eSefarad Noticias del Mundo Sefaradi
Laurence Salzmann i su mujer Ayse Gursan Salzmann, izieron un estudio de los archivos 25 anyos antes i fue bien admirado. Se fueron a todas partes de la Turkia para topar trazas de las komunidades Judias. El tomó fotos i eya komo antropologista i archeologista tomo notas i asi fue ke publikaron unos kuantos libros. Una tomba, una sinagoga ,una eskuela i un immueblo kon letras de Hebreo deshaban sus trazas.Tuvieron la okasion de enkontrarlos de nuevo para tener una entrevista.
Fuitesh invitados por el Rabinato en 1984 para ver ande biven los Judios i ande se topan las sinagogas.Este projekto resivio apoyo tambien por BEIT HATEFUTSOT komo un museo.Porke esto tomo tantos anyos?
Respuesta: Al empesijo este projekto tenia ke durar 2 o 3 mezes. La idea era de mostrar las komunidades ke bivian i bivieron un tiempo afuera de Istanbul.Istanbul no era inkluido.Topar lo ke esperavamos tomo mas tiempo. Por esta razon pasimos 4 mezes para vijitar el pais. Entretiempo lavorimos sovre un otro livro.Yo pensi ke era importante inkluir a la Komunidad de Istanbul.Vide la nesesidad de azer un filmo tambien.Se puede entender ke todas estas detalias toman tiempo.
Mosotros desimos ke la Komunidad Judia en Turkia tiene su partikularidad. Ke pensas tu sovre muestra historia de 500 anyos i de muestros kostumbres?
Respuesta: Yo digo ke es mas de ser uniko. La Komunidad reusho a kedarse en vida tanto tiempo,komo un grupo de minoridad. Se avanso mas ke los otros grupos de minoridad. Es tan uniko ke pudo guadrar sus kostumbres i su lingua asta muestro tiempo.
Tu primer livro era»Anyos Munchos i Buenos» Salio en 1991 por la primera vez i en 2003 salio en Turko.Ahora sale tu segundo livro»Travels in search of Turkey’s Jews» [Viajes en la buskeda de los Judios de la Turkia] Ke differensia ay entre los 2 livros?
Ay differensia grande. En el primero se avla de la Komunidad Judia de Istanbul. En el Segundo se avla de las Komunidades afuera de Istanbul.
Este segundo livro ke konta el pasado de los Judios kon sus kostumbres es ke sera mostrado en en paises i universidades differentes? En museos differentes?
Respuesta: Por seguro. Los emprimeros tienen kontaktos en Europa i la Amerika. Pensan meterlo en DVD, i krear un program de leksiones. Es una okasion para mostrar komo biven los Judios de la Turkia.
Desde 1960 lavoras komo uno ke toma fotos i aze filmos.Lo azes endjuntos kon tu mujer antropologista i arkaelogista. Ay otros projektos?
Respuesta: Ya tuvimos komo «The last Jews of Radouti» Uvo un otro sovre los Giatanos de la Transilvania kon el titulo «Mioritza». Despues avia «Gordon» en forma de filmo i fotografia. Se trata de la tomba del Rey Midas en Anatolia.
El lavoro kon tu mujer ke signifikasion tiene?
Respuesta: Puedemos estar enjuntos i kompartir kozas ke mos interesan. Kon el apoyo ke mos damos no tenemos menester de una tresera persona. Es un avantaje grande. Yo soy bueno en las fotos i eya es buena en las eskriturias.
El segundo livro kon su DVD me da la impresion de ser mas nostaljiko. Pasaron 30 anyos desde ke salio i la manera de bivir se troko.Vosotros topash una differensia?
Respuesta: No se puede nyegar ke ay kambios. Pero estos kambios no tokan a las raizes.Tengo ke dezir ke kuando parti de la Turkia en 1989, mi lien se korto kon este pais. Las differensias las vide en komunikando kon la Komunidad Judia. Del punto de vista politiko oy es muy differente de lo ke era en los anyos 1980. Si se izo peor o mijor, desho esto a la Komunidad para desidirlo. En los atakos de NEVE SHALOM los Turkos ya se mostraron serkanos. Si se toman en kuento las relasiones entre Israel i la Turkia, esto se torno malo i la amistad esta mas en el pasado.
En el filmo se mostra»BUYUK ADA» i komo la Komunidad se va ayi en verano. Pasatesh 2 veranos ayi.Ke rekuerdo vos keda?
Respuesta: Pasar el tiempo ayi, para eskrivir ya era una experiensia nueva. Era un tiempo alegre i de paz. Guardimos suvenires buenos. Por exemplo el «Casino Horozlu» ande las mujeres jugaban el KANASTA i kantavan kantikas de Judeo Espanyol del tiempo de sus nonas. Tuvimos konversasiones kon «KAREN GERSON i MUSA ALBUKREK» El jugar tenis, nadar i azer paseos eran lo bueno. Aviamos alkilado abasho del Monasterio Grego, una kasa por 2 veranos.
Del Tour ke izitesh,anyos antes,ke fue lo mas interesante?
Respuesta: No fue solo un insidente. Ay sienes. Teniamos ke azer investigasiones por eskrivir un livro i enkontrimos djente. En BERGAMA era «BULISA». En Tire era «Madam ESTER». En Izmir era la famillia «CIKUREL’. En Adana era la famillia de «KORODO», etc.Estos momentos no se olvidan, i se topan en el livro.
En el Primer Livro yegando a el fin dizes ke kada sivdadano Turko entre los Judios konta sovre la politika i la ekonomia del pais.Los Judios representan un puente kon los kontaktos ke tienen en el Mundo Oksidentalo. En el Segundo Livro no se avla muncho de esto.Ke futuro se puede esperar para los Judios?
Respuesta: En los anyos 1980 ,se veia bueno. Teniamos esperanza ke la Turkia entraria en el EU. Jak Kamhi era aktivo. Oy no esto seguro ke la Turkia kere entrar ayi. Sovre todo en mirando a la Gresia, Espanya i Portugal. La Turkia tuvo un kresimiento en los ultimos tiempos. El puente entre el Oriente i Oksidente se aze mas i mas difisil. El futuro de la Komunidad Judia kaye en manos de los mansevos. Eyos van a ver en ke lugar les gustaria bivir. Esto tenemos ke demandarles a eyos. Ay ke ver la poblasion Judia para tener una idea.
Trezladado por Shimon Geron para Ladinokomunita
Este artikulo kon los autores del muevo livro «Travels in Search of Turkey’s Jews» (Viajes en bushkeda de los Djudios de Turkia – leer artikolo) viene del Jurnal Shalom del 23 Feb. 2011 i fue presentado por Aylin Yengin.
