eSefarad Noticias del Mundo Sefaradi
Alkanses i perspektivas para los sigientes mezes
En Israel, ansi ke en otros paizes tambien, se estan kontinuando los esforsos para asigurar ke la Autoridad Nasionala del Ladino kontinue a funksionar komo una institusion independiente, sigun lo aze desde su fondasion en 1997, i no sea aneksada, en konformidad kon un proyekto de ley ke esta siendo aprontado, a una Autoridad Jenerala para el Patrimonio de las Komunidades Etnikas en Israel.
El primer paso fue echo pokos mezes atras, en un enkontro kon la Ministra de Kultura i Sport, la Sra Limor Livnat, de una delegasion formada por el V Prezidente de Israel i Prezidente de la ANL, el Sr Yitzhak Navon, el Viseprezidente, Sr Moshe Shaul, i el konsejero juridiko de la ANL, el avokato Ofir Katz. En este enkontro el Sr Navon i el Sr Shaul izieron sovresalir la importansia del ladino i de su kultura no solo para Israel sino ke para todo el puevlo djudio, el mundo de avla espanyola i la kultura universala tambien. Fueron apuntados los muy importantes logros alkansados en los serka de 15 anyos de aktividad de la ANL, i los peligros ke la amenazan si eya es transformada de institusion independiente, kon su propio sudjeto i la posibilidad de desidir kualos son sus proyektos mas importantes, en uno solo de los numerozos departamentos de la mueva Autoridad para el Patrimonio de las Komunidades Etnikas de Israel.
Paralelamente a esto, i sin asperar la repuesta de la Ministra de Kultura i Sport, la ANL empeso una kampanya para asigurarse el apoyo i ayudo del publiko, en Israel i en el estranjero tambien.
Fueron aprontadas i ya fueron firmadas por miles de personas, 3 petisiones – en ladino, ebreo i inglez –yamando a la ministra Livnat ansi ke a los miembros de la Keneset ke deveran votar en favor o kontra de la mueva ley, si es prezentada, a no aneksar la ANL a la mueva Autoridad, sino ke permeterle de kontinuar en su aktividad, komo asta agora. Fue adjustada una yamada a todos los amantes de la kultura djudep-espanyola, a eskrivir personalmente a la ministra, demandandole de no azer ningun paso ke meteria en peligro el futuro de la ANL.
Esperamos ke estos pasos ya bastaran para konvenser a la Ministra de Kultura i Sport i a sus konsejeros, del menester de topar una solusion ke permeta de reglar este problema sin yegar a un konfrontasion; afin ke, mizmo si desidan de ir adelantre kon sus proyekto, de krear una Autoridad Jenerala para el Patrimonio de las Komnunidades Etnikas de Israel, la ANL no sea aneksada a esta autoridad sino ke pueda kontinuar en su aktividad komo asta agora i anchearla mizmo ainda mas.
Si estos esforsos no reushen deveremos intensifikar muestra lucha muncho mas, mobilizando para esto el apoyo i el ayudo, moral i material, de todos los amantes del ladino i su kultura, no solamente de Israel sino ke de todos los lugares onde ay djente ke apresia esta kultura i kere ke podamos transmeterla a muestros ijos tambien.
Moshe Shaul
Vise prezidente, Autoridad Nasionala del Ladino
Fuente: Kaminado i Avlando Nº 1 – julio a set. 2012 – Revista de la Asociasión Aki Estamos «Amigos de La Lettre Sepharad»
