eSefarad Noticias del Mundo Sefaradi
Karos todos
Al anyo 1932 empesaron a venir djudios de Salonik, para enreziar el porto de Haifa. Poko a poko se enstalaron en la kaledja Hashomer i formaron komunidad unada, kon kehilla, ayudo uno al otro, i amista.
La kaleja era el sentro, los enkontros, los djugos,el bazar, todo… Aviya estrechura i mankeza, ama estavamos orozos.
Haifa esta fraguada en la muntania Carmel, i muchas kalejas son kon suvidas, abashadas, eskaleras, ama, la kaledja muestra era derecha i pudiyamos azer todas las aktivedades afuera. Salio ke aviya siempre dubara golores i bruido. Pasavan los ke veniyan a ezmolar los kuchiyos, el enkalador, el estanyador (de los tendjeres) el mendelero, kon la gitara i el martiyo de tavla, para alimpiar la algolon de los mendeles. La arraba kon el yahum de labane, gritando ke ya vino… el vendedor de peshe ke kantava, ya vin el peshe, peshe bivo… i el ke vendiya patata, gritava, en arabo beshiling ya batata, kiere dizir, sinko groshes un kilo de patatas. I pasava el vendedor de tramuzes, i fava kon kamun.
I bever se kiere, vendiyan sumo de kanyas de asukar, o tamar Hindi, ke es un sumo de fruta importada del este. Karpuses, sabres i kastanias toradas enriva de karvon.
La mas dubara era el diya de djuveves, veniyan komo diez arabas (carriage) kon kavayos o aznos, de los kazales del deredor, kon zarzava i frutas freskas ke vienen de arankar. Empesavan las mujeres a eskojer kualo merkar para la sena de shabat, no solo merkar, era yamar a las vizinas: Merkada, abasha, ay fava freska; Binuta ay pinzela; Sultana, ven presto, ay kalavasikas chikas para reinado; Dudun, abasha, mira ke fijoleta, i vedre i amariya… mira Regina, el segundo tiene espinaka.
Las mujeres kon los sestos yenos, no achetavan a los presios, i aviya negosiyasiones sovre el presio, halis bazar oriental. Despues del merkar, era el mundar… se asentavan grupos kon tavajas en los piezes, i inchiyan los tenjeres kon kozas limpias, mundadas, i prontas para el gizado. A mi me yamavan, Nisimiko, hayde toma la kuva de estierko, ya esta yena de kashkas, yevala abasho i trayla vaziya. No aviya frigider, i kada diya se komiya gizado fresko.
El moabet entre las mujeres, era komo un jornal bivo.
– Komo esta Liachi? le abasho la kaentura ?
– Esterina, ke pasa kon tu ija mazal,? esta kon el amigo / se van a kazar?
– Aman Roza, ya me kansi del primos, kada ves se tapa el ojo, i devo de korrer ande el tinikiliero ke me de aguja para avrir el ojo, ya me kansi de pompear. (el primos teniya pompa, para azer presion del petrol )
– Komo esta izak? va abashar alhad al porto?
Demandas i repuestas… i mundar…
Mas tadre, veniya un ombre kon gatika maymona, ke baylava, en sintiendo el pandero, i el ombre kantando. Los ijos mas grandes djugavan chilikas, kon gritos i dubara de entusiasmo. los mansevos aziyan teatro de la kaleja, kon umor i alegriya. el lechero kon los yahumes, el azno kon los panes freskos del forno. Ahdut en la fin de la kaledja. El vendedor de petrol kon golor pezgada i vestimienta manchada, entiniendo el yagum de misura. A mi komo kriyatura me plazio ver komo los kazalinos pezavan kon la balansa de dos chinis enkolgados, en un chini una piedra markada, un kilo , medio kilo…
Kuando mos ivamos a las aktivedades del grupo Tsofim (skaot boys) ke era en la muntania, pasavamos a pie de otras kalejas, i diziamos: ke es esta kaledja? se murieron todos? no ay djente afuera, i kayades. esto era al empesijo del paes, mil i una kultura i komportos, achakes ke vinieron de paeses totalmente diferentes.
Oy ya esta todo trokado. Todos se enderecharon kon la kultura i komporto israeliano, la kaleja es para los otomobiles i la djente en kaza. Mos akodramos de la chikez kon dulzura i rekuerdo a los bruidos i las golores, la amista, todo avierto i klaro sin sekretos, i kon saporto de uno al otro.
Un fuerte abraso a todos.
Nissim Ashkenazi
Kiryat Motskin
Israel.
Fuente: Nissim Ashkenazi/Ladinokomunita
