eSefarad Noticias del Mundo Sefaradi
La sezon de arokojer las azitunas ampesara en serka. Los aparejos, kada dia ke pasa, pujan para pueder estar pronto visto ke el tiempo de la rekolta es bastante kurto. En muestro kavzo mi ijo Moni se okupa de la organizsyon del personel para la rekolta. Este anyo sin los arabos ke no pueden entrar en el payis i sin la posibilita de topar ovreros taylandezos pensa ke devemos demandar ayudo de muestros keridos serkanos a darmos una mano para arekojer las azitunas. Ademas este anyo vamos a ser ekipados por dos muevos vibratores motorizados ke servirán a sakudir los arvoles sin muncho esforso, donde las azitunas kayendo en los files devran ser arekojidas en un muy kurto tiempo, lo ke nesesita manos, koza ke lo espero no mos mankara. Para ke la azeyte virjin no se vinagreye(asid) las azitunas ke se rekoltan devran ser esprimidas a lo mas 3 oras mas tadre, otra dilema ke devemos areyevar. Penso ke en el medyo de Novembre ampesaremos la rekolta.
Vinyendo a la situasyon de la mueva rekolta en Israel, los espesialistos no la ven kon un buen ojo. Antes de todo la produksyon de azeyte de oliva no abastese ke al 50% de la demanda, dunke la otra mita la importamos de la Evropa a saver en mayoriya de la Espanya, Italya i Gresia. Estos payizes en despartes ke kontrolan una grande parte de la konsomasyon lokala, azen grande konkerensya a los produktores israelianos. Komo savemos munchos de eyos para poeder egzistir en el merkado, a las vezes merkan azeyte rafinada segondarya de los evropeos i la mesklan kon sus produktos virjin para amengueser el koste. El puevlo no rendiendose kuento de la kualitad i mirando de merkar mas barato, konsumen en siertos kavzos una azeyte ke no sierve ke para mechas de kandelas i ke danya a la salud.
Para darvos una idea de la produksyon de azeyte de oliva en Israel, en mirando las istatistikas vemos ke en el anyo 2010 la produksyon era de 10 mil tonas. Esta kantidad dublo verso 2019 i en poko tiempo se pensa ke arivera a depasar las 25 mil tonas en los anyos vinideros. Israel es ovligado de importar azeyte de oliva i malgrado ke los presyos en el mundo pujan kada diya, la demanda interna es muy grande. El governo para mirar de establisir presyos no tanto altos amengo las taksas a la impotasyon koza ke da preferensya a la azeyte ke viene del etranjero donde el koste es finansado en partida por el payis eksportador. Visto ke el produktor israeliano no resive semejante ayudo de la parte del governo el se topa enfrente de una konkurensya no justa. Es ansi ke siertos de los mochaves kortaron sus arvoles despues de las peryitas ke tuvieron.
Este no es mi kavzo visto ke parami la azeyte virjin ke prodyuzamos serve solo a mi famiya i mes keridos, tiene el label VOO ke sinyifika 100 % azeyte pura de oliva. Siendo un chiko produktor ke lavora kon amatorizmo, no nesesito ayudo de dingunos, ma si las otoridades kompetentes se okupan seryozamente a dezvelopar esta industria agrikola i se toma dechizyones urjentes de ayudo material i teknik, en poko tiempo grasias a la kapachida i a la fakulta inovativa ke tenemos, pensó ke en los 7 anyos vinideros Israel puedera abasteserse en totalidad en azeyte de oliva de kalitad i mizmo azer konkerensya en el merkado lokal a la Espanya ke es el payis produktor el mas grande del mundo. Muestros enjenyeros agrikolos kon sus kapachidades inovativas kreyeran el ekipamento neseseryo para arekojer las azitunas sin empleyar munchos brazos umanos, koza ke mos eskabuyera de trayer ovreros palestinianos.
Oganyo la gerra de una parte, la sekura del enverano pasado de la otra, kavzo ke la produksyon fue basha i no se aspera un mijor resultado de akel del anyo pasado. La mankura kavzo una pujita de 39 % en el presyo del litro. A esto si se ajunta ke en el mundo uvo una pujita en los presyos de 7.6% de todas las azeytes a kavzo de la gerra en Ukranya el kual es el mas grande produktror de azeyte kanola, devemos asperarmos a ke los presyos en el merkado israeliano pujaran mas.
Un orto problem oganyo, es la proteksyon de los ovreros o de los volontaryos ke lavoraran en el norte de la Galile onde se topan milyones de arvoles de azitunas. El governo i las otoridades lokalas devran de mirar a protejar esta djente en dándoles la posibilita de metersen al abrigo en kavzo de atakos de drones o de misiles. Se nesesita de krear kon primura refujyos, si no, no se puedra lavorar, koza ke agravara mas la mankasa de azeyte de oliva.
Selim Salti
Fuente: BÜLTEN de los turkanos de Israel – turkisrael.org.il
