para otro día …
____________
Esta es una de las 3 konsejas GANADORAS del KONKURSO DE KOMPOZISION 2024 en la kategoria PRINSIPIANTES.
