eSefarad Noticias del Mundo Sefaradi
Zelda Ovadia, espesialista en lengua djudeo-espanyola, mos avlara en esta seksion sovre “LOS KALES D’ESTAMBOL”, aki mos va a komentar sovre todas las sinagogas de los distintos kuartieres de esta antika sivdad, las desparesidas i las aktuales.
LOS PRIMEROS KALES
La primera i mas antika sinagoga d’Estambol, a la vista ke fue fraguada en el anyo 318 de muestra era o sea a los prinsipios del kuatren siglo, en Halkoprateia, yamado mas despues Bakircilar, kuartier ke se topa en la parte asiatika de la sivdad.
En el anyo 450, sovre la demanda i la obstinasion de la ermana del rey bizantino Theodosius II, esta sinagoga fue transformada en iglesia.
En las pajinas 40-41 de un livriko de 149 ojas, eskrito en arabo, ke se topa en el trezoro del Palasio Topkapi, es mensionado ke a los deredores de Tahtakale, serka del merkado ande vendian ustensiles de kovre (Bakiricilar) avia una sinagoga i ke en el sinken siglo fue transformada en iglezia, lo ke enrezia la existensia de una semejante sinagoga.
Todos ya savemos ke los djudios ekspulsados de Espanya, en 1492, se avian aresentado en el Imperio Otomano i en los paizes ke azian parte de este imperio en akeya epoka komo Gresia, Bulgaria, Yugoslavia, Erets Israel i mas, ma en sus gran mayoria estos djudios se aresentaron en la kapitala el imperio, Estambol.
Yegando a tierras ajenas, estos djudios kijieron kontinuar a bivir serka los unos de los otros afin de poder mantener sus lengua, uzos i kustumbres, sin mesklarsen demazia kon la povlasion lokala.
Dos de los kuartieres ke kaji eran povlados solamente por djudios son los foburgos de Balat i Haskoy, a la oriya del Haliç, yamado el Kuerno de Oro, ke es tambien uno de los lugares mas ermozos i pitoreskos d’Estambol.
Naturalmente ke ande ay djudios ay tambien keilot. Es en el foburgo de Balat ke fueron fraguados los dos primeros kales de la sivdad, Ahrida/Ohrida i Yanbol ke son aktivos asta oy dia I klaro ke no en sus estado original ke data de seines de anyos.
El kal de Ahrida fue fraguado por los djudios de la sivdad de Ohrid, en Makedonia. Este es el mas ermozo de entre los dos kales. La teva es konstruida en forma de prua, komo simbolo de las naves ke trusheron a los 
djudios ekspulsados de Espanya al Imperio Otomano, ma mirandola de profil mos aze tambien akodrar la Arka de Noe.
Kada uno puede deskojer la version ke le parese la mas adekuada. A la vista, bazandomos sovre pretensiones, en el siglo 17, el falso mashiah Sabetay Sevi, avia dado un sermon en esta sinagoga.
Un otro evenimiento ke tuvo lugar en esta sinagoga fue la selebrasion de la viktoria de la armada turka en la gerra entre el Imperio Otomano i Rusia. En el 18 de Mayo 1877, el Sadrazam (posto ekivalente al de primer ministro) Ibrahim Ethem Pasha i otros miembros del governo otomano, avian partisipado a una orasion espesialaa ke tuvo lugar en esta sinagoga kon okazion de esta viktoria.
El kal de Ahrida avia servido tambien de lugar de abrigo a una unidad de kavayeros de la armada turka durante la Primera Garra Mundiala.
La sinagoga fue danyada seriozamente en fuegos en diversas epokas, fue restaurada en 1709 i 1823 ansi ke tuvieron lugar ayi lavoros de reparasion en los anyos 1926 i 1955.
El kal de Ahrida ke tiene una kapasidad de 350 lugares fue testigo a diezenas de bodas i bar mitsvas, i asta oy dia da servisios a los yehidim de la sivdad, prinsipalmente en los dias de shabat i los dias de fiestas.
La sinagoga Ahrida ke fue deklarada, en 1989, por la Asosiasion para la Prezervasion de Trezoros Kulturales de Turkia, komo monument istoriko, en los dias de la semana puede ser vijitada solamente kon permisos espesiales.
La segunda sinagoga de Balat es Yanbol ke fue feraguada por djudios orijinarios de Bulgaria ke se avian aresentado en Estambol. Segun un ferman ke data de 1694 sovresale ke este kal ya existia ainda en la epoka del Imperio Bizantino.
En el kortijo de la sinagoga pueden ser vistos restos del edifisio ke datan de akeya epoka.
Este kal komo munchos otros en akeyos tiempos fue kemado kaji kompletamente i fraguado de muevo verso la fin del siglo 17.
El fue restaurado en 1895. Lavoros de reparasion tuvieron lugar ayi a lo largo de los anyos. De mizmo ke el kal Ahrida, el kal Yanbol tambien fue proklamado komo monumento istoriko.
BS»D
Meldi kon grande gusto el artikolo de la Sinyora Zelda Ovadya.Demando ke me excuse por 2
puntos ke vo aklarar.
El sentro Bak?rc?lar se topa en la parte evropea de la sivdad i non en la parte asiatika .Es serka de la Universita de Beyaz?t.
La Keila de AHR?DA fue enpleyada por abrigo de kavayos en la sigunda gerra mondiala de lo kualo me akodro.Posivle ke enla gerra primera tambyen fue empleyada en mesmo buto,ma en la sigunda so test?guo bivo.
La rengrasyo por su estudyo tan byen prezentado.
Shabat Shalom
Moshe Palacci
Estimado Sr. Palacci,
Antes de todo kero agradeserlo por aver meldado mi artikolo I segundo por sus korreksiones.
En lo ke toka el kuartier de Bakiricilar, tiene yena razon i este fue un yerro «jeografiko|» de mi parte.
Viniendo al kal de Ahrida, ke lo konosko, komo nasida I kresida en Estambol, I desde munchos anyos en Israel.
Yo me bazi prinsipalmente sovre el livro de del Sr. Naim Guleryuz, «Istanbul Sinangolari».
Siendo ke el, save el turko, ayi esta eskrito I lo esto sitando «Ahrida Sinagogu ikinci Dunya Savasinin seferberlik doneminde bir suvari mufrezesini barindirmistir»
Siendo ke avia una unidad de kavalieros, esto de akordo kon el ke avia kavayos, ma ke estavan kon sus kavalieros. Esta unidad fue mobilizada durante la gerra, ma ya lo savemos Turkia no partisipo en eya.
Le dezeo una semanda buena I klara i dias alegres
Kon mis mijores saludos,
Zelda Ovadia
Yerushalayim