eSefarad Noticias del Mundo Sefaradi
Zelda Ovadia, espesialista en lengua djudeo-espanyola, mos avlara en esta seksion sovre “LOS KALES D’ESTAMBOL”, aki mos va a komentar sovre todas las sinagogas de los distintos kuartieres de esta antika sivdad, las desparesidas i las aktuales.
EL KAL ITALIANO
o kon su nombre mas konosido al seno de los djudios d’Estambol,
EL KAL DE LOS FRANKOS
La chika komunidad djudia-italiana d’Estambol, despues de aver pasado de un edifisio al otro durante una larga epoka, en lugares ke eran chikos i no komodos, i para algunos de eyos leshos de sus moradas, fue desidido en fin de kuento, i prinsipalmente, kon la obstinasion de los fideles mas djovenes de esta komunidad de fraguar un kal ke servira a la komunidad djudia-italiana de la sivdad.
En primer lugar fue merkado un terreno en la kaye yamada oy Sair Ziya Pasha Yokusu, en el kuartier de GaIata. Despues de largas proseduras para resivir los permisos de kontruskion adekuados i despues de aver topado los fondos menesterozos, en 1886, se empeso en la konstruksion del famozo Kal de los Frankos.
El edifisio orijinal fue derrokado en 1931 i en su lugar fue konstruido el aktual kal, ke su fasada es en el estilo gotiko.
En dekorasiones en su interior se puede ver la enfluensa del estilo uzado durante el Imperio Otomano. La grande ventana, detras del ehal, esta dekorada kon el vitraj de una roza. Kolonas de marmol kon kapiteles dekorados al estilo korintiano suportan la galleria de las mujeres, la azara. Esta sinagoga, ke es muy diferente de los kales klasikos, vale la pena de ser ijitada.
En desparte de dar los servisios relijiozos a los yehidim de esta komunidad, durante largos anyos el Kal de los Frankos sirvio tambien de sentro kultural ande fueron dados sermones i konferensias, prinsipalmente en las noches de Shabat, en las 12 semanas ke presedavan la fiesta de Pesah.
Figuras de las mas eminentes de la komunidad djudia d’Estambol komo el Gran Rabino David Asseo, el Rav Isak Rofe, Hoca Eliezer Menda, Sr. Moiz Alboher, Haham Eliyau Koen, Dr. Yomtov Garti, Dr. Akshiote, Sr. Isak Misistrano, los avokatos Daniel Behar I Kemal Levent i otros munchos mas, estavan entre los ke tomaron la palavra en estas tadradas. Eyos avlaron prinsipalmente de temas relijiozos i de moralidad. En los dias de Shabat fueron dados ayi konsertos del koro de Maftirim.
El kal Italiano ke fue restorado en 1980 esta ainda avierto a los servisios de la komunidad djudia d’Estambol.
Gracias a Zelda Ovadia por este interesante paseo por el barrio judeo-italiano de Estambul, ilustrandonos de paso sobre los origenes de esta última, asi como sobre sus lugares de culto, y las personalidades que en ella destacaron …